Responsive Ad Slot

Hmasawnna Thar | 10 October, 2015

Saturday, October 10, 2015

/ Published by VIRTHLI
Tuolsung
Martyrs sungkuo hai an inpawlpuina an nei
CCPur:  PTC GHQ, YPA GHQ le SSPP GHQ executive meeting thurel angin zani zantieng 2:00PM khan PTC Office­ah Tribal Martyrs 9 sunghai inpawlpuina an nei.
   
YPA GHQ President S. Chingngaihpau chun, Tribal rights le land humhalna dinga martyrs 9 hai thisen in CCPUr district sungah inpumkhatna an tlun el chau ni lovin Hill district pumpuia  inpumkhatna an tlun thu, martyr hai thisen a thlawna luong an remtinaw leiin JAC le ATSUM thuoitu hai hmlak pei nain New Delhi­a an fe thu, Schools le office hai ruong vui hma chu khar ding ti nisienkhawm student hai hmakhuo ngaina leia Schools hai hawng nawk dinga hotu han an rel a ni thu a hril. Hmasawnna dingin education a pawimaw a, phairam biel hai angin home tutor/coaching ei lak zo naw leia school hawng nawk dinga rel a ni thu  a hril.
   

SSPP Jt. HQ chun, ram le hnam sanna dinga hringna inhlantu hai inzana pein victims family han Bill 3 le Separate administration an thlierhran thiem a pawimaw thu; bill 3 hai that nisien khawm Manipur sawrkarin bill dang a hung pass nawk pei ding a ni leiin ei nau le tu le te hai ta dingin Bill 3 hai fethlenga Separate Administration buoipui a ni thu an hril.

Martyrs sungkuo hai khawmin JAC hmalakna an ringzo thu, hotu hai thu ti lo social media haia thuthang ring mei mei lo dingin mitin an ngen.  LT Tonsing, Chairman CWC PTC GHQ chun victims family hai ta dingin tawngtaipekna a nei.

Health official hai CCPur­ah an hung
CCPur: Integrated Disease  Surveillance Programme hnuoia zanikhan Imphal­a inthawk Kh. Sashikumar Mangang, State Epidomology Officer inrawinain official 4 an hung a, CMO le Medical Superintendent, Dist. Hospital hai an inhmupui. Official hung hai hin CMO kutah damdawi iemanizat an hung phur hai an inhlan. Damdawi an hung phur hai lai Normal Saline (glucose) 100, RL 100, IV set 50 a thang a, Medical Supdt. District Hospital kutah RL 50, DNS 50 an pek bawk. Dengue natna hri inleng mek le inzawmin District Hospital­a Children Ward le Medicine Ward haia khum 3 ve ve huol dingin Medical Supdt. leh remruotna an siem a, zanikhan Dengue ni dinga ringhla damnaw mi 30 hai thisen sample laka um hai khawm Imphal tieng an phur nghal.

Zan dar 8 chen Dharna inthung ta dingin
CCPur: JAC chun zanikhan inhriettirna siemin Dharna inthungna hmun dinga ruot haia Dharna in­thung hai chu zan dar 8 chen inthung ta dingin an inhriettir. Hi baka hin Bandh hun zantieng 2:00PM a inthawk intan a ni leiin zantieng 2PM hnunga chun Bandh inza seng dingin mipui hai an ngen.

JAC kuta ralna Rs. 10,300 a lut nawk
CCPur: JAC against Anti­Tribal Bills hnuoia Finance Sub­Committee in In tina Rs. 100/­ le a chungtieng tribal martyrs hai ralna dinga a dawl chu zanikhan khuo 4 haia inthawk Rs. 10,300 a lut belsa nawk. Zanita khuo 4 ralna sum petu hai chu Sangaikot block a PN Khovong Rs. 500/­; Samulanlan block a Haotak Phailen Rs 2800/; Tamenglong Dist a Joujangtek Rs 5000/­ le Thanlon block a Zoupi Rs 2000/­ hai an nih.

Thingpui inlum hun roster
CCPur: District Hospital Morgue­a October 10­21, 2015 inkar sunga ruong nghaktu hai dawn ding thingpui inlumtu ding hai (duty roster) JPO in an siem thar. Hi dungzui hin Oct 10, 2015 in ZYO; Oct 12 in YVA; Oct 13 in YPA; Oct 14 in YMA; Oct 15 in KKL; Oct 16 in SYO; Oct 17 in CYA; Oct 19 in HYA; Oct 20 in ZYA le Oct 21, 2015 in TYO duty an tih.

