Responsive Ad Slot

Hmasawnna Thar | 14 June, 2015

Sunday, June 14, 2015

/ Posted by VIRTHLI HMAR
Tuolsung
Inhrietthiemnawna an neinaw thu an puong;
Thudiklo thedar lo dingin an ngen
CCPUR: June 13, 2015  zantieng dar 3 – 4 PM inkar sung khan Hmar Inpui (HI) inrawina hnuoiah hnam sunga pawl tum tum a thuoituhai chu tulaia 19­Saikot Constituency a MDC Candidate pahni hai inkara thu vuongva inleng vel leia thil ditumlo um thei ding anga an lang leiin inkhawm a nih a. Hi hun a hin Candidate Pu Darsiemlien Ruolngul le Pu Lalhrillien hai pahni chun an pahni inkara iengkhawm buoina le inremnawna an nei naw thu hrilin, inlengpawin an inbiek zing thuhai an hril a, vawisunni chenin an inbiekpaw ran thuhai an hril. Anni Supporter hai thang nat leia thuvuongva indiklo hung um chu pawi an ti thuhai an hril a. Social Media tum tum Facebook group le Online Portal News haiah thu indiklo le buoina thei thil thedar ta lo dingin Pathien hmingin mipuihai an ngen. Chuongang bawk chun hi huna hin an Agent le an hnungzuituhai ve ve khawmin iengkhawm inhrietthiemnawna an nei naw thu hai an hril bawk. Anni hai tading hin Rev. & Dr. Jacob Pudaite chun a hranpa takin tawngtai pekna a nei. Chuzo chun hi huna fekhawmhai chu inchibaituoin inthe a nih. (input:LRS Puruolte/ Photo Alan)



SAL in Seminar hmasatak  an nei
CCPur:   Famtah Pastor Thangngur thi champha vawi 70 ­na hrietzingna dinga December 20, 2014­a indin Sinlung Academy of Letters (SAL) chun June 13, 2015 khan VTI, Muolhlum, CCPur Auditorium­ah SAL Seminar hmasatak nei a nih. Seminar hi Pu David Buhril, Secretary, SAL in a keihruoi a, Rev. Edwin Darsanglur chun tawngtaina in hun a hawng. Hi huna “Ka tawn hriet” ti thupui hmanga Bible & Translation chungthu hril dinga ti Rev Dr Rochunga Pudaite chu damnawna leiin a thang theinaw a, Pu L. Keivom chun Bible & Translation chungthu a hril.
    



Pu David Buhril chun, tawng danga ziek thu le hla inletna tiengpang ei thaw tlawm leia tawng inlet ei thiemnaw bakah tawng thu le hla inlet tieng ei thaw tlawm leiin lekhabu tha le thu tha tak tak mi tam lemin ei la tiem phaknaw thu, tuhin ei hung thaw tan mek a ni a, thenkhat chu tawng inlet kawnga thaw thei tak tak ding khawm ei um a nih tiin a hril.
     
Pu L. Keivom chun SAL indin a nina san le a thiltum hai hrilin, SAL hi All India le International level chenah, khawlai hmuna khawm hmang thei dinga New Delhi chu hmunpuia neia chu hmuna Registration thaw dinga buoipui mek a ni thu; membership drive khawm la hung thaw a ni ding thu le member lakna kawnga ruok chun fimkhur taka lak a ni ding thu a hril a. Tawng inlet uluk a pawimawzie, inlet diknaw leia a ninaw zawng dai inkawktir thei a ni thu bakah tawng ziek le thu ziek hai fimkhur a pawimaw thu  uor takin a hril.
    
Hi huna hin Saptawnga Joycee Kilmer in a phuok ‘TREES’ ti chu hmar tawnga inletsiekna nei a ni a, result ruok chu kar thar tienga puong  a ni ding thu Secretary, SAL chun a hril.

Hill People’s Alliance (HPA) indin
CCPur: June 12, 2015 khan Churachandpur District­a inthawka Independent a MDC a thlangtling thar 18 hai laia 17 han meeting an nei a, Party thar  “Hill People’s Alliance’ (HPA) an indin a, HPA leader dingin Langkhanpau  Guite an thlangtling bakah an party indin thar hi recognised dingin sawrkar  ngen an tum niin ei thu dawngna chun a hril.

