Responsive Ad Slot

Hmasawnna Thar | 07 July, 2016

Thursday, July 7, 2016

/ Published by VIRTHLI
Mizo Hnampuon 1 seng an hlan
CCPUR: Hiangtam Lamka, CCPur­a Pasaltha hai inzana buk­a JAC inrawinaa sit­in­protest a fe mek a, zanikhan Mizoram­a inthawk Thiempu Rorelliana, Zo sakhuo founder le midang pahni hai khawm va thangin Rorelliana hin thuhrilna hun a hmang bakah Tribal Martyrs 9 sungkuo hai kuomah Mizo Hnam puon pakhat seng inhlanna a nei.


Hi huna Rorellianna in thu a hrilnaah, ram, hnam le sakhuo hai hi thehran lova a ruola fetlang ding a nih tiin a hril. Ram pakhat a ma le ama, hnam pakhat ama le ama indo chun damsuok ngainaw nih, hiengang hin eini le ei ni ei indo chun damkhawsuok ngai naw manih tiin a hril. Hi huna hin JAC Chief Convenor le JAC thuoitu hai khawmin an uop.

HSLC Compartmental Exam, 2016
CCPUR: Board of Secondary Education, Manipur hnuoia HSLC Compartmental Examination, 2016 chu July 8, 2016 khin Exam Centres 19 haiah nei ning a tih. Churachandpur District­a Exam Centre dingin Ebenezer Academy ruot a nih. Hi centre­a hin Roll No. 16812­19490 (Regular) le Roll No. 1038­1452 & 4531 (External) hai inthung an tih.

M.Th. 1st Class in a passed
CCPUR: Nk. Mary Grace Z. Pangamte, d/o Pu L. Ruoivel Pangamte of Rengkai, CCPur chun Union Biblical Seminary (UBS), Pune a inthawk M.Th. 1st Class in a passed a, marks 70% zet a hmu phak. A hlawtlingna hi ei Chanchinbu chun a lawmpui hle. Nk. Mary Grace Z. Pangamge hi BA English (Hons) le MA English zo a ni bawk a nih.

HCF in an dem thu an puong
CCPUR: Hmar Chief Federation (HCF) chun, HNA Founder President Pu Lalthangsang Intoate nunrawng taka that a nina thuah pawi an ti thu July 6, 2016 khan Condemnation insuoin a puong. Hiengang mani mi le sa inthatna hi tuta hnung um ta ngainaw sien an nuom thu an puong bawk. HCLF hmalakna hnuoia June thla laia HPC(D), HNA, HPC­D President pawl han buthleng awt meua inremna an siem kha mitinin lawmum ei ti lai zinga hiengang inthatna a hungtlung hi HCF chun pawi a ti a, Pathien hminga hiengang thil thaw nawk ta lo dingin HFC chun ngenna a siem.

Medical Assistance Rs. 5000/­ seng a pek
CCPUR: Mr G. Thangkhosuanmung, EM, ADCC & Chief of Hiangtam Lamka chun zani zingkar khan a biel sunga mi 12 hai kuomah medical Assistance Rs. 5,000/­ seng a pek. Chun, T. Singneng, Member V/A Hiangtam Lamka khawmin mi 12 hai kuomah ama mimal pawisa hmangin Rs. 500/­ seng thangpuina a pek bawk.

Medical Assistance pek hai chu­ Samuel of Zomi Colony; Pamkhanching of Zomi Colony; Liansangmuan of Marian Street, Phailian; Niangthon of Hiangtam Lamka; Niangsuanching of Hiangtam Lamka; Nemzaching of Hiangtam Lamka; Siamchinkhup of Hiangtam Lamka; Velminthang of Hiangtam Lamka; Lallianpuii of Hiangtam Lamka; Chingbiaklun of Hiangtam Lamka; Kaigin of Compound Veng le Khanching of Zogam Bazar hai an nih.

LM Khaute a hung
CCPUR: Mr L.M. Khaute, IPS, DGP, Manipur chu zanikhan CCPur­ah a hung inzin a, Dr Chinkholal Thangsing of Rengkai Road nu thi ralna a nei bakah Thangzam Road­a a chengna in le hmun dang thenkhat a sirkuol zoin Imphal tieng a kir nawk.

