Aizawl, 22 September, 2017, Virthli (ONP):
Mizoram sawrkar le Hmar People’s Convention (Democratic) hai inkara official
levela inbiek tawpnatak chu September 21 anthawk khan ni hni sung nei a ni
hnungin vawisun khan Aizawl hmunah tluongtaka zo fel a nih. Tuta ṭuma inbiekna
a hin inremna (peace accord) siemna dinga Memorandum of Settlement (MoS) le
Sinlung Hills Council Bill draft khawm inbiek nawk huna enthat nawk dingin
induong fel nghal a nih.
Mizoram Home Department a Additional
Secretary Pu Lalbiakzama chun inremna dinga thaw ding pawimaw (modalities) hran
hran induong a ni thu a hrila, inbiekna in a rasuok ding laia pawimaw pawl
tak Sinlung Hills Council indin tum
khawm a sinthaw dan ding le thuneina a nei chin dinghai chipchier taka
hriltlang a ni thu a hril.
Tuta ṭuma inbiekna hin HPC (D) cadre hai an
hungkir (home coming) dan ding le sawmdawlna (rehabilitation package) pek an ni
dan ding khawm hriltlang a ni bawk.
Pu Biakzama chun tuta mi hi official levela
inbiek tawpna tak a ni ta leiin vel nawk chu political level a inbiek a nita ding
thu a hrila, a hun ding ruok chu sawrkar thuneitu ha’n an la ruotfel ding thu
le tukum sung ngeia nei hman tum a ni thu a hril bawk.
Hi lai zing hin HPC(D) spokesperson Pu
Lalthalien in Virthli palai a hril danin Memorandum of Settlement (MoS) le
Sinlung Hills Council Bill, 2017 draft induonga um chu a thuphunga pawm a ni
thu a hrila, amiruokchu a tu tieng tieng khawma siemthat a tulna hai lo bi (study)
chienga inbiek nawk hunah entlang nawk dingin thuthlukna an siem thu a hril.
MoS le SHC Bill draft hai lo bi chieng dingin Sawrkar palaihai in Mizoram sawrkar
ah intlun an ta, chuongang bawk chun HPC(D) palai haiin Hmar Inpui ah intlun an
tih.
Hmar Inpui keihruoina hnuoiah Hmar hnam
sunga pawl (organisation) tum tumhai in MoS le SHC Bill draft hai chungchangah
inrawntlangna an nei ni ding thu HPC(D) palaihai chun an hril bawk a nih.
Development council nilo a political
council nei thei dinga inbiekna a fetluong pei chu lawmum a ti thu hrilin Pu
Lalthalien chun tulai sanah ADC neka ngirhmun insang lem ei dit a ni lai zingin,
a tu tieng tieng khawma ei pawm tlang thei ding inremna ei siem chu nakie tieng
peia ADC hmu theina dinga thil tul hmasatak a ni thu a hrila, mipui khawma pawm
dan ei thiem a tul thu a hril bawk.
HPC(D) le Mizoram sawrkarin inremna an lo ziek
chun “State Act” a hlangkai ding a ni leiin SHC Bill khawm Mizoram state
assembly in a pawmpui ngei a hung ngai ta ding ana, political council neiin
subject iemanizat ah thuneina (autonomy) nei thei a nita ding leiin act/legal
binding um lo inremna nek chun azie um hrim hrim dinga ngai a nih. Amiruokchu
MoS zieka a um chun 1994 HPC peace accord kha invalidate/ supersede a hung ni ta
ding leiin ei palaihai hin fimkhur takin hma an lak ngei ring a um bawk a nih.
