Hmasawnna Thar | 05 August, 2015

Tuolsung

EMs le Finance Committee ding ruot

CCPur: Mr Langkhanpau Guite, Chairman, ADC/CCPur chun under section 27(A) (2) of the Manipur (Hill Areas) District Council (3rd Amendment) Act, 2008 hnuoia thuneina pek a ni angin ADC/CCPur­a Executive Members (EMs) ding mi 5 hai zanikhan a ruot. EM dinga ruot hai chu M. Gouzamang Guite, (17­New Lamka East);Genneikhup (4­Chongkhozou); Zamneiching @  Zamnu (23­Muallum); Ngamhao Touthang (14­Tuibuong) le G. Thangkhosuanmung (15­Hiangtam Lamka) hai an nih.

           

Chun, ADC/CCPur­a Finance Committee ding hai ADC/CCPur Chairman chun zanikhan a ruot bawk a, chuonghai chu T.Khaikhomang­ Chairman; le Members dingin Jamchinthang, Lalditsang, P. Kamkholal, Hausuanthang, G. Suanchinpau le Lalhrillien hai an nih.

Rengkai Road lampui siemthat

CCPur: Special Contractor P. Tongthang Zou in lampui siet ngaimaw na leia July 8, 2015 nia   Rengkai Road le hmun tum tum hai pil a vur hnunga ruo a hung sur nawk leia mipui le motor inlawn hai ta dinga harsatna an tlun zuolna Rengkai Road chu zanikhan HSA Churachandpur Jt. Hqrts hmalaknain DC, CCPur le CEO, CCPur hai thupek dungzuiin zanikhan Tripper 2 le JCB pakhat hmangin siemthat a nih. HSA CCPur Jt. Hqrts thuoitu Lalthanzau chun, Rengkai Road pil vur a ni leia motor le kea inlawn hai ta dinga harsatna nasa tak an tlun leia DC le CEO kuoma thil umdan an tlun hnunga District Council in Tripper 2 le DC in JCB pakhat hung thawlawma lampui hi siemthat niin a hril. Lampui siemthatna hi zani zing dar 8 a inthawk zantieng 1:30PM chen khan thaw a nih. Hi chungthua hin HSA CCPur Jt. Hqrts chun DC le CEO hai chunga lawmthu an hril.

A hun taka office kai le tin dingin

CCPur: Department tum tuma DLOs le staff hai chu zing dar 10 a inthawk zantieng dar 4:30 chen a hun taka office kai le tin hlak dingin DC CCPur chun an hriettir a, Office a huna kai lo hai hrietsuok anni chun an chunga action lak a ni ding thu le DLOs hai chu an hlaw lakna dinga countersigned thaw loa withheld dingin DC chun Department tin hai an hriettir. Hi thil hi nuom hun huna kai le tin thawktu an um ti report um leia DC in an suo a nih.

Gas lak huna booking thaw nghal dingin

CCPur: Thlaisuongna LPG Consumer han Gas lakna le booking thawna dinga sunnithlaka hun an hmang ral hlak le inzawmin Mr Lunminthang Haokip, DC, CCPur chun zanikhan Order an suo a. LPG Dealers/Agents hai chu consumer han Gas an lak huna booking (lak nawk thei hun ding) thaw nghal pei dingin an hriettir. Booking ni le hun ruok chu a pangngai anga ning a tih.

SDO/SDM a verification thaw hmasa dingin

CCPur: Arms licence hnitu (applicants) hai chun concerned SDOs/SDMs haia inthawk verification la hmasa dingin Mr Lunminthang Haokip, District Magistrate chun zanikhan Order an suo a, SDOs/SDMs hai khawmin silai licence ngentu hai chu an ngenna san tha taka enfel hmasa dingin an hriettir bawk. Chun, Licence silai neitu hai chun state Police le CID (SB) verified hmasa lova midang kuoma zawr/transfer lo dingin an hriettir bawk.

Monsoon Dance Class nei mek

CCPur: August 1, 2015 khan HL Daka Memorial Hall, HSA Campus, Rengkai, CCPur­ah   Monsoon Dance Class tan a ni a, Pu Francis Songate, Gen. Secy. HYA GHQ chun Dance Class hi ribbon chep bawngin a hawng. Hi Dance Class hi August 1, 2015­ August 31, 2015 sung nei ding a ni a, Instructor chu Vincent Hekte, Nobby Lalrintluanga le Meshak Hrangchal hai an nih. Dance Class hun sung hin Urban Dance (Basics&Advance),B ­Boying Basics, Hip­Hop,{Including Aerobics (workout), Stretching, Contemporary Basic, locking popping, Street Jazz Basics (Girls) All Types of Waves, All Types of Isolation, Footwork (Side walk, moon walk)} hai inchuk ning a tih.

