Responsive Ad Slot

Hmasawnna Thar | 02 July, 2015

Thursday, July 2, 2015

/ Published by VIRTHLI
Tuolsung
Digital India Week 2015 hmang ding
CCPUR: July 2­7, 2015, 10AM a inthawkin District Training Centre (DTC), Tuibuong­ah Digital India Week­2015 hmang ning a tih. July 2, 2015, 8:45AM in Digital India Week­a thang ding han CCPur Govt. H/S campus, Opposite Laitui Pharmacy a NEILIT CCPur Centre a inthawk DC Office inkar rally nei an tih. Rally hi DC CCPur in vai liem a tih. Rally­a hin DC Office­a Officer le staff hai thang seng dingin DC/CCPur chun an hriettir.
    
Rally nei zoin DTC a programme hmang ning a ta, programme hmang sung hin DIO/NIC, CCPur e­District Manager han Digital India thuah thupui tum tum hmangin thu hril an ta, July 3, 2015 in Digital India thuah Quiz & Painting competition um a ta, July 4, 2015 in student­hai ta dingin Digital Locker Account hawng ning a ta, e­Governance thuah quiz competition um a tih. July 7, 2015 in competition neia um haia lawmman semna nei ning a tih.

Addl. Commissioner in a kaisang
CCPUR: Govt. of India, Ministry of Finance, Dept. of Revenue (Customs, Excise & Service Tax) Notification No. 22/2015 dungzuiin Pu J.K. Simte (Jamkhomang Simte), IRS s/o (L) L.  Simte, MCS of Rengkai, Nehru Marg, CCPur chu Joint Commissioner, Central Excise, Customs & Service Tax a inthawk Additional Commissioner in a kaisang. A kaisangna hi ei chanchinbu chun a lawmpui hle.

B.Ed training nuom teacher hai ta dingin
CCPUR: Directorate of Education (S) chun in­service Science & Arts Graduate teacher hai ta dingin kum 2 sung DM College of Teacher Education, Imphal­ah B.Ed. training buotsai a tum. Chun, Hindi Graduate teacher hai ta dingin Govt Hindi Teachers Training College, Imphal­ah “2­yrs Hindi Shikshan Parangat Training  buotsai a tum bawk. Hieng training haia thang nuom Teachers hai chun No Objection Certificate, regular Appointment order; EIN,Graduate Certificate, Date of Birth Certificate thangin document pawimaw tum tum July 15, 2015 chen in Director of Eduation (S) a peklut thei ning a tih tiin Director of Education (S), Govt. of Manipur chun inhriettirna a siem.

Mipui kuoma thupuong
CCPUR: ADC, CCPur Election, 2015 le inzawma 19 ­Saikawt Constituency result chungchanga inhrietthiemnawna um anga inlang chu thu nawk um ta lo dingin July 1, 2015 khan sukfel a ni tah. Chuleiin, mimal, party, hnam le khawtlang inkara buoina le inhrietthiemnawna um thei ding thil tukhawma thaw zawm ta lo dingin L.K. Hmar, PRO, HPC(D) GHQ, Sinlung, Hmarram chun zanikhan inhriettirna a siem. Chun, hmatieng peia khawm mitin inthuruol taka khawtlang le mipui ta dinga sin thawtlang seng dingin fielna a siem.

IRS hnuoiah DDT kap zo fel
CCPUR: Dist. Malaria Depart., CCPur chun National Vector Borne Disease Control Programme fethlengin Myanmar Border area­a Indoor Residual Spray (IRS) programme hnuoia DDT an kapna chu an zo fel. Behiang PHC hnuoiah khuo 16., mi 1841 umna In 379, rooms 1024 haiah DDT kap a ni a, Singngat PHC hnuoia khuo 15­a mi 3662 umna In 865­a rooms 1752; Sinzawl PHC hnuoia khuo 5, mi 5222 umna In 9945 haia rooms 1983 le Saikot PHC hnuoia khuo 14­a mihriem 1434 umna In 296 a rooms 683 haiah DDT kap a nih.

CCPur Times Magazine a suok nawk tah
CCPUR: Tuithaphai, CCPur thangsana thlatina suok Churachandpur Times June 2015 issue chu a suok nawk ta a, agent le a zawrna dawr haia inchawk thei a ni nawk tah. A sungah thu tiem inhawi le bengvar thlak tak tak tiem ding a um. A sunga thu  um hai lai ‘Mizoram should solve Sinlung Hills issue now’ , Liensangvung Award, Tribe Leaders Meet , KNF 28th Rising Day, Articles hran hran, career, health le a  dang dang tiem ding a um.

