Responsive Ad Slot

Hmasawnna Thar | 01 March, 2016

Tuesday, March 1, 2016

/ Published by VIRTHLI
Dept. tum tum han thawktu pension hai an inthla
CCPUR: Mr Khaikhanlian Guite, DI of School, CCPur le staff hai chun zanikhan an sinthawpui a sina inthawka pension L. Thanzam, AI of School/CCPur inthlana CCPur Govt. Hr. Sec. School­ah an nei a,  parthi inhlitirna an nei bakah Belpui pakhat an pek.

ADC/CCPur Chairman inrawinain CEO,ADCC le Staff hai chun an sinthawpui V. Kamzagin, EO (Town); Hemkhothang, LDC; S. Kamzachin,Driver le Thangzagen Gangte,Water carrier hai inthlana zani zangieng 1:00PM khan Tuibuong­a ADC Office hall­ah an nei. Pensioner 4 hai hi ADC Chairman chun present inhlanna neiin Pathien kuoma tawngtaipekna a nei. Staff han parthi le Belpui 1 seng an pek a; Dist. Council Employees Assn. chun Rs. 50,000/­ seng an inhlan bawk.


L. Mangkhogin Haokip, IPS, SP, CCPur office chamber­ah zani zantieng khan Police department thawktu an sina pension mi 2­ SI N. Zamkhanpau, Reserveline le ASI Langkhanthang Zou, Anti­Human Trafficking Unit hai inthlana an nei. SP/CCPur chun pensioner 2 hai kuomah present a pek  a, pension chen sin thaw thei dinga an um malsawmna a ni thu hrilin an pension na le inzawma document sukfel tul hai SP le Staff han an buoipui ding thu a hril.

Chun, District Hospital­a OPD Hall­ah zani zantieng khan Dr J. Songoukham Samte, Med. Supdt., Dist. Hospital inrawinain an thawktu chanpui mi 11 an sina pension hai inthlana hun an hmang bawk. Hi huna inthla hai chu ­ Dr N.Samte; Dr Ch. Hauzel; Staff Nurse ah­ K.Zalianchhungi; H.Chalsiam; Chinggohniang, Ningmang Paite; Kimneiching  le  Grade­IV –a T.Ginkhopau; Ngaikhonaing le  T.Hatpi  hai an nih.

Ralthuom phur pasal 4 man an nih
CCPUR:  February 28, 2016, 8:30PM vel khan 7­Assam Rifles han Moirang le CCPur inkar   Torbung village­ah  ralthuom  an phur leiin  mi 4 ­ Thangminlen Haokip @ Laxman (35) s/o Mangkhogin of D.Phailian; Ngamminthang (23) s/o Paolen of Suongdojang village; Thangjalen Gangte (41) s/o Lhunkhothang of Tuilumjang le Jangngam Haokip (38) s/o Lunlal Haokip of K.Thenjang village  hai an man. Mana um hai kuta inthawk hin country made  9mm pistol 1, magazine 1 le a mu 2, mobile phone 4, Rs.1160, purse 1, 9mm pistol mu bawm ruok  (empty case) 1 le  Honda Activa MN02D­2409  an  man a,  CCpur Police kutah an peklut.  CCPur Police chun hi thua hin FIR No.11 (2) 2016 CCP­PS u/s 25 (1­C) A.Act & 34 IPC an registered.

ADC Chairman in ditsakna an hlan
CCPUR: Mr Langkhanpau Guite, Chairman, ADC/CCPur chun Feb. 22, 2016 a tan HSSLC (Class XII) Exam, 2016 candidates le March 1, 2016 a HSLC (Class X) Exam. 2016 tan dinga candidates hai chu hlawtling seng dinga ditsakna an hlan. Thienghlim taka exam ding le unfair means tukhawma thaw lo dingin a ngen bawk.

