Responsive Ad Slot

Hmasawnna Thar | 21 November, 2015

Saturday, November 21, 2015

/ Published by VIRTHLI
Tuolsung
IGNOU Induction prog hmang
CCPUR: Zani 11:00AM khan Indira Gandhi National Open University, CCpur College Study Centre (1702) ah Induction program hmang a nih. K. Vungzamawi, Coordinator, IGNOU Study Centre in lawmlutna thucha a hril a, Know Your University ti thupui hmangin IGNOU Regional Centre, Imphal a inthawk le Vanlallawm, Principal CCPur College han thuhrilna hun an hmang.



K. Vungzamawi chun CCPur IGNOU study Centre hi Jan. 7, 1991 a indin a ni thu, CCPur district-a Post Graduate Course inchuk theina umsun a ni thu a hril. Kum 2008 a inthawk CCPur Study centre chun student hai le thangruolin examination system sukdanglamin tuchen hin exam system thienghlim taka nei theia um a ni thu a hril.

Dr. Oinam Jaya Lakshmi, Assitant Director, Regional IGNOU, Imphal chun, IGNOU hi kum 1985 a indin le kum 1987 khan IGNOU in students 4500 a nei tiin a hril a, tuhin India rama IGNOU regional Centre 56 le ramdang (abroad) ah centre 22 a um mek tiin a hril.

IGNOU hnuoia Course tum tum inchuk han online-a status update thaw hlak dinga hrilin Identity Card a hming indiklo le a dang dang hai an rang thei anga regional cenre inhriettir hlak dinga student hai ngenin study material semdawkna a nei.

MGNREGS ni 7 sinthawna ding sanction
CCPUR: Chairman, DRDA le Executive Director, DRDA/CCPur chun zanikhan MGNREGS 2015-16, 2nd Phase-a Block 10 haia Job Card holder hai ni 7 sin thawna ding sum a sanctioned. Sum sanctioned lai hin material cost ding khawm a thangsa.

Sum sanction-a um Block 10 hai chu- Thanlon block-ah khuo 64; Singngat block -ah khuo 96; Lamka block-ah khuo 60; Saikot block ah khuo 41; Sangaikot block-ah khuo 103. Tipaimukh block-ah khuo 18; Vangai block -ah khuo 35; Henglep block-ah khuo 170; Tuibuong block-ah khuo 174 le Samulamlan block-ah khuo 109 hai an nih.

MGNREGS 2015-16 a 1st phase a khan  Job Card holder hai ni 5 sin thawna ding August 12, 2015 khan sanction a ni a, Job Card holder hai nikhat hlaw chu Rs.190/- a nih.

Disaster Authority meeting nei
CCPUR: Zani zantieng 1:00PM khan District Relief & Disaster Management Authority/CCPur chun DC Office Chamber-ah meeting an nei a, SDOs hai le CEO bakah line department hai an thang. Hi huna hin tukum sunga tuilien le thlihrangin thil a suk siet hai chungthua SDOs han report an pek le state sawrkarin fund a hung pek  chu an milnaw a, a tlawm taluo leiin DC/CCPur chun SDOs hai chu thangpuina pek ding hai a thara thlangsuok thar dingin mawphurna a pek.


Thanksgiving prog. an hmang
CCPUR: Lamka RPC KTP chun kum 2015 sunga Pathienin tam taka a thuoina le tuchena tukhawm an member thina tuok um lo le member sawrkara sin nei thar dam an um leia Pathien kuoma lawmthu hrilna 2015 Year End Thanksgiving programme zanikhan an hmang.

RAS kum 20 tling lawman nei
CCPUR: Zani 10:30AM khan NGO Rural Aids Service (RAS) chun 20th foundation day an office, Tuibuong-ah an hmang. Hi huna hin Mr Lunminthang Haokip, IAS, DC/CCPur khuollienin a thang a, Guest of Honour in Dimgoulung, Secy. RRC/RNBA le Thangchinkhup Guite, DDM/NABARD hai an tang a, functional president in N. Sukajit, PM. NERCOMP/CCPur a thang.


