Responsive Ad Slot

Kohran tinin zaikhatin Lal piengni champha urlawk

Wednesday, December 23, 2015

/ Published by VIRTHLI
Aizawl, 23 Dec, 2015 (Virthli News): Mi tamtak hriethlaw ninaw sienkhawm, ni 22 December, Thawle zân kha Mizoram chanchin ah inchikthlak le mellung pawimawtak a ni ve tlat el.
Mizoram-ah chanchinṭha lut kum nia hrietlar kum 1894 ânthawk tiema Kristiennain kum 121 lai an vawi hnung le kohran tamtak phun a ni hnungin a vawikhatna di'n Mizoram-a kohrantin deu thawin zaikhatin Lal piengni champha an urlawk.

Mizo/zohnathlakhai laia pathienthu (Bible) inchûk zo tah le lan chûk mekhai pawl ti a hrietlar Mizo Theological Association (MTA) huoihawtna hnuoiah December ni 22 (Thawleni ) zân khan Aizawl lammual (Assam Rifles Ground) ah Mizoram-a kohran popo huopin Unity Carol Service buotsai a ni a, kohran hran hran a inthawkin mipui ṭhahnemtak an fekhawm.

Hi hunah hin mas (Christmas) hla dang dang hmangin lengkhawm buotsai a ni bakah Mizoram-a gospel artiste hming thang tak tak le Gospel Musical Band inlar tak tak ha'n an thiemna le an rawlmawihai hmangin mipui fekhawmhai an in awia, MTA president Rev. Dr. Lalchhuanawma ânthawkin Pathienthu cha ropuitak ngaithlak a ni bawk.

Thlasik khawdai tak kara mipui fekhawmhai hmelah hlimna le phurna mawl chun hi programme hi a hlawtling zie a sukchienga, kohran tin inzawmkhawm ‘Unity choir’ in 'Halleluia Chorus' thiemtaka an rem chun mipui na a sukthlei hle. Unity Choir a hin EFCI (EFCI Choir) kohran khawm a lusa pawl an ni nghe nghe a nih.

Hi programme puol lieu lieua buotsai EFCI female voices- Rosy Vanlalhlani, Caroline Biakthansangi, Margy Lalremruati le Lalremkimi ha'n an rawlmawitakhai hmangin mipui an in awia, "By the river of Babylon" (Mizo/Lusei version) thiemtaka an sak chun mipui lawm a hlaw hle.
Gospel artiste lai hin Nk. Pensy Lalthangliani, Nk. Margareth Malsawmzuali (Maggie), Nk. Lalduksaki, Nk. Vanlalpari, NK Rebecca Zorintluangi le NK Esther Lalrinhlui hai malzai-ah an inlang bakah Tv. Andrew Laltlankima & Grace Lalchhanhimi (Mizo Idol 2014) le Tv. K. Vanlallawmawma & Judith Lalremruati ha'n madley mawi tak tak an rema, musical band hieng- Drop Doubt, The Prophets; brass band-'Territorial Staff Band'(Salvation Army) le group singing- 'One in Christ' hai an inlang bawk.

Unity Carol Service hi kohran popo ha’n inngeinawna neu neu le inthlierhranna hai sirah hnawla Lal Piengni champha hi inremtak le lungril hmunkhat putin lawm thei a nih ti inentirna’n buotsai a ni thu MTA thuoituhai chun kha hma khan chanchinbumihai an lo hril tah a nih.

Hi lai zing hin Mizoram chun Christmas vawi 145na lai a lo hmu dinga an ta a. Mizorama Christmas hmasatak chu kum 1871 khan Tuivai vadung kamah British Sipai, Mary Winchester sansuok dinga Mizoram hunglut (Lushai Expedition 1871-72) hai khan an lo hmang dai tah a nih.Welsh Missionary Rev. Williams William in kum 1891 khan Mizoram (Lushai Hills) ah chanchiná¹­ha a hril hmasatak nia hriet a ni a, chu umzie chu chanchintha lut hma, kum 20 hma dei khan Mizoram ah Christmas lo hmang a ni tah ti na a nih.




Don't Miss
© all rights reserved
made with by Simon L Infimate