Finance Minister Arun Jaitley in Union Budget 2015-16 Lok Sabha-ah a phar
NEW DELHI: Finance Minister Mr Arun Jaitley chun zanikhan  Lok Sabha hmuna Union  Budget 2016­17 a phar. Tuta tum hi Arun Jaitley in a zawna Lok Sabha­a Union Budget a phar vawihnina a ni tah. Union Budget a hin sawrkarin Agriculture le Social Sector hai ngaipawimawzuol ni dingin a hril. Defence Budget­ah Rs. 340,922 crore; Defence pension a dinginRs. 82,333 crore;MGNRGA Job Scheme a dingin Rs.38,500 crore;Gram Panchayat le Municipalities Grant­in­Aaid a dingin Rs. 2.87 lakh crore; Pradhan Mantri Gram Sadak Yojana a dingin Rs. 19,000 crore; Agriculture a dingin Rs. 40,000 crore; Prime Minister Fasal Bima Yojana a dingin Rs. 5,500 crore; Rural Sector a dingin Rs. 87,700 crore; Agriculture credit a dingin Rs. 9 lakh crore hai a thang.

Thilman kaisang dinghai lai Cigarette, inheina thuomhnaw (branded garments),Car, Vuongna chuongman, hnuoithatna le industrial­a Solar heater hai  bakah dum hmanga siem  thil hai a thang a; Thilmang tlahnuoi dinghai lai Pheikawk, Electronic thil, electric motor, electrical equipment, lekhapuon, paper board, newsprint, pat le a dang dang hai a thang. Chun, Budget a hin BPL sungkuo hai ta dingin LPG policy thar a thangsa. Fiscal Deficit target 3.5% a nih.

Finance Minister Arun Jaitley chun, Loneitu le mirethei hai ngirhmun dawmsang le tlangram khaw kilkhawr hai ngirhmun dawmsang chu sawrkarin a ngaipawimaw tak a ni thu hrilin loneitu hai sum hmusuok chu kum 2022­ah a letin a pung ding thu; Tlangrama chenghai ngirhmun dawmsangna dingin Rs. 87,700 crore hmang dinga riruong a ni a;

May 1, 2018 chenah India rama tlangram khaw kilkhawr electric meivar la tlung nawna hmun hai electric meivar pek hman vawng tum a ni a, hi thil thawna dinga indin Deen Dayal Upadhyay Gram Jyoti Yojana le Integrated Power Development Schemes haia hmang dingin Rs. 8,500 crores riruong a ni a, fai le thienghlimna tiengpanga Swachh Bharat Mission a dingin Rs. 9,000 sie a nih tiin a hril.

HSLC Examination, 2016 tan ding
IMPHAL: Board of Secondary Education, Manipur hnuoia HSLC Examinaton, 2016 chu vawisun hin tan ning a tih. Private Exam centres 68 thangsa in exam centres 87 ah candidates 37,700 exam an tih. HSLC Exam thienghlim taka nei a ni theina dingin members 45 umna Flying Squad le Micro Observers ruot an nih. Flying Squad le micro­observer hai hi camera inchawitir an nih.

Police Commando 5 hai suspended­na order hlip
IMPHAL: Manipur­a Congress MLAs han Manipur Police Commandos personnel 5, Feb. 25, 2016 nia an sina suspended­a an umna le inzawma suspended an nina Feb. 20, 2016, 11AM chena hlip a ninaw chun Assembly Budget Session fe mekah an thang naw ding thu an hril leiin Police Commandos 5 hai suspended­a an um hlipna ‘revocation of suspension order’ chu zanikhan Manipur DGP in an suo.

Naga Students Federation (NSF) hotu thenkhat Police Commandos han an sawisak nia intumna le inzawma NSF in Naga mi hai chengna biel sunga Meitei/Manipuri motor hai lut an khap hnunga Police Commando 5 hai kha suspended an nih.

M. Prithviraj MLA tling dan an dik  nawin
IMPHAL: 10th Manipur Legislative Assembly Election huna Moirang A/C a inthawka M. Prithviraj thlangtlinga puonga a umna chu zanikhan Manipur High Cort chun an diknaw niin a puong. Election hi kum 2012 a nei a ni a, M. Prithviraj hi Congress party candidate a ni a, an khingpui P. Saratchandra chun hi election le inzawma a khingpuiin affidavit a peklut chu an dik naw a nih tia hekna a siem a nih. Affidavit a pekluta educational qualification a ziek chu an dik nawh ti P. Saratchandra heknaa hin a thangsa.

