July ni 9 khan Lungthulien khuoah bufai hi sem a ni a. In-tinah Kg 10 peia sem niin, a dan ang chun milukipah Kg 5 ti a ni a. A țum khata dingin inang senga sem niin Rs 3 / Kg a nih. Hmarbiel khuo dang danga khawm NFSA hnuoia bufai hi sem niin thu ei dawng bawk.
Manipur sawrkar hin iengtin takin am NFSA hi a fepui hriet a ni naw a. AAY, BPL le APL bufai NFSA hin tawkbuoi naw ni a, a belsana a ni lem ding a nih. Antyodaya Anna
Yojana (AAY) hnuoia bufai hi in-tin ta dingin Kg 35 a nih.
Bieltu MLA, MDC le social worker haiin hieng neka mumal lema a fe theina dingin hma an lak nuom a um hle a. DÁN anga fepui thei a ni chun, sûng tin khawsakna zângkhai pha vieu a tih.
NFSA hnuoia bufai hi lawm chi a ni am hrietchieng a la ni naw a. Asan chu, ei hril ta angin AAY, BPL le a dang dang a sukbo chun lawmna nêkin buoina ding a nih. Chun, bufai bag sepral a um niin thulakna chun a hril a. Hun nawkah khuo tinin an chang ding zat an hmu theina dingin bieltu MLA in a vil an nuom thu an hril bawk.
Iengpo khawm ni sien, NFSA hmang a nina thuah bieltu MLA chungah lawmum ei ti a. Hi neka changtlung lem dinga hma hung la pei dingin ei nuom.
Report: Gospel Songate, Special Corr., Virthli
