Tuolsung
Dist. Level Digital India Week hmang tan
CCPUR: July 2, 2015, 10AM khan District Training
Centre (DTC) Hall, Tuibuong, CCPurah District Level Digital India Week program
hmang a nih. Hi Digital India Week hmang ding le inzawmin zani zingkar 8:45AM
khan Mr Lunminthang Haokip, IAS, DC, CCPur inrawinain SDOs, DLOs, DC Office staff le NIELIT CCPur
students han NIELIT CCPur, Hill Town a inthawk DC Office, Tuibuong chen lampui
zuiin rally an nei a, rally hi DC CCPur in a vailiem.
DTC Halla program hmang huna DC CCPur in thu a hrilnaa chun, ‘Digital India’ ti hi ieng dang ni lovin ‘extention of egovernance’ a ni a, Digital India hnuoiah Pillars 9 a um a, chuonghai chu Broadband Highways, Universal Access to Mobile connectivity, Public Internet Access Program (National Rural Internet Mission), eKranti (Electronic Delivery of Service on Demand), Information for All, Electronics Manufacturing, IT for Jobs le Early Harvest program hai an nih tiin a hril.
Mr Ghyneswor, DIO, NIC in projector le slides hai hmangin hi huna hin Digital India & Digital Locker thuah presentation a pek a, Khaipu Gangte, eDistrict Manager chun ‘Role of edistrict le Dinesh, NIC & Bigen Sana, NIELIT han Jeevan Prammam (Digital Life Certificate to pensioners) le Digital Literacy thu hai an hril. Vawisun hin Digital India theme hnuoiah Painting le Quiz Competition hai nei ning a tih.
State Competitive Scholarship exam
CCPUR: July 10, 2015, 10:00AM khin Manipur state
sunga district headquarters tinah Directorate of Education (S) huoihawtnain
Class IX le Class VI student hai ta dingin State Competitive Scholarship
Examination,2015 um a tih. Churachanpur districtainthawka candidates hai chu
Phungkhothang Govt. H/S ah exam an tih. Hi exama thang ding hai Admit Card chu
ZEO/CCPur Officeah sem mek a nih.
DC in drainage hai sukfai dingin an hriettir
CCPUR: Fur ruotui tlak hun ei tawng mek le inzawma
CCPur khawpui sung hmun tum tuma
tuiluongkawr (nulla) hai an hnawk le bit leia lampui sunga tuihawk an
luong hum hum hlak leia motor le kea inlawn mipui han harsatna nasa
tak an tuok hlak a. Hi le inzawm hin DC CCPur chun Officer 5 hai chu nulla
sukfai le July 10, 2015 chena action report pelut dingin an hriettir. Hi
dungzui hin EE/PWD, CCPur chun inter town road a nulla hai sukfaina sin thawng
an ta, OC/80 RCC chun Police stationa inthawk Tiddim Road zula nulla le
culvert blockage hai inthielfai an ta, BDO/Tuibuong in Sielmata inthawk Peace
Ground inkar nulla le footpath blockage hai inthielfai a tih. BDO/Lamka chun
Sielmat a inthawk Lanva inkar nulla le footpath blockage hai sukfai an ta,
CEO/ADC, CCPur chun town area a bikin Police station a inthawk Tiddim Road a
nulla le Culvert blockage um hai sukfai ding thu pek an nih tiin DC CCPur chun
a hril.
Upa J. Lungawi, MCS(retd) a thi; vawisun vui ding
CCPUR: Pu/Upa J. Lungawi, MCS (retd) chu July 2,
2015 khan kum 90 mi niin zanikhan Cancer natna leiin a thi a, a ruong vawisun
hin Rengkai thlanmuolah vuiliem ning a tih.
Pu
J.Lungawi hi indikna ngaisangtu, mi indik le ringum, mi invawng fai takel, kum
upat hnung khawma suit le nectie inbela smart taka um thei zing a nih. Hmar
hnam sunga le kohran le khawtlanga nina pawimaw tak tak lo chel hlak a nih. Kum
1934 khan NEIG Mission school Senvawnah
lekha an chuk a, kum 1940 khan CCpura hung kaiin lekha an chuk a, kum 1948
khan Churachand High School, Imphal, Gauhati University hnuoiah Matric a zo a,
BA chu kum 1954 khan DM College, Imphala inthawk a zo a, Leisen khaw mi hai
laia BA passed hmasa tak a nih.
