Aizawl, June 13, 2018, Virthli (ONP): Vawisun khan Badminton Hall, PHQ, Khatla-ah Mizoram sawrkar chun chun Hmar Peoples' Convention -Democratic/HPC (D) hai kuomah sawmdawlna a sema. Home Minister R. Lalzirliana chun HPC (D) cadre mi 102 le council member dang mi 12, an rengin mi 114 hai kuomah Rs 2.8 lakh seng an hlan. Rs 30,000 hi sumfai a inhlan ani a, a dang Rs 2.5 lakh chu cheque a inhlan a nih. April ni 13, 2018 a home coming ceremony, CTI, Sesawngah nei tum khan Mizoram sawrkar chun sumfaiin Rs 20,000 seng a lo inhlan tah a, a renga HPC(D) cadre han sawmdawlna an hmu hi mi pakhatah Rs 3 lakh seng a nih.
Vawisuna sawmdawlna sem inkhawm neina a thu a hrilnaah Pu Lalzirliana chun HPC (D) mi-le-sa, Mizoram-a hungkir hai chu sawrkarin a ngai pawimaw em em a, sawrkarin sawmdawlna pek dinga an tiem chu sukpuitling ngei a tum a nih tiin a hril. Hnam khat seng ei nih ti hrezing ding le Mizoram-a remna le muongna a um zing theina dingin ṭhahnemngai taka sawrkar leh ṭhangruol dingin an cha bawk a nih. Inremna thuthlungin a sawmsa pakhat Sinlung Hills Development Council (SHDC) ṭhieka thuneina insanglem nei Sinlung Hills Council (SHC) indin chungchang khawm June ni 27 Assembly Session-ah rel a ni ding thu a hril sa a. Sawmdawlna sum hi ṭhangkai taka hmang dingin a'n cha bawk a nih.
A hmaa ei lo tarlang tah ang khan April 2, 2018 khan State Guest House- Aizawl ah sawrkar le Hmar Peoples' Convention (Democratic) hai chun inremna thuthlung an lo ziek tah a. Inremna a hin Mizoram sawrkar aiawin Chief Secretary Pu Arvind Ray le HPC (D) aiawin HPC (D) Chairman Pu H Zosangbera ha'n hming an ziek a nih. Zanikhan Cabient Meeting neiin Sinlung Hills Council (SHC) indinna ding Bill chu a lo pawm tah bawk a nih. Hung tlung ding June 27 hin Special Assembly Session kovin SHC Bill pass ding chungchang ngaituo ning a tih. SHC hi thlaruk sung interim in feng a ta, chu zova election nei dinga ti a nih.
Hi hun hi Home Addl. Secretary Pu Lalbiakzama chun a keihruoi a. Home Minister chun sawmdawlna a'nhlan a. IGP Pu LH Shanliana, IPS chun lawmthu hrilna neiin hun a khar a nih. Anni hai bak a hin Home Department hotu hai mi iemanizat in an uop bawk.
Thulakna in a hril danin Interim council hi July thla hin tan hman beisei ani a, a hun ding tak ruok chu chieng taka hril lang a la ni nawh.
HPC (D) working chairman Pu Lalthanglien @ LT Hmar in Virthli palai a hril danin General Administration Department (GAD) chun interim council indinna ding hin order ansuo tah a, hi order hi home department ah pek a ni tah a, home department hin tuta kar annawleh karnawk tieng khin notification insuo hman an inbeisei thu an hril niin a hril.
June ni 27 hma hin Interim Sinlung Hills Council nei tan ding hun a chieng hman a ring thu, Pu LT Hmar chun a hril bawk.
