Responsive Ad Slot

Hmasawnna Thar | 17 June, 2015

Wednesday, June 17, 2015

/ by VIRTHLI HMAR
Tuolsung
Ministry siem ding hun la hriet lo: HPA in ministry an siem thei ding le dingnaw hriet a la ni nawh
CCPUR: Manipur­a Autonomous District Councils (ADCs) 6 haia inthlangna June 1, 2015 nia nei a ni hnung le June 10, 2015 nia vote tla hai tiemzo a ni hnung tuchena hin ADCs han ministry an siem thei ding hun hriet a la ni nawh.
    


MDC dinga thlang thar hai Manipur sawrkarin Gazette Order insuo a ta, chu hnungah Nominated MDC hai Gazette order insuo nawk a ta, chu zovah sawrkarin MDC hai intiemkam (oath taking) hun ding la hung ruot a ta, chu dungzui chun CEO/CCPur in MDC thlang thar le Nominated MDC hai intiemkamna ding Notification an suo ding niin Ms Mannuamching, CEO, ADC/CCPur a inthawk ei thu dawngna chun a hril. Tuchena hin Manipur sawrkar chun MDC thlang thar hai Gazette order a lan suo naw a, hi lei hin ADC han ministry an siem thei ding hun hriet a la ni nawh.
    
CEO/CCPur chun, MDC le Nominated MDC han MDC ni dinga intiemkamna an neizo hnungah Chairman Election nei hun ding ruot ning a ta, Chairman ding thlang zo a ni hnungah Vice Chairman election hun ding Chairman in ruot a ta, Executive Member (EM) ding hai ruok chu Chairman kuta um a nih tiin CEO, ADC, CCPur chun a hril.
    
Churachandpur District a MDCs seats 24 umah khan Congress (INC) in seat 5, BJP in seat 1 le Independent in seat 18 an lak a, Congress le BJP hai chun an khatin sawrkar an siem theinaw ve ve a. Independent Candidate­a MDC dinga thlangtling mi 18 laia 17 hai chun sawrkar siem tumin party thar Hill Peoples Alliance (HPA) an indin a, Amiruokchu, HPA hin sawrkar an siem thei ding le dingnaw thuah idea a neinaw thu CEO chun a hril a. State Election Commission khawmin idea a neinaw a, Legal expert ruoi a ngai ding niin Ms Mannuamching, CEO, ADC, CCPur chun a hril. Hieng a ni lei hin CCPur ADC a ministry siem ding hun chu hriet a la ni nawh.
    
CCPur ADC a chun Elected MDC 24 hai baka hin MDC 2 nominate an la ni ding a nih.

Vocational Bible School
CCPUR: Good News Club huoihawtnain zanikhan ZPCS, Zomi Colony, CCPur­ah Vocational   Bible School tan a ni a, Thongkhanlal, Asst. Commandant, CRPF hin Vocational Bible School hi a hawng. Thongkhanlal chun, VBS hun sung Pathien thu le hla ei inchuk hai hi puitling hnungah ei sawr tangkai hle hlak thu a hril. VBS hi June 19, 2015 chen aw ding a nih.

Imphal­ah Workshop a um ding
CCPUR:  State Health Society, Manipur le Regional Office, UNICEF, Guwahati hai thangruola huoihawtnain June 19&20, 2015, 10AM haia khin Hotel Nirmala, Imphal hmuna State Health Society le inzawmin Workshop um a tih. Hi huna hin Dr Thangchinkhup Guite, CMO le Seiboi Mate, Dist. Programme Manager, National Health Mission hai thang an tih.

Teachers han workshop
CCPUR: June 16­26, 2015 chen ni 10 sung aw ding DIET Centre, HQ Veng­ah ZEO le CEO hnuoia Teachers han zanita inthawk khan Workshop an nei tan. Hi huna hin ZEO le CEO hnuoia teachers hai an thang a, DIET Centre­a teachers han training an pek.