December 13, 1957 khan Extension Officer
(Cooperation) sawrkar sin chel tanin Manipur
hmun tum tum haia postingin SDC hmun tum tum haiah chelin a lo um a, May
9, 1979 khan Manipur Civil Service (MCS)
a inkaisangtir a ni a, SDO Singngat, Emplyoment Exchange Officer, Imphal;
Treasury Officer le SDO/CCPur; Asst. Commissioner (HO & DDO), DC Office,
CCPur; SDO Tipaimukh hai lo chelin Feb. 4, 1988 khan kum 30 sawrkara sin a
thaw hnungin a lo pension ta a nih. Ama hi Hmar mi hai laia SDO sin chel hmasa
tak nia hriet a nih.
Pu J.
Lungawi hnam sunga nina pawimaw a lo chel hai lai kum 1954 Hmar National
Congress President hmasatak niin ama hun lai hin Hmar chu ST lista zieklut a
nih. Dr H.S. Thanglung Chairman nina hnuoia kum 1956 khan Hmar Literature Society
a Secretary hmasatak a ni a, kum 2003 in Vice Chairman/Acting Chairman lo niin
hi hun lai hin Manipur University hnuoia Hmar MIL chu BA chena inchuk dinga
pawm a nih. Kum 2004 khan Chairman, Hmar Company& Officers Pensioners’
Association, CCPur le nina dang dang lo chel le Kohrana khawm nina dang dang lo
chel ta a ni bawk a. Kum 1991 khan HmarEnglish Dictionary a lo siem ta bawk.
Pu J.
Lungawi hin naupasal 2 le nau nuhmei 3 a nei. Lusun sungkuo hai ei Chanchinbu
chun a sunpui hle.
SDO/BDO Singngat building hawng ding
CCPUR: July 4, 2015, 12:00Noon khin Mr Ginsuanhau,
MLA/Singngat chun Singngat SDO/BDO office building bawl thar hawng a tih.
Building thar hi Rev. Khamvum, DS, EBC Singngat Division chun Pathien kuoma
inhlanna nei a tih. BDO/SDO office hawngna hi Pu Ginsuanhau bakah Pu
Lunminthang Haokip, DC, CCPur le S. Khamthang, Special Contractor han uop an
tih.
Position lak le IIT entrance tling lawmna nei
CCPUR: M. Songgel Youth Club chun zanikhan M.
Songgel Community Hallah Manipur University hnuoia BA final exama 6th Position latu Kimneithem
d/o Doulet Lhungdim of M. Songngel le IIT Entrance test a JEE Advance 2015 a
India pumpuia ST laia 246 postion latu Thangminlun Haokip s/o Khaimang Haokip of
M.Songgel hai lawmpuina hun an hmang. M. Songgel Youth Club chun mi pahni hai
hlawtlingna thuruk chu student hai exam ding huna ‘student curfew’ puong a,
student han mobile phone chawi an lo khap hlak thu, hi lei hin M. Songgel khuoa inthawk MU a topper 2 le IIT ah
mi 3 an tling ta niin an hril.
Kimneithem hi Happy Heart Schoola Class X 2nd division a passed niin Rengkai Govt. Hr. Sec. Schoola Class XII Arts 1st divisiona pass, CCPur Govt. Collegea inthawk English subjecta MU hnuoia 6th Position la a nih. Thangminlun Haokip hi JNV/Tuinom ah class X passed, JNV Kottayam, Kerela state a inthawk class XII passed, kum 201315 sung JNV Kottayam, Kerela state a TIME Cochin, Coaching Institute –ah Dakshana Scholarship hmuin Clear Joint Extrance Examination 2015 ah India pumpuia ST rank 246 hmu phak le IIT lut thei ding a nih.