JPO kuta ralna Rs. 67,020 a lut
CCPur: Zanikhan district Hospital morgue­a JPO kutah mimal le Organisation 9 han martyrs hai ralna dingin Rs. 67,020/­  bakah puon 12 le maibal 3 an pek. Ralna le thangpuina petu hai lai ­EBCC Kanaan, New Lamka Rs.10,000 le puon 9; Teikhang V/A Development, Mizoram Rs.5,000/­; Chothe Lim Abom, Chandel Dist Rs.5,000/­ le  puon  3; Evangelical Lutheran Women Assn.Gundung Division Rs.2,500/­; Issac Hmar Memorial Foundation,Imphal Rs.10,000/­; H.Tualkhanneng of V.Munhoih, New Lamka Maibal pum 3; Ruby Self Helf Group, Ccpur Rs.1,000/­; Pastor Prayer Fellowship, New Delhi Rs.12,910/­; Kangchup Area Rs.20,000/­ bakah gate donation/reception Rs.610/­ a nih.

DIO in  damdawi tam tak an kap
CCPur: District Immunization Office (DIO) hnuoia Routine Immunization staff hai chun April­September, 2015, thla 6 liemta sung khan naupang le nuhmei naupai tam tak damdawi an kap. Hieng hai lai hin nuhmei naupai TT damdawi kap 2052, naupang 2459 hai TB vengna BCG kap an nih. Chun, Naupang 6187 hai Khulhip (DPT) damdawi kap an ni a, naupang 6187 hai Zenghri vengna Polio kap an nih. Naupang kum 1 le a hnuoitieng mi 7477 hai Hepatitis damdawi kap, naupang 3416 hai Sentut (measles) vengna kap; Naupang 116 JE vengna kap le naupang 3056 hai Vitamin A indawntir an ni a, naupang kum 5, kum 10 le kum16 an rengin mi 3387 hai TT damdawi kap an nih.

Jolzam le L. Molvom­ah awareness
CCPur:  FNS/ICDP (CCPur) ­ DD:RPC. NEI hmalaknain October 10, 2015, 6:30AM khin Jolzam Community Hall­ah tulaia natna chi tum tum laka inveng dan ding thuah hrilhrietna Awareness on W.A.S.H. nei ning a tih. Chun, October 11, 2015, 6:30AM in hiengang awareness hi L. Molvom Community Hall­ah nei ni bawk a tih. Awareness hun h aia hin Mr Haopu Gangte le S. Muana hai bakah Medical Department, CCPur hai resource person in thang an tih.

OPD ah mi 19839 an inen
CCPur: Rural Health Mission hnuoia Revised National TB Control Program chun January­September, 2015 inkar thla 9 sung khan OPD ah mi 19839 an enfel. Chun, hi hun sung ma hin mi 1237 hai khaksaw (new sputum) an enfel a, follow up (old sputum) 336 an nei a, TB invawi thar mi 162 hai kuoma TB damdawi an pek thar. Thla 9 sunga TB damdawi faa damfel le course zo mi 107 an um a, TB natna nei (positive) 84 hmu thar a ni bawk.

Nunghak Camp
CCPur: Ladies Prayer Fellowship (LPF)  chun JAC/CCPur remtipuinain hungtlung ding October 12­15, 2015 inkar sung khin  Gilead Prayer Mountain Kawnpui­ah “Come, let us return to the Lord (HOsea 6:1) thupuia hmangin Grace Camp buotsai a tum. Hi camp a lut nuom han Oct. 12, 2015, 11­12:00PM chenah camp neina hmun ding tlung kim seng ding a nih. Camp­a thang nuom Registration pelut lo han camp lut hunah Registration fee Rs. 100 peka thang thei ni bawk a tih.

Nobel Peace Prize-2015 dawng dingin Tunisia National Dialogue Quartet
Oslo: Norwegian Nobel Committee chun Coalition of civil society groups Tunisian ‘National Dialogue Quartet’ chu Nobel Peace Prize 2015 dawng dingin zanikhan an puong. Tunisian National Dialogue Quartet a hin civil organisation 4­ Tunisian General Labour Union; Tunisian Confederation of Industry, Trade and Handicrafts; Tunisian Human Rights League le Tunisian Order of Lawyers hai an um a nih.
   