Tuolthattu hai inpuong ngam dingin an phut
CCPUR: July 5, 2016, zingkar inhma taka tu ti hrietlo han Hmarveng­a a chengna in gate tuola an kap hlum Pu Lalthangsang Intoate ruong chu zanikhan Sielmat, CCPur thlanmuolah vuiliem a ni tah. A ruong inthlaliemna programme­a hin mipui tam tak an fekhawm a, Hmar Inpui affiliated organisations tum tum­ HYA, HAA, HMARTOB, HWA, HPC­D (Chairman) pawl hai bakah Hmar Christian Leaders Forum, HNA, KNO, Kuki Women Human Rights, Hmar Returnees Association le khaw tum tuma VA haia inthawk hunbik hmang a nih. HSA chun a ruong um nia hun an lo hmang ta leiin a ruong inthlana huna hin a hranin hun an hmang ta nawh. Hmar Returnee Association chun hi huna hin inzanain condolence salute an pek bawk.


Hi huna thuhriltu hnam thuoitu hai chun Pu Thangsang an inro zie le tuolthattu hai an dem takzet thu an puong tawl a, hiengang mi hringna la ngam khawpa huoisen hai chu an thilthaw inpuong ngam ve dingin an phut.

Union Minister dinga lak thar han charge an lak tan tawl 
NEW DELHI: PM Narendra Modi in zani hmasaa Union Cabinet a suklien/sawidanglam huna Minister dinga laklut thar hai chun zanita inthawk khan charge lain an sin ding hai an thaw tan a, an  ngaipawimaw ding thil hai an puonglang tawl bawk. HRD minister Ms Smriti Irani chu Textiles ministry chel dinga pek a ni a, HRD minister hi cabinet suklien huna Cabinet­a laklut thar Mr Prakash Javadekar pek a nih. Parliamentary Affairs minister M. Venkaiah Naidu chu Information & Broadcasting minister pek a ni a, Urban Devpt. Ministry khawm la chelsa bawk a tih. Chemical and Fertilizer minister Anant Kumar chu Parliamentary Affairs minister dinga ruot anih.

Zanita charge laa sin tan hai lai hin Information and Broadcasting Minister M. Venkaiah Naidu;  Minister for Law and Justice Ravi Shankar Prasad; Parliamentary Affairs Minister  Ananth Kumar; Textiles Minister Smriti Irani; Rural Development Minister Narendra Tomar; Steel Minister Birender Singh; Environment Minister Anil Madhav Dave le Sports Minister Vijay Goel hai an thang a;   Arjun Ram Meghwal le Santosh Gangwar han Minister of state for Finance; Minister of state for Railways Rajen Gohain le Minister of State for  External Affairs MJ Akhbar, Minister of state SS Ahluwalia, Ramdas Athawale, Jayant Sinha, Mahendra Nath Pande, PP Chaudhary, CR Chaudhary le Ajay Tamta hai khawmin charge an lak tawl.

Parliamentary Affairs Minister Ananth Kumar chun, tuta Parliament Monsoon Session hung um dinga hin Goods and Services Tax (GST) chu pass thei ngei a beisei ta thu hrilin pass a ni ngei theina dinga political party tum tum hai inbiekpui a ni ding thu a charge a lak huna hril.

Minister of state for Railways thar Rajen Gohain chun, passengers hai himna le India hmarsakbiel pumpuia Rel a infepawna intlungri chu a ngaipawimaw tak ding thu charge a lak huna a hril a. India hmarsak biel hi tlangram khawkrawk tak tak el a ni leiin hieng hmuna Rel­a infepawna (connectivity) siem chu thil namai a ni nawh, sienkhawm PM Narendra Modi hnuoia Centre sawrkar chun kum 2020 chenah India hmarsak states tin hai Rel lampui intlungtir vawng a tum a, chu ding chun hma lang ka tih tiin a hril.

Union Cabinet sawidanglam le suklien a ni hnunga Council of ministers hai le an chanvo kimchang lem phek hnungtieng inchuon a nih.