Headline
September 6 chenin Sanjenthong leilak bawlzo beisei;
Private Schoolhai enkaitu dingin dan siem a ni ding
IMPHAL: Manipur Works Minister, Dr Ratankumar chun,
Sanjenthong Leilak bawla um mek hi September 6, 2015 chena bawlzo thei dinga
beisei a nih tiin zanikhan Manipur Assembly an hriettir. Imphal West district
le Imphal East district a chenghai infepawna leilak pawimaw tak a ni leiin
sawrkarin a ngaipawimaw a, bawlzo vat a ni theina dingin theitawp suoin hma a
lak a nih. Leilak hmangruohai rambung danga lak ani lei le ei state ah bandh le
economic blockade a um ngun taluo leia tum ang le zo dinga ti huna zo thei lova
u m a nih tiin Dr Kh. Ratankumar chun a hril.
Manipura Private Schoolhai enkaitu ding le thunun anni theina dingin
State sawrkar chun dan (Law) siem a tum a. Hi thila ding hin Private School
Regulations Act/Bill ding induong a ni a, zo fel tep a ni ta a, Manipur
Assembly session nawkah Private School Regulation Bill hi putlut ning a tih
tiin Manipur Education Minister M. Okendro chun zanikhan Manipur Assembly an
hriettir. Private School Regulations Act hi April 21, 2009 a inthawka kha siem
dinga State sawrkarin hma a lo lak tan ta a nih tiin M. Okendro chun a hril
bawk.
Demand for Grants 6 passed
IMPHAL: Zanikhan Manipur Assembly chun Demands for
Grants 6 an passed nawk. Demand for Grants passeda um hai chu Land Revenue,
Stamps and Registration Rs. 80,31,90,00; Environment & Forest Rs.
184,98,16,000; Youth Affairs & Sports Rs. 55,48,08,000; Horticulture &
Soil Conservatation Rs. 85,20,44,000; Minorities and Other Backward Classes Rs.
34, 87,58,000 le IFCD Rs. 282,22,23,000 hai an nih.
Titthawng um lo nia hril
IMPHAL: Ukhrul District sunga Old Wahong Village
bula ramhnuoi tlangkang um el thei dinga hril chu mithiem han a hmuna an va
envel a, titthawng um lo a nih tiin SDO, Jessami chun a hril. Chun, Ukhrul a
inthawka ei thu dawngna khawmin hril rik a ni ang em ema titthawng le inlau um
ding a ninaw thu a hril.
Health Dept. hnuoia
Dist. Hospital 7
IMPHAL: Manipur Health Department hnuoia District
Hospitals 7, Community Health Centre (CHC) 17, Primary Health Centre (PHC) 85
le Primary Health SubCentre (PHSC) 420 a um mek. Chun, Doctors/Manipur Health
Service (MHS) thawktu 1196 an um a, hienghai laia 2 chu Grade 1, 43 hai Grade
II, 90 hai Grade III le 1070 hai Grade IV an nih.
Entrance test result puong
IMPHAL: Directorate of Agriculture, Govt. of Manipur
hnuoia Academic Session 201516 sunga hi Directorate tira B.Sc. (Agri), B.Tech
(Agri. Engg), B.Tech le Food Tech, B.Sc. (Home Science) le B.Sc (Nutrition )
admission thawna dinga entrance test result chu puong a ni ta a, result hi Directorate
a Notice Boardah en thei dinga tar a nih.
Rallya thang naupang 7 khaw hrelovin
IMPHAL: State sawrkarin Babupara, Imphal bula
Bengali High School sukboa Ram Krishna Mission indin a tumna le inzawma July
6, 2015 chena hi school suoksan dinga thusuok a siem dodalnain zanikhan hi
school a kai student hai chun Assembly complex panin lampui hrawna an nei.
Lampui hraw student hai hi Police han secretariat lai an lo dang a, sienkhawm
fethlengin Nityaipat Chuthek, Keishampat chen an tlung a. Hi huna hin rally a
thang student 7 hai chu nisa inrui khaw hre lovin an um.