DTC­ ah District Forum meeting
CCPUR: July 1, 2015, 10AM a inthawk khan NEICORD/ACTED huoihawtnain DTC, Tuibuong, CCPur­ah in ‘2nd Dist Forum of Public shemes in remote and backward dist of North East India” program hmang a nih. Hi huna hin Project Manager, NEICORD chun introduction a nei zovin NEICORD/ACTED chun CCPur District sunga scheme tum tum thawa um hai ngirhmun le hmu dan hrilna le interaction programme nei a nih. July. 7, 2015 in hiengang prog. hi hmang nawk ning a tih.


Headline
Kum 5 sungin Rs. 1,00,000 crore sengin India hmarsak bielah lamlien km. 10,000 siem tum a nih : Nitin Gadkari
GUWAHATI: Zani hmasa khan Guwahati­ah India hmarsak biela motor lampui siemthatna ding le inzawmin Workshop nei a nih. Hi Workshop hi Union Road Transport and Highways minister Nitin Gadkari in khuollien ni pumin a hawng. Workshop a hin Union Sports & Youth Affairs Minister Sarbananda Sonowal, Union Minister of state for Home Kiren Rijiju, Meghalaya Chief Minister Mukul Sangma, Tripura le Assam PWD minister­hai khawm an thang. Hi workshop a hin Assam CM Tarun Gogoi fiel ve a ni a, sienkhawm a thang nawh.
    
Hi huna Nitin Gadkari in thu a hrilnaa chun tuta inthawk kum 5 sungin India hmarsak bielah lamlien Kilometre 10,000 vela sei Rs. 1,00,000 crore sengin sawrkar thlungpuiin siem a tum a, hi sinthawnaa hin tuolsung Contractors, thiemna bik neihai, a biel sung mihai inthangtir ning an tih tiin a hril. Hi thiltum (Plan) sukpuitling a hung ni ngei theina dingin India hmarsak biel states 8 a sawrkar le a biel mipuihai thlawp le thangpui seng dingin Nitin Gadkari chun a fiel.
    
India hmarsak biela motor lampui siemthatna dinga hin sawrkar thlungpui chun NE biel mihai phur le thatho taka thang dingin a dit a nih. Sawrkar thlungpui chun pheikhai inruol taka NE biel a state sawrkarhai le fetlang a nuom bawk. Sawrkar thlungpui le NE biela state sawrkarhai ei thangruol phawt chun hi Scheme hi hung hlawtling a ta, state sawrkar han an thlawp naw a, an thangpuinaw chun a hung hlawsam ding a nih tiin Union Minister for Youth Affairs & Sports, Sarbananda Sonowal in hi huna thu a hrilnaah a hril.
            
Transport tiengpanga seng tlawmna tak tui hmanga infepawna (water transport) khawm sawrkar thlungpui chun a ngaipawimaw a, nasa taka hmalak tum a nih tiin Sarbananda Sonowal chun a hril bawk.

Imphal
NEC member dingin Prof. G. Kamei
IMPHAL: North Eastern Council (NEC) full time member dingin Prof. Gangmumei Kamei le Chandrakanta Das hai ruot an nih. Prof. Gangmumei Kamei hi Manipur mi, NEC member a ruot hmasa tak a nih. An sin chel hi Central­a Secretary rank nia hril a nih. DoNER Minister chun NEC member­a ruot an nina order hi an suo a nih.

Mithiruong hmu a nih
IMPHAL: Zanikhan Lamlongthong hnuoia Imphal vadungah mithiruong (pasal) pakhat, a hming le umna hrietlo, kum 50  mi vel bawr ding hmu a ni a, en thei dingin JNIMS morgue­ah sie a nih. A hmel inlang danin Meitei Pangal a hawi tiin Police chun an hril.

Sawrkarin chingfel a tih: CM
IMPHAL:  Nagaland Board of Secondary  Education (NBSE) hnuoia Class IX & X student­hai lekhabua Manipur state flower Shiroy Lily Nagaland state a Siroy tlanga chau hmu a nih tia zieklanga um hi Nagaland sawrkar leh inbiekna neia chingfel  ning a tih tiin zanikhan CM O.Ibobi Singh in inpui an hriettir.