Hi huna hin Dimgoulung chun website: www.rasnei.org a hawng a, khuollienin Souvenir a hawng a, Rev. D. Jangkholam, Executive Director, EAC in RAS staff hai ta dinga Pathien kuoma tawngtaipekna a nei.

Nitish Kumar in Bihar CM dingin intiemkamna a nei
Minister dinga intiemkamna nei 28 lai Lalu naupasal pahni Tejaswi le Tej Pratap hai an thang
PATNA: Mr Nitish Kumar chun zanikhan Patna khawpuia Gandhi Maidan-ah Governor Ram Nath Kovind hmaah RJD, JD-U le Congress thangruol Bihar –a Grand Alliance sawrkar-a Chief Minister dinga intiemkamna a nei. Hi huna hin RJD Chief Lalu Prasad naupasal pahni Tejaswi Yadav le Tej Pratap hai thangin midang 28 han minister dinga intiemkamna an nei bawk.

Minister dinga intiemkamna nei hai lai hin RJD a inthawk 12, JD(U) a inthawk 12 le Congress a inthawk 4 an thang. RJD Chief Lalu Prasad naupasal pahni zanita minister dinga intiemkamna nei hai hi an MLA vawikhat tlingna ve ve a ni a, Tejaswi Yadav (26) chu Bihar Deputy Chief Minister dinga ruot a nih.

Nitish oath taking ceremony-a thang hai lai hin Congress Vice President Rahul Gandhi, Prime Minister hlui H. D Deve Gowda, West Bengal CM Mamata Banerjee, Delhi CM Arvind Kejriwal; PM Narendra Modi in sawrkar thlungpui aiawa a tir Union Minister M. Venkaiah Naidu; CPI-M leader Sitaram Yechury, CPI leader D Raja; JD(U) President hlui Rajiv Ranjan Singh Lallan, Bijendra Prasad Yadav, Shrawan Kumar le Jay Kumar Singh bakah out going members hai po po; MP hlui MP Maheshwar Hazari, Krishna Nandan Prasad Verma, Santosh Nirala le Khurshid @ Firoz Ahmad; Lok Sabha opposition leader Mallikarjun Kharge, minister hlui Subodh Kant Sahay; J&K CM hlui Farooq Abdullah  le a naupa Omar Abdullah, Assam-a inthawk AIUDF leader Badaruddin Ajmal; HP CM Virbhadra Singh, Kerala CM Oommen Chandy; Assam CM Tarun Gogoi le Karnataka CM Siddaramiah le cine-star Nagma hai khawm an thang.

Mr Nitish Kumar chun Home le Personnel portfolio hai chel a ta, Tejaswi chu Road le Building construction; a unaupa Tej Pratap chu Health portfolio pek an nih. Minister dang hai portfolio ding khawm puong vat ni tang a tih.

Bihar Assembly seats 243 uma inthlangnaa khan Grand Alliance -a RJD in seats 80, JD (U) in seats 71 le Congress in seat 27, an rengin 178 an lak a nih.

Constitution in a phalpek dungzui chun Chief Minister thangin Bihar chun Minister 36 a nei thei a nih.

Thongju le Thangmeiband A/C byelection
IMPHAL: Election Commission in a lo puong ta angin vawisun hin Thangmeiband A/C le Thongju A/C haiah byelection um a tih. Vote neitu han zing dar 7 a inthawk zantieng dar 4 chen vote thlak thei an ta, vote tla hai November 28, 2015 khin tiem ning a tih. Election thienghlim le fel taka nei a ni theina dingin Flying Squad, surveillance team sie an ni a, Election observers 3 sie an ni bawk.

Thongju A/C ah candidate 3 an um a, chuonghai chu Th. Bishwajit (BJP), Bijoy Koijam (Congress) le Dr Tonsana (MPDF) hai an ni a, Thangmeiband A/C ah candidate pahni an um a, chuonghai chu Jyotin Waikhom (Congress) le Kh. Joykishan (BJP) hai an nih.