CD tlangzar
CCPUR: (L) Upa Vialzahau hrietzingna dinga “Tun leh Zua Sannem la ­2015” ti hming chawia Video CD album siema um chu zani zantieng 4 PM khan Dalthang chengnain, Zogam Road, N. Lamka hmuna Singngat MLA Ginsuanhau in a tlangzar. Hi huna hin MDCs Zamnu,  Hausuanthang le Pumtulthang hai bakah K. Guite, Advisor, ZRO le Chinlunthang, President UZO GHQ hai khawm an thang.



Headline
Manipur­a ADC 6 haiah BJP chu Selkaltu Pawlin thang an tih: Th. Chaoba
IMPHAL: Zanita BJP Manipur Pradesh President Th. Chaoba in Manipur Pradesh BJP Office, Nitiyapat Chuthek, Imphal­a Chanchinbumihai an hmupuinaah, Manipur­a Autonomous District   Councils (ADCs) 6 haiah BJP chu selkaltu pawla thangin, Selkaltu pawl inthungnaah inthung an tih tiin a hril. ADC election hmasa khan BJP seat pakhata khawm an tling naw a, kum 2015  ADC election­a ruok chun BJP ticket in mi 21 zet Member of District Council (MDC) a thlangtling an hung ni ta a, BJP chun hma nasa takin a sawn a nih tiin Th. Chaoba chun a hril.
    
Vawisun khan BJP Manipur Pradesh Office, Nityapat Chuthek, Imphal­ah BJP Manipur Pradesh thuoituhai le tuta tuma ADC election a BJP ticket­a thangtling MDCs han meeting an nei a; hi meeting a hin ADCs 6 haia sawrkar siemna dingah BJP chun tu party khawm thangruolpuilo ding (alliance thaw lo) le BJP chu ADC 6 haiah Selkaltu Pawla thang ding tiin lungruol taka tha titlang le rel a nih tiin Th. Chaoba chun a hril. Hi thil hi party sukhrat zuolna ding, a bik takin tlangram biela dinga thaw remtitlang a nih tiin a hril. ADCs 6 a MDC a thlangtlinga um hai hming tuchena Manipur Gazette­a State sawrkarin a lan suo naw chu mak a ti thu Th. Chaoba chun a hrillang bawk.
            
Manipur ADC election 2015 a Political party tum tum hai ngirhmun chu, Indian National Congres (INC) 46, Naga Peoples Frond (NPF) 43, BJP 21 le Independent 34 an nih.

Dist. Hospital fai takin Rs. 50 lakh
IMPHAL: Kayakalp Awards Scheme le inzawma zanita Dr O. Ibomcha Singh, Director, Health & Family Welfare, Manipur le State Mission Director, RIMS in RIMS Directorate, Imphal­a Chanchinbumihai an inhmupuinaa chun, ei state a District Hospital fai le thienghlim taka a thang chun hi Scheme hnuoia hin award Rs. 50 lakh, a pahnina Rs. 20 lakh; Community Health Centre (CHC)/ Sub­District Hospital (SDH) fai le thienghlim takin Rs. 15 lakh le a dawttuin Rs. 10 lakh dawng an tih tiin a hril.

B.F.Sc. selection test result
IMPHAL: Fisheries Department, Manipur tira kum 2015­16 academic session a B.F.Sc inchuk ding thlangna (selection test) result chu a suok ta a, hlawtlingna chang hai hming chu en thei dingin Directorate of Fisheries, Lamphelpat Notice Board­ah tar a nih tiin Director, Fisheries, Manipur chun inhriettirna a siem.

Motor in pasal 1 a baw hlum
IMPHAL: Zani zingkar inhma tak khan Thoubal District­a Wangbal le Wangjing inkarah motor in pasal pakhat a bawhlum hnungin a tlansan. Motor hi a neitu le ieng motor chie am ti hriet a ninaw a, a mi baw hlum hi zingkar walking fe niin an lang tiin ei thu dawngna chun a hril.