March, 2016 ah Thoubal Project hawng thei beisei
IMPHAL: IFCD minister, Ngamthang Haokip chun Thoubal project a right side canal sinthaw chu 100 ah 70 zo fel a ni ta a, March, 2016 ah Thoubal project hi zo fel le hawng theia a um beisei a nih tiin zanikhan Manipur Assembly an hriettir.

Lungril buoiin mi 1 a sun hlum
IMPHAL:  Zanikhan lungril buoi Arambam Naobi (26) s/o Ibomcha of Takhel Makha Leikai, Imphal West District in Khundrakpam Sanathoi (21) s/o Ibomcha of Takhel Mayai Leikai a sun hlum bakah Yumkhaibam Premchand (18) s/o Angousana chu a awm, a phing le a ke haiah na takin a sun hiem a, JNIMS panpui a nih.

Dzuko Valley­ah Police station
IMPHAL:  Dzuko valley­a chenghai vengtu ding le a tul tul thawtu dingin Dzuko valley­ah Police station sie a ni ding thu, inlirthei inhmang a um chun a umna area sunga duty police officer in maw a phur ding thu le Imphal khawpui sunga CCTV hai siem that a ni ding chu zanikhan Dy. CM Gaikhangam in Inpui an hriettir. Mr Gaikhangam chun, state police department in high technology device a mamaw thu, tuta hma nekin mipui le police inkar that tieng tieng a pan pei thuhai a hril.

Kap hliem 2 hai laia 1 a thi
IMPHAL:  Zani hmasa 3:30PM vel khan Naoremthong Khulem Leikai­ah Khulem Jiten (28) in insung thil buoina le inzawmin a pa Khulam Kendrajit a vuok leia va san tuma fe a patei dinghai Khulem Priyobata (55) le Khulem Krishnamohan (50), (L) Jugeshwar nauhai a licence Pistol in a kap hliem a, hienghai laia Khulem Krishnamohan chu a hliemna tuorzo lovin Shija Hospital­ah zani zingkar khan a thi. Hi thina lei hin a veng mipui lungsenin Jiten chengna in an va suksiet bakah Mahindra Scorpio MN01S/3281, Mahindra Duro Scooter le Genertor pakhat an raw siet. Jiten hi a tlan h mang a, Police han man tumin an zawng mek.

Demand for grants 6 pasi a nih
IMPHAL:  Zanikhan Manipur Assembly in Demands for grants an pasi. Demands for grants pasi a umhai chu Police, Vigilance, Fire Protectio & Control, Jail le Home Guard hai an nih.

B.A. (Hons) 6th Semester result puong
IMPHAL: Manipur University hnuoia BA (Honours) 6th Semester examination, 2015 result puong a ni ta a. A pumpuia pass percentage 69.78 a nih. Result hi Controller of Examination, Manipur University a inthawk hriet thei ning a tih. Top 10 chena eini tlangmi tling hai phek hnung tieng tarlang a nih.

Thuoihmanga um hai insuo tah
IMPHAL: Zeliangrong United Front (ZUF) ni dinga ringhla han Rel lampui siemnaa inhlawfa pasal pahni an thuoihmang Mistulal Dash (25) s/o Harilal  Das of Cachar District, Assam le Chuijangam Kamei (24) s/o Poungamngai, Puiluan Village, Nungba Sub­division, Tamenglong district hai chu dam le himin June 30, 2015 khan an insuo tah.

MU ah admission form sem lai
IMPHAL: Manipur University hnuoia MA/M.Sc./ M.Com/MLIS/ MCA admission thaw nuomhai ta dingin July 8, 2015 chen khin Manipur University Cash Counter, Canchipur­ah application form lak thei a nih.

ATSUM in blockade an suspended
IMPHAL: ATSUM President le General Secretary hai thangsaa ATSUM thuoitu 6 manna ding State sawrkarin Warrant of arrest order an suo hlip an remti lei le Assembly session zova inbiek an remti leiin June 22, 2015 a inthawk ATSUM in National Highways le National projects haia economic blockade an thaw chu July 11, 2015 chena dingin suspended a nih tiin ATSUM adviser, Romeo Bungdon chun a hril.