Thangmeiband biela hin voters 26,537 an um a, polling stations 41 hawng ning a ta, Thongju bielah voters 28,215 an um a, polling stations 45 hawng ning a tih.

Vawisun Sangai Festival tan ding
IMPHAL: Manipur Sangai Festival 2015 chu vawisun November 21, 2015 hin tan ning a tih.  Sangai Festival hi November 30, 2015 chen aw ding a ni a, Tukum Sangai festival a hin Norweigian Ambassador, Nepal, Japan, Thailand, Myanmar le Cambodia haia inthawk palai an  hung thang ding thu Manipur Chief Secretary O.Nabakishore chun a hril. Kum danga ang bawkin Myanmar a inthawk Sangai festival sim ding official hai chu Golden Myanmar flight in  Nov. 21, 2015 hin Imphal Airport an hung tlung ding thu le thil ditumlo a tlung nawna dingin venghimna sin khau taka thaw a nih tiin Chief Secretary chun a hril.

IRCS in artificial limbs mi 6
IMPHAL: Indian Red Cross Society (IRCS), Manipur State Branch chun National Headquarters, IRCS leh thangruolin tuchena hin mi 6 hai kuomah artificial limbs a thlawnin an pek ta thu an hril. Artificial limbs 6 a thlawna an sem hai hi Rs. 35,000 manhu vel a ni thu an secretary Dr Y. Mohen chun a hril.

Kum 2 le a chanve mi kap hliem
IMPHAL: Zani hmasa zan sawt hnung khan Imphal West district-a Thongju Part-II a Pheija Leiton Makha hmuna tu ti hrietlo han In pakhata silai vawi 5/6 lai an va hmetpuok leiin a pa Chirom Sharat Meitei le zal  Chirom Lanchenba (2 ½ ) chu a hnungzang lai kap hliem a nih. Naupang hi Shija Hospital and Research Centre, Langol-ah enkawl mek a nih. A kaptu hai hin an tum tak chu a pa Chirom Sharat Meitei a ni a, sienkhawm an kap fuk naw a nih. Sharat hi BJP candidate worker a ni a, byelection hung um ding le inzawmna nei ring a nih.

MTFD in Jantar Mantar-ah relay protest an fepui zing
New Delhi: Manipur Tribals Forum Delhi (MTFD) chun Anti-Tribal Bills 3 hai dodalnain Nov. 4, 2015 a inthawk khan tribal martyrs hai coffin leh Jantar Mantar hmuna relay sit-in-protest an fepui zing a. National Commission for Scheduled Tribes (NCST) Vice Chairman Shri. Ravi Thakur khawmin protest na hmuna hin thu hrilna neiin a thei chena hma a lakpui ding thu a hril.
Jantar Mantar hmuna MTFD Protest-naa fekhawm mipui hai lai JAC in martyrs hai ruong November 30, 2015 nia vui dinga a rel chungthua ngaidan lakkhawm a ni hunah a tamlemin vui tha an la tinaw a, hi thua hin MDFD chun Nov.19, 2015 khan JAC Chief Convenor kuomah ziek ngeiin Martyr hai ruong vui dinga thutlukna siema um chu ennawn dingin an lo ngen ta a nih.

SC in MP Governor Notice a pek
NEW DELHI: Supreme Court chun Madhya Pradesh Governor Ram Naresh Yadav chu MP Professional Examination Board (PEB) ‘Vyapam Scam’ tia hrietlar-ah inrawlna neia intumna le inzawmin notice a pek bakah sawrkar thlungpui chu Ram Naresh Yadav hi Governor a ninaa inthawk ban dingin an hriettir. Supreme Court chun hi chungthua hin State sawrkar khawm chawlkar 3 sunga hrilfiena pe dingin an hriettir bawk. Vyapam scam-a inrawlna neia intum hai lai hin Mr Naresy naupa Shailesh khawm a thang a, sienkhawm March 25, 2015 khan ringhlaum takin Lucknow hmuna a thisaa hmu a nih.