Others:
James Keivom in NYPPA Photographer of the Year award a dawng
NEW YORK: James Keivom s/o L. Keivom, IFS (Retd) chu June 15, 2015 zana New York Press Photographers Association’s (NYPPA) Pictures of the Year gala nei huna thlalak themthiemna leiin New York Press Photographers Association chun Photographer awards inhnar um tak tak pahni an inhlan. Award a dawng hai chu News Picture category­ah pakhatna le pahnina­ Best in Show le Photographer of the Year awards hai an nih. James Keivom hi New York Daily News photographer sinthaw a nih.
    

James Keivom hin, Eric Garner rek hlum a nina le inzawma protest a cover naa Best in Show award hi a dawng a ni a, Photographer of the Year award hi Michael Brown kap hlum a ni le inzawma protest a cover­na thlalak leia a dawng a nih.
    
Photographer of the Year a dawngna
Tuta tum hi James Keivom in award a dawng vawikhatna a ninaw a, vawi tam tak a lo dawng ta a, kum 2013 khawm khan Hurricane Sandy coverage a thawnaah “Best in Show Award” inhlan a lo ni ta a, Hurricane sandy a cover­naah Picture of the year thangin awards 6 tawp a lo dawng ta a, thla a lak pakhat lem chu New Jersey­a gallery­ah main photo in a lo hmang ta a nih.

Union Minister Aizawl­ah an zin
AIZAWL: Zan khat riekin Union Minister of state for Panchayati Raj Nihalchand chu zanikhan Aizawl­ah an zin. Mizoram LAD hotu han Mizoram Panchayati Raj a neinaw thu le Village Council nei lem a ni thu; a sin thaw dan le tuta VC ngirhmun hai Nilachand kuomah an hrilfie. Union Minister hin Mizoram Governor le CM hai khawm an hmupui.

NDA in CM candidate puong naw nih
PATNA: Bihar Assembly Election hung um dinga hin BJP chu Prime Minister Narendra Modi hmingin ngir an tih. Chun, Bihar Assembly Election hung um dinga hin NDA chun Chief Ministerial candidate puong naw ni a, sawrkar tha siem ding ti thupuia hmangin eletion hung um ding hi hmasuon a tih tiin Anant Kumar, in­charge, Bihar Election, BJP chun zanita Patna hmuna reporter­hai an hmupui huna a hril.

NE biela states 5 haia dingin Rs. 14,599 crore
NEW DELHI: Union Ministry of Road Transport and Highways hnuoia um National Highways and Infrastructure Development Corporation (NHIDCL) chun India hmarsak biela states 8 um hai laia states 5, Assam, Arunachal Pradesh, Meghalaya, Sikkim le Nagaland haia lamlien le leilak hai siem thatna dingin sum Rs. 14,599 crore hmang dinga riruong siem a nih tiin NHIDCL thusuok chun a hril. Modi sawrkarin an din thar Bharat Mala Project Highways Km. 10,000 le leilak 2,000 siemnaa hmang dingin Rs. 1,30,000 crore hmang dinga riruong a nih tiin Sanjay Jaju, Director (Finance), NHIDCL chun a hril.

Kohima Police han Truck le mi 4 an man
DIMAPUR: June 14, 2015 khan Kohima Police han Phesama Check Gate­ah Truck pakhat, a lekha umlo, B/R No.AS­01DD­1976, Chasis No. MAT361333b1J25061 le Engine No. 697TC66JYY126294 le mi 4, Jiten Das (28) s/o Robindra Das (Driver) of Lokra Village, Kamrup, Assam, tuta Bokajan a um; Rahul Das (23) s/o Jiten Das, Toukal Village, Assam; Nayan Saradhar (22) s/o Akshay Suradhar of Agia village, Goalpara, Assam le Indrajeet Das (21) s/o (L) Narmoha Das of Chatabari village, Bokajan, Assam hai chu an man. Truck driver chun Rs. 5,000 hlaw dinga hi truck hi a khal a ni thu le Senapati, Manipur a mi pakhat kuta pek dinga a ruoituin a hril niin an puong. A ruoitu hi Assam a um niin a hril bawk.