Jasmine Revolution 2011 hartharna hung um le inzawma politics dan indik tak hmanga Tunisia rama democracy roinrelna humna dinga an thaw hlawkna le Middle East, North Africa le khawvela rambung tum tuma inremna le democracy dittu hai ta dinga entawntlak taka hma an lakna leia Nobel Peace Prize hi inhlan dinga Nobel Committee in puong a nih. 
   
Tunisia rama mipui helna le politics thila buoina nasa tak a tlung hun, mipui sawrkarna tluse el dinga a hung um lai kum 2013 a kha sawrkarna enkawl le Democracy sawrkar tluse el dinga kei ngirtu dinga Quartet hih hieng pawl 4 hai hin lungruol taka an indin a nih. Tukum sung ringawt khawm extremist hai chetna leia mi 60 zetin thina an tuok le an ram democracy sawihning zing a ni laia ram chin tham takel in Nobel Prize el chau bakah prize sum tam tham tak a dawng ding hi Tunisia ram ta ding chun hnena ropui tak a nih.
   
Nobel Prize 2015 hi Organisations 4 thangruol hai insem dinga pek a ninaw a, Quartet kuoma inhlan a nih tiin Nobel Committee thusuok chun a hril. 
   
Nobel Peace Prize 2015 a ding hin nominations 273 zet a lut a, sienkhawm kum 2014 nek chun nomination lut hi 5 in a tlawm lem. Nomination hmu hai lai hin German Chancellor Angela Merkel le Pope Francis hai khawm an thang a nih.
   
Nobel Prize Medicine, Physics, Chemistry le Literature dawngtu ding hai tuta hma khan puong a lo ni ta a, Economics a Nobel Prize dawngtu ding chu October 12, 2015 khin puong ning a tih. Nobel Economics hi a tan hlima siem ni lo, kum 1968 a inthawka indin le pek tan chau a nih.
   
Nobel Peace Prize sum hi dollar 972,000 a ni a, December 10, 2015 khin inhlan ning a tih.

Temporary a siem Chakpi leilak tuiin a len
Imphal:   Ruo nasa taka a sur leia  August 31, 2015 nia Tuilienin Chakpi vadung chunga Leilak  RCC Bridge  a len hmang leia Chakpikarong mipui hai hraw dinga remporary­a leilak siema um chu   ni 2 vel inzawm zuta ruo a sur leia tui  a lien nawk leiin zani zingkar khan  a len hmang nawk.  RCC Brige hi a hmasa takin kum 1966 a Calcutta­a um  Company in an siem  sem a nih.

Manipur­a khawm Natl. Postal Week
Imphal:  India ram pumpuia National Postal Week tan a ni le inzawmin Manipur­a khawm zanikhan  Head Post Office, Imphal­ah  National Postal  Week  hmang tan ve a ni a,  Vinod Kumar, Director (post) chun  zanikhan  National Postal Week hi a hawng. Postal week hi tuta kar sung po hmang ding a ni a, hi hun sung hin events tum tum buotsai ning a tih. Mr Vinod Kumar chun, Postal system  thatlemna dinga thurawn tha hai lawmlut zing a ni thu a hril. Postal  Week sung hin Postal division le Sub­Divsion le branches tin haiah World Post Day, Saving Bank Day, Mail Day, Philately Day, Postal Life Insurance Day le Business Development Meet Day haia hmang a ni ding thu a hril. India hi khawvela Postal Network nei lien tak niin March 3, 2014 chen khan Post Offices 1,54,882 a um.

JSCC in administrative block an kal
Imphal: AMSU, KSA, MSF le SUK hai umna Joint Students’ Coordinating Committee (JSCC) chun All Manipur Recognised Private Schools’ Welfare Association le All Manipur School Van Transports’ Association hai le agreement an lo siem tasa sukpuitling a ninaw leia a dodalnain zanikhan Heritage Convent School, North Point; RK Sanatombi, Shishu Nistha Niketan school haia adminisrative block hai chabi in an kal. Agreement dungzui hin ILPS nawrpui leia July le August thla haia school khar an ni lei khan School fee 30% chau lak ding ti a nih. Sukpuitling a ni hma chu an hmalakna an sunzawm pei ding thu an hril.

