Responsive Ad Slot

32nd ICI CKTP Gen. Conference, New Delhi: REPORT

Monday, April 11, 2016

/ Published by Joyful Thiek
11 April 2016, New Delhi (VIRTHLI): ICI Central Kristien Thalai Pawl (CKTP) General Conference vawi 32-na chu 8 - 10 April 2016 sung khan New Delhi hmunah hlawtling taka hmang zo a lo ni tah. Shri Kiren Rijiju, Union Minister of State for Home Affairs, Govt. of India chu 10 April khan khuollien in a thang a, Rev. Thangngur Award le Buonglienkung Music Award hai zawngna khawm nei a nih.

Hi inkhawmpuilien a thang ding hin mikhuol 1000 lai an fe khawm thu hriet a nih a, inkhawmpui panna lampuia hin Hmar mi ngat 800 chuong 6 April 2016 khan rel (train) a chuongin, Hmar mi nikhat sunga rela chuong rawn tak record chikhat siem a nih. Mikhuol hai ta ding hin transit camp pahnih (Hmarkhawlien & Guwahati ah) buotsai a nih a, an reng hin All India Prayer Fellowship (AIPF) campus, Chhatarpur, New Delhi a intlung an nih.

8 April 2016 (Zirtawpni) khan mikhuol hai ta dingin bus 19 hire in Delhi khawpuia hmunuomum hai enna (site-seeing) nei a nih a, Lotus Temple, India Gate, Qutub Minar le Bethesda Social Service Centre (BSSC) hai en le thlaw an nih.

9 April khan rorelna le Worship Service AIPF Auditorium-a nei a nih a. Zan inkhawm tinah Rev. Thangngur Award zawngna (solo competition) first round nei a ni bawk.

10 April (Pathienni) ruok chun Jawahar Lal Nehru Stadium Auditorium, Lodhi Colony ah Worship Service tum 2 nei a nih a. Hi hun a hin Shri Kiren Rijiju, Hon’ble Union Minister of State for Home Affairs, Govt of India chu khuollien a thangin, ama ta dinga tawngtaipekna Rev. Lalneikhup Hmar, Secretary, Finance, ICI in a nei.


Worship Service session hai bak a hin Buonglienkung Award zawngna (Choir Competition) nei a nih a, Rev. Thangngur Award zawngna final round nei a ni bawk a nih. A hnuoia ang hin lawmman pek dawk a nih:

Choir Competition (Presbyteries):
1st (*Buonglienkung Award): Assam Hills Presbytery
2nd: Guwahati City Church
3rd: Jiribam Presbytery

Choir Competition (Mission Fields):
1st: Assam Mission Field
2nd: North Tripura & Karimganj (NTK) Mission Field

Solo Competition (Presbyteries):
1st (*Rev. Thangngur Award): Nk. Lalhmunmawi @ Neithangveng, Cachar Presbytery
2nd: Nk. Lalbiekkim Bapui @ Muolhoi, Assam Hills Presbytery
3rd: Nk. Mari Tuolor @ Guwahati City Church

Solo Competition (Mission Fields):
1st: Vinod, Tripura Mission Field
2nd: Mercy, North India Mission Field
3rd: Mala, Arunachal Mission Field

Hi inkhawmpuilien a hin KTP member hai laia inchukna tienga thawtha bik mi 2 (pahni) kuomah lawmpuina certificate pek a nih a; chuong hai chu, Nk. Rose-El Rothangmawi, UPSC All India Combined Geologists & Geo-Scientists exam ah All India Rank 11 a hmu lei le Pu Dr. Immanuel Zarzosang Varte, Ph.D a zo lawmpuina in. Chu el khelah, Youth Care Centre (Thalai In) project a Rs. 10,000 le chungtienga thangpuina pe hai kuomah ‘Pillars of Thalai In (Appreciation Certificate)’ pek suok a ni bawk.

Worship service hai a hin thuhriltu ah Rev. Lalhmingthang, Secretary, Evangelism, Rev. Lalrohlu, Presbytery Secretary, Hmarbiel South, Upa Dr. Zawlthanglien, Vice-Chairman CKTP, Rev. Vijayesh Lal, General Secretary, EFI, Rev. HP Runremthang, Youth Co-ordinator le Rev. Lalneikhup Hmar, Secretary, Finance hai an thang a, thuhril thenkhat hai hi vai tawnga inlet an nih. Conference Greetings Elder Chul Dong Han, Sinam Church, South Korea, Shri Kiren Rijiju, Rev. Zathangsing Zate, Executive Secretary, Ms. Darthangmawi, Women Co-ordinator hai anthawk ngaithlak a ni bawk.

ICI KTP 32nd General Conference hih kohran le pawl dang dang hai khawmin an va uop ve a, ‘Pillars of Thalai In’ le ‘One Day for Christ’ campaign hai khawm a hlawtling hle thu hriet a nih. Inkhawmpui fe ve thei lo hai ta dingin programme um sung po internet a entheina LIVE STREAM buotsai a nih a, hi Live Stream hin views 1700 chuong a hmu phak niin ei thudawngna chun a hril.

Kum 2017 hi Conference chun ‘Inpumkhatna Kum (Year of Unity)’ in a puong a, 33rd General Conference hi Tuithaphai Presbytery a innghat ning a tih.
Don't Miss
© all rights reserved
made with by Simon L Infimate