IAF Vuongna tuoksiet a tuok
ALLAHABAD: Zani zingkar dar 7:25 vela Indian Air Force (IAF) Central Command, Bamrauli a inthawka vuong suok Jaguar Aircraft chu zani zingkar 8:47 AM vel khan a vuongsuoka inthawk km. 50 vela hla, FCI Warehouse bul, Chaka an ti hmuna tuoksiet a tuok a, leilet lai a tla thla, thil tawkpawi a neinaw bakah a Pilot pahnihai chu him le damin an inchawmdawk hman. Hi thil tlung le inzawm hin Court of Inquiry thaw dinga order insuo nghal a nih.

Delhi Law Minister DJB Chairman in
NEW DELHI: Delhi Law Minister thar Kapil Mishra chu Delhi Jal Board (DJB) Chairman dinga ruot thar a nih. A hmain DJB Chairman sin hi Delhi Deputy CM Manish Sisodia in a lo chel hlak a nih. June 15, 2015 khan Raj Bhavan, Delhi­ah Mr Kapil Mishra chun Delhi  Governor Najeeb Jung hmaah Delhi Law Minister thar dingin intiemkamna a nei chau a nih.

Assam­ah  Wai­Wai khap a nih
GUWAHATI: Wai Wai 1­2­3 Noodles( mimi) le Wai­wai mini Ready to east noodles hai chu Assam state sungah ni 30 sunga dingin zawr, semdar le sekkhawl khapna Notification June 15, 2015 khan Assam sawrkarin an suo. Wai Wai noodles a hin mihriem hriselna sukse thei ding thil a uma hriet a ni leia khap a nih tiin Assam sawrkar thusuok chun a hril.

EC in Sangma party NPP a suspended
NEW DELHI:  Election Commission chun Mr P.A. Sangma Party Nationalist People’s Party chu  Election Symbols (Reservation and Allotment) Order 1968 hnuoiah election expenditure statement an peklut naw leiin an party recognition a suspended. NPP hi Centrala sawrkarna siemtu NDA­a thang an ni a, April 15, 2015 chena pelut dinga an hriettir hnunga khawm  statement a peklut naw leiin May 15, 2015 chena pelut dingin deadline a pek a, sienkhawm hi chena khawm hin an la peklut naw leia a suspended a nih.

Ama le ama a ringah an at
MUMBAI: June 15, 2015 khan Jigar Makwana (20) chu hmul metna blade hmangin Bandra Metropolitan Court huongsungah ama le ama a ringah an at a, Bhabha Hospital, Bandra panpui a nih. Doctors han a ngirhmun a derthawng nawh tiin an hril. Jigar Makwana hi Santacruz a cheng, a upa Ravi (32) chu mi suomna le buoina siemnaa thanga intumna leia Khar Police han an man leia lungawinawa hi thil hi a thaw niin Police han an hril.

Tripura CM in PM Modi an hmupui ding
AGARTALA: Tripura Chief Minister Manik Sarkar chun vawisun hin New Delhi ah PM Narendra Modi inhmupui a ta, India hmarsak biela states hai Special Category status­a an um sunzawm peina ding thu hriltlang an tih tiin State Government official thusuuok chun a hril.  Chun, Tripura CM le PM hai hin Tripura Economic Development chungchang khawm hriltlang an tih. NE CM­hai chun NE state hai chu Special Category states an nina chu la sunzawm pei dingin PM kuomah joint memorandum an lo pek ta a nih.

A khinghnia mit thalo IFS officer hmasa tak
CHENNAI: Tamil Nadu state a um Ms N.L. Beno Zephine (25), a mit khinghnia tha lo chu, India rama hiengang Indian Foreign Service (IFS) sin thaw hmasa tak dingin haptakar liemta khan External Affairs Ministry chun appointment Order a pek a, ni 60 sunga a sin zawm dingin an hriettir. Ms Zephine hi kum 2014 a kha Civil Services exam a hlawtling ta a nih. Posting khawm India ram le foreign pek thei ve ve a ni ding a nih. Zephine hi literature graduate a nih.