Student­hai inrawl ve lo dingin
IMPHAL: Zanikhan Chandel District­a Tengnoupal Sub­Division huop sunga MPSC huoihawtna hnuoiah Competitive Exam, Class X & XII exam a mak hmu insanghai lawmpuina inkhawm Tengnoupal hmuna nei a nih. Hi huna khuollien Manipur Health & Family Welfare Minister D.K. Korungthang chun student­hai chu bandh le economic blockade thawna haiah inrawl lo dingin a ngen. Ei state sungah thil ngen ei nei pha pha a bandh le economic blockade ei thaw el hlak hi ei ram le a mipuihai ta dinga vangduoina a nih. Hieng thil thawna haia hin student­hai an hang inrawl nawk hlak hi chu ei vangduoi dabawl a nih tiin a hril.

Rs. 8.85 lakh le rangkachak kg. 2 chuong hmukir
IMPHAL: Zanikhan Thoubal­ah HDFC Bank, Thoubal Branch suomna le inzawmin Police han pasal pakhat pawisafai Rs. 1,00,000 le rangkachak grams 700 leh an mankir nawk leiin hi Bank suomna le inzawma Police han mi an man chu pathum an tling tah. Pawisa le rangkachak hi Plastic a tha taka funin Pukhri sunga an denglut a nih. Tu chena pawisafai hmukir nawk ta po chu Rs. 8.85 lakh le rangkachak kg. 2 chuong a ni tah tiin Police thusuok chun a hril. HDFC Bank, Thoubal Branch hi July 5, 2016 zantieng dar 5 vela hmaituom mi 6 velin an suom a nih. Hi huna hin pawisafai Rs. 87,70,805 le rangkachak Rs. 1,17,18,100 manhu an lakhmang a nih. Pasal 3 mana um tahai lai hin Thokchom Dilip (50) of Thokchom Village, Thoubal District le Thiyam Arjun (23) of Charangpat Mayai Leikai hai an thangsa. Anni pahni a inthawk hin pawisafai Rs. 7.50 lakh le rangkachak Rs.50 lakh manhu hmukir a nih.

TPLA cadre 2 Pistol 2 leh man
IMPHAL: July 2, 2016 khan Red Shield Division, Senapati Brigate hnuoia Jwalamukhi Battalion han Motbung, Senapati district­ah Thadou People Liberation Army (TPLA) cadres 2, Lilen Lhouvum (40), s/o Kamkho Lhouvum of Teijang Veng (Ward No. 09), Keithelmanbi, SEnapati District le Rilkam Khongsai (28), s/o Rilsuthang Khongsai of Ekban, Senapati District hai chu 9mm Pistol 2, magazines, a mu 7, Mobile phone 2 le SIM Cards 4 leh an man niin PIB, Defence Wing thusuok chun a hril.

Report pe dingin an hriettir
IMPHAL: Tulai hnai ela Suspension of Operation (SoO) group a thang pawl hran hran hotu kap hluma an umna chu sawrkar thlungpuiin a ngaimaw hle a, hi chungchanga hin Union Home Ministry chun Manipur sawrkar chu report pe dingin a hung inhriettir niin ei thudawngna chun a hril. (IANS)

Centre in Bombay le Madras HC hming
NEW DELHI: Sawrkar thlungpui chun Bombay le Madras High Court hai hming chu Law Ministry rawtna um angin ‘Act of Parliament’ fethlengin tuta an put mek Mumbai High Court le Chennai High Court tia thlakthleng a tum a, hi thil hi Union Cabinet meeting chun zani hmasa khan a remti/pawmpui tah. Kum 1990s laia hieng metro cities pahni hai hming thlakthleng a nia inthawk khan High Courts hai hming khawm hi Mumbai HC le Chennai HC tia thlakthleng dinga ngenna le phutna lo um tan ta hrim a nih. High Courts hai hming thlakthlengna ding hin The High Courts (Alteration of Names) Bill, 2016 Parliament­ah passed a tul ding a nih. Union Cabinet minister Ravi Shankar Prasad chun, Calcutta High Court khawm ‘Kolkata high court’ tia thlakthleng ani ding thu a hril.