Others
MBBS inchuk dingin Hmar mi 4 an tling
GUWAHATI: Assam sawrkar hnuoia MBBS/BDS Entrance
Examination, 2015 result a suok ta a. MBBS inchuk thei dingin Hmar mi 4 an
hlawtling a, chuonghai chu
1.
Lalrotluong Hrangchal Gauhati Medical College.
2.Tv. Jeffrey
Ngente, Muolhoi, Haflong Assam Medical College, Dibrugarh
3. Thangsingpui
Jorhat Medical College.
4. Nk.
Juliet Lalsiemkim Hmar, Saron, Mahur, .S.A.A. Medical College, Barpeta hai an
nih.
Naupang kap hlumtu mi 4 laia 3 vuok hlum
SITAMARIH: Zani hmasa zan khan silai chawi pasal 4
han Bihar state a Sitamarih Mobile repair dawr neitu Awadh Kishore Singh le a
naupa Ratnesh (12) hai chu an intieng pana an fe laiin lamlakah an lo kap a,
Ratnesh hi a hmuna a thi nghal a, a pa hi na taka a hliem leiin Patna Medical
College & Hospital panpui a nih. Hi thil tlungna hmuna mipui chu an lungsen
hle a, a kaptu mi 4 hai chu an hnawt a, mi 3 hai chu manin an sawisak hlum a,
pakhat chu a tlan hmang hman tiin Hari Prasath, SP, Sitamarih chun a hril.
MP hai hlaw sukpung dingin
NEW DELHI: Parliamentary Panel chun MPhai hlaw,
Allowances le Ex MP hai pension hlaw a dabawla sukpung dingin sawrkar kuomah
recommendations an peklut. Hi recommendations hi sukpuitling a hung ni chun
tuta MP han thla khata Rs. 50,000 an hlaw chu Rs. 1,00,000 le MP pension thla
khatah Rs. 20,000 chu Rs. 35,000 le tuta ni khata sitting allowance Rs. 2,000
chu Rs. 4,000 a hung ni ta ding a nih.
Rupee 1 sut man Rs. 1.14
NEW DELHI: Kum 20 deuthaw chengkhat note sut lova um
ta chu tulai hnai khan thaw thar nawk a ni a. Rupee 1 note sut thara um hi
note pakhat peia a sut man chu Rs. 1.14 vel a nih . Hi thil hi RTI activist
Subhash Chandra Agrawal indawnna a siem dawna Security Printing and Minting
Corporation of India (SPMCIL) in a hril a nih. Chengkhat (Rupee 1) note hi a sut
man le tekhin a tlo naw leia kum 1994 a inthawka kha sut ta lova um a ni a,
hiengang bawk hin cheng 2 (Rupees 2) le cheng 5 (Rs. 5) note hai khawm hiengang
lei bawka sut zawm ta lova lo um an ni thu Agrawal chun a hril. Hieng pawisa
note chin hai hi sut an ni tanaw hnung khan a thir (coin) a siem an hung nih.
Amiruokchu, Union Finance Ministry gazette notification dated December 16, 2014
dungzuiin March 6, 2015 khan Shrinathji Temple (Nathdwara), Rajasthan hmuna
Rupee 1 note hi hung hmang nawk a nih.
Pawisa note dang haia chun RBI Governor in
suoi a thaw hlak a, Rupee 1 note a ruok chu Finance Secretary in suoi a thaw
thung a nih.
Nuhmeihai Mobile phone hmang lo dingin
JAISALMER: Khawvel pumpui huopa technological
revolution a fe vut vut lai le July 1, 2015 nia PM Narendra Modi in Digital
India project a hawng zo hnunga khawm Rajasthan state a Barmer district sunga
Samdari Panchayat biela Kanana village a cheng nuhmeihai chu Mobile phone le
Social media hmang lo ding, Jean kekawr bun lo ding, Jean jacket hak lo ding le
pasal an nei ta chun dhoti a inbel dingin an khawtlang thuoitu (Panchayat) han
khapna thu an pek.
