Responsive Ad Slot

1st RPL 2016 ah Thangkhanpau Memorial FC (TMFC) in a pakhatna an lak

Sunday, July 24, 2016

/ by VIRTHLI HMAR
CCPUR, July 24, 2016, Virthli (ONP): June 3 – July 23, 2013 inkar sunga football khelna, team 12 in vel 11 seng an khelna 1st Rengkai Premier League (RPL) 2016 football final match chu Thangkhanpau Memorial FC (TMFC) le Zawlbuk FC in an inkhel a, TMFC chun an khingpui Zawlbuk FC chu 3-1a hnein hrattak nina an lo lak tah a nih. TMFC chun a pakhatna lawmmanin Trophy, Sumfai Rs. 10,000/- le Certificate an dawng a, a pahnina Zawlbuk FC chun Trophy, Sumfai Rs. 5,000/- le Certificate an dawng. RPL a thang club/team 12 hai chu Certificate in hlan vawng an nih. Huoihawttu FAST chun RPL hlawtlingna dinga sum le kawng dang danga thangpuina lo petuhai, hi match a thang club/team hai po po, Media tienga lo mihaiin hi RPL an hrietphana le lo thangpuitu Hmasawnna Thar Daily Newspaper, Online News Portal- Virthli le CCPur Times hai chungah lawmthu an hrila, chun Fast hin hunsawtnawte ah Gospel Camp buotsai an tuma hi thil a ding hin T-Shirt rawng chi hran hran Pathien thu le inzul, thu ziek tha tak tak tulai taka design Rs. 350/- a inthawk a chungtiengin an zawr suok mek chu rawngbawl nuom hai ta dinga kawt lientak hawng a ni thu an hril bawk.


Khuollien Pu Lalramlien  Darngawn chun hiengang FAST in a huoihawt chu lawmum le hmasawnna a ni thu, Khawvelin football an ngai ropui ta thu hrilin India ram khawm hma a sawn zie le India Captain khawm Mizo Jeje-a a ni thu a hril. Khuol inzaum Pu Thangchuoilo Vice President, HYA Rengkai Branch chun RPL inkhel a ni huna inkhelmi thiem tak tak hmu ding an um chu lawmum a ti thu, chuonglai zinga fak-le-dawn kawnga fimkhur a ngai thu hrilin, hratna chang khawmin mi nakhel zawnga lawm le program buotsai nagilo dingin an fui a. Hrat naw hai khawm fak lo le dawn lo ding thil hrie a, fimkhur taka nun khal ding le hun nawka iengtina hnena chang thei ding am ti ngaituo lem dingin an fui bawk. Khuol Chawngpu Pu Ramnunsiem @Aren Sanate chun RPL huoihawttu FAST thil tum ball pet el niloa Gospel Camp chen le thil dang danga khawm an thangkai pei dinga a hmu thu le a lawmthu a hril a, sawrkar infuk naw thu, election hun a mipui thanglak dan an dik naw zie le mi bussiness kara um ei ni tah tiin a hril a, Rengkai khawsung ngei khawm a ni ding anga lampui le thil dang dang hai a um naw thu a hrillangsa bawk.

Goal thuntuhai chu TMFC tadingin Zawlthang (Jersey-20), Ramsang (4) le Paosei (7) hai anni a, Zawlbuk tadingin John David (14) in a thun bawk. Cash Prizes hai hi Pu M. Gouzamang Guite Rengkai bieltu MDC le EM, ADCC in a tum a nih. Hi huna hin Nk. Jennifer Nianglawmkim, Pu Ramhluolien Khawbung le Pu Lien Shakum haiin hla mawi tak takin mipui fekhawm hai an in awi. FAST chun memento Khuollien, Khuol Inzaum le Khuol chawngpu hai an inhlana anni hai khawmin thilpek an inhlan. Hi hun a hin ama taksa ngei hung inlang thei naw de sienkhawm Pu Laldawnlien Varte Gen. President, HYA GHQ chun RPL Opening Ceremony huna a lo intiem ta angin AGS, HYA GHQ fethlengin thilpek an hlan. Hi huna hin FAST member fam lo chang tah hai inzana le hrietzingna'n inkhel hmain CDSA Referee inrawinain totawka minute 1 sung tawngtaina nei a nih. RPL a hin vawi 132 lai zet match nei a ni phak a nih.

Report: LRS Puruolte Photographs: Muona, Virthli


Don't Miss
© all rights reserved
made with by Simon L Infimate