Aizawl, April 12, 2016 (Virthli) Kum liem tah April thlaa General Election to Village Council 2015 nei a ni tum khan Aizawl District huomsunga khaw 25 le Kolasib District huomsunga khaw 6 haiah vauna leiin inthlangna dinga ngir (candidate) an um naw leiin inthlangna nei ani ta nawa. The Lushai Hills District (Village Councils) Amendment Act 2014, sub-section (7) of Section 3 hnuoia siem The Mizoram (Election to Village Councils) Rules 2014, Rule 3(1) in thuneina a pek angin Mizoram State Election Commission chun hieng khaw 31 hai a hin By-Election to Village Councils nei dingin thusuok siem in May 19, 2016-ah inthlangna a um ding a nih..
State Election Commission (SEC) chun inhriettirna hi 12.4.2016 hin a suk suoka, inthlangnaa ngir tum hai ta dingin 26.4.2016 zantieng dar 3 chen hming peklut thei ning a tih. Hming pek lut hai hi 27.4.2016 zing dar 10 anthawk sun dar 12 inkarah endikna nei ning ata, inhnukdawk nuomhai ta dingin 28.4.2016, zing dar 10 le sun dar 12 inkar hun hawng pek ning an tih. Inthlangna chu 19.5.2016, zing dar 7 anthawka zantieng dar 4 chen nei dinga ti a nia, inthlangthat (re-poll) ngai a um a ni chun a zing May 20-ah re-poll nei ning a tih. Inthlang zo velah vote tiemna um nghal a tih.
Inthlang puong a ni tak leiin Model Code of Conduct chu vawisun anthawk hin Aizawl le Kolasib District-a inthlang neina ding constituency huomsunga hai hmang tan nghal a nia, hi Model Code of Conduct hin political party po po, inthlangnaa ngir ding candidate hai, Minister, Parliamentary Secretary, Member of Parliament, MLA, Municipal Councillor-hai le Village Council inthlangnaa inhnamhawi sawrkar sinthawtu a huom sa vawng ding a nih.
Tuta tuma by-election a ding hin Assembly Electoral Roll thar tak chu hmang ani ding thu Mizoram State Election Commission thusuok chun a hril.