Naufahra hai kuoma thangpuina an pek
IMPHAL: Red Shield Division hnuoia Senapati Brigade Maram Battalion chun July 4, 2016 khan Karong Village­a CCM Orphanage an va kan a, hi home­a um naufahra hai kuomah thangpuina thil chi tum tum an pek. Chun, July 2, 2016 khan Willong Village­ah ‘Know your Army’ Mela an buotsai bawk. Hi huna thang thalai, students le nu le pa hai en thei ralthuom chi tum tum pholang a nih. (PIB Defence)

Rambung 4 sir dingin PM an zinsuok
NEW DELHI: PM Narendra Modi chu rambung 4­ Mozambique, South Africa, Tanzania le Kenya ram hai sir dingin zani zan khan New Delhi suoksanin an zin suok. PM hi a hmasa takin Mozambique ah inzin a ta, vawisun hin an khawpui Maputo tlung a tih. Mr Modi hi kum 34 liemta sunga India PM Mozambique inzin hmasa tak a nih. A cham sungin President Filip Nyusi inhmupuiin an parliament khawm sir a tih. Mozambique a suoksan tawmin India mi cheng hai inpawlpuina nei bawk a tih. Mozambique leh MoU ziek bawk an tih.

Assam tuilien leiin harsatna
GUWAHATI: Assam rama chun tulaia ruosur leiin Brahmaputra vadung le vadungte tui hai a kaisang pei leiin hmun tam tak tuiin a chim mek. Tuilien hin districts 7 haia khaw 257 hai a sukbuoi leiin mi tam takin harsatna an tuok bakah thlai chingna lo hectares 6000 chuong ding tuiin a suksiet ta bawk. Lakhimpur district­a chun tuilien leia harsatna tourtu hai enkawlna dingin relief camp 7 hawng a nita a, Kaziranga National Park­a Sa kap khapna hmun camps 30 chuong tuiin a chim ta bawk.

Gujarat le MP power plants haiah CISF
NEW DELHI:  Gujarat­a Sikka Thermal Power Station le Madhya Pradesh­a Gadarwara Super Thermal Power Project hai venghimtu dingin sawrkar thlungpui chun CISF Commandos 230 chuong a tirlut niin Home ministry thusuok chun a hril. Security thilah fimkhur thua hieng Thermal power stations hai venghimtu dinga CISF hi tirlut an nih.

A nauhrawn vadunga dehawntu man
THANE: July 1, 2016 khan Mr Tulsiram Saini (30) an tipa chun a nauhrawn kum 8 mi chau chu Badlapur­a Ulhas vadung­ah that tumin a deng lut a, thi dingin a maksan a, sienkhawm vangnei thlak takin hmunhnawk ah an tang a, lampuia fe han a tap ri hrie in an sansuok. Hi naupangnu inpuongnaa inthawk a pahrawn Tulsiram Saini hi July 5, 2016 khan Police han Thane a, Kalyan hmuna an va man.

Police Sub­Inspector man
GURGAON: Andheri hmuna Gangster Sandeep Gadoli inkaptuona tehlem (fake encounter) a inrawlna neia intum Police Sub­Inspector Pradhuman Yadav of Gurgaon Police chu Mumbai police­a Special Investigation Team han zani hmasa zan khan an man. Mr Pradhuman Yadav inrawina hnuoia Gurgaon crime branch team police 5 han Gangster Sandeep Gadoli hi February 7, 2016 nia Adheri hmuna Hotel Airport Metro sunga hi kap hlum a nih.

Bus tlan lai sungah nupui suollui
AGARTALA: Tripura state a chun July 4, 2016 zan khan Bus driver Parimal Debnath le a assistant Joyded Dey han nupui pakhat Bus tlan lai sungah an suollui a, a suolluitu driver le a assistant hai hi zani hmasa zingkar khan Police han an man tah. Mr Debnath le Dey hai hi zanikhan Tripura south Belonia Judicial magistrate hmaah inlangtir an ni a, Court chun ni 14 sung judicial custody­a la um phawt dingin a rel.

Suolluia um nuhmei hi Dhupbari hmuna a unaunu kan dinga zantieng 4:30PM vela Nidya­a inthawk ‘Sri Krishna’ ti inziekna Bus TR­07­1215 a chuong a ni a, Ekinpur chen an tlung hunah passenger dang hai chu an tum vawng a hnungah nupuinu chun Dhubbari fe ding a ni thua hrila hi hmun an tlung ding le dingnaw an dawn hunah driver chun, Bhubbari chu an tlingnaw ding thu le Bus neitu chengna Belonia chen chu an phur thei ding thu le hi taka inthawk jeep laa a fena ding a tlung thei ding thu a hril leiin nupui hin remtia Bus a hi chuong zawm pei a nih.

