Hmasawnna Thar | 25 July, 2015

Tuolsung

Teacher in Class X inchuklai a suk hliem; ZSF Blue Star Academy an khar ding

CCPUR: July 23, 2015 khan Lailam Veng, CCPur hmuna Blue Star Academy­a Class X inchuklai nuhmei kum 16 mi chu an Geography Teacher (pasal) in a nakawr chung lai a sukhliem a, a hliemna le inzawmin Zomi Students Federation (ZSF) GHQ chun hi thil tlung an dem hle thu puongin inbiekremna um hma po School an khar ding thu zanita Press Release an insuoa chun an zieklang.

  

Ei thu dawngnain a hril danin, Geography teacher hi class lak zo a suok ding laiin nuhmei naupang nu hin a wish naah ‘Thank You Madam’ a ti pal a, ‘madam’ titu tu am tia student hai an dawn huna, student nu hin ama a ni thu hrilin ngaidam an hni a, chu hnunga an Geography teacher hi va fe nawkin a hmaiah a va ben a, a nakawra manin a kei bakah a sam khawm a kei pek nia hril a nih. Hi taka inthawk hin a nakawra thisen suok hmu a ni a, Vice Principal chun staff room a inumtirin enkawl a nih. Hi le inzawm hin KZP GHQ in zani zingkar khan District Hospital –ah van entir a, chu hnunga hi thil tlung chungthu hi ZSF GHQ kuta an pekdawk, ZSF in thil umdan an suichieng hnunga hiengang thil hi tuta hma khawmin Blue Star Academy­ah a lo tlung hlak ti an va hmusuok a, zani zantieng khan ZSF GHQ Office, Tedim Road ­ah Executive meeting nei a ni a, School Authority hai chu administration enkai zo lo; Corporal punishment hi RTE Act dungzuia phallo a ni a, teacher pasal pakhatin student nuhmei a sawisak hi series tak a nih tia hrilin inbiekremna nei a ni hma chun School hi khar dinga ZSF GHQ in an rel a nih.

Hindi Exam sawnhlat a nih

CCPUR: Lalbahadur Shastri Hindi Maha Bidiyalai hnuoia Hindi Exam chu tulaia ILP buoina leiin sawnhlat a nih ti exam form fill­up hai po po Principal in inhriettirna a siem. Buoina a hung inveng pha exam hun ding le a hmun ding inhriettirna hung siem nawk ning a tih tiin Principal thusuok chun a hril.

SFJ­CCPur installation prog. hmang

CCPUR: July 24, 2015, 11:00AM khan District Training Centre, Tuibuong, CCPur­ah Society for Fast Justice Churachandpur (SFJ­CCP) installation program hmang a ni a, Rev. (retd) H. Nengzatun in SFJ­CCP member hai tawngtaipekna neiin Rev. Dr Kh. Khaizakham in thuhrilna hun a hmang.

  

Hi huna Rev. Dr Nengpi Singson, President, SFJ­CCPur in lawmlutna thucha a hril a, Elder  Thangkhomang Haokip, Founder G/S SFJ CCPr chun keynote address hrila ei district sunga Fast Justice puitlingna dingin thudik a rorel a pawimaw thu a hril.

Police han T. Changsan an man nawk

CCPUR: Mr Timothy Changsan, NECH, Bethlehem Veng, CCPur a Administrator hlui chu July 24, 2015 khan District Session Court, CCPur­a inlang dingin a lawyer advocate M.I .Sharma leh an va fe a, hi huna hin CCPur Police han OC inrawinain Court Compound sungah an lo man.  Zanikhan Court hmaa inlangtir nghal tum an ni a, sienkhawm Judges hai an lo tin ta leiin  Imphal tieng Court hmaa inlangtir dinga thuoi nghal an nih. Mr Timothy chunga hin Police chun FIR No. 2&3 (2­2015) WPS­CCP U/S 354/376(C)/ 506, 6,8&10 POCSO (Protection of Children from Sexual Offences) Act 2012 hnuoia case an registered a nih.