Bufai an sem

CCPur: UZO, USA in tuilien leia harsatna tuortu hai thangpuina ding an hung pek hai chu zani 3:00PM khan UZO/GHQ le ZYA GHQ han an sem a, Zomunnuam a tuilien thangpuina Bufai bag 25, New Zoveng kuomah bufai bag 6 le Ngulzen Veng­a  Bufai bag 4 an pek tawl. 

Malaria Positive 22

CCPur: Malaria Department, CCPur chun July 2015 thla sung khan damnaw mi 2829 hai thisen lain an enfel a, hienghai lai hin Malaria Positive 22 an hmu. Malaria Positive hmu hai laia 19 chu Malaria PF an ni a, 3 hai chu Malaria PV an nih. July, 2015 thla sungin official record­ah Malaria leia thi an um nawh.

DTO in July thla sung Revenue Rs. 10,58,790/­

CCPur: District Transport Office (DTO), CCPur chun July, 2015 sung khan Revenue Rs. 10,58,790/­ an hmu a, April­July, 2015 sunga Revenue an hmu chu Rs. 40,17,587/­ a tling a, Govt.­ah challan in an peklut.

   

Chun, July, 2015 sung khan DTO/CCPur chun motor tum tum 142 an registered a, hienghai lai hin Truck 1, Auto Rickshaw 10, Eeco Van 3, Car 12. Jeep/Bolero 7, motor cycle/activa 106 le others 3 a thang. April­July 2015 sunga motor tum tum an registered chu 586 a tling phak a, chu hai lai chun Truck 5, Water Tanker 1, Bus 1, Auto rickshaw 21, Eeco Van 8, Car 52, Jeep/ Bolero 19, Motor cycle/activa 474 le others  5 a thang.

CCPur­a tuilien  chungthuah meeting

CCPur: August 5, 2015, 1:00PM hin Mr Lunminthang Haokip, IAS, DC, CCPur inrawinain DC Office Chamber­ah CCPur district sunga SDOs hai thangin Department tum tuma Officers han meeting nei an ta, hi huna hin Churachandpur district sunga tuilien leia mipui ta dinga harsatna an tlun chungthu hriltlang an tih. DC, CCPur chun Department tum tuma Officers hai chu meeting­a hin thang seng dingin an hriettir a; SDOs hai chu an biel chita tuilienin In le khuo a suksiet le a sukbuoi zat; DAO/Agri, CCpur; DO (Horti &SC) le Dy. Director (Seri) hai chu Tuilienin Leilet le thlai a suksiet zat; IFCD chu Khuga Left & Right canal tui le Dam ngirhmun; DFO (Fishery) chu tuilienin Ngakul a suksiet zat le Jt. Director (Vety) chu tuilien leia ran thi zat hai report pe dingin an hriettir.

Headline

Manipur thedarna ding a thangsa chun State sawrkarin pawm theinaw nih: O.Ibobi Singh

Imphal: Manipur CM O.Ibobi Singh in zanita a office­a Chanchinbumihai an hmupuinaa chun, India sawrkar le NSCN(IM) han Peace Accord an zieka hin Manipur state thedarna ding a thangsa chun State sawrkarin pawm thei naw nih. Manipur thedarna ding a thangsa a ni chun a dang le dodalna ding thil inpeisa diema um a nih. Tuta hma khawm khan India sawrkar le NSCN(IM) inbieknaa hin ei state sawrkar rawn le inhreittir a ni hlak. Amiruokchu, Accord an zieknaa hin chu rawn le inhriettirna a um der nawh. Hi lei hin an thil thaw dan hi an langtlang naw a, a ruk a rala thaw amani ding ti theiin a um. An lungril khawm a thienghim tawk naw niin an lang tia hrilin an thil thaw dan a lawmnaw thu a hril. Union Home Minister kuomah Peace Accord copy hung pe vat dinga a ngen thu a hril bakah Home Ministry thaw ding niawm tak PMO in an thaw el chu a hrietthiem theinaw thu a hril bawk.

