Responsive Ad Slot

An Interview with Solomon V Hmar

Saturday, August 13, 2016

/ Posted by VIRTHLI HMAR
Pathien mi hmang; Hla siemtu inlar Tv. Solomon V Hmar le Hohlimna
(An Interview with Solomon V Hmar) by LRS Puruolte | Virthli.in

"Krista zara ka hamțhatna hi ka puong seng nawh…"
- Solomon V Hmar

Biodata
Hming: Solomon V Hmar
Nu hming:Lalvarkim
(Note: A Pa hming chu ziek sa dal ei tih, a nu kuoma um hlak le seilien a ni leiin)
DOB: 01-04-1983
Address: AG Road, Rengkai, CCPur
Qualification: B.COM (Hons)
School: AG High School
College: St. Edmunds College, Shillong
Hobby: Music/Singing
Merital Status: Unmarried
Work at: Vijaya Bank
Tuta a posting-na hmun: Raichur District, Karnataka, India
A sin chel lai: Assistant Branch Manager, Vijaya Bank


Q. I talent ti el inla Pathien-in hla tiengpang ah a hmang em em che a, mi tam takin malsawmna an dawng pha a, hlasak le hla phuok hi iengtik huna kha i lo thaw țan am a ni a?
Solomon: Hla hi naupangte ka nilai a’nthawk ka lo inhnik ta reng niin ka hriet. Naupang lai khawm hla phuokfawm sak hi ka hmanga. Ka hung tleirawl hlim lai lem chu love song phuok hi ka hmang khawp el. (A la’n nui a- Hahaha...) Pathien hla hi 2002/2003 lai vel a’nthawk khan sandam hung inhre chiengin ka hung siem țan a nih.

Q. Pathien-in hienganga hla tienga a hmang thei che hi Pathien ropuina dingin zuk hril el inla, nang khawm ama tadingin inpek ve chu ni ngei a ta. I nitin hringnun hi iengang takin am Pathien le kar ei ti di'm, thlarau ram ah i hmang a?
Solomon: Ka nu'n hmeithaia a mi enkawl kan’ lei hin, Ka hringnun a hin zamna riu hi ka nei hlak a. Mi lai hin ka pauzo ve naw bawk. Inrieng ngawi ngawi hin inhrietna ka nei hlak a. Nisienkhawm chuong hai chu ka tadingin Pathien belbulna țha tak hmangruoa an chang lema. Taksa tieng suong-le-kuo inhnemna țha ka nei naw leiin, iengkim ah Pathien ka bel a. Ama chun ami dawn a, hieng chen a mi țhuoi ta a, ami la țhuoi nawk pei bawk ding a nih.

Q. Hi Officer, nitin a thawkna nei ta dam i ni a. Sun le zan huna hai hun hi i hmang dan hriet chak a um ngei. Anleh hla hi i phuokna ding hin hun i lak sawt hlak am?
Solomon: Hi office kai dam ka hung ni tah a. Hun thawveng chu a vang ta khawp el a. Ka sin hi ka join ding khan, ka ruolpa'n ami sawisak a "Bank ah țhang i ta, hla hung siem thei ta nawng i tih" a mi ti a. Chu țawngbau chun a mi tawk hle el a, Pathien kuom ah ka țawngtaiin kan hlan thar a, " I malsawmna hai po po hi neilo a nang nei che ka nuom lem a nih " tiin kan pek thar a. Bank a ka țhang hnung khawm Hla a mi la pek pei a, ka lawm khawp el. Ei sinthawna leiin Kristien hai ei rawngbawlna chai naw sien ka nuom. Hla siem hi siem tum/phuok tum hrim hrim a um a. Pathien mi pek a um bawk a. Pathien-in hla a mi pek pha chu sawt a aw ngai nawh. Minute tawite sung khawmin a thluk leh ka ziek dawk el hlak.

Q. Hla iengzat chie am phuok tang i ta? Nangin a thu le thluk i siem le mihaiin a thu an neisa nangin a thluk i siem pek dam iengzat am um tang a ta?
Solomon: Hla hi tu chen hin 90 (Sawmkuo) vel chu ka nei tah-in ka hriet. Mi hla thluk hi 50 (Sawmnga) chuong chu ka siem in ka hriet ta bawk.

Q. I hla phuok hai hi Pathien zarin a hring em em a, unau hnam dang dang hai khawmin an sak a. Pathien malsawmna tam tak eini ang bawkin an dawng ve ngei ring a um a. Iengang am dawnna i hmu a?
Solomon: Pathien-in HMAR hi hla kuongpui ang deuin a hmangin, a bul țhut niin an lang a. Hnam dang lai hin chu hla thar a vang thei khawp el. Ei hla hai hi translation an thaw zung zung hlak a nih. Pathien-in hnam dang lai khawm a hmanga, ei ni lai nek hmanin a hlu lem am a ni aw… ka ti chang dam a um hlak.

