Responsive Ad Slot

HACS in ISTv Hmar program a dingin Rs 60,000/- an pek

Wednesday, August 22, 2018

/ Posted by Simon L Infimate
CCPur, August 22, 2018, Virthli (ONP): Hmar Artists' Association, Imphal Jt Hqtrs enkaina hnuoia ISTv Hmar Program chu Pathien zarin hun iemanichen anthawk khan a la fe zinga. Hi program le inzawm hin mamaw le pawimaw dang dang tam tak hieng a hmuna sie ding Computer ,camera, external hard disks etc hai an neia, hnam sunga ṭhahnemngai haia inthawkin ṭhangpuina sum le pai hai bakah hmangruo hai khawm a tlawm azawng anlo dawng taa, hienghai lei hin ISTv Hmar Program enkaitu hai chu an lawm hle a nih.

ISTv channel hi pe suok thei zing hai sien khawm, channel peksuokna ding Computer ṭha tawk tak el an mamaw a, chu le inzawm chun Hmar Artists' Association (HAA) General Headquarters kuoma an harsatna an lo intlun angin hotuhai chun hma lain ei hnam sunga ei organisation pawimaw ve em em Hmar Art and Culture Society (HACS) chu inbiekna lo neipuiin Hmar Art and Culture chun an harsatna le an mamaw em em chu lo ngaipawimaw pekin thafantakin an harsatna chu a tlawmazawng ti el lovin vawikhat thua lak nghal theina tawk dingin sumfai in sîng ruk (Rs 60,000) an inhlan a nih.


Hi thilpek inhlanna hunser le inpawltlangna hun hi Hmar Art and Culture Finance Secretary Pu Lienzathang a In ah vawisun khan nei a nih. Hi huna hin Hmar Art and Culture Society a inthawkin Dr. Rosiem Pudaite, Rev Ruolhlei Pakhuongte, Pu Zosanghlei Joute, Pu Zaneisang le Pu Lienzathang hai an thanga, Hmar Artists' Association tienga inthawkin President Pu JB Songate, ISTv Coordinators Tv. Robert, Nk. Rose Pulamte le Adviser Upa Darliensung hai an thang.

Hmar Artists' Association le ISTv Coordinators hai chun Hmar Art and Culture chungah lawmthu an hril a, Pathienin an hmalakna hai le hnam ta dinga an rawngbawlna kawng ah malsawmin an hma ṭhuoi pei din ditsakna insangtak an inhlan a nih.
Don't Miss
© all rights reserved
made with by Simon L Infimate