   

ILP thua chun Drafting Committee in draft bill chu zani 10:30 AM khan State sawrkar kutah an peklut tah. Draft Bill hi an hmatienga Assembly Special Session ko a pasi ani ding thu O.Ibobi Singh chun a hril. Draft Bill hi Assembly­a putlut le pasi a ni hmaa JCILPS thuoituhai le la entlang a nuom thu CM hin a hril.

           

Hieng laizing hin India sawrkar le NSCN(IM) han Peace Accord  an zieknaa hin Manipur ram thedarna ding a thang a ni chun do let ning a tih. Chu ding chun inpeisa diema um kan nih tiin All Manipur United Club Organisation (AMUCO) le United Committee Manipur (UCM) han zanikhan thusuok an siem. AMUCO chun zanikha 18th Manipur Integrity Day Akham Leikai Community Hall, Kwakeithel­ah an hmang a, hi huna AMUCO President Dr Y. Mani Khuman  hi thu hi a puong a nih.

Rimsi taka kum 14 lungin intang dingin

Imphal: Zanikhan District & Session Court, Imphal EAst chun October 11, 2013 zan dar 7:30 vela nuhmei kum 14 mi suollui tua intum Laishram Joykumar Singh (44) s/o L. Tomba of Tangkham Awang Leikai chu kum 14 rimsi taka lungin intang dingin a chungthu a rel. Joykumar hi lungina ni 642 an tang ta a nih.

Darkar 48 General Strike tan

Imphal: Zani zantienga inthawk khan JCILPS students wing chun Manipur pumpui huopin darkar 48 aw ding General Strike an thaw tan. General Strike hin August 6, 2015, 6PM chen a aw ding a nih. Zani hmasaa Secretariat va khek khumtu student hai chunga police hai nunrawngna lei le ILPS thlawpnaa General Strike hi an thaw niin JCILPS Students Wing Convener Nandababu Oinamcha chun a hril.

Nuhmei 3 an hliem pha

Imphal: Zanikhan Khwairamban bazar­a dawrkai nuhmei ruolin Samukhong ah ILP le inzawmin human chain an siem a, nuhmei pungkhawm hai hnawtdarna dingin Police han tear gas an kap leiin nuhmei 3 an hliem. Imphal khawpui hmun dang dang haia khawm ILP thua nuorna chu a la fe pei.

School kaia fe um nawk ta lo

Imphal:Joint Students Union of Goverment Higher Secondary School in Educational Institutions hai hun tiemchin um lova boycott an puong leiin zanita inthawk khan Imphal khawpui le a se vel haiah student school kaia fe an um nawk ta nawh. State sawrkarin rawn lova a thu thua School a hawng leia lungawi lova boycott hi an puong a nih.

Exam Centre sawn a nih

Imphal: August 9, 2015 a Staff Selection Commission (SSC) hnuoia Combined Graduate Level (Tire­I) Examination, 2015 hung um dinga Exam Centres hai thlakthleng a ni a; Johnstone Higher Secondary School­a exam dinga ti hai chu Modern College, Porompat­ah exam dinga an Centre sawn a ni a; T.G. Higher SEcondary School le CC Higher Secondary School­a exam dinghai chu an exam Centre HRD Academy, Ghari hmuna sawn le Ananda Higher Secondary a Exam ding hai chu Kid’s High School, Dewlaland ­ah sawn an nih tiin Deputy Secretary, Manipur Public Commission chun inhriettirna a siem.

8th MR Rifleman kap hlum

Imphal: 8th Manipur Rifles a Rifleman Hopson Maring (35), s/o D. Methang Maring of Kangsang Village, near Pallel, Chandel district chu August 3, 2015 zantieng khan a chengna insungah pasal 2 han an va kap hlum niin a sung han an hril. Hopson Maring hi Tengnoupal A/C MLA D. Korungthang In vengtu a nih. Chawl laa an ina va fe, chu huna hi thil hi a tuok a nih.

Bolero Pickup eksiden­ah mi 3 an thi

Aizawl: Zani sun dar 11 vel khan  Bukpi supply Kudam a inthawk North Chaltlang pana tlan Bufai phur Bolero Pick up MZ­01­K 9786 chu Tuikhuahkawn lamtung a hraw laiin tlankai zo  lovin a hnung zawngin an tawl a, lamthlang rawlah tawl liem leiin mi 3 an thi a, midang pakhat an chawmdawk hman leiin damin a suok. Hi motor eksiden­a thi hai chu­ Sawngneihthuama (52) S/o Lama Retailer, Abrahama 28 S/o Khumthang Motor neitu le Driver Chalrokung (26) s/o Ramhmangai of Saikawt, CCPur hai niin ei thu dawngna chun a hril.