Zangnadawmna Rs. 2,00,000 seng pek ding
NEW DELHI: June 30, 2015 zana West Bengal state a
Darjeelign district sunga Sub Division pathum, Darjeeling, Kurseong le
Kalimpong sunga mimkei rapthlak tak a tlung leia thina tuok sunghai chu
zangnadawmna Rs. 2,00,000 seng Prime Minister’s National Relief Fund a inthawk
pek ning an tih tiin PM Narendra Modi chun a puong. Mimkei leia mihriem thina
tuok hi 39 an tling tah.
Aadhar Card tehlem siemtu man
CHANDIGARH: Zani hmasa khan Chandigarh Police hnuoia
Crime Branch han Mukesh Kumar (29) chu Aadhar Cards tehlem a siem leiin Hallo
Mahra khuoa inthawk an man. Mukesh Kumar dawra inthawk Aadhar card tehlem a
siemna computers, printer, scanner le hmangruo dang dang hai khawm man sa a nih
tiin Police chun an hril.
PMKSY thaw dingin a pawmpui
NEW DELHI: Zanita Union Cabinet meeting chun Pradhan
Mantri Krishi Sinchayee Yojana (PMKSY) chu thaw dingin a pawmpui. Hi Scheme
dunzui hin khawtin kuomah tui lakna ding irrigation facilities pek ding ti a
nih. Hi scheme a sum hmang dinga riruong chu Rs. 50,000 crore a ni a, PMKSY
enkaitu ding hin National Steering Committee indin a ni a, hi Committee a
Chairman chu PM a ni a, members chu an zawmpui Union Ministerhai an nih tiin
Union Finance Minister Arun Jaitley chun a hril.
Chhattisgarh sawrkarin Police hai allowance sukpung
RAIPUR: Chhattisgarh state a Maoist annawleh
Naxalites helpawlhai chetna, a bikin Baster Division a duty Police hai
allowance chu July 1, 2015 a inthawk sukpung dingin state Cabinet meeting in a
rel tiin an CM, Raman Singh chun reporterhai a hril. Hi thil hi Police
constables le Assitant Constables 22,000 velin an tangkaipui ding a ni a, state
sarwkar khawmin kum 1 ah Rs. 121 crore a
seng belsa pha ding a nih tiin Raman Singh chun a hril. Constable thla 1 ah Rs.
8,990 hlaw han Rs. 14,144 hlaw tang an ta, assistant constable le secret troops
(Gopniya Sainik) hai insurance chu Rs. 5,00,000 a inthawk Rs. 25 lakh a sukpung
ning a ta, Police constable hai ration allowance thla khatah Rs. 650 ni hlak
kha Rs. 2,000 le State special task force thla khatah Rs. 1,200 hlaw han Rs.
2,200 an hung hlaw ta ding a nih tiin Raman Singh chun a hril.
HP Judge a sina inthawk suspended
SHIMLA: June 1113, 2015 inkar sung khan Hotel
Ambassador, Manali, Himachal Pradesh ah “Drugs Menace in IndiaOverview,
Challenges and Solutions” ti thupui hmangin Judgeshai ta dingin Conference a
um a. Hi Conferene a thang ve Himachal Pradesh a inthawka nuhmei Judge pakhat
chun mawilo baksakin a mi sawisak bakah Manali bula private resort a inzinpui
dingin a fiel tia hekna a siem khum leiin Himachal Pradesh High Court Chief
Justice Mansoor Ahmad Mir chun Civil Judge (senior division)cumChief Judicial
Magistrate, Himachal Pradesh chu a sina inthawk a suspended.
APCC President hlui an ban
HYDERABAD: Andhra Pradesh Congress Committee (APCC)
President hlui D. Srinivas chu zanikhan Congress a inthawkin an ban a,TRS a
zawm ding thu a puong bawk. Mr Srinivas chun harsa ti tak puma Congress suoksan
a ni thu a hril. Srinivas hi Andhra Pradesh state thedar a ni hmaa minister lo
nita a nih.