Zan dar 7:30 vel a hung ni chun Driver hin a assistant chu Bus hi inkhal tirin nuhmeinu hi va panin sex neipui a pawisa pek dingin a thlem a, sienkhawm a lo nuom peknaw leiin a suollui a, zan dar 8:30 velin Gouranga bazaar area­a Mr Mohanlal Das an tipa in tuola intumtirin an tlansan el niin ei thu dawngna chun a hril.

Suolluia um nupui hi nau pahni nei tah, a pasal chu middle east tienga sinthawa um nia hril a nih.

Lionel Messi thla 21 jail intang dingin
MADRID: Barcelona soccer star Lionel Messi chu Tax a pek ding ang a pek nawh tia intumna le inzawmin Barcelona Court chun thla 21 sung jail intang dingin zanikhan thiemnaw an changtir. Messi baka hin a pa Jorge khawm thla 21 jail intang dingin Court chun thiemnaw an changtir bawk a nih. Thiemnaw inchangtira an umna hi Spanish Supreme Court­ah ngaituo that dingin appeal an thaw thei ding niin court statement chun a hril.

Amiruokchu, Spanish law dungzuiin under probation in kum 2 sung um thei a ni a, a umzie chu Messi le a pa Jorge hai hi Jail an intang kher ring a um nawh tiin ei ei thu dawngna chun a hril. Court chun Messi fine 2 million euros (dollar 2.21 million) chawi ding le a pa hi 1.5 million euros fine chawi dingin a rel bawk a nih. Messi chun, financial chungchang ienkhawm hriet a neinaw thu le football a khel el a ni thu Court­a a chungthu rel huna hin a hril.
------------------------------------------------------------------------------------------
Union Council of Ministers hai le an portfolio thar
PRIME MINISTER
Narendra Modi :Personnel, Public Grievances and Pensions, Department of Atomic Energy Department of Space; All important policy issues and all other portfolios not allocated to any Minister