NDFB(S) Joint Secretary man
GUWAHATI: June 15, 2015 khan NDFB(S) Self­styled Joint Secretary, Sumanta Basumatary alias B. Sinaihang chu Assam Police han Tukraijhar, Chirhang district­ah an man. Deember 23, 2014 a Kokrajhar district, Assam a tribal mi 80 zet thatna dinga thu phierrutu le mawphurtu tak niin intelligence thusuok chun a hril. Hun sawt takel Bengaluru ah a zunbi hmang a, tulai hnai ela hung suok le Chirang a um nia hril a nih.

A khinghnia mit thalo IFS officer hmasa tak
CHENNAI: Tamil Nadu state a um Ms N.L. Beno Zephine (25), a mit khinghnia tha lo chu, India rama hiengang Indian Foreign Service (IFS) sin thaw hmasa tak dingin haptakar liemta khan External Affairs Ministry chun appointment  Order a pek a, ni 60 sunga a sin zawm dingin an hriettir. Ms Zephine hi kum 2014 a kha Civil Services exam a hlawtling ta a nih. Posting khawm India ram le foreign pek thei ve ve a ni ding a nih. Zephine hi literature graduate a nih.

Zangnadawmna Rs. 2,50,000 seng pek
JOWAI: June 13, 2015 zantienga East Jaintia Hills district, Meghalaya sunga Ratacherra an ti hmuna mimkei a tlung leia thina tuok mi 4 sunghai kuomah zangnadawmna Rs. 2,50,000 seng  interim relief a pek anni ta a, state sawrkar sum an dai chun zangnadawmna hi la pek belsa ning a tih tiin W.R. Lyngdoh, DC, East Khasi Hills District chun a hril.

Pakistan­ah mi 11 khai hlum
LAHORE: Zanikhan Pakisran ramah Court in thi dinga thiemnaw an changtir ta hnung mi 11 hai chu Jail hran hran 8 haiah a khaihlum nawk. Tuta kum fe mek sunga Pakistan ram sunga khai hluma um chu mi 150 an tling ta nia hril a nih. Khai hluma um hai hi a tlangpuiin tuolthattua intum an nih.

Ei ralthuomhai thil cheimawina a ni nawh:Asif
ISLAMABAD:Pakistan Defence Minister Khawaja Asif chun, “A tulna a um chun ei ralthuomhai India donaah hmang ning a tih” tiin a hril. Pakistan ralthuomhai hi thil cheimawina a ni nawh tiin Khawaja Asif chun a hril bawk. India politicians han Pakistan helpawlhai thangpuitua an min tum hi an dik nawh tiin Pakistan Defence Minister hin tuolsung chanchinbumihai kuoma a hril.

Saudi Arabia ramah mi 100 lu tanbawng tah
RIYADH: June 15, 2015 khan Saudi Arabia chun drugs a sumdawng, Court in thi dinga thiemnaw an changtir tasa chu a lu tanbawngin a that. Tu kum sunga Saudi Arabia rama lu tanbawnga that chu mi 100 zet an tling ta niin official Saudi Press Agency thusuok chun a hril. Kum 2014 khan mi 87 hai chu an lu tanbawnga that anni bakah kum 1995 khan mi 192 hai chu an lu tanbawnga that an nih tiin Amnesty International thusuok chun a hril.
----------------------------------------------------------------------------------------------------------
VAWISUN THUPUI
Lalpa in Pathien chu zui in ta, ama chu ting in ta, a rawng dam bawl in ta, ama chu in chel tlat ding a nih.      ­ Deuteronomy 13:4


Editorial: Tangka, sum le pawisa ei ti hi

Mihriem hai hin mamaw le dit ei hau em em a, mihai inza, mihai inpak, mihai lawm hlawna ding dam, milien le milal nina ding dam, thuneina le thil thaw theina ding dam, lekhathiemna ding dam, mihriem hriselna le mihriem hringnun keiseina ding dam, hmelthatna ding dam, mawi le nalna ding dam,hausakna ding dam, hminginthangna ding dam, chet theina ding dam, hmingthatna ding dam, khawtlang, hnam, sakhuona le politics haia tlaktlumna ding dam le thil iengkima dingin tangka , sum le pawisa ei ti hi a pawimaw bek bek a, hi thil thang lo chun mihai chung en ni chu thil harsa tak, thil theilo ang a nih ti inla ei hril suol taluo ring a um nawh. Hi lei hin tangka, sum le pawisa tia ei ko hi ei zawng sup sup el a nih.
    