          

May 27, 2015 khan Court of Special Judge (POCSO) chun bail­a an suo a ni a, sienkhawm July 6, 2015 a kha Justice Kh. Nobin Singh, High Cort of Manipur in bail a nina oder a stayed nawk a nih.

Hnachang pakhatin vui 15

CCPUR: Tipaimukh Constituency huop sunga Tuolbung ram sunga hmun pakhata Hnachang pakhat chun vui 15 zet a nei a, mi han maktiin a thla an lak sup sup el niin Ropui Songate of Parbung chun report a hung pek. Chun, tu lai tak hin CHC, Parbung a damnaw um hai lai Malaria invawi mi 4 an um niin a hung hril bawk.

Orientation on Enhanching Performance

CCPUR: July 29, 2015, 10:30AM khin Synod Hall, I.B. Road, CCPur­ah District Health Society/CCPur huoihawtnain Multipurpose Worker (Female) hai ta dingin One Day Orientation Training on Enhancing Performance of Nurces at the Centre Levels’ um a tih. Hi huna hin Community Health Centre/Primary Heal Centres tum tum haia Medical Officer in­Charge hai chu anni hnuoia Contract le regular­a thawk Nurses hai tir seng dingin Dr Thangchinkhup Guite, CMO/District Mission Director, DHS, CCPur chun inhriettirna a siem.

Headline

HSLC Compartmental Examination 2015 result puong;

Candidates 5356 exam hai lai 4850 an passed

IMPHAL: Board of Secondary Education Manipur (BSEM) hnuoia High School Leaving    Certificate Examination (HSLC), 2015 result chu zanikhan puong a nih. Exam dingin candidates 5378 in form an fill up a, canidates 5356 an exam a, hienghai lai hin students 4850 an passed a, a pumpuia pass percentage 91 a nih. First Division­ah 129, Second Division­ah 3556 le Third Division=­ah 1165 an passed. Male regular ah mi 2395 an exam a, 2152 an passed a, pass percentage 90 a ni a, First division­ah mi 50, second division ah mi 1842 le third ah 620;   Female regular­ah mi 2844 an exam a, first ah 78, second ah 2025, third­ah 496 an passed pass percentage 91 a nih.

  

Male external ah mi 49 an exam a, second­ah 19, third ah 22 an passed a, pass percentage 84;  Female External ah mi 68 an exam a, first ah 1, second ah 30, thrid­ah 58 an passed a, pass percentage 85 a nih.

          

Roll No. 5188 chu a exam result withheld le HSLC Examination, 2016 a khawm thang thei lo ding ti a nih. Kum 2004 a inthawk khan HSLC Compartmental Examination a  Certificate le Marksheet a kawpin a passed hai pek an ni tan a, a hranin Original Certificate le Marksheet pek an ni tanaw a, Original Certificate­ cum ­Marsheet a pek an nih. HSLC Compartmental Examination, 2015 Certificate­cum­Marsheet hi School­hai kuomah 31­07­2015 a inthawk peksuok tan ning a tih. HSLC Examination, 2015 a failed hai chu HSLC Examination, 2016 ah thang thei an ta, regular candidates ang chun admit thei ni tanaw nihai. HSLC Compartmental Examination, 2015 a mani answer scripts enthat (recheck) thaw nuom han result suoka inthawk ni 20 sungin subject pakhatah fee Rs. 400 pei pein thaw thei an tih tiin Controller of Examination, BSEM chun inhriettirna a siem.

Motor 20 suksiet a nih

IMPHAL: Manipur­a Transporter’s Organisation 12 han darkar 14 sung Cease steering strike an nei sunga an thusuok bawsie a service Auto Rickshaw 19 le Van pakhat suksiet niin Spokespersons, Transport Body thusuok chun a hril.