Class X &XII pass hai lawmpuina
CCPur: Socio­Economic & Educational Trust (SEET) (M) huoihawtnain zani 10:30AM khan Lydia Hall, Angel Place, Bungmuol­ah tukuma Class X & XII pass hai lawmpuina le tawngtaipekna hun hmang a nih. Dr R. Sanga, Chairman, SEET (M) chun Class X &XII pass hai  par inhlanna a nei a, Rev. Dr V. Ginsianthang, Founder Principal CES Mualnuam & Principal GBC chun Class X pass mi 32 le XII pass mi 32 hai tawngtaipekna le infuina thucha a hril. Hi hun hi Vungzagin Valte, MLA le Thangchinkhup, manager, NABARD, CCPur hai khawma uopin thuhrilna hun an hmang ve.


First Summer Jam 2015 nei
CCPur: June 13, 2015, 1:00PM a inthawk khan Tiddim Road, Hmuia Veng­ah HOPE, Empowerment and Development Foundation huoihawtnain ‘First Summer Jam 2015’chu   “Igniting the spirit of charity through music” ti thupui hmangin Charity Beat Contest/Road  Show nei a nih. Hi huna hin Organiser hai bakah band iemanizat in hla an sak a, mipui thahnemtawk takin an uop.



Headline:
Inremna le muongna ding chauin India in a nurlear thil hmang a tih:  Dr Jitendra Singh
New Delhi: Union Minister of State for Department of Atomic Energy, Dr Jitendra Singh chun zanikhan NDA sawrkar kum khat a tlingna le inzawmin New Delhi­ah Chanchinbumihai an hmupui a, India chu khawvela nuclear thil nei tha takhai laia thang ve a nih. Amiruokchu, a nuclear thil chu inremna le muongna ding thilah chau hmang a tih tiin a hril. Nuclear thil hi inremna le muongna thila chau hmang dingin India chu an tiem tlat a nih tiin Dr Jitendra Singh hin a hril.
    Prime Minister Narendra Modi hmalakna leiin India chun hmatieng panin a fe pei a, kum 2023­24 a chun a nuclear thil nei hi a let thumin hung pung a tih. Nuclear Power Corporation chun kum 2014­15 in power 37,835 million Units a hmusuok zo a nih. Kudankulam Nuclear Power Unit­2 chu tuta inthawk hun sawtnawte ah hmang thei dinga hawng vat ni tang a tih. Nuclear power in mihriem hriselna nasa takin a suksiet ti hi an dik nawh ti fie a ni tah. Atomic energy chungthu­a awareness a dingin sawrkar thlungpui chun New Delhi hmuna Nuclear Hall indin a tum tiin Dr Jitendra Singh chun a hril.

Imphal
Regional Commander thangin NSCN(K) 2 man
Imphal: June 11, 2015 khan NSCN(K) Self­styled Chairman (Amamchat Region) thangsain  Imphal West District Police Commandos han Lamphel Police station huop sunga Super Market­ah an man. Mana um hai chu Khumlo Abi Anal, Lambung Village, Chandel District le Pammei Kakilong alias Kaling of Chingkhulong Village, Tamenglong District hai an nih. Khumlo Abi Anal hi SS Chairman, NSCN (K) Amamchat Region niin Police thusuok chun a hril.

UNC in darkar 48 bandh
Imphal: Alternative Arrangement an ngenna sawrkarin tuchena a la sukpuitling pek naw leia an lungawi nawzie suklangnain United Naga Council (UNC) chun June 16, 2015 zanriala inthawk June 18, 2015 zanril  inkar chenin, darkar 48 sung Naga mihai chengna biela National Highways haiah bandh an thaw ding thu S. Milan, Secretary, Information & Publicity, UNC chun thusuok a siem.

Manipur­ah Maggie Noodles khap
Imphal: Thuthar um nawk hmapo a dingin Manipur state sungah Maggie Noodles zawr, sie le semdar khap a nih tiin Dr J. Suresh Babu, Commissioner, Food Safety and Principal Secretary, Health & Family Welfare Department, Govt. of Manipur chun Order an suo.

NEC director a hung inzin ding
Imphal: Kh. Siile Anthony, Director (HRD&E), North Eastern Council (NEC) chu June 15, 2015 khin Imphal­ah a hung inzin ding nia hril a nih. Manipur­a a cham sungin R.K. Sanatombi  Devi  Vidyalaya, Jiribam bawla um mek enna le Manipur sawrkar hnuoia Planning le  Education Department hnuoia officials hai review meeting neipui a ta, NEC Project sinthaw dan hriltlang an tih. June 17, 2015 in Imphal suoksanin Kohima, Nagaland pan a tih.