Others
Mephedrone 151 kgs leh mi 4 man
MUMBAI: June 30, 2015 khan Maharashtra Anti­ Terrorist Squad (ATS) han Oshiwara hmuna Hotel pakhata inthawk mi 4 leh 151 kg a rik Mephedrone an man. Mana um Mephedrone hi Rs. 30 crore manhu vel niin ATS official han an hril. March thla khawm khan Directorae of Revenue Intelligene han Sangli, Maharashtra ah mi 3 leh Mephedrone 405 kgs an man bakah Police constable pakhat chu Sangli district a hin Mephedrone kg. 110 leh a ina inthawk an man.

Digital India Week PM in a hawng
NEW DELHI:  PM Narendra Modi chun zanikhan New Delhi­ah Digital India Week le E­education, E­Health le E­Governance policy document, Digital India programme hnuoia mihai a hawng. Manipur thangsain India rama states le UTs hran hran haia khawm Digital India Week hmang tan a nih. Hi thil hi tulai khawvel thiemna hmanga ram mipui han hrietzauna an nei theina ding le information technology chungchng mipui hrilhrietna dinga thaw a ni a, Digital India project hnuoia hin Broadband internet hmangin Gram Panchayat hai po po thlungzawm ning a tih tiin PM chun a hril.

J&K­ah ralthuom tam tak dapdawk
JAMMU: Army le Jammu and Kashmir Police thangruol han Kishtwar district sunga Jangalwar area hmuna dappui an thawnaah ralthuom tam tak dapdawkin an man tiin defence spokesperson S.N. Acharya chun zanikhan a hril. Ralthuom an dapdawk hai lai AK­56 rifle 1, magazines 3, Pistol 2 le a magazines 2, UBGL 1 le  UBGL grenades 1, AK­47 mu 423, Pistol mu 20, Hand  Grenades 13 le Kenwood radio set 2 a thang.

August 15 chenin insukfaina nei ding
NEW DELHI: Bank­hai thangsain Public Sector institutions le Central Government Offices haia chun August 15, 2015 chen khin insukfaina sin (cleanliness drive) nei ning a tih tiin sawrkar thlungpui thusuok chun a hril. Hi thil hi PM Narendra Modi dit dana thaw a nih tiin Union Ministry of Drinking Water & Sanitation chun thusuok a siem. A hma chun cleanliness drive hi June 22­26, 2015 inkar sunga nei dinga ti a nih.

Odisha state­ah sai an pung pei
BHUBANESWAR: Odisha state a chun Sai umzat tam le pung tieng a pan pei. Kum 2012 khan Odisha state­ah SAi umzata report chu 1930 a ni a, kum 2015 a Odisha Forest & Environment in Elephant Census report a peka chun Odisha state a Sai umzat chu 1954 an tling tah. Kum 3 liemta sung khan Odisha state a hin electric man lei, le sapeltuhai leiin ram Sai 341 an thi niin ei thu dawngna chun a hril. Sapeltuhai chun a Ha dit leiin Sai an that hlak a nih.

Purunsen thupruk khapna kum 1 suksei
NEW DELHI: Zanita PM Narendra Modi rawia Cabinet Committee on Economic Affairs (CCEA) meeting chun Purunsen man kaisang pei ding dangna dingin Purunsen thupruk khapna dan chu July 2, 2015 a inthawk kum 1 dang keisei nawk dingin an rel. Purunsena sumdawngtu han a manto huna zawr dingin an thupruk hlak dangna dinga  hi khapna thupek hi suksei a nih.

NDFB(S) cadres 3 man an nih
GUWAHATI: June 30, 2015 khan Assam Police han NDFB(S) cadres 3, Santosh Kharkerkary @ K. Shimang, self­styled Deputy Commander, Deimalu Basumatary le Gambor Gayari hai chu Salbari, Baksa district­ah AK­56 Rifle 1, magazine 1, silaimu 30, factory siem 9mm Pistol 1, magazine 1, China siem Grenades 2, RDX kg. 7, detonators 2 le silaimu 85 leh an man niin  Dhananjay Ghanwat, SP (Operation), Baksa district chun a hril.

Strawberry zawrnain Rs. 19,77,980 an hmu
AIZAWL: Saiha Horticulture Division hnuoia Strawberry chingtu hai chun November 2014­May, 2015 inkar sung khanStrawberry zawrnaa inthawk Rs. 19,77,980 an hmu. Saiha Horticulture Officer, CH Lalmuanpuia chun, Saiha­a inthawk km. 10 a hla Niawhtlang ­II a chun kum 2014 a inthawk khan Mission for Integrated Development of Horticulture  (MIDH) hnuoiah strawberry (sweet Charlie) inchingtir an ni a, tuhin sungkuo 18 hai chun fakzawngnain an hmang mek a nih tiin a hril. Strawberry hai hi Saiha bakah Lawngtlai, Lunglei le Aizawl haia zawr hlak a ni a, a chingtu hai hi Horticulture department chun hmangruo, hnuoithatna le  tul dang dang haiah an thangpui hlak niin a hril.