CABINET MINISTERS
1. Rajnath Singh - Home Affairs
2. Sushma Swaraj - External Affairs
3. Arun Jaitley - Finance & Corporate Affairs
4. M Venkaiah Naidu - Urban Devpt. Housing & Urban Poverty Alleviation, Information & Broadcasting
5. Nitin Jairam Gadkari - Road Transport and Highways & Shipping
6. Manohar Parrikar - Defence
7. Suresh Prabhu - Railways
8. D V Sadananda Gowda - Statistics & Programme Implementation
9. Uma Bharati - Water Resources, River Development & Ganga Rejuvenation
10. Najma A Heptulla - Minority Affairs
11. Ramvilas Paswan - Consumer Affairs, Food & Public Distribution
12. Kalraj Mishra - Micro, Small & Medium Enterprises
13. Maneka Sanjay Gandhi - Women & Child Development
14. Ananth Kumar - Chemicals & Fertilizers, Parliamentary Affairs
15. Ravi Shankar Prasad - Law & Justice, Electronics & Information Technology
16. Jagat Prakash Nadda - Health & Family Welfare
17. Ashok Gajapathi Raju Pusapati - Civil Aviation
18. Anant Geete - Heavy Industries & Public Enterprises
19. Harsimrat Kaur Badal - Food Processing Industries
20. Narendra Singh Tomar - Rural Development, Panchayati Raj Drinking Water & Sanitation
21. Chaudhary Birender Singh - Steel
22. Jual Oram - Tribal Affairs
23. Radha Mohan Singh - Agriculture & Farmers Welfare
24. Thaawar Chand Gehlot - Social Justice and Empowerment
25. Smriti Zubin Irani - Textiles
26. Harsh Vardhan - Science & Technology, Earth Sciences
27. Prakash Javadekar - Human Resource Development
MINISTERS OF STATE
28. Rao Inderjit Singh - Planning (Ind.Charge) Urban Devpt. Housing & Urban Poverty Alleviation
29. Bandaru Dattatreya - Labour & Employment (Independent Charge)
30. Rajiv Pratap Rudy - Skill Development & Entrepreneurship (Independent Charge)
31. Vijay Goel - Youth Affairs and Sports (Independent Charge), Water Resour-ces, River Development &   Ganga Rejuvenation
32. Shripad Yesso Naik - AAYUSH (Independent Charge)
33. Dharmendra Pradhan - Petroleum and Natural Gas (Independent Charge)
34. Piyush Goyal - Power (Independent Charge) Coal (Independent Charge)
  New and Renewable Energy (Ind.Charge) Mines (Ind. Charge)
35. Jitendra Singh - Development of North Eastern Region (Independent Charge),   Prime Minister’s Office, Personnel, Public Grievances &
 Pensions, Department of Atomic Energy, Department of Space
36. Nirmala Sitharaman - Commerce and Industry (Independent Charge)
37. Mahesh Sharma - Culture (Independent Charge), Tourism (Independent Charge)
38. Manoj Sinha - Communications (Independent Charge), Railways
39. Anil Madhav Dave - Environment, Forest and Climate Change (Ind. Charge)
40. VK Singh - External Affairs
41. Santosh Kumar Gangwar - Finance
42. Faggan Singh Kulaste - Health & Family Welfare
43. Mukhtar Abbas Naqvi - Minority Affairs, Parliamentary Affairs
44. SS Ahluwalia - Agriculture & Farmer Welfare, Parliamentary Affairs
45. Ramdas Athawale - Social Justice & Empowerment
46. Ram Kripal Yadav - Rural Development
47. Haribhai Parthibhai Chaudhary - Micro, Small & Medium Enterprises
48. Giriraj Singh - Micro, Small & Medium Enterprises
49. Hansraj Gangaram Ahir - Home Affairs
50. GM Siddeshwara - Heavy Industries & Public Enterprises
51. Ramesh Chandappa Jigajinagi - Drinking Water & Sanitation
52. Rajen Gohain - Railways
53. Parshottam Rupala - Agriculture & Farmer Welfare, Panchayati Raj
54. MJ Akbar - External Affairs
55. Upendra Kushwaha - Human Resources Development
56. Radhakrishnan P - Road Transport & Highways Shipping
57. Kiren Rijiju - Home Affairs
58. Krishan Pal - Social Justice & Empowerment
59. Jasvantsinh Sumanbhai Bhabhor - Tribal Affairs
60. Dr Sanjeev Kumar Balyan - Water Resources, River Development & Ganga Rejuvenation
61. Vishnu Deo Sai - Steel
62. Sudarshan Bhagat - Agriculture and Farmers Welfare
63. YS Chowdary - Science & Technology, Earth Science
64. Jayant Sinha - Civil Aviation
65. Rajyavardhan Singh Rathore - Information & Broadcasting
66. Babul Supriyo - Urban Development, Housing & Urban Poverty Alleviation
67. Sadhvi Niranjan Jyoti - Food Processing Industries
68. Vijay Sampla - Social Justice & Empowerment
69. Arjun Ram Meghwal - Finance, Corporate Affairs
70. Dr Mahendra Nath Pandey - Human Resource Development
71. Ajay Tamta - Textiles
72. Krishna Raj - Women & Child Development
73. Mansukh L Mandaviya - Road Transport & Highways, Shipping, Chemicals & Fertilisers
74. Anupriya Patel - Health & Family Welfare
75. CR Chaudhary - Consumer Affairs, Food & Public Distribution
76. PP Chaudhary - Law & Justice, Electronics & Information Technology
77. Dr Subhash Ramrao Bhamre - Defence

VAWISUN THUPUI
Chuongchun, Pathienin ama angpuiin mihriem a siem a, Pathien angpui ngeiin a nih a siem chu, pasal le nuhmeiah  a siem a nih. ­ Genesis 1:27

Editorial: Thing phun

Tulai hi thing phun hun lai a ni leiin ei ram sawrkar chun thingkak phun dingin a semsuok ur ur a. Thing phun tienga inhnikna neihai ta dingin ngaiven hun le thingkak phun hun lai tak a nih. Thingkak phun a pawimawzie hi ei hril uor hle a, a pawimawna hi chu hril tam ngai lova ei hriet seng ta a nih. Environment humhimna ding chau ni lovin thing hi mihriem hai hmangruo pawimaw tak a ni leiin thing phun uor chu ei thaw ding makmaw anih. Ei economic ngirhmun a lan hnuoi leiin thlaisuongna Gas hmang nekin meihawl le thingher hmanga thlai suong ei la tam lem lei khawmin thing phun hi ei uor le ei taima hrim hrim a tul a nih. Kum tin thingkung a singtel ei satthluk a, meihawl le thingher lakna a hmang mi ei ni leiin ei thingkunghai a bo vawng nawna dinga kum tina a tam thei ang tak thingkak ei phun thar chu ei thaw ding makmaw a nih.