Assembly in Demands 7 an passed
IMPHAL:Manipur Assembly chun zanikhan Department hran hran 7 hai sum hmang ding, Demands 7 an passed. Demand passed­a um hai chu­ Power, Youth Affairs & Sports, Sationary & Printing, IFCD, Art & Culture, Tourism le Land Revenue, S tam etc hai an nih.

Irom Sharmila Chanu insuo
IMPHAL:  Irom  Sharmila Chanu chu heka a  umnaa inthawk thiem inchangtirin zanikhan Lamkhanpau Tonsing, Chief Judicial Magistrate, Imphal West in hrentanga a umnaa inthawk an suo. Irom Chanu Sharmila hi Armed Forces Special Powers Act, 1958 Manipur pumpuia inthawk hlip dinga bungheia nuorna a nei leia case siem khuma um a nih.

Nupui pakhat inkhaihlum saa hmu a nih
IMPHAL: Zani zingkar dar 7:30 vel khan Bishnupur Police Station huop sunga Kwashiphai an ti hmuna Hatneikim Zou (32) w/o Tungnung Joseph Zou (35) of Chothe Village Ward No. 12, Bishnupur District chu Thingkung pakhatah inkhaihlum saa hmu a nih. Hatneikim Zou hi a puonbi lai hmanga inkhaihluma hmu a nih. A sunghai chun a thi dan hi an ringhla leiin Police in case an registered.

Zirtirtu pakhat kap hlum a nih
IMPHAL: Zanikhan NSCN (IM) ni dinga ringhla han Aimol Village, Chandel District­ah Zirtirtu pakhat an kap hlum. Hi inthatna dodalnain zanikhan Pallel ah mipui an pungkhawm a, Imphal le Moreh inkara fe ding motor hai an dang.

Petrol man Rs. 3.03 a sukhnuoi
NEW DELHI: India rama chun Petrol man litre 1­ah Rs. 3.04 a sukhnuoi a ni a, Diesel man ruok chu litre 1­ah Rs. 1.47 a sukpung a ni thung. Petrol man sukhnuoi le Diesel man sukpungna hi February 29, 2016 zanril le March 1, 2016 a inthawk hmang tan ning a tih. Hi dungzui hin Delhi­a chun Petrol litre 1­ah Rs. 56.61 ni tang a ta, Diesel man chu litre 1­ah Rs. 46.43 a hung nita thung ding a nih tiin IOC thusuok chun a hril.

Alok Verma in Delhi Police Commissioner
NEW DELHI: Senior IPS Officer Alok Kumar Verma chun zanikhan Delhi Police Commissioner sin a chel tan. Mr Alok Kumar Verma hin B.S. Bassi a thlakthleng a nih. Mr Verma hi 1979 batch IPS Officer,Arunachal Pradesh­Goa­Mizoram and Union Territory (AGMUT) cadre niin Tihar Jail­a Director General sin thel lai a nih. South District Dy. Commissioner; Joint Commissioner, Crime Branch; Joint Commissioner of Police, New Delhi Range; Special CP (Intelligence) le Special CP, Vigilance sin hai lo chel ta a nih. Delhi Police Commissioner hlui Bassi hi zanikhan Police Headquarters­ah inthlana nei a nih.

Assam­a Hmar Political issue thu ah Central Sawrkar thuoitu hai an inbiekpui ding
NEW DELHI: Assam rama Hmar Political issue le inzawmin  Hmar hnam aiaw thuoitu han March 1, 2016 hin Central sawrkar thuoitu Joint Secretary (NE) Satyendar  Garg le Dy. Secy. Ajay Kanoujia hai inbiekpuina nei an tih. Hi huna Hmar hnam aiawa thang ding hai chu Dr John H. Pulamte, Ex­President, Hmar Inpui inrawinain Mr Lalbeisei Hmar, Ms. Lalropui Hmar, Ms Lalramhnem Buongpui le Coordinator in Delhi Mr Romeo Hmar hai thang an tih.