Telangana ah Tekin mi 6 a deng hlum
ADILABAD: Zani hmasa khan Telangana State a Adilabad district sunga Kawtala Dahegav hmuna Tekin mi 6 a deng hlum a, mi 6 in hliemnna inrik tak an tuok a, Asifabad Hospital panpui an nih. Mi 6 hai hi Lo­a sin an thaw laia Tek hin a deng hlum le a deng hliem an nih tiin ei thu dawngna chun a hril.

WB ah mimkei leiin mi 27 thi
DARJEELING: Zani hmasa zan khan West Bengal a Darjeeling District a Darjeeling, Kurseong le Kalimpong sub­division haiah ruosur nasat leiin hmun 25­ah mimkei rapthlak takel a tlung a, mi 27 zet in thina an tuok. Hieng sub­division pathum haia hin thangpuina le sawmdawlna sin thawtu dingin SSB battalions 3 tirlut an nih.

Petrol le Diesel man sukhnuoi a nih
NEW DELHI:  June 30, 2015 khan Petrol man litre 1 ah 31 paise le diesel man litre 1 ah paise 71 a sukhnuoi a nih. Khawvel pumpui huopa thautui man a hung tla hnuoi leia petrol le diesel man hi sukhnuoi a nih tiin Indian Oil Corporation (IOC) thusuok chun a hril. Delhi a chun petrol litre 1 ah Rs. 66.62 le diesel Rs. 50.22 a ni tah.

Loneitu 2 electric in a man hlum
MUZAFFARNAGAR: Zani hmasa zantieng khan Shamli district sunga Alim Village­ah loneitu, an loa sinthaw lai Devender Kumar (40) le Toda village­a loneitu a losa sin thawlai bawk Harvinder Singh (26) hai chu electric high tension hrui tla thla in a deng fuk leiin electric in a man hlum ve ve.

Saborinadhan in sesamna a nei
THIRUVANANTHAPURAM: MLA dinga thlangtling thar K.S. Saborinadhan (31) chun zanikhan Kerala Assembly­ah MLA dingin intiemkamna a nei. Kerala Assembly ah MLAs 140 an um a, hienghai laia a naupang tak a nih. Sabarinadhan hi Kerala Assembly speaker hlui (L) G. Karthikeyan naupa a ni a, Engineering Graduate le MBA degree nei a nih. A pa thi leia a pa tlingna biela Congress ticket­a ngir a nih.

America­ah Kalashnikovs silai  siem ve
WASHINGTON: Khawvela silai inlar, a bik takin Asia le Africa rambung haia helpawl le sipai han an hmang lar em em Russia in a siem Kalashnikov assault rifles (AK tia hrietlar) ang chi America khawmin a siem ve tah. Thomas McCrossin, CEO, Kalashnikov USA chun an siemna factory hmun a hrillang naw a, Kalashnikov USA brand neitu chu Russian Weapons Company (RWC), Pennsylvania a ni a, company slogan chu “Russian heritage, American innovation” ti a nih. AK­47 hi Russia ram (Soviet Union ni hlak) a kum 1947 laia Mikhail Kalashnikov in a siemsuok a ni a, a siemsuoktu Lt. Gen. Kalashnikov chu kum 2013 khan a lo thi tah.

-----------------------------------------------------------------------------------------------------------------
VAWISUN THUPUI
Lawm rawp unla, ma loin tawngtai unla, iengkimah lawm­thu hril rwp ro; chu chu nangni tieng thuah Krista Isua chun Pathien ditzawng a ni sih a. ­1  Thessalonika 5:16­18

Editorial
Hmelthatna le hmangaina

Mi hmeltha bula um chu an hawi a, a hadamthlak a, en nghawk an um naw a, an bula umzing el ei nuom hlak. Hmel­tha hai hi midang hai neka vangnei an nih. Pathienin hieng zozai mihriem a siem a, chu hai laia hmeltha hang ni bik el chu an hamtha bik a, midanghai neka Pathien malsawmna an dawngna a ni bawk. Hmeltha en le hmu chu an hawi hle ning a tih putar kum 70/80 ni tahai khawma nunghak hmeltha an hang hmu chang hin chu tar an nina an hrietfuk ta ngai naw a, ‘ka vanglai leh intuok sienla chu aw’ tiin an thlir vawng vawng hlak. Pasalhai ta dinga nunghak hmel­tha hmu an hawi ang bawkin nuhmeihai ta ding khawmin pasal hmeltha hmu inhawi an ti a, an bulah um an chak ve hlak.
    