Mihriemhai hi pawisa ditin ei intlansiek nasa hle a, a biling a balangin ei intlansiek sup sup el a nih. Hi thil hin ei ram, ei hnam, ei mimal nun le niphung a peihmang tah a ang khawp el. Ei pawisa dit dan hin mi dang pawisa dit taluo tia ei hril hai kha ei khum ta niin an lang. Pawisa ei hmuna ding a ni phawt chun ruoltha, sungkhat laina khawm a um thei ta naw niin an lang.
    
Pawisa ei dit taluona leiin an hlem thei ei inhlem kuol a, fak thei dan ei zawng ngar ngar a, pawisa ei hmuna ding le ei hamthatna ding a ni phawt chun mihai hlem hlum der khawm  pawitina ei nei tanaw niin an lang. Hieng thila hin tu khawm indem le insawisel thei ding bik ei um chuong naw a, ei reng hin ei inangtlang seng a ni deu tak tah. Hlem ding hmu tha deu han an hlem lien deu a, a hmu thanaw deu han ei hlem chin el a, a faru thei han an fakruk a, thamna la thei han an lak a, suol taluo em emah khawm ei ngai chuong ta nawh. Thamna la thei le faru thei hai chu ei ngaisang hlur el ni tain an lang.
    
Election huna khawm pawisa hau hau ei baw a, mi fel le mi tha, Pathien ti mi le minaw ti khawm ei thlier hran chuong ta nawh. Ei suolna em em el pakhat chu, pawisa ei lakna pa  annawleh pawisa ei lakna nu hai kha vote chuong lovin ei mihriem dit (candidate) kha ei la vote tho tho hlak. Hi lei hin election a ngir ding chun pawisa a nuoitel neinaw hai ta ding chun ngir ngamna ruol an ta nawh. Tuta tuma MDC election a khawm khan candidates han pawisa cheng nuoi iengzat am an seng ding ti hi ngaituo tham tak a tling a nih. Pawisa ei Pathien an ta el naw mani ti ding khawpin ei um tawl a ni hi!
    
Pawisa hi ei Bible a ei hmu dan chun suol tinreng bul a nih a ti a. Hieng laizing hin ei ram thuoituhai hlak chun sawrkar thlungpui (Central Government) a inthawka pawisa hril suok tam chu inelnain an hmang a, pawisa tam tak tak an zu hril suok hlak. Central a inthawka ei pawisa hmu ngaituo chun ei ram hi hmasawn hle awm tak a ni ta a, sienkhawm chuong ang hehu chu a ni si nawh. Khawpui le hmun thenkhat hmel chu a danglam ngei, sienkhawm ei state pumpui, a bikin tlangram biel hang en hin duthusam chu a ni nawh. Hmasawnna ei hmu hi a la tiel rek ruk chau a ni hi!
            
Ei Bible chau ni lovin ei ni laia Pathien thu mi hriltuhai le mi tam lem in pawisa hi suol tinreng bul a nih tiin ei hril rawp hlak. Amiruokchu, pawisa hi ei hmang indik phawt chun suol tinreng bul chu ni theiin ka hriet nawh. Hmang indiklo ruok chun suol tinreng bul el chau ni lovin thina tur hrat tak a ni thung. Pawisa hi a hmangna an dik chun ram le hnam dawmsangtu le a bula ei hrillang hai po po ni theina a nih. Chuleiin pawisa hi a hmangna ding indik taka hmang chun suol tinreng bulpui chu niin an lang nawh.

Don't Miss
© all rights reserved
made with by Simon L Infimate