Tlangmihai ei chengna hi a tlangpuiin tlangram inten tak tak a ni a. Furpui hun laia ruo a hung sur tam chang chun hmun tam takah mimkei rapthlak tak tak a tlung hlak a, mimkei leiin thina le hliemna tuok khawm ei bo bik nawh. Mimkei laka ei inhumhim theina pakhat chu thingkung lien hi a ni leiin ei ramin thingkung lien, zung nghet taka kei chi ei mamaw rawn hle a nih. Thingkung lien hi mimkei rapthlak tak tak tlung thei ding dang theitu a ni leiin thingkung lien chi hi phun uor lem inla nuom a um.

Chun, thing hi sum lamsuok theina tha tak a ni a. Hi lei hin thingkak naran el chau ni lovin sum hmu theina chi thing hieng lamkhuong, theihai, zawngta le a dang dang hai hi phun uor zuol thei inla nuom a um. Chun, thingzar lien chi hmawng le bung thing hai hi tlangram, a bikin lamlien sir le ram intenna hmun haiah phun uor inla mimkei lakah nasa takin a mi venghim thei ngei ding a nih. Hmawng le bung thinghai hi a zar a lien a, deihlim tha tak le zung detindo taka kei hlak a ni leiin tlangrama phun ding chun a tha bik zuol a nih ti inla ei hril suol taluo ring a um nawh. Hieng a ni lei hin  hiengang thing hi phun uor zuol ei tiu.

Amiruokchu, thing ei phun dingin ngaituona hmang a pawimaw hle. Ei thing phun ding kha a par le a ra hai vatehai tlan thei chi a ni am? A hna tlahai inrang taka hmawn zung zung thei a ni am? A phunna hmun an chep dim, hmun hluo le hnawksak a hung ni dim? ti le thil dang tam tak ei ngaituo hmasak a pawimaw hle. Far (pinnus) tieng chi hai, Conifers an ti hai hi a zar a mawiin an buk nasa naw a, evergreen an ni leiin lamlien sira phun dingin a tha hle. Amiruokchu, a par le a ra hai hi rannung hai ta dingin tlan ding a um naw a, a hnahai hi an hmawn intak a, pil a sukthur a, pil a suksiet hlak leiin bu le thlai chingna hmun le bul hnai haiah chun phun le ching chi an ni nawh tiin mithiemhai chun an hril.

Ei ram sawrkar khawmin thing phun hi a ngaipawimaw a, thing phunaa hmang dingin sum tam tak a sangsawn hlak. Hi le inzawm hin kum tinin Vanamohatsav (A tree planting festival) a huoihawt hlak. Tu kum khawm hin “One Tree, One Family” ti thupui hmangin Manipur state sunga hmun hran hran haiah Vanamohatsav, 2016 a huoihawt. Churachandpur district a ngei khawm July 7, 2016 hin Kangvai Model Village, (Community Hall) ah District Level in Divisional Forest Officer, Southern Forest Division, CCPur in Vanamohatsav, 2016 a huoihawt ding a nih.

Thing phun ei ram sawrkarin a ngaipawimaw hi lawm a umin a that em em vei le inruolin a neka ngaipawimaw ding chu thingkak phun zo hnunga ‘a enkawlna’ tiengpang hi a nih. Tha le zung, sum le pai tam tak sengin kum tin thingkak nuoitel ei phunzie hlak. Official record­a chun a tha el thei. Amiruokchu, a enkawl le venghimna tieng ei ngaisak nawk ngai ta sinaw leiin ei thingkak phun hai hi a tam lem an thi nawk vawng hlak. Ei thing phun a puitling hi chu zaah pakhat a tling dim maw?  Hieng hi ei ngirhmun a ni leiin a enkawl zuina tiengpang hi ngaipawimaw hle ding a nih.

Don't Miss
© all rights reserved
made with by Simon L Infimate