Assam­a Hmar political issue thua hin  Feb. 26, 2016, 7PM khan HI President hlui, Dr. John Pulamte, Pu RC Tryte, Pu Lalbeisei, David Hmar,Chawnghmunlur Varte le Lalawmpui Hmar han Assam CM Tarun Gogoi an lo inhmupuiin  NC  Hills (Dima Hasao) le Barak Valley a Hmar political issue hai chingfel pek dingin an lo ngen ta a,  Pu Gogoi chun, Assam sawrkar aiawa Hmar issue le inzawma thang tak Home Commissioner le Addl. DGP hai an rawnpui zovah Hmar hai ngirhmun chingfel a ni ding thu a lo hril ta a nih. Assam rama hin HPC(D) Assam Region chun Assam sawrkar le Central sawrkar  leh tripartite agreement neiin HPC(D) Assam Region chun silai khawm an lo intung ta a nih.

PM Narendra Modi ramdangah an zin ding
NEW DELHI: March 30, 2016 a inthawk April 3, 2016 inkar sung khin PM Narendra Modi chu ramdangah inzin a tum. Ramdanga an zin sung hin Belgium, USA le Saudi Arabia hai sir a tih.March 30, 2016 in New Delhi suoksanin Belgium pan a ta, Belgium a inthawk Washington (USA) pan a ta, Nuclear Security Summit­ah thang a ta, hi zo April 2, 2016 in Saudi Arabia pan a tih. Belgiuma hin India­EU Summit­ah thang a tih. Pakistan thangsain Nuclear security summit­a hin rambung tum tum 50 vel an thang ding nia hril a nih. Kum 6 liemta hnunga India PM Saudi Arabia ram an zin nawkna hmasa tak ding a nih.

Pak. Governor hlui thattu khai  hlum
ISLAMABAD: Pakistan­a liberal Punjab Governor hlui Salman Taseer thattu Police Commando hlui Mumtaz Qadri chu zanikhan Pakistan chun a khai hlum.  Kum 2011 khan  Mr Mumtaz Qadri hin Governor hlui Salman Taseer hi Islamabad khawpui­ah sun var laiin  vawi 28 laizet silaiin a kap a, damzo lovin Taseer hi a thi a nih. Qadri khai hlum a ni dodalnain zanikhan Pakistan ram pumpuiah Islamist hai hun protest an nei bakah ‘black day’ in an puong. Qadri hi Rawalpindi khawpuia Adialia jail sunga zani zingkar 4:30AM a kha khaihlum a nih. Taseer hi Christian sakhuo zuitu nuhmei pakhat Islam sakhuo in­thuoi dan ‘black laws’ a nih tia hriltu tan zawnga tawngkam a nei leia Qadri hin a kap hlum nia hril a nih.

VAWISUN THUPUI
Ngai ta u, ka sukthieng cheu a na, nisienlakhawm, tangka sukthieng ang chun a ni nawh; rinumna raw tuina meia chun ka fie cheu a nih. ­ Isai 48:10

Editorial
Taimakna indik le indiklo

Zohnathlakhai hi ei pi le pu, ei thlatu haia inthawk hnam thabo ni ngailo, hnam taima le mani tawka intodel khipkhepa lo um hlak hnam ei nih. Amiruokchu, hun a hung fe pei a, ei taimak dan a hung danglam pei ta niin an lang. Taimakna tha le indik sawmtung pei la um de inlakhawm taimakna indiklo, taimakna tangkailo le taimakna ditumlo haia taima hi thangtharhai lai nasa takin a hung inlar a, taimakna indiklo le tangkaina nei lovin bu a mi khuor khum a, ei sungkuo nun le khawsakna hai a hung suksiet a, taimakna tha lo le indiklo hi ei tuorhla ta bek bek el a nih. Hi lei hin taimakna indiklo le ditum lo takel hai hi do a hung ngai ta a nih.

