Responsive Ad Slot

Tuiring khuo- in The 1st Tuiring Youth Day puithu takin an hmang

Saturday, December 9, 2017

/ by VIRTHLI HMAR
Turing, December 08, 2017, Virthli (ONP): Tuiring khuo chun an khuoa a vawikhatna dingin ‘The 1st Turing Youth Day ‘ December 8, 2017 khan puithu takin an hmang. Hi huna hin Khuollien in Mr. Tom Ebay, Photographer, For One Life a thang a. Khuollien hi Tuiring kawtsuo-ah a khuo mipuiin lo hmuokin Bawng-Gari ah inchuongtir a ni a, ropui takin Tuiring khuo-ah lawmlut a nih.

Hi huna Khuollien Tom Ebay, For One Life in thu a hrilna a chun Tuiring mipuiin khuollien dinga an fiel chu lawmum a ti thu a hril a. For One Life chun music le sports tienga thalai hai talent suk hmasawn chu an thiltum a ni thu a hril a. Hma tieng peia khawm For One Life a hotuhai kuomah hi hmuna talent nei an tam zie hai an tlun ding thu le thalai hai thiemthil nasa nawk zuola suk hmasawn dinga hma an lak ding thu hai a hril. Thu a hril zo hin Flag keipharna a nei a, organiser hai thilpek inhlanna a nei a. Hi huna hin ama khawm organiser han ditsakna thilpek inhlanna an nei ve.


Turing Youth Day hmang huna hin Pu V.L Vula, Secy., Village Authority Tuiring le Pu Hranglorthang, President, Tuiring HNU Unit hai khawma thuhrilna hun an nei a. An thu hrilna a chun Tuiring khuoa ta dinga thil tha kawkhmutu ni dingin le tlawmngaina kawngah a hma neka nasa in thang lang ei tiu tiin mipui fekhawm hai an fiel a. An Khuo changkangna dinga education pawimawizie hai ursun takin an hril. Hi huna hin Tuiring khuoa nunghak le tlangval fam lo changtahai inza inentirna in totawka sunna hunser hmang a ni bawk.

The 1st Tuiring Youth Day hmang a ni huna hin Local artiste- Pu Lalremsang, Tv. James Hmar, Pu Buonthanglur Inbuon, Guest artiste- Nk. Grace Famhoite (ICI KTP Voice), Nk. Gloria Khawlhring (Semikah) han hla mawi tak takel sakin mipui hai an inawi a, Veteran artiste- Pu Zaituokung in a hla hit hai- ‘ Headmaster Babu’, ‘ Dawnkir chang in ei nun hlui hai’ a sak a, mipui na a tlei hle. Tv. Donald in lam hmunuom um takel inentirna a nei bawk a nih. Hi Youth Day hmang ding hin hmun hrang hrang anthawk Tuiring khawsuok thahnem tawk takel han an uop a, Virthli Photographer Tv. Muona Infimate khawmin a uop ve a nih. Zan hunah hla ruoi the a nih.

Tuiring khuo hi Hmar hla phuokthiem, hlasakthiem le Footballer tam tak el hai suokna khuo a ni a, insit a um naw hle a . A khuo mipui hai an felin mikhuol lawm dan khawm an thiem hle bawk a nih. Tuiring hi Saikot Constituency, Churachandpur District sunga um a nih.

Don't Miss
© all rights reserved
made with by Simon L Infimate