Senior advocate kap hlum
MHOW: Madhya Pradesh-a Mhow hmuna chun zani hmasa zan sawthnung khan tu ti hrietlo motorcycle a chuong mi pahni han senior advocate Yogesh Garg chu na takin an kap hliem a, inrang taka hospital panpui a ni a, sienkhawm damzo lovin a thi. Yogesh Garg hi zan dar 11:40 vela Sanghi Street-a a Office-a inthawk suoka a Car innghatna Lakhsminarayan temple a pan lai meka kap a nih tiin Mhow Police station incharge Ashok Tiwari chun a hril. A awm le ring haiah silaimu lutna hmu theiin a um. Garg hi Sardarpur-a Dhar khuo mi niin criminal lawyer inlar takel a nih.

Pawisa lem thedartu mi 2 man
NEW DELHI: Zani hmasa zan Delhi Police han Bihar-a Bettiah district mi India pawisa lem thedartu pasal 2 an man. Mana um hai chu Haridya Thakur le Nagender Ram hai an ni a, Nigambodh Ghat hmuna an agent inhmupui dinga Delhi-a hung an nih. An kuta inthawk pawisa lem Rs. 1,000 note 87; Rs. 500 notes 30 man a nih.

Jihadist han Mali hotel-ah mi an hrentang,3 an kap hlum
Bakamo: Zani zingkar khan Mali-a Bakamo khawpuia luxury Radisson Blu Hotel-a chun terrorist han silai kap puokin hotel-a tlung mikhuol le thawktu 170 vel an hrentang a, hi thu ei sut chena hin an mi hrentang hai laia 3 an kap hlum a, hrentanga um mi 80 hai chu dam le hima sansuok an nitah tiin TV report chun a hril a, India mi 20 hotel-a um hai khawm hima insuo ni tain ei thu dawngna chun a hril bawk.

Hotel va beitu hai hi diplomatic plates intarna Car hmanga hotel campus sunga lut le Jihadist pawl an nih tiin security thusuok chun a hril. A va beitu hai hin ‘God is great’ tia khekin an silai hai hmetpuokin Grenades an dengpuok bawk nia hril a nih.
--------------------------------------------------------------------------
VAWISUN THUPUI
Thil suol thawtuhai leiin inlau naw la, mi khawhlo khawm chu inhnar bawk naw rawh. Mi rilo kuoma chun lawmman um naw nih a, mi khawhlo khawnvar chu herhlum a ni ding a ni sih a. -
-Thuvarhai 24:19--20

Editorial
7th Pay Commission Recommendation

Sawrkar thlungpui chun ei  ram le khawvel economy ngirhmun le inmil peiin, kum 10 dan peiah Central Government hnuoia thawktu hai hlaw a ennawn hlak a. Hi le inzawm hin Central Govt. thawktu hai hlaw ennawn tu dinga ruot Justice AK Mathur inrawinaa 7th Pay Commission chun zani hmasa khan Finance Minister Arun Jaitley kuomah Central sawrkar hnuoia thawktu hai hlaw sukpungna ding report an pek a. Commission recommendation hi Cabinet in a pawmpui chun January 1, 2016 a inthawk hmang tan a ni ta ding  a nih.

Hieng laizing hin Central Govt. in a hnuoia thawktu hai hlaw a hung sukpung huna hin thil man a hung kaisang hlak leiin state pasie, a bikin mi pasie hai ta ding chun thil lawmum a ni hran ngai naw a, sienkhawm khawvel economy le enmil peia sawrkarin a thawktu hai hlaw a ennawn le an khat tawka a ennawn a tul tlat si leiin a pasie hai chu ei pasietna a zuolpei ding a nih. Central sawrkarin a hnuoia thawktu hai hlaw a sukpung hlak hi khawvel khawsakna le economy izir-a a thaw hlak a ni lai zingin ei economy hmasawn pei na dingah mithiem hai a hip ve theina dingin hlaw chungthuah private sector hai an elpui a ngai bawk leiin thawktu hlaw sukpung pei chu sawrkar thlungpui ta dingin a lo thei lo a nih.

