ZAWNGTA (STINKY BEAN)

~ Ramthienghlim Varte, Columnist, Virthli

Zawngta hi tlang mihai chau ni lovin mi hmun dang danga umhai ta ding khawma hme inhnik a ni bakah  hriselna dinga damdawi tha a nizie a chanchin ei bengvar nawkzuol theina dingin tlawmte hei ziek ei tih.

Scientific name  :  Parkia Spaciosa

English name     :  Bitter Bean, Twisted cluster bean

Local name        :   Zawngta

 
India saktieng rambung  hieng Laos, Mynnmar, Thailand, Malaysia, Singapore, Indonisia le India Hmarsaka umhai chun ei fak le dawn suk hniktu, ei ngisang em em Meiteihai lem chun IRONBA ah zawngta thang ngeia an hei siem hin chuh bufak a suk hnikin an lawm a kim hlie hlie hlak a nih.

Zawngta a hin taksa ta dinga pawimaw Amino acid (fakhai lo chiezawptu/se nawitu) hi a tam leiin thildanghai phingpuia lo inkhawlhai suknawitu a ni tlat leiin a rim hi taksa a hin an nam/se hrat a, Stinky Bean (Be rimsie )an ti reng a, chuleiin ei hei fak a, zun, ek le thlana hai a rim suok ham ham thei khawpa hrat taksa ta dinga damdawi  tha a nih.

Hriselna dingin a tha em em a, zawngta chanchin suitu mithiemhai chun tlangval tha-in-thakna re ta hnung khawm a hun tawka karkhat vel an fak zawm chun taksa a suk hratin 90 miniutes vel chau dam chuh awlsam taka ke’n an lawn thei nawk el hlak. Anemia (Thisen tlawm)  mi hai ta dingin ni tina fak le dawna an pawl hin thisen (Red blood) sukthienghlimtu le thisen (Red Blood-RBC)/Haemoglobin (Hb) suk tamtu a ni leiin anemia invawihai ta dingin damdawi  tha em em a na; Zunthlum (Diabetes)neihai  ta ding tak takin Blood sugar sukhnuoitu a nih. 

Zawngta hin Potassium ( thil fakhai chie/kang ral pei thei) a tam leiin Blood Pressure upat dan zira BP insanghai siemthatu a ni a, BP Strock leia buoina venghimtu a nih. Thluok lum taluo leia nun tawrawt, inlauthut, ngaituona buoi le dang danghai venghimtu khawm a ni bawk.  The England Journal of Medicines a chun Zawngta fa hlak mi 100 peia 40 (40% ) PB stroke-a inthawk venghim a nih ti a Research thawtuhai chun an hmusuok thu an ziek bawk. 

Zawngta a hin hmu theilo zungzam hring kar el a um a, chuh phingpui hrat nawhai, ril inlawng (Ulcer) le ril sunga thil thur tam taluo hai lo sawinawi pei tu dinga damdawi tha tak a ni bawk leiin ek nem damdawi a na, zingkar toilet programme suk zangkhaitu a ni hlak bawk. 

Thokang damdawi thatak el a nih. Ei pi le puhai khan Zawngta hi inkawlah an lo phun hlak a, Zawngta rim hih thokangin an chim em em a, Thokang laka invenghimna damdawi a tha tak ni bawk. Zawngta tamna hmunah thokang hmu ding an um ngai nawh ti a nih. 

Ringla ringnaw la, Apple hi ei ngaisang le taksa hriselna le tha man to em em a ni hi. Amiruokchu, Zawngta le khaikhin chun Apple let nga’n Zawngta hin Vitamin a tam lem a, a let li in Protein a tam lem a, a let hniin Carbohydrates, a let thumin phosphorus  a tam lem bawk. Mak deu a nih.

 Zawngta um hun hih an khel tieng deu an tah a, a mu chang Bazaar-a an zawr a ra nawk hma pova ding inchaw la sie tha rawh. Amiruokchu, zingkar i hme chang suna i chang-chavai fimkhur deu hlak rawh. Damdawi tha ti leia a hun le hmun ngaituo mang lova nuom hun huna Phingpuia Gas pipe Zawngta-a siem khah inthlasuok el chun remchang kher naw nih.