MDCs 25 han sesamna an nei

IMPHAL: July 13, 2015 nia MDC a thlangtling thar han sesamna an nei huna sesamna nei ve lo MDCs 25 han zanikhan ADC Complex, Sangakpham ah sesamna an nei tawl. Sesamna neihai lai hin INC MDCs 22 le Independent MDCs 3 an thang. Zanita sesamna neihai hi Chandel, Ukhrul, Tamenglong le Senapati ADC hnuoia mi hai an ni a, Chandel le Tamenglong district haia inthawk 11 ve ve, Ukhrul a inthawk 2 le Senapati district­a inthawk 1 an nih.

          

Sesamna hi DC Chandel district Robert Ksh; Jacintha Lazarus, DC Senapati; Maranchal Luikham, DC, Tamenglong le  Hrishkesh Modak, DC Ukhrul han an inneitir tawl a nih.

Pasal pakhat inkhai hlum saa hmu

IMPHAL: Zani zingkar khan Thokchom Koba (65) s/o T. Ibomcha of Yurembam Leikai chu an In tuola electric banah inkhai hlum saa hmu a nih.

Curfew darkar 15 inthlazal

IMPHAL: Vawisun hin Imphal East le Imphal West District haiah Curfew darkar 15 sung, zing dar 5 a inthawk zan dar 8 chen inthlazal ning a tih tiin district pahni haia Magistrates han zanikhan thusuok an siem nawk.

Sekmai dam a chim

IMPHAL: Minor Irrigation Department in Non­ Lapsable Central Pool of Resources (NLCPR) hnuoia kum 2011­a inthawka Sekmai vadung­a an bawl Sekmai Dam, la hawng lo chu zani zingkar 3:30AM vel khan tui hratin a nawr chim. Sekmai dam bawlna a tha tawknaw leia chim ni dinga hril a nih.

Isak Chisi Swu damnawna an rik

NEW DELHI:  NSCN(IM) Chairman, Isak Chisi Swu (85) chu Kal natna leiin Fortis Hospital, South Delhi­ah July 5, 2015 khan admit tan le enkawl mek a nih. Haptakar liemta khan operation thaw a ni a, Intensive Care Unit (ICU) ah sie a ni a, a damnawna an rik hle nia hril a nih. Isak Chisi Swu hin nau pasal 2 a nei a, ramdang (foreign) ah an um. Nagaland a Kohran Pawl tum tu m han a hung dam nawk theina dingin an tawngtaipui sup sup niin ei thu dawngna chun a hril.

Thla 6 sungin mani inthat 47

AIZAWL: July 23, 2015 khan Police Headquarters­a Arya Mess­ah Mizoram Police­ a Northern   Range (NR) huop sunga Police Officers han Half Yearly Crime Review meeting an nei a, January 2015­June, 2015 inkar, thla 6 sung khan NR Zone­ah mani le mani inthat 47 an um ti report a nih. Northern Range hin Aizawl, Mamit, Kolasib, Champhai le Serchhip district­hai a huop sa a nih. Half Yearly Crime Review meeting hi DIG (NR) LT Hrangchal inrawina hnuoia nei a nih.

Assam­ah JE leia thi mi 52

GUWAHATI: Tuta kum fe mek sung hin Assam state sunga Japanese Encephalitis natna hri leia thi mi 52 an tling ta bakah hi natna invawi mi 318 hmu an ni ta tiin Health Department official thusuok chun a hril. JE natna hri inlengna district hai chu­ Dibrugarh, Tinsukia,Sibsagar, Golaghat, Dhemaji, Kamrup (Rural), Cachar, Darrang le Barpeta hai an nih.