7th Pay Commission recommendation dungzui hin Central Govt. hnuoia thawktu nuoi 47 hai basic salaries chu 16 persent in hung pung a ta, allowances chu 63 percent le overall a hlaw pung ding chu 23 percent a hung ni ding a nih. 2008 Sixth Pay Commission a khan thawktu hai hlaw 35 percent a sukpung a nih. 7th Pay Commission a hin house rent allowance 139 percent in a pung a, pensioners nuoi 52 hai hlaw chu 24 percent in a hung pung ding a nih. Central Govt. hnuoia thawktu a hlaw tlawm tak han thla khatah Rs. 18,000 hlaw tang an ta, apex scale han Rs. 2.25 lakh per month le Cabinet secretary chin le hi rank a mi han Rs. 2.50 lakh per month hlawng an ta, Central Govt. thawktu hai hlaw annual increment 3 percent hung ning a tih. Amiruokchu Seventh Pay Commission hin Grade Pay le Pay band sukbo dingin a recommended a, Health Insurance scheme introduce dingin a recommended a; Military service hai hlaw chu a leta tama sukpung a nih. 7th Central Pay Commission recommendation hi hmang a hung ni hun sawrkar thlungpuiin thawktu hai hlawin kum khatah Rs. 1.02 lakh crores a seng belsa ding a nih.

Pay Commission reccommendation hi a tlangpuiin sawrkar thlungpui chun a pawm hlak a, hi lei hin Central Govt. hnuoia thawktu hai chun 7th Pay Recommendation dungzui hin January 1, 2016 a inthawk hlaw an hmu  ngei beisei a nih. Central Pay Recommendation hi State sawrkar hai khawma sukdanglam hretin an hung hmang hlak a. State sawrkar hnuoia thawktu han Central Pay ang pe ve dinga state sawrkar an hung mawr hlak bawk leiin sawrkar thlungpuiin hlaw a sukpung hlak hi state pasie deu a bikin Manipur state sawrkar ta ding chun harsatna intluntu a hung ni hlak.

6th Pay Commission kha kum 2008 in hmang tan a ni a, state intodel deu hai chun Central in hlawbi thar a hmang zova inthawk sawtnawte hnunga an hung zui vel el thei hlak a, Manipur ruok chun a hmang ve el thei ngai nawh. Tukhawm hin kum hung thar a ta, thawktu han 7th Pay Commission recommendation ang hlaw pe ve dinga ngenna le nawrna a hung inri sup sup nawk ngei ring a um a, state sawrkar lu nasa takin a sukhai rek ding a nih. Kum 1997-2001 sunga Wahengbam Nipamacha Singh Chief Minister nina hnuoia Manipur State Congress Party (MSCP) in sawrkarna an chel lai khan thawktu hai ngenna angin  sawrkar hlaw an sukpung rawk a, Manipur sum ngirhmun in a zir si naw leia Overdraft nasa tak um leia sawrkar thawktu hai chau ni lova mipuiin harsatna ei tuok nasat zie kha ei la hriet tawl seng ring a um. Hlaw sukpung chu sawrkar ta ding khawma nuom a um, sienkhawm sum ngirhmunin a zir si lova nuoma hlaw sukpung, pek thei si lo nek chun pek thei tawk hlaw ei nei chu a thalem ti sawrkar thawktu han ei hriet a tul. Tuta Manipur sum ngirhmun en lem chun 7th Pay Commission reccommendation dungzui hin state sawrkar chun a thawktu hai hlaw a pek theinaw hulhuol ding a nih.

State sawrkar khawmin ramdang le state dang hai ang bawka mani thawktu hai hlaw a hunbi ang peia a sukpung ve zat zat theina dinga hma a lak ve a tul. Chu ding chun state sawrkarin sum lamsuokna ding tiengpang uor taka a fepui a tul. Development sin thaw ei ti zing lai ei state sum ngirhmun siemthatna ding tiengpang ei ngaitha tlat chun development tak tak hi hmu thei ngainaw manih.

Don't Miss
© all rights reserved
made with by Simon L Infimate