Subsidised LPG zawr 25% in a tlahnuoi
NEW DELHI: Direct Benefit Transfer Scheme (DBT)
hmang a ni hnungin ‘ghost beneficiaries” hai peihmang an ni leiin Subsidized
LPG zawrsuoka um chu 25% deuthaw in a tla hnuoi tiin Chief Economic Advisor
(CEA) Arvind Subramanian chun zanikhan UNDP Conference call huna a hril. Hi lei
hin 201415 sungin sawrkar chun Rs. 12,700 crore vel a save phak beisei a nih
tiin Mr Subramanian chun a hril.
Online National AgriMarket
NEW DELHI: Zani hmasa a PM Narendra Modi thuoina hnuoia
Union Cabinet meeting chun Online National Agriculture Market indin le hawng
dingin an rel. Hi thil hi awlsam lema
loneitu han an Lo le an Huon haia thlai, bu le bal an tharsuok hai
bazara an zawr theina dinga thaw a nih.
Ram Sai chet leiin nupui 1 a thi
JHAGRAM: Zani hmasa khan West Bengal state a West
Midnapore district, Hhargram Subdivision sunga Bastro khawsungah ram Sai 4 an
va lut a, hi khawsunga Ngaidi in iemanizat an suksiet leia b ang chimin nupui
pakhat Ranhi Hansa (38) chu a del hlum. Hi khaw mipui lungsenin Forest
Department team hmaah nuorna an va nei a, ram Sai hi hnawthmangna sin thaw
dingin an ngen. Khaw mipui hai chun, Sai hai hin an bu le bal hai nasa takin an
suksiet niin sawiselna an siem bawk.
MoS Home Darjeelingah an zin
NEW DELHI: PM Narendra Modi remruot angin Union
Minister of state for Home, Kiren Rijiju chu zanikhan Darjeeling ah an zin a,
Kurseong SubDivision a Tingling hmuna Relief Campa um in le lo nei lo le
hospitala enkawla um hliem zatelhai a va kan a, sawmdawlna pek vat anni ding
thu a hril. Kien Rijiju hi Darjeeling MP. S.S. Ahluwalia, NDRF le Home Ministry
officials han an zui a, Kalimpong khawm va sir an tih.
Vawisuna inthawk MNP
NEW DELHI: Hun iemanichen liemtaa inthawka lo
buoipui tah Mobile Number Portability (MNP) chu vawisun July 3, 2015 a inthawk
India ram pumpuia hmang thei a ni ta ding niin
Rakesh Garg, Chairman Telecom Commission le Secretary, Department of
Telecommunications chun a hril. MNP dungzui hin Mobile phone hmangtu hai chun
mani number pangngai kha hmang zingin mobile operators dang (entirnain Airtel a
inthawk Aircel) a insawn thei a ni ding a nih. A hma chun MNP hi May 3, 2015 a
inthawka tan dinga ti a ni a, sienkhawm Cellular Operators Association of India
(COAI) chun hi service sukpuitlingna dinga technical tieng an lan zozapnaw leia
hun suksei dinga DoT kuoma ngenna an siem dungzuia sukhnuk a nih.
US Presidential Award dawng dingin mi 108
WASHINGTON: US President Barack Obama chun
Presidential Award for Excellence in Mathematics and Science Teaching dawng
ding hai hming a puonglang ta a, hienghai lai hin Illinois a, US a um Indian
American Darshan Jain khawm a thangsa. Hi lawmmana hin a pawisafai US dollars
10,000 a thangsa. Hieng zirtirtuhai hi America hlawtlingna siemtu an nih tiin
Barack Obama chun a hril.
------------------------------------------------------------------------------------
VAWISUN THUPUI
Thalrau chu sukmit naw ro. Thu hrilhai hmusit naw
ro; iengkim infie lem unla, a tha chu pawm tlat ro. Suol anga inlang po poa
inthawk chun insiekieng ro. ~ 1 Thessalonika 5:1922
Editorial: Sixth Schedule
June 29, 2015 a The Imphal Free Press chun Back to
Sixth Schedule ti thupui hmanga editorial a zieknaa chun, Gogernment of India,
Ministry of Home Affairs (North East Division) in May 7, 2015 khan “Extension
of Sixth Schedule of the Indian Constitution in the Hill Areas of Manipur” ti
thupui hmanga P.C. Lawmkunga, Chief Secretary, Manipur kuomah lekha a thawna
chun, sawrkar thlungpuiin Manipur ram pumpui inpumkhatna sukbuoi lova tlang
mihai enkawl tha a ti thu le a nuom thu a zieklang bakah Manipur a ADChai chu
Sixth Schedule hnuoia sie dingin Manipur sawrkar an hriettir niin a zieklang.