Kum 15 in Ph.D an chuk ding

LUCKNOW: India rama postgraduate student naupang tak Sushma Verma (15) chun Lucknow­a Babasaheb Bhimrao Ambedkar University (BBAU)­ah Environmental microbiology a research thawin Ph.D an chuk ding a nih. Ms Sushma hin BBAU hnuoiah Microbiology subject­ah M.Sc a zo el chau ni lovin topper a ni a, University Research Entrance Test­a rank 7­na a nih. Sushma pa Tej Bahadur chu BBAU­a Asst. Supervisor (sanitation) sinthaw a nih. Kum 5 mi a ni laiin 2005 khan UP board hnuoiah Class IX an chuk a, kum 2007 khan kum 7 thlathum le ni 28 a upa niin  Class X a passed­a Limca Book of Records’ chun Class X passed hai laia naupang takin a record a, kum 13 a tlingin Lucknow University hnuoia B.Sc. a zo a nih. A unaupa Shailendra khawmin kum 14 mi a niin BCA a zo a, tuhin Bengaluru­ah MCA an chuk mek. An unaua naupang tak kum 3 mi Ananya khawmin tuhin Ramayana chu tha takin a tiem thei tah.

Student kum 10 mi hrem leiin a thi

KARIMNAGAR: July 16, 2015 khan Karimnagar district­a Aurangabad town sunga Vivek Vardhini Model School­a Class V student Kolipaka Ashrita (10) chu a homework a thaw naw leiin an Mathematics teacher in darkar 2 chuong zet a hrem leia khaw hre lovin a tlu a, MGM Hospital panpui a ni a, sienkhawm July 23, 2015 khan a thi. A thisen fe vel a dang bakah a taksa a kham taluo leia nuhmei naupang hin tuorzo lova a thipui nia hril a nih.

LS le RS inthung sukchawl nawk

NEW DELHI: Zani khawm khan Lok Sabha le Rajya Sabha inthungnaah boruok a la danglam chuong naw a, Selkaltu Pawl han Lalit Modi le Vyapam Scam chungthu haiah an thil ngen pangngai ngenin inpui pahni haiah rorelna um thei lo hiel khawpa an khek  rak rak leiin Lok Sabha le Rajya Sabha session hai chu July 26, 2015 chena dinga sukchawl nawk a nih. Parliament Monsoon Session a zawna ni 4 zet rorel thei lo le sukchawla a umna a ni tah.

Bu thing le hme thing fak leiin unau 4 an thi

MUNGER: Zani hmasa zan khan Bihar State a Munger district sunga Asarpur village a cheng unau 4, Champa Kumari (12), Swati Kumari (10), Suman Kumari (8) le Kalpani (6) han an Bu le hme thing zan huna an fak nawk leiin an damnaw pha a, Hospital panpui an ni laiin lamlakah an thi. Bu le hme thing a hin an ngeilo ding thil a lo lut ni dinga ring a nih.

Kum 4 liemta sungin tuilien leia thi 4,553

NEW DELHI: Kum 4 liemta sung khan India ramah tuilien leiin mi 4,553 an thi niin zanikhan Union Minister of state for Water Resources, Sanwar Lal Jat chun Lok Sabha an hriettir. Tuilienin thil a suksiet chu Rs. 40 lakh crores nia riruong a nih. Tuilien leia mihriem thi tamna tak chu Uttarakhand state a ni a, mi 800 an thi.

 Mobile phone dawr 2 ah Grenade denglut

SRINAGAR: Zani 11:30AM vel khan helpawl ni dinga ringhla han Srinagar khawpuia karan Nagar an ti hmuna Aircel Office le Vodaphone Showroom haiah hand Grenades 2 an denglut a, sienkhawm mihriem thi le hliem an um nawh. Terrorist­hai chun May thla khan Mobile telecommunication hmun hai an bei ding thu an lo hrillawk ta a nih.

