Responsive Ad Slot

UN International Day for World's Indigenous Peoples ursun taka inser

Thursday, August 9, 2018

/ Posted by Simon L Infimate
Guwahati/CCPur, Aug. 9, 2018: “Kumkhat sunga hi hun pawimaw tak eiin ser hun a hin, United Nations Declaration on the Rights of Indigenous People (UNDRIP) hi a puitling thei ngeina ei hmakhuo ngaituona kawnga ei thuneina le ei ram le tui hai chunga ei thuneina hai hi tuel khawma an hriet le an inza theina dinga hmalakna hai hi ei theina po po a thara insuo nawk zuol a ngai” - UN Secretary-General António Guterres.


Tukum INTERNATIONAL DAY OF THE WORLD’S INDIGENOUS PEOPLES, 9th August 2018 inzana hunser, Indigenous Forum, Assam, North East Indigenous Peoples’ Forum le World Barua Organisation hai huoihawtna hnuoia vawisun Pragjyoti ITA Cultural Complex, Machkhowa, Guwahati, Assam, India ah North East India po po huopa ursun taka nei a ni a. Hi hun a hin mi lien le inlar tak tak thuhril dinga ko an ni a, hienghai lai hin ei mi le sa le Hmar Inpui Jt. Secy (GHQ) Dr. Immanuel Zarzosang Varte khawm thu hril dinga fiel a nina angin a thang ve. Hi program a hin Unau Meitei tieng aiaw Dr. Nongthombam Jiten ti lo chu Manipur tlangmi a chu Dr. Immanuel Zarzosang Varte chau hi hiengang thuhrilna hun pekin a um. North East hmun dang dang hieng Tripura, N.C.Hills, BTC, Meghalaya, Tripura, Arunachal Pradesh, Mizoram, Manipur, Nagaland, Sikkim bakah India sunga ram dang dang hieng Uttarakhand, Chattisgarh, Maharashtra, Kerela, Orissa, etc hai a inthawkin mipui le hnam thuoitu an fe khawma, UN a inthawka India Representative khawm a thangsa bawk.

Dr. Immanuel Zarzosang Varte hi minute 20 chuong hun pek a ni a, amiruokchu a thuhril sung hi minute 10 khawm tling lovin a zo a, thuhriltu dang dang hai nekin kutben le program hnunga lawmna chibai a dawng nasa lem a nih. A thuhrilna a chun “Indigenous le Tribal thuoitu hai in enfel a tul thu hrilin sum le hun tam tak sengin ram le hiengzat ei mipuihai laia thu ei hril tah a, amiruokchu ei hun, tha le zung le pawisa ei seng ang hu hin ra ei hmu nawh. Ienglei am ning a ta? ti vawisuna hung khawm hai hin mani chit ah insut ei tiu. Tribal annawleh indigenous ei in ti tawla chu ei changzie, ei tawngdan, ei ngaituona le ei khawsak dana hai pi le pu hai mizie iengkhawm putlo hnam thuoitu ei tam taluo tah. Hi lei hin ei mipui haiin ei tawng an hrietthiem ta nawh. Ei hnam tawng ei hmang khawmin ei chipui haiin ei hril an hriet thei ta nawh.

Vawisuna hung khawm mipui hi zat hai hi tribal inti si in iengza’m ei pi le pu hai anga ei hnam dan le nunphung ngaina le ngaipawimaw ei um ding? Ngaituo tham a nih. Tukum International Day for World’s Indigenous Peoples a thupui chu ‘Indigenous peoples’ migration and movement’ a nih. Ei taksa a ni naw tawp khawmin ei lungrila le thlarau ei mipui hai lai; ei ram le tui hai lai insawnin (migrate) hnam thuoitu hai hi ei mipuihai le ei ram le tui hai le inzawmna intan ta hi inzawm nawk ei tiu. Hi hi ei thawnaw chun iengangin khek indur inla khawm tangkai tak tak naw nih.

Mi thenkhatin Tribal hai hi ‘History khawm nei lo, ziek khawm nei lo’ an mi tih. Anachu kei chun India a um thei nasan chu tribal hai lei a nih. India’s History hi tribal haia inthawka in tan a nih. Hmatieng peia India lamtluong khawm tribal haia innghat a nih. Tribal hai hi India’s history le India’s future ei nih. Chu chu theinghil nawng ei tiu. Tribal leaders hai po po ei mipui thuoi hai leh in zawmna siemtha nawk ei tiu. Ni danga ei i pen neka mel khat bek pen sa tum ei tiu. Vawisun thuoitu le zinga thuoitu hung ni ding hai hin iengtiklai khawm nisien, khawlai khawm nisien ei hung suokna le ei nina theinghil ngai nawng ei tiu. In renga chungah ka lawm ie. Thank you all!” tiin a hril a nih.
Don't Miss
© all rights reserved
made with by Simon L Infimate