AR han helpawl 2 an man
Imphal: 9­Sector Assam Rifles hnuoia 12 Bihar regiment hai chun Oct. 8, 2015 khan Imphal West Police Commando hai le Tera bazar­a dappui an thawnaah PREPAK cadre K. Chouba @ Pulsiba Singh (36) s/o (L) Ibotombi Singh of Sagolbal Tera Konthoujam Leikai an man a, Lamphel Police kutah an pek.
   
Chun, hi ni ma hin Langjing Bazar  a motor inlawn hai an dapnaah  PREPAK cadre pakhat   Thokcham Anil @ Naobi @ Ricky Singh (36) s/o (L) Th. Bobo Macha @ Murali Singh of Naorenttheng Takhelombam Leikai, Imphal West an man a, Patsoi Police kutah an pek. Kum 2005 a Kotha (Moreh) hmuna Assam Rifles lambunnaa thang niin zanita Assam Rifles thusuok chun a hril.

Dengue thuah awareness an neipui
Imphal: 12­Bihar regiment of 9 Sector Assam Rifels chun Oct. 8, 2015 khan Brighter  Academy School, Khumbung hmunah students hai Dengue thuah awareness an neipui.   Manipur­a Dengue invawi mi 13 zet hmu an nita leia awareness hi an buotsai a nih.

Mizoram Mimkeiin In a keichim
Lawngtlai: Zani zingkar dar 5 vel khan Mizoram­a Lawngtlai III, Helipad bul laia sungkuo  4 in an hluo Ms Zothanmawia In Assam type chu pil intawl leiin a chim a, mihriem thi le hliemna tuok ruok chu an um nawh. Hi in chim sawng chung tak hluotu Darrimawii chu fakthei dawr siem a ni a, in chim leia a thuomhnaw inhmang chu Rs. 1 lakh vel manhu nia a ring thu a hril. Zani hmasa zana ruosur lei khan Lawngtlai khawsung h mun dang haia khawm mimkei a tlung nuol nia hril a nih. In chim na hmuna hin  tlawmngai pawl han zanikhan hnatlang neiin inthielfaina sin thawin thuomhnaw hai an rut khawm.

Pre­poll survey dungzuiin Bihar­ah Nitish a hrat:Survey
New Delhi:  October 12, 2015 a inthawk Phase 5­a Bihar Assembly Election hung um ding le inzawm pre­poll/election thawa um dungzui chun Bihar Chief Minister nilai mek Nitish Kumar inrawi Grand Alliance chun simple majority in hratna an chang ding niin a hril.
   
CNN IBN/IBN7­Axis in survey an thaw dungzui chun Grand Alliance­a Janata Dal­United (JD­U), Rashtriya Janata Dal (RJD) le Congress chun Assembly Seats 243 umah seats 137­ah hratna an chang ring a nih. BJP inrawinaa coalition party chun seats 95 an lak ring a ni a, NDA’s main constituent BJP chun seats 82 le an thlawppui Ram Vilas Paswan party LJP chun seat 2 an lak ring a nih. Survey dungzui hin Nitish Kumar inrawi JD­U chun seats 69, Lalu Prasad party RJD in seats 48 le Congress in seats 20 an lak ring a nih. 
   
Survey hi September2, 2015 a inthawk October 4, 2015 inkar sunga Assembly constituencies 243 haia district 38 haia thaw a nih.
   
India TV­Cvoter pre­poll survey chun BJP inrawinaa NDA chun seats 119 le Grand Alliance chun 116 le Others in seat 8 an lak el thei niin a hril. Survey thawnaa dawnna petu hai laia Dalit 44%, Mahadalits 41%, MBC (most backward castes ) 50%, OBC 29% le upper caste 70% chun NDA an dit a, Dalits 28%, Mahadalits 33%, MBC 31%, Obc 59% le upper caste 15% han Grand Alliance an dit niin ei thu dawngna chun a hril.
           
First Phase October 12, 2015 nia nei dinga vote campaign theina hun vawisun hin a tawp ta ding a nih.

