Responsive Ad Slot

Mizoram sawrkar le HPC (D) in inremna ziek, thlaruk sung SHC interim in fe phawt ding

Monday, April 2, 2018

/ Posted by Simon L Infimate
Aizawl, 2 April, 2018 (Virthli, ONP): Hun iemanichen anthawka inbie tah Mizoram sawrkar le Hmar People's Convention (Democratic) hai chun Mizoram le Hmar mipuihai ta dinga mellungpawi maw tak inremna tluontling (historict peace accord) chu vawisun khan State Guest House, Chaltlang, Aizawlah zantieng dar 4:30 khan ah an lo ziekfel tah.
Memorandum of Settlement (MoS) hi Mizoram sawrkar aiawin Chief Secretary Pu Arvind Ray in a sign a, HPC (D) aiawin HPC(D) chairman Pu H. Zosangbera in hming a ziek bawk a nih.

Peace accord ziek a ni hma report a pekna ah, Mizoram home additional secretary Pu Lalbiakzama, official level inbiekna a sawrkar tieng lo inrawitu chun Mizoram sawrkar le HPC (D) chu kum 2010 anthawk khan an lo inbiek tan ta, sienkhawm inbiekna fumfe tak chu August ni 10, 2016 anthawk khan tan niin tukum March ni 7 le 8 khan political level talks neiin inremna ziek dingin inrem a ni thu a hrila, HPC (D) ha'n ramhnuoi maksana nun dan pangai hraw thei dinga overground ah an hung ta chu lawmum a ti thu a hril.
A hril peina ah Pu Lalbiakzama chun HPC (D) hai hin ralthuom thachi 48 in surrender an ta, Home Coming ceremony dingin Zilthaw ah sawrkarin April 3 le 4 khin pickup a boutsai ding thu a hril.

Pu Lalbiakzama chun inremna zieka um ta chun Mizoram abikin hmarsak (northeast)tieng ralmuongna nghet (lasting peace) an tlun a beisei thu a hril.


Pu Lalrinmawia, political adviser to the chief minister, political level talks a sawrkar palai inrawitu chun inremna ziek theia um ta chu lawmum a ti thu hrilin Mizoram sawrkar le mipui khawma thaw ding tamtak an nei thu a hrila, a tulna tapawhtah inringzo tawna le inthangpui tawn a ngai ding thu a hril.

HPC (D) chairman Pu Zosangbera aia thurhiltu HPC(D) spokesperson Pu Lalthalien chun inremna zieka um chu lawmum a ti thu hrillin Hmar mipui bakah Mizo popo ta dinga mellung pawimawtak a nih ti'n a hril.

Mizoram sawrkarin nu le pa chan changa Hmar mipuihai harsatna chingfela inremna a ziekpui chu lawmum a ti thu a hrila, ground rules thatak le Suspension of Operation (SoO) khawm um lova swrkarin ramhnuoimi a biek hlak hriet ding um lo karah a tawp tlung theia an um ta chu lawmum a ti thu a hril.
Sinlung Hills Council siema um ding chun mipuihai ta dinga hmasawnna le inthuruolna an tlun ngei a beisei thu a hril bawk.
Peace Accord ziek zo a ni hnung hin sawrkar theuneitu le HPC(D) thuoituhai chun chanchinbumi hai inpawlpuina an neia, hi huna virthli palai (The telegraph, Newmai News Network le The Mizoram Post correspondent ni bawk) indawnna dawnin Pu Lalbiakzama chun HPC (D) chu Mizoram chapter khar a ni phawta, Assam tieng le Manipura la umhai chu an ngaiven ta naw thu le Mizoramah buoina an siemsap a ring ta naw thu a hril.

Pu Lalbiakzama bawk chun arms laying down or home coming ceremony nei hun ding chu riruong danin (tentative) April ni 12 ah Central Training Institute (CTI), Sesawng, Aizawl anthawk km 39 velah nei a ni ding thu a hrila, amiruokchu a tul chun sawrkarin a hun hi sawn thut thei a ni thu a hril bakah SHC chu interim in 6 thlaruk sung a fephawt ding thu le, a tul angin sawrkarin hma a lak pei ding thu a hril.

Pu Lalthalienin ei pailai indawnna a dawn danin HPC(D) cadre mi 100 bawr vel chu arm laying down ceremony ah an thang ding thu a hrila, Assam region le Manipura SoO ziekna a hming peluthai chun arm laying down (surrender) ah an thangnaw ding thu a hril.

Memorandum of Settlement (MoS) tlangpui:

1. MoS thiltum tak chu Sinlung Hills Development Council (SHDC) chu Sinlung Hills Council (SHC) tia thlak ning a ta, thuneina insang lem (enhanced autonomy) pek niin SHC area a mipuihai abikin socio-economic, politics le culture ah hma an sawn theina dingin inrelbawlna nei thei a tih. SHC hin member 14 nei a ta, hi taka 12 chu thlang (elect) ding ning an ta, 2 dang ruok chu sawrkar le SHC inrawn tuoa ruot chawp (nominate) ding ning a tih. Chief Executive Member (CEM) um a ta, Chairman le Deputy Chairman bakah Executive Member (EM)4 le Council Member- 5 um bawk an tih.
2. 1994 MoS (Peace Accord) hluolan (supersede) ni tang a tih.
3.SHC hi state act (by act of state legislature) a siem ning a tih.
4.SHC ta dingin Secretariate, council headquarter ah in nghat ning a tih.
5. Hieng a hnuoia subject 2 le inzawma dan siem a ni ding chun Sawrkarin SHC rawnin a ngai dan la phawt a tih.
a) Religious and social practice of the people living in the council area
b) Customary laws and procudures of the Hmar Community.
6. SHC in a budget ding siem thei a ta, sawrkar i pawm le Assembly a passed ding ning a tih.
7. SHC in development project siem dingin zalena nei a ta, state sawrkar ah thelutin state sawrkar fethlengin central sawrkar le funding agency dang anthawk fun an hmu phal pek ning a tih.
8. SHC in plan le scheme induong thei a tih.
9. Sawrkarin official gazatte in Sakawrdai annawle hmun dang headquarter in ruot a tih.
10. Sawrkarin relief/rehabilitation/ex-gratia HPC(D) cadre hai ta dingin siem a tih.
11. HPC (D) cadre overground a hunghai criminal case an nei chun suktawp (drop) ning a tih.

Don't Miss
© all rights reserved
made with by Simon L Infimate