Helicopter tuoksiet a tuok

Guwahati: Pawan Hans Helicopter, a sunga Tirap District Deputy Commissioner Kamalesh Josh le pilot 2 hai chuongna, zani 11AM vela Dibrugarh, Assam­a inthawka vuong suok chu tuoksiet a tuok a, Helicopter nia hriet chu Tirap district, Arunachal Pradesh ramhnuoiah hmu nia hril a nih.

Police han Class XI student an kap hlum

Aizawl: Zanita Chawngte/Kamalnagar, Mizorama Bandh thaw pawl hnawtdarna dinga Police han silai an hmetpuok naah Class XI student, Agosh Chakma (20) of Old Baseisora town chu an kap hlum. Chakma ADC hnuoia thawk ding thawktu indiklo taka lak a nih tia a dodalnaa Central Young Chakma Students Union han bandh hi an thaw a nih. Bandh le inzawmin an thuoitu mi 9 Police han an man a, insuo dinga ngennain mi 300/400 vel  han Chawngte Police Station hi an va khek khum a, chu huna hi thil hi  tlung a nih. Mipui lungsenin motor 4 an suksiet hman.

Mizoram DGP thar dingin Thianghlima Pachuau

Aizawl: 1987 batch IPS Officer, Manipur & Tripura Cadre, Mr Thianghlima Pachuau chu Director General, Mizoram thar dinga ruot a nih. Thianghlima Pachuau hi Deputation a Mizoram­a fe ding a nih. Mizoram sawrkar ngenna anga a sin thar hi a chel ding a nih.

DG, Civil Defence tharin Sharma

Shillong: Senior IPS Officer, Assam­Meghalaya Cadre R.K. Sharma chu Director General, Civil Defence & Home Guard thar dinga ruot a nih. Hi sin chel lai Y.C. Modi chu CBI­a Additional Director dinga ruot a ni leia hi sin hi hung ruok a nih. R.K. Sharma hi Central Deputation a um a nih.

Pakistan sipai han mi 1 an kap hlum

Jammu: Zani zingkar dar 5:40 vel khan Pakistan sipai han Jammu & Kashmir a Jammu district sunga Kanachak le Pargwal sector­a Border Outpost chu silai chin le Mortar Shells hmangin an kap a, Civil mi Sanjay Kumar (22) chu an kap hlum niin BSF thusuok chun a hril. August 2 & 3, 2015 hai khawm khan Ceassefire bawsiein Pakistan sipai han Poonch le Jammu Sector an kap a, tawkpawi ruok chu a nei nawh.

Kum tin India pawisa note lem Rs. 70 crore

NEw Delhi: Pakistan rama siem, India pawisa note tehlem kumtin Rs. 70 crore pei India ramah a hung lut niin National Investigation Agency (NIA) thusuok chun a hril. India rama India pawisa note lem indar mek hi Rs. 400 crore vel a tling phak ring a nih. Intelligence Bureau sui dan ruok chun India pawisa note tehlem ramdanga inthawka hung lut hi Rs. 2,500 crore vel a tling phak niin an hril ve thung.

WB ­ah Journalist 1 thuoihmang

Kolkata: August 2, 2015 zing dar 9 vel khan West Bengal State­a Alipurduar town a inthawk Journalist pakhat Chayan Sarkar, reporter, Uttarbanga Sangbad chu tu ti hrietlo han an thuoihmang a, tuchen hin hmu a la ni nawh. Hi thil tlung le inzawm hin Police han thu indawn dingin mi 8 an man tah. Chayan Sarkar hin College Admission thawnaah thamna a um ti Bengali Daily Uttarbanga Sangbad­ah a zieklang a, hi le inzawm hin July 28, 2015 khan that dinga vauna a hmu nia hril a nih.

Pasal pakhat Saphu kawr leh man

Kolasib: August 1, 2015 zantieng khan Environment and Forest Department, Mizoram le Madhya Pradesh a Forest Department hnuoia Special Task Force thangruol han Laltlankunga of Kolasib Venglai In an dap a, Saphu kawr grams 520 a lo inchawk lai an va tuokfuk bakah In an dap a, an khum hnuoiah polythene a fun Saphu kawr dapdawk sain Laltlankunga leh an man.  Madhya Pradesh a Saphu kawr an man chungchanga thu indawnna an neina fe peiah Laltlankunga hming hrillang a ni a, chu le inzawma MP Forest team hi Kolasib, Mizorama hung an nih. Laltlankunga hi August 2, 2015 zan khan MP Forest team han thuoiin an ram tieng an fepui.