Assam cabinet in division thar
Guwahati: Assam state cabinet chun division thar ‘Central Assam Division’ siem dingin remtina an nei. Hi division hnuoia hin Nagaon, Morigaon, Karbi Anglong le Dima Hasao district hai an um ding niin official thusuok chun a hril. Udalguri le Darrang district hai chu Northern Assam Division hnuoia le Barak Valley district sunga Cachar, Karimganj le Hailakandi hai chu Barak Valley Division hnuoia um an tih. Chun, Assam­a tea garden le factory workers han hamthatna thalem an dawng theina dingin Assam Gratuity Act, 1992 siemthat ding; Assembly constituency tina hmeithai 200 pei hai kuomah grant Rs. 1,000 seng pek ding, nuhmei pasal neilo kum 40­60 inkar hai constituency tina mi 300 pei kuomah grant Rs. 10,000 pek ding le BPL hnuoia mi nuhmei pasal nei hai kuoma grant Rs. 10,000 seng pek ding tiin cabinet chun relin an remti bawk.

NDFB­S cadre pakhat kap hlum
Guwahati: Zani hmasa zan khanAssam­a Udalguri district sunga Rowta vadung bul Arunachal Pradesh le inrina laia dappui an thawna huna inkaptuona tlungah NDFB­S cadre pakhat Police han an kap  hlum niin IGP, L.R. Bishnoi chun a hril. Kap hluma um hi Thopsa Basumatary a ni a, a ruoldang 3/ 4 vel hai chu damin an inrelhmang a, inkaptuona hmuna hin ralthuom khawm an dapdawk niin a hril.

DRDA official thamna a lak leiin man
Guwahati: Assam Police­a Vigilance and Anti­Corruption Wing chun zani hmasa khan  Kamrup (Metro) a DRDA  project director Nandita Konwar chu bill sukfelna dinga contractor kuoma inthawk thamna a lak leiin Section 7 of the Prevention of Corruption Act. hnuoiah an man. Ms Nandita Konwar hin a sinthawna bill lakna dingin 10% a ngen niin contractor Upen Chetri chun complaint a pek a. A pawisa  ngen pek dinga office a va fe huna  thamna sum a lak lai taka man a nih. Nandita Konwar hi Bihar le Tripura Governor hlui Devananda Konwar naunu nia hril a nih.

SSC Hr.  Sec. Level Exam, 2014 final result
New Delhi: Satff Selection Commission (SSC) huoihawtna hnuoia Data Entry Operator le Lower Division Clerks lakna dinga Combined Higher Secondary Level (10+2) Examination, 2014 final result puong a ni tah. Ei ni tlangmi hlawtlingna chang ei hriet hai chu hieng a hnuoia hai hi an nih.
 Data Entry Operator:
1. Japheth L Hranngul           
2. Ngulminlen Doungel
3. L Paominthang Haokip
Lower Division Clerk:
1. Melody Dimnunthar Amo;   
 2. Lamngaiching
3. Blesso Thienminlun Haokip ;
4. T Kam Lianmung
5. Ginzasang Ngaihte;            
6. Serto Teresa kom
7. Sarah Lhingboi;      
8. Ningmuankim
9. P. Manglensay Lhungdim;             
10. C Zonunthari
______________________________________________________________________
VAWISUN THUPUI
Ka mihai chu hrietna tlaksam leiin sukbohmang an na, Hrietna chu i dit naw leiin kei khawma ka thiempu i ninaa inthawk chun dit naw tang ka ti che. I Pathien dan  chu i theinghil vei a, Kei khawmin i nauhai theinghil veng ka tih. Hosea 4:6

Editorial
Ei ram damna dingin inthuruolna chau

Khawvela inremna, muongna, himna le damna a um theina ding chun a sunga cheng rambung hran hran le hnam tum tum han an sang bik, a thaw thei bik le a chang rawn bik  ni tumna peihmanga mihriem ei nina ang le Pathienin dikna le chanvo a mi pek ang senga lungawina nei hi ei ram le hnam damna dingin a va pawimaw lawm lawm ngei de! Khawvela ei cheng sung chun mihriem, hnam tin chitin, tawng hran hran le sakhuo dang dang bietu hai hin ei ngirhmun dawmsangna dingin hma lain kal ei pen ding hrim a nih. Amiruokchu, ei thenum, ei unau nekchep zawnga mani ngirhmun dawmsang ei tum sung chun a tutu khawm ngirsuok hlei thei lovin ei um ding a nih ti chu a chieng em em a nih.
   