India rama Chartered Accountant naupang tak

HYDERABAD:Tulai hnai el khan Andhra Pradesh mi Nischal Narrayanam (19) chun Chartered Accountant (CA) a zo. Institute of Chartered Accountant of India (ICAI) danin kum 21 tlaing hma chu Chartered Accontant  member a inzieklut a phal naw leiin chu thila ding chun kum 2 a la nghak a ngai ding a nih. Nischal hi Mathematics thiem em em el, kum 9 mi chau a ni lai khawma a pa balance sheet siem indiklo hmua hril thei a nih. A pa hi Company pakhata Chartered Accountant sinthaw le a nu Ph.D (Sanskrit) a nih. Nischal hi India rama Chartered Accountant zo hai laia naupang tak a ni el bakah Double Guiness World Record neihai laia a naupang tak, World Memory Champion naupang tak, “ 7 brilliant brains of the world” hai laia pakhat ve niin Osmania University hnuoia B.Com le M.Com zo ta hai laia a naupang tak, Mathematics a thiem leia Shanghai kahwpuia Global Conference a Special Invitee le Speaker a ruot a lo ni tah. Global Conference a hin rambung tum tum 190 an thang.

Kum 2014 sungin CAPF a mi 175 an inthat

NEW DELHI:  Kum 2014 sung khan Central Armed Police Forces (CAPF) sungah mani le mani inthat 175 an um tiin National Crime Records Bureau (NCRB) thusuok chun a hril. CAPF a hin personnel 9.3 lakh an um a, hienghai laia 18,000 hai chu nuhmei an nih. Mani le mani inthat 175 laia 73 (41.7%) hai chu nuhmei an nih. CAPF a hin CRPF, BSF, CISF, ITBP, AR le NSG hai an thang a nih.

Lok Sabha nominate member in 2

NEW DELHI: President chun Assamese actor, George Baker, 2014 Lok Sabha election­a West  Bengal a inthawka BJP candidate­a ngir, tlingzo lo le Kerala a inthawka Professor Richard Hay hai chu July 23, 2015 khan Lok Sabha member in a nominated. Richard Hay hi Anglo­Indian a nih.

Army in officers 10,000 a tlasam

NEW DELHI: Defence Minsiter Manohar Parrikar chun, Indian Army chun tuhin sipai Officers 10,000 in a tlasam tiin zanikhan Lok Sabha­ah ziekin an hriettir. Navy in Officers 1,800 a tlasam niin a hril a, chun kum 2012 a inthawk tuchena hin army officers 644 hai chun an pension hun hmain pension an lak niin a hril. Tuhin Army personnel 45,000 in training an nei mek a, chu hai lai chun Navy­a ding 10,523 le Air Force­ah 11,979 an thang a, kum 2012 a inthawk tuchena sawrkarin training­naa sum a seng chu Rs. 2,409.3 crore a ni tah tiin a hril.

Chung in FIFA President inchu ve a tum

SEOUL: South Korea mi FIFA Vice President hlui Chung Mong­joon chun February 26, 2016­a FIFA Presidential election um dinga khin ngir ve a tum. Chung chun FIFA Vice President­a chelnaw hnung kum 2011­a inthawk khan FIFA sunga Corruption nasa takin a pung niin a hril.  A ngir ding thu hi August thla lailung vel khin, a thei chun Europe hmuna a ngir ding thu hi official­a a puong ding thu a hril. FIFA President inchu dinga ring hai lai UEFA President Michel Platini, Brazil great Zico le Liberia federation president Musa Bility hai an thang.

________________________________________________________________

VAWISUN THUPUI

I lungril chun misuolhai inhnar naw raw se, Sunnithlakin Lalpa tinaa chun um zing lem rawh. Matheiloin chutaka chun lawmman a um a, I beiseina chu thlawn der naw nih.  Thuvarhai 21:17­18

Editorial: Furpui hun ei tlung

Kum tina pel der lova ei hmu le ei tawng hlak fur ruotui ei dawng  mek a. Inzing uta ruo a sur leiin van ruotui,  thilhring, ramsa, ina vai chi ran chi tum tum, thing le ruo, bu le thlai, khawvel le a sunga um thil tinreng hai mamaw em em el, a boa  ei um thei lo chu ei dawng mek a, iengzata tam am ei dawng ding ti ruok chu ei hriet thei nawh. An umtirtu Pathien chauin ruosur ding zat hi a hriet. Khawvel mithiem han hrietna chin neihai sienlakhawm Pathien ang em a hriet chiengna an nei nawh. Pathien ropuizie suklangtu a nih. Thal hun le fur hun siemtu chungah hin a chang leh ei chier hlak a, nisienlakhawm chier ding chu ei ni nawh.