Saruok le sex thil enah Mizoram pakhatna

New Delhi: Internet fe thlenga saruok le Sex film enah Mizoram pakhatna, Delhi pahnina le Maharashtra palinain an thang niin survey thusuok chun a hril. Khawvel pumpui huopa chun India chu position pangana a nih. Saruok le sex film (porn) en hrat hai lai Nagaland, Meghalaya le Assam hai khawm list­ah an thangsa. Tulai hnai el khan India sawrkar chun ei rama porn websites 800 neka tam khar le dang dingin Order an suo.

Congress, NCP, TMC, AAP le ML han LS an boycott

New delhi: Congress MPs 25 ni 5 sung Lok Sabha session thang thei lo dinga suspended anni dodalna le an tourpuinain zanikhan Congress, NCP, TMC, AAP le Muslim League (ML) han Lok Sabha inthung an boycott a, Lok Sabha session hi ni 5 sung an boycott ding niin an hril bawk. Left Parties, Samajwadi Party le RJD member hai khawm Lok SAbha a inthawk an suoktau. Congress MLA­hai chun suspended­a an u m hi dodalin zanikhan Parliament tuolah Dharna an nei a, Sonia Gandhi, Dr Manmohan Singh le Rahul Gandhi hai khawm an thang.

Pasal 3 Sai ha 5 leh man an nih

Siliguri: Zani hmasa zan khan West Bengal state a Darjeeling district sunga Phulbari hmuna Forest Guards han Car pakhat sukchawla an dapnaah Sai Ha 5 dapdawkin Car sunga chuong pasal 3 hai leh an man. Mana um hai lai hin Raidak Forest Range hnuoia Forest Department thawktu pakhat naupa a thangsa. Sai Ha hi Rs. 3,00,000 manhu vel a nih tiin Sanjay Dutt, Phulbari Forest  Ranger chun a hril.

Zirtirtu 1,600 an inban tah

Patna: Bihar State a chun Certificate tehlem hmanga Zirtirtu sina lut mi 1,600 zet an sin haia inthawk an inban tah. Bihar High Court in Certificate tehlem hmanga Zirtirtu sin thaw hai chu hriet suok anni huna man le an chungah legal action lak ning a tih tia thusuok a siem leia tithawnga inban an nih. Nikum khan Bihar State sawrkar hnuoia Education Department chun  Zirtirtu 40,000 zet an certificate hai enfel hmasa lovin Zirtirtu in a lak a, hi huna fake certifiate hmanga zirtirtu sin thaw a lut an nih.

GHADC hun suksei nawk

Shillong: Meghalaya sawrkar chun Garo Hills Autonomous District Council (GHADC) hun (term) chu thla 2 dang a suksei nawk. Hi Council term vawithum zet keiseia a umna a ni tah. August 18, 2015 a inthawk hi Council hi Governor enkawlna hnuoia um ding a nih. DC, West Garo Hills chu Administrator a ruot a nih. Hi Council Election process chu October thla sunga zo fel dinga riruong a nih.

Thane­a building chimin mi 11 a del hlum

Thane: Zani zingkar dar 2:30 vel khan building sawngli, kum 50 zeta upa tah,Thane Railway station bula mi chu a chim a, sungkuo pakhata mi 4 thangsain mi 11 a del hlum a, mi 7 an hliem. Building hi a sunga chenghai imu inhnik taka an in laia chim a ni a, a sunga chenghai laia a tam lem chu sansuok an nih tiin Santosh Kedam, Municipal Corporration, Regional Disaster Managment Cell chun a hril.

Key amendments 6 hnukkir

NEw Delhi: Kum 2013 a NDA sawrkarin Land Acquisition Bill a lo induonga key amendments 6 belsaa um hai chu Joint Committee of Parliament on Land Acquisition Bill chun hnukkir an remtih. Hi Committee member a thang BJP MLAs 11 han Amendments hi lakkir dingin rawtna an siem a nih.