Zani lai ela Norweigian Nobel Committee in Nobel Peace Prize dawng dinga a thlang Tunisia rama civil society 4 inzawmkhawm ‘Tunisian National Dialogue Quartet’ hai dam kha an ropui in Nobel Peace Prize dawng dinga thlang an nina kha lawmpui an um hlie hlie a, khawvela inremna le muongna dit mimal le rambung popo chun an hlawtlingna kha lungril takin an lawmpui seng ngei ring a um. Tunisia rama mipui helna nasa tak suoka, a rama Democracy tluse el thei ding ngirhmuna a um laiin Civil Society ­Tunisian General Labour Union; Tunisian Confederation of Industry, Trade and Handicrafts;  Tunisian Human Rights League le Tunisian Order of Lawyers hai chun democracy tluse el ta ding indin thar nawk a ni theina dingin an pawl bing hmingthatna ding amani annawleh an mimal hamthatna ding hnawt lova sietlain  Quartet kha an indin a ni a. Inthuruol taka an ram democracy sukse tumtu hai an dotlang leiin  hlawtlingna an chang a nih. An inthuruolna le thawtlangna that leiin an ram Democracy an sanhim el khelah Khawvela chawimawina insang tak, khawvel mihriem han an inhnar, Nobel Prize seng senga khawm a ropui le inzaum chungchuong Peace Prize 2015 dawng dinga thlang an hung nita hiel a nih.
   
Khawvel rambung dang dang hai chau ni lovin ei ni tlangmi hnam tlawmte, nuhmei­pasala inneipawl, thlatu thuhmun, tawng inhrepaw seng  hai ta ding khawm hin entawn dingin a va tha lawm lawm ngei!. Vai rama Rel station­a Kuli zat khawm tling zolo han ei hnam bingin pawl ei hang nei fir fer tawl a, ei hnambing chit ngirhmun dawmsangna dinga hma lak tawl seng.    India ram boruok sik le sa indanglam hlei takel, hmun khata ruo a sur leh, hmun khata khuo an thal ang ela inrem thei der lo hai kha Manipur Assembly in Anti­Tribal Bills 3 a hung passed leiin ei nuom le nuom thu khawm hril lovin chawp le chilin Manipur tlangmi hnam tum tum hai lai thlipui hung hrangin hmun khatah a mi mut bum a. Beiseina insang tak neia  kal  ei pen lai zingin ei sungah inremnawna le inerna thli hung hrang tan nawka ei inthuruolna inhning tan nawk anga a hung um hi a pawi takzet.
   
Politics ka khel e, ka ek e ei hang ti vel a, ei politics khel dan hi tirdak a um takzet. Ei mimal amani annawleh ei hnambing ta ding bika thang ei lak sung hin chu ram ropui tlung naw manih.  Ei hril ta angin Vai rama Rel station­a Kuli zat khawm tluk lo hai hin mani hnam bing hamthatna ding chau hnawta ka lei pen pei a ni vai chun  tukhawm damkhawsuok ding ei um naw ding  zie hi ei hriet nawn nuom a um takzet. Tunisia rama Civil Society pali han chan tha le insang lem inchu lova an rama Democracy an sawmhring theina dinga inthuruol taka kal an pen thei ang hin ei ni Zohnathlak sunga hnam tum tum, tawng hran hran hmang, zaa­ah 100 Kristien inti ngam hai hin thaw ve thei inla chu ei ram le hnam hi damin a hung parvul ve ngei ding a nih ti hi ringhla a um nawh.
   
Ram pakhata pawl hran hran hai hman an ram le hnam sanhimna dinga kal an pen ruol thei chun hi laia Zohnatlak tlawmte chau, nuhmei­pasala inneipawl, tawng inhrepaw vawng hai hi iengleiin am thawtlangin kal pen ruol theinaw bik ei ta! Ram hmangaina lungril thienghlim tak nei mi ei ni phawt chun kalpen an ruol thei ngei ding a nih. Chuong ni lova ei unau hai nekchep zawng annawleh mani’n chantha le insang lem chang tuma kal ei pen a ni ruok chun ei ram hmangai dan an dik naw a ning a ta, ei inennawn a tul tina a ning a tih. Ram hmangaitu inti thuoitu le hotu hai khawmin Pathien rawn zing puma kal an pen a tul a, chuong ang bawkin mipui hai khawmin mani mimal ngaidan ringawt fepui lova Pathien rawn zing pumin inthuruol taka kal ei pen tlang zing theina dinga hma la thar seng dingin ei infiel a nih.



Don't Miss
© all rights reserved
made with by Simon L Infimate