Amiruokchu, hmelthatna hi hmangaina a thangsa naw chun umzie bo a nih. Tlangval hmeltha le nunghak hmeltha an innei a. An hmelthat leia an inditna chun hun sawt a dai ngai nawh. Hi lei hin hmelthatna le hmangaina hai hi fe hmunkhat ding le unau ang ela inthe thei der lova an umzing a tul. Hmeltha le hmeltha innei, inthe nawk khawm an um hlak. Ienglei am ei ti chun an inkarah hmangaina tak tak a um sa ve naw lei a nih. Hmeltha le hmeltha innei hin sungkuo hlimna le lawmna an tlun thei nawh, hmangaina a thang si naw chun.
    
Nunghak hmeltha hai vangneina bik chu pasal tha, officer lien le mihausa pasala an nei theina hi a nih. Nunghak hmeltha na nanahai chun mi an hip a nih. Hi hi hmelthat hlutna a nih. Nunghak hmeltha, nungchang tha bawk si, lekhathiem bawk si, fel bawk si, zei bawk si, sawiselna ding um lo hai lem hi chu dit an umin ngaisang um takel an nih. Hmelthatna hin hipna a nei hrat hle ning a tih. Khawvela Lal ropui thenkhat khawm nuthlawi hmeltha zunah an intang a, an nina ding khawm ni thei lovin an um pha hlak. Hmelthatna hi a tha ie, dit le inhnar a um, sienkhawm hmel­thatna ringawt nei ni lo, hmangaina neihai dit an um zuol.
    
Hmelsie bula um chu a rinum a, a hadamthlak ve nawh. Mi hmelsiehai chu an thikthu a sie a, an hrang a sie bik an tih. Hi lei hin hmelsie chu nuom a um nawh. Amiruokchu, hmelsie bovin hmeltha a um thei sinaw leiin hi khawvela hin hmelsie khawm an pieng ve hlak. Hmelsie khawm nihai sienla nunghak hmeltha, nungchang thalo le ler hur hai nek chun hmelsie tak nihai sienkhawm hmangaina le mi rimsihai lunginsietna neihai chu mi ditum, mi ngaium le mi ngaisangum anni hlak. Hi lei hin upa han ‘hmel chu siem that thei a nih’ an lo ti hlak. Mi hmelsie khawm nihai sienla, lekha an hung thiem a, IAS, IFS, IPS Offier an hung ni pha chu mi hmeltha, mihai dit le inchu sup sup an hung ni hlak.
    
Nunghak hmeltha hai ku hi a ruk a ralin an ler nuom an ti bawk. Hi thu hi an dikna chen a um ning a tih. Eini lai ngei khawm nuhmei hmeltha fu fu, pasal nei lo le hmuzo lova nuthlawia leng le um el hmeltha fu fu le pumduong tha tak takel hmu ding an bo bik nawh. Hi lei hin hmeltha chau hi chu duthusam a tling ngai nawh. Hmeltha bawk, nungchang tha bawk, lekhathiem bawk, hmangaina le lunginsietna nei le hau hai hi dit le ngaisang an u m zuol a, mihai inchu sup sup an hung ni hlak.
    
Mi hmeltha le pumduong hlawtling, ngaino bei takel le rasi nei tha em em el, thabo, hmusuok tum neka hmang huou huou hlak, an hnik chau du le nungchang tha neka incheina uor le ngaisang lem hai ruok hi chu dit an um naw a, an bula um hi sawl a um a, mihai nghawk anni hlak. Hieng a ni lei hin hmeltha chau a huntawk naw a, hmeltha + hmangaina nei mi, nungchang tha, mi taima, fel le lekhathiem ni hai hi a tulsa a nih. Hmeltha ringawt hin chu hlutna a um chuong nawh.      


Don't Miss
© all rights reserved
made with by Simon L Infimate