---------------------------------------------------------------------------------------------------------------

VAWISUN THUPUI

Nangni khawm inring zingin um ro, in ring naw hunah Mihriem Naupa chu a hung ding a ni sih a,” a ta.  ~ Luka 12:40

Editorial

Lungrilah iemani tak  himawna  a um

Manipur­ah Inner Liner Permit System (ILPS) thua bill thar siem le pasi dinga ngenna le nawrna hrat taka a fe mek lai le ILPS boruok a sosang vawrtawp lai takin India sawrkar le NSCN(IM) han Peace Accord an hung ziek ta thut el a. Hi Peace Accord sung thu hi puonglang a la ninaw lei in iengtin am kakhawk a nei ding ti chu hriet a la ni nawh. Amiruokchu, hi peace accord hin Manipur, Assam le Arunachal Pradesh state mihai ta ding chun lungrilah iemani takin h imawna an neitir niin an lang. Hi lei hin peace accord a India sawrkar le NSCN(IM) thuthlung le inremna chun ieng thil am a funsa a ti hi mipuihai hriet chak em em el, tlumte thlir taka an lo thlir el a nih.

   

India sawrkar le NSCN(IM) han thangruk zetel a liem hnunga peace accord an hung ziek thei el ta hi chu mitinin a thu chu tha tiin ei lawmpui seng. Amiruokchu, an inremna point chi tum tum hai hriet el theia a la um nawna thua hin an inremna thuthlung ziekna chungchanga hin lawmpui dan ding zuk hril ruok chu harsatna tak a la um. Hi lei hin sawrkar thlungpuiin an hmatiengin mipuihai hriet thei dingin an inremna points hai hung puonglang sienla nuom a um hle. Hun sawt tak puonglang lova a um nek chun puonglang vat chu a tha lem ring a um.

   

Hi peace accord thua hin thuvuongva mei mei hrildar chu thaw chi ni naw nih. Hi lei hin thu chieng tak hriet a ni hmakhat chu lo la to veng veng inla a damdawi tha tak ni ngei a tih. Rambung pakhat sawrkarin thil a thaw chu a tha dingin lo ngai hri phawt inla ei ta dinga hadamna a ni ring a um. Thuvuongva mei mei hin a tha tieng nekin a thanaw tiengpangah kakhawk a nei lem hlak leiin hrildar le media hran han haia thedar lo hram hram ding a nih. Thudik puonglang a ni huna chau sawisel nuom le ngaidan ei neihai hrillang chau inla ra tha an suo lem ring a um.

   

Ei hriet seng ta angin tuta hmaa NSCN(IM) in India sawrkar kuoma an lo kar tlat hlak, full sovereignty (mania thuneina pumhlum); Defence ( ram venghimna sin); Currency (India pawisa hmang chungchang); Foreign Relations (ram dang le inlaichinna); Democratic Parliamentary  System (India rama Democracy le Parliament kalhmang) hai chu an pawm thei thu hrilin, a bak po chu anni Naga hai kutah an state inawpna chu um dingin an dit thu an hril a. An inhnukhnuoi theina tak nia an hril hnungah, inbiekna sunzawmpui pei thei nia ngaiin inbiekna chu sawrkar thlungpui leh an sunzawm ta pei a, tuhin peace accord an tlung ta a nih.

   

Amiruokchu, an inbiek laia an mu tanna pakhat chu Naga mihai chengna ram, an thenum Naga mihai hluo ram, Nagaland­a rinlut annawleh inthangsatir a, Greater Nagaland siem kha a ni a. Hi thil hi Manipur, Assam le Arunachal Pradesh sawrkar le mipui fak thei lo, an lem thei naw hrim hrim le an kal tlat a ni a. Hi lai thu tak hi a nih lungril taka himawna um chu! Manipur, Assam le Arunachal Pradesh mipuihai chun peace accord ah hi thil hi a thangsa an remtinaw sa a ni a, a lo thang pal chun a kakhawk a na hle ring a um.

           

Sawrkar thlungpui chun Mizorama MNF le Peace Accord a lo ziekpui ta bakah Assam state ah AASU leh khawm Assam Accord (foreigners issue thuah) an lo ziek ta a, hienghai hi NE state­a Accord zieka um ta hai laia a puithu deu a ngai hai an nih. Hieng Accord haia hin state danghai ram lak hekna a la um ngai nawh. Helpawl group chin lem hai le accord an ziekna haia khawm state danghai a tawksa ve nawh. Hi lei hin Naga Peace Accord a inremna points in ngaiven a hlaw zuol a nih.