Hi thu le
inzawm hin ThadouKuki Student’s Union (TKSU) General Headquarters chun Manipur
tlangram biel hai Sixth Schedule hnuoia sie TSA General Headquarters le Thadou
hnamin an dit thu an hril a. Hiengang bawk hin Zohnathlakhai khawma tha ei ti
ve ring a um a, unau Naga hnam haiin iengtin am an ngai ve ding chu maw? Tuta
hma khan chu Naga hnam hai khawmin an dit ve a, Sixth Schedule Demand
Committee, Manipur a khawm thangin Sixth Schedule ngennaah an lo thang ve hlak.
Tulai ruok hin chu Alternative Arrangement an inhnikin an buoipui lem ta niin
an lang.
A hma khan
chu Manipur sawrkar khawmin Manipur tlangram biela ADChai chu Sixth Schedule
hnuoia sie a nuom a, sawrkar thlungpuiah
khawm recommend a lo thaw hlak. May 13, 1991 a R.K. Ranbir Singh Chief
Minister nina hnuoia Cabinet agenda No. 1 a chun Manipur tlangram biel sixth
schedule hnuoia sie dingin an recommended. Chun, R.K. Dorendro Singh Chief
Minister nina hnuoia Manipur Cabinet meeting August 17, 1992 Agenda No. 1 a
khawm Manipur tlangram biel Sixth Schedule hnuoia sie ding tiin an rel a, sawrkar
thlungpui kuomah recommend khawm an thaw a hril a nih.
Chun,
Radhabinod Koijom Chief Minister a hung ni nawk a. Radhabinod Koijom Chief
Minister nina hnuoia Cabinet meeting 28/3/2001 a neia um a Agenda No. 10 ah
Manipur tlangram biel chu Sixth Schedule hnuoia sie an dodal naw thu le Sixth
Schedule hnuoia sie an remti a. Amiruokchu, hi huna hin thu tlawmte belsa a
nih. Manipur tlangram biel Sixth Schedule hnuoia sie a lo ni khawma ‘with
certain local adjustment and amendments” ti thangsain recommend sawrkar
thlungpui kuomah an thaw nawk. Amiruokchu, tuchen hin Sixth Schedule hnuoiah
Manipura A DChai sie an la ni nawh.
Manipur
tlangram biel hai Sixth Schedule hnuoia tuchena sie lova a la umna san hi
suizui le ngaituo chet chet a tulin an
lang. Manipur tlangram biel hai Sixth Schedule hnuoia siena ding thua hin
Manipur state sawrkar, Manipur a tribal MLAhai annawleh Hill Areas Committee
an lunglut tak tak naw lei khawm a ni thei. Nisienlakhawm thudik tak chu hriet
lo le hrillang lovin a um niin an lang. Chun, Manipur a tlangmihai khawm Sixth
Schedule thuah hin ei inhnik zo tak taknaw lei le ei inthuruol tawknaw lei
khawm a ni thei.
Phairam biela cheng ei unau Meiteihai khawm Scheduled Tribe ni nuom pawl
an hung u m ta a, tulai tak hin Scheduled Tribe list a thang sa dinga ngenna le
nawrna an nei nasa. An mithiem le hmathlir hla hai chun Scheduled Tribe a um le
Manipur phairam district 4, Imphal East District, Imphal West District, Thoubal
district le Bishnupur district hai chu Fifth Schedule hnuoia sie le um an nuom
niin an lang. Tlangram biel Sixth Schedule hnuoia sie a lo ni chun hi thil hi
an ta dinga thil tul niin an hriet niin an lang bawk.