Pathien thu chun tlaksam ei nei ngainawna dingin sin tangkai thawa inhmang zing ding le tukhawm um mei mei lo dingin a min chuktir a nih (Tita 3:14).  Zohnathlakhai hi hnam thabo hrim hrim ei ni ngai nawh ei ti ta kha, ei taimakna thenkhat hi sin tangkai ei thawna a ninaw leiin taimakna tangkailo hi bansan le tawpsan a hun ta a nih. Zanah ei meng sawt a, zingkar ei tho inhnu a lo ni khawmin sin tangkai le thil pawimaw ei thaw lei ni thei ngei sienla nuom a um. Huou huou thawna haiah ei tlang tawl seng. Huou huou thawna programme haia ei imu a suok thei ngainaw ang bawk hin ei lekha tiemna le ei sin thawna hai sengah taima inla nuom a um.

Bike a zan sawt tak tak hnunga tlan kuol le risie siem pawisa der lova zan re hnunga zurui leia khek rak rak dam, thaw ding pawimaw le emergency thil ni si lova hrat deu deuva motor khala tlan puot puot hai dam hi mi thabo invak kuol invak kuol a, a ruk thei ang patawpa a zawrna hmun dap ti dam, ruk inruk ding zawnga mihai zal le in hun nghaka chet ti hai dam hi mi thabo sin an ni der nawh. Amiruokchu, hiengang taimakna hai hi taimakna ditum lo le taimakna indiklo an nih. Hiengang zawnga taimakna hi tawpsan thei seng inla chu ei ta ding senga that tlangna a hung ni el ding a nih.

Tulaia thangtharhai, a bik takin nunghak, tlangval le tleirawl hai thil ching tha lo le ditum lo takel chu tulna ni lova Mobile phone le computer inhnelpui hi a nih. Nu le pa thuawinawna le suol intanna bulpui pakhat a nih ti inla ei hril suol taluo ring a um nawh. Ei nauhai hin lekha an tiem amani ei sawn a, totawkin an pindan sungah an um a, zan sawt tak tak an meng a, ngai tha deuin ei um a, exam result a hung suok a, nu le pa tam takin parent call ei hmu a, chu pha zet chun ei nauhai taimakna kha a lo indiknaw zie ei hung hriet suok chau hlak. Taimakna indiklo a ni ve tlat leiin nauhai khawmin hiengang zawnga an taimakna hi chu mi bansan pek hai sienla nuom a um khawp el.

Football le Game hran hran inkhel en taima, a suok hun darbi buoi lo, khawvar thak thak khawma en pei khawm hi thabo sin chu a ni der nawh. Mi thabo hai ta ding chun khawvar chu thil harsa takel a nih. Nisienlakhawm, thil tangkaina neilo, insung ta dinga hlawkna um der lo thawna ding kawnga hin ei thalaihai hi ring nekin an taima khawp el. Lekha tiema khawvar chu an pei der naw a, inkhel ena khawvar, mobile phone inhnelpuia khawvar le huou huou thawna haia khawvar chu awlsam an ti hle. Hieng thil hai hi taimakna indiklo hai laia thangsa an ni leiin thalai han ei bansan ngam a tul.

Sum le pai, fak le dawn, sil le bil hmu theina dinga sinthaw taima, sumdawng taima, lekhathiem nina dinga lekha inchuk taima le lekha tiem taima, thil tangkai thawna dinga meng sawt, mithi inleng leia khawvar le a dang dang hai chu taimakna tha le indik an nih.  Hiengang thil thawna ding haia hin ei taima thei phawt chun ei mimal le sungkuo nun inhawi a ta, khawtlang, kohran, ram le hnam khawmin tangkaipui a tih. Taimakna indiklo bansan a, taimakna indik hraw dinga thalaihai po po in ei lungril ei thlak danglam a hun ta a nih. Iengang malsawmna dawng ding khawm ni inla taimakna indik ei fepui a tul. Taimakna indiklo ei fepui sung phawt chun intodelna, hlawtlingna le malsawmna hai hin mi hung bawm ngai naw nih. Chu nek chun tlaksamna, harsatna, retheina le beidawngna chi tum tum han mi hung bawm hlak an tih.

Don't Miss
© all rights reserved
made with by Simon L Infimate