Responsive Ad Slot

HPC (D) Mizoram Region Thiek; Manipur Region thuoitu thar ding ruot

Wednesday, July 25, 2018

/ Published by Simon L Infimate
CCPur,July 24, 2018, Virthlii (ONP): Hmar Peoples' Convention - Democratic (HPC-D) a Defence Secretary Sanga Hmar chun thusuok siemin, HPC(D) Mizoram chu thiek a ni thu le Manipur Region a mawphurna cheltu ding hai ruot ani thu a hnuoia thusuok a siem a chun a hril.

-----------

HMAR PEOPLE'S CONVENTION (DEMOCRATIC)
Serve the Nation
GENERAL HEADQUARTER : SINLUNG

THUSUOK July 24, 2018

A hmasa'n hieng chenchen mi thuoitu ei pa Pathien kuomah ropuina le chawimawina chu um vong lem raw seh.

Hmar People's Convention (Democratic) le Mizoram sorkar chun April 2, 2018 khan Memorandum of Settlement (MoS) a ziek a. Hi MoS dungzui hin April 13, 2018 khan HPC(D) Cadres le Council Member 114 hai chu In inlawiin Mizoram Home Minister kutah hnam sipai ralthuomhai inhlan/intung a ni bawk. A thutiem ang ngeiin Mizoram state Assembly chun June 27, 2018 khan Sinlung Hills Council Bill a passed a, Governor remtina (assent) a hmu le inruolin 'Act' a ni nghal bok. MoS dungzui bawkin Mizoram sorkar chun thla 6 sung aw ding SHC Interim Council member ding chu HPC(D) le inrawnin a ruot a. CEM, Chairman, Dy. Chairman, Executive Member le Member dinga ruothai chun dan ang takin July 13, 2018 than thukham (oath) an lak ta bawk a nih. Hieng hi thil um dan a ni ta leiin Mizoram sung bika HPC(D) hminga 'movement' chu sukchawl hri niin a pawl (Mizoram Region) khawm thiek (disband) a ni nghal thu ka puong. Hi le inruol hin tuta HPC(D) General Headquarter Council ngir lai mek khom thunawk um hma poa dingin inchawltir (suspend) a nih. Amiruokchu, hi suspension hin HPC(D) Assam Region le Manipur Region huopsa naw nin.

HPC(D) General Headquarter Council thiek a nina san tamtak laia pawimaw zuol chu a Member a tamlem Mizoram sorkar le inrem siem ah an thang el khelah, mi 4 (pali) chu tuta SHC Interim Council inrawitu dinga ruot an nina lei le, HPC(D) C-in-C Pu Lalropui-in hun lo taka a mi boral san thut lei a nih.

Chuong lai zing chun, Manipur state sung bika dingin HPC(D) hi UPF (United People's Front) hnuoia umin central le sorkar hrietpuiin SoO nei a nia, tripartite political talk khom nei zing a nih a, Ankhasuo hmunah Designated Camp neiin sipai (cadres) 124 hai chu sorkar ah register tlap an nih. Manipur a hin Hmar hnam sipai pawl hi a fe pangngaiin a fe zing a ngai a nih. Chu lei tak chun, June 13, 2018 khan kei, Sanga Hmar (Defence Secretary) hi HPC(D) Council chawllailawk sunga a pawl ai lo aw dingin HPC(D) Chairman ngatin a mi ruot ka nih. Ka tlin le tlin naw thu dawn loa hienga HPC(D) Council sukchawl lailawk sunga mawphurna pek ka ni angin pawl sung le puotienga indawrna iengkim kei a fethlengna naw chun pawm ni ta naw nih. Chun thu nawk um hma po a HPC(D) Manipur Region a mawphurna cheltuhai chu hieng ang hi an hin;

1. Sanga Hmar : JMG, Political Talks, Finance, Defence Hmar Army etc.
2. Mathew Hmar : Home, PRO & Information
3. Josh Hmar : Treasurer, Commander Town & Hmarram
4. George Hmar : Commander Sinlung Camp & Vangai
5. Muonte Hmar : Officer on Special Duty (OW)
6. Dr. Romeo Hmar : Collector

Hmar hnam tadinga mellung pawimaw le inchikthlak, Sinlung Hills Council hin Hmar hnam, abiktakin Mizorama Hmarhai tadinga hmasawnna tha le tluongtling intlun ngei dingin HPC(D) chun ditsakna lnsangtak anhlan bawk.

Thusuok siemtu,

(Sanga Hmar)
Defence Secretary,
HPC(D) General Headquarter


Don't Miss
© all rights reserved
made with by Simon L Infimate