Q. "Krsita zara ka hamțhatna" ti hla kha kei a mimal tak chun ka lo dit ve em em a. Mi tam tak khawm an ni ve niin ka hriet. Kha kha i hung hmusuok dan mi hril la ka nuom ngei.
Solomon: St. Edmunds Hostela ka um laia Pathien mi pek a na. Ka ti tah ang khan ka nu le chauh a um ka ni leiin inriengna hi ka nei hlak a. Ruol lai khawm hin ka chang a par ngai nawh. "Pa" dam hi kan hnar thei em em el bawk. Nisienkhawm Pathien-in ka beidawngna a hriet a, Fahra hai pa, hmeithai hai pa indiktak a ni zie a mi hrilhriet a. Ka hringnun ka hang thlirin Pathien hmel inlang nawna hrim hrim ka hmu naw a. Pathien hi ka Pa indiktak a lo ni leia ka hamțhatna hai ka hmuin ka puong seng naw a. Krista a ka hamțhatna chu hlim tak le lawm takin hla hin ka hung ziek suok thei tah a nih.

Q. I hlaphuok hai a lekhabu a siema um kha a um dan tak i mi hril thei ding? Chun, kha kha a dit/a'n chaw nuom an tamin ka hriet a, khawlai lai am hmu thei a ni a?
Solomon: Rengkai Lalnu (L) Pi khawlpi vuina Program a khan Choir haiin 'BEISEINA HRING' ti hla kha an saka. Pathien-in a hmang em em a. Pu JC Chongkholien khawma a hung dit pha a. (L) Pi khawlpi hrietzingna dingin ka hla hai chu a bu-in a mi siem pek tah a nih... A dit hai chun Ka nu Lalvarkim AG Road, Rengkai, CCPur/Pu L Hmingsang Joute Vengpui, Rengkai, CCPur hai kuomah hmu thei ning a tih.

Q. Solfa chu i thiemsa a ni a. Music rem tienga hin ieng ieng am thiem i nei a? Degree dam iengang am i nei a?
Solomon: Solfa hi thiem ti thei khawm an nawh. Ei sak rawn naw deu chun ei buoi nawk hlak. Insawizawi deu zing hi a țul ve. A hming chun Diploma chen chu ka zo a, chun Rev. Roding Pulamte a inthawk-in Staff notation hi Elementary chen chu ka zo ve bawk kha ti.

Q. Hla tieng panga pawimaw i ti, hril nuom dam i nei am?
Solomon: Mi țhenkhat hin hla thluk hi an hung sawisel deu chang a um hlak a. A ni ngei hla thluk hi a pawimaw a. Ka hla hai hi a tamlem chu lengkhawm zai a tam a. C. Lalthlunglien in a hla pakhat ah " Kan țawng ngeiin Lalpa’n a mi biek ” a lo ti a. Kan rilrem zawng tak a nih. A mak ka tih Pathien-in hla a hmang nuom/mipuiin an dit hai hi a tlangpuiin lengkhawm zai hi a lo ni nawk pei bawk. Hla changkang deu hi siem nuom chang a um a chu, a hlawk naw thei khawp el eini lai chu Pi le pu a’nthawka ei hla taste bawk kha a lo fe nawk nuom lem hlak. “KA LAL HMANGAINA” hla ka siem khan a chord hai Hmar hla a hmangna la um țhaklo dam ka hmanga, anachu ei paw phak tak tak chuong nawh. Hla hi phuoktu le saktu hai khawmin ei hriet ka nuom chu changkang deu khawm siem ei ta, sak ei tiu, anachu nuom changkang el khawm zawng ding an chuong nawh, Pathien hmang thei ding hla le thu hai kha a țha lem.

Q. Virthli group member hai infui nuom deu dam i nei am?
Solomon: Virthli Admin hai kuomah ka lawm tak zet. In mi hung hriet vawng vawng a. Virthli member hai, Khawvel a hin damsan ei nei naw a, ei damsan chu Nitin a thil țha thaw a, Lalpa rawng chau bawl hi a nih. Khawvel a hin a țha pakhat bek khawm ei um nawh. Ei fel lei ni lem lo a, a rawngbawltu dinga ko ei ni hi malsawmna chungchuong a nih. Ei țhatlai, ei vanglai hin theitawpin Pathien ropui zie puong ei tiu. Pathien thu naw innghatna tlak a um der nawh. Pathien thu hi a țha bek bek a. Pathien thu hi zawm tak tak ni inla chu ei ram, ei hnam khawm a buoi, a buoi chu ring a um nawh. Ama chu Buoina Pathien a ni si naw a. Chun a tawp takah hnuoi a thil um hai a hin ei lungril innghat lovin chungtieng a thil um hai a chun innghat tlat lem ei tiu. Chungtieng ei thlir zing chun hlimna ei lungril ah kang ngai nawng a tih.

Virthli: Kan lawm che, Solomon. Pathien-in malsawmin, țhuoi pei raw se che. Damsawt rawh.
Don't Miss
© all rights reserved
made with by Simon L Infimate