    F

urpui hun ei tlung a, van ruotui a hung tla tam deu leiin Manipur a chenghai khawmin kawng hran hranah harsatna chi tum tum ei tuok pha mek a, thenkhat bu phun hlei thei lovin a siem bakah bu phunsa thenkhat a suksiet a, tui tam taluo leiin Ngakul hai luong liemin Nga vai lai tam tak an suokdawk a, bu le thlai tam tak a suksiet bakah in tam takah tui a luonglut el chau ni lovin a chim a, lamlien le leilak thenkhat suksiein, phaizawla chenghai ta ding lem chun ke le inlirtheia inlawn vel hai chen a sukbuoi pha. Ruotui tam leia harsatna ei tuokhai lei hin Pathien ei hrilsiet chang khawm a bo nawh.

  

India rama state hran hrana tuialien ang em em chun harsatna ei la tuok ve ngai naw a, hi lei hin Manipur mihai hi ruotui tam lei le khuo inthal lei hai hin chu Pathien chunga lungawilo, nuor le pheng ding ei ni naw a, lawmthu hril ding lem ei nih. Tuilien leia a sawmtel le zatel thina em ei la tuok ve ngai naw a; khuo inthal leia thlai ching thei lo hiel khawp le boruok lum taluo leia thi em khawm ei la um nawh. Ei vangnei bikzie hi hriet a, Pathien kuoma lawmthu hril lem dinghai ei nih. Van ruotui ei dawng hi ei mamaw tawka ngai ding a nih.

  

Fur ruotui tam leia harsatna tuor zuol bik chu Greater Imphal area le phairam district a cheng hai anni ring a um. Tlangram biela cheng han harsatna ei tuok ve hi a nep lem ring a um. Hi thil khawm hi tlangram biela cheng hai ei vangnei lemna a nih. Tuilien hi inpel der lova kum tin, furpui hun zata harsatna namen lo takel ei tuokpui hlak a nih ti chu ei hriet seng. Amiruokchu, mipui ni leh, a state sawrkar ni leh furpui huna tui tam taluo annawleh tuilien laka lo inveng le lo dangna sin hi ei uksaknaw taluo deu a nih. Ei tuok ding hriet sa ni sia ei lo indang annawleh ei lo invenglawk nuom tlat si naw chun ei tuor ding ma a nih.

  

Churachandpur town sung bika lem chun tuilien laka inveng hi sawrkar ta ding chun thil harsa taluo ding niin an lang nawh. Town sunga nullah hai hi lien tawk tak le fai takin siem inla, CCPur town area sunga vadungte­hai, Sielmat, Chingkawn, Lailam, Lanva, Tuithapui vadung hai le kawr­ruom um haia tui luong liem theina bik vadung kam (river banks) haia hin tuilien dangna siem inla chu ruotui tam changa tui tam taluo leia harsatna hi a nep lem ngei ring a um. A sunga chenghai le a sawrkar khawm hin hi thil hi a tum khawm a la tu m sin naw el hi a pawi hle a nih.

          

Hieng vadungkam hai po po hi a tluon suokin tui luong liemna ding siem ding tina ni lovin an hnuoi zuol bikna, mihreim chengna hmun haia tuailien dangna hi a bat batin siem inla, tuilien laka ei him theina a ni ngei beisei a um. Tui a lien pha hlak chu Zawng mangsie an hril ang elin ei phek buoi sup sup el hlak a nih. IFCD khawmin tuilien dangna bang siemna ding hin fund a neinaw mani ding, a neinaw chun budget siem huna siemsa ngei sienla nuom a um. Distrit a MLAs le Minister hai le District Administration hai thangruola tuilien dangna siem hi an ngaipawimaw chun an siem thei ring a um. Hi thila ding hin hma hung la ngei hai sienla nuom a um.