Workshop on HIV & AIDS nei
Imphal: World Vision India le State Network of Positive People hai thangruola an hmalaknain zanikhan “HIV and AIDS­ Issues and Challenges” ti thupuia hmangin  ni 2 sung aw ding Nirmala Hotel, M.G. Avenue, Imphal­ah Workshop nei a nih. Hi workshop a hin S.K. Dev  Verman, Principal Secretary, Tribal Affairs & Hills le Social Welfare chu Chief Guest in a thang.

Others
Van eksiden­ah mi 22 an thi
Rajahmundry:  Zani zingkar inhma tak khan Andhra Pradesh state a East Godavari district sunga Dowlaiswaram barrage a Godavari vadungah Van pakhat eksidenin a tla lut a, nuhmei 9 le naupang 7 thangin mi 22 zet a hmuna an thi a, pasal naupang pakhat, Kiran (13) damin a suok a, sienkhawm a hliem leiin Hospital panpui a nih. Van a chuonghai hi  Venkateswara temple­a pathien biea fe, an hungkir tienga eksiden hi an tuok a nih. Van a hin mi 23 an chuong a nih.

Air India sunbu­ah Chawlru hmu
Mumbai: June 11, 2015 a Delhi le London inkara vuong Air India vuongnaa sunbu­ah Chawlru hmu a ni leiin passenger tam takin sunbu hi an fak naw pha nia hril a nih. Hi bu dawngtu hin Air India thuneituhai kuomah sawiselna a siem a, Air India a inthawka dawnletna a la um nawh. Hi thil tlung hin mihai lungril a thawng hle.

Assam tuilienin zuoltieng a pan
Guwahati:  Assam state sunga districts 16 haia tuilien chun zuol tieng a pan pei. Tuilien leiin mi 2,60,000 chuong han harsatna an tuok pha mek. Relief Camps 9 hawng a ni ta a, mi 900 lai enkawl mek an nih. Assam CM Tarun Gogoi chun tuilien leia sansuokna le sawmdawlna sinthawna fe mek a ennawn a, tuilien leia harsatna tuorhai chu damdawi, fak le dawn tlasam der lova pek anni theina dinga hma la dingin an hriettir. MeT Department chun ruo intak deuvin a la sur ding niin a hril.

MP a kangmei suokah mi 4 a kang hlum
Gwalior: Zani hmasa zan khan Madhya Pradesh state a Morar an ti hmuna kangmei  a suok a, building sawngli a kang a, hi building­a chenghai laia sungkuo pakhata mi 4 a kang hlum a, mi 2 an hliem. Kangmeiin a kang hlum hai hi building neitu, M.K. Yadav, a nuhmei Phoolan, a nau pasal upa lem Arun le a naunu Chikki hai an nih. Kangmei hi electric Short­circuit lei nia hril a nih.

Kum 2019 chenah ekin vaibelsie 11
New Delhi: Sawrkar thlungpui chun kum 2019 chena khin India ramah Ekin vaibelsie 11 bawl a tum tiin Union Minister fo Rural Development, Panchayati Raj and Drinking Water and  Sanitation, Mr Birender Singh chun a hril. Tuchena hin In vaibelsie 5 haia dingin Ekin bawl pek a ni ta a, kum 2022 chena chun India rama mi 100 ah 90 hai bek tuidawt hmanga tui pek tum an nih. PM Narendra Modi lem chun states tin han tui dawn ding an in sengah an laklut theina dingin Rs. 2,600 crore hmang tha a tih tiin a hril bawk.

Amonia Gas putsuok leiin mi 5 an thi
Ludhiana: Punjab a Ludhiana khawpuia inthawka km. 25 vela hla Delhi­Ludhiana highway a Dorcha Bypass Road­ah ammonia gas a putsuk leiin mi 5 an thi a, mi 100 chuong an damnaw pha leiin Hospital panpui an nih. Ammonia Gas phurna tanker chu flyover pakhatah an tet a, a valve a tet kawi leia gas hi putsuok nia hril a nih. Gas a hung putsuoka inthawk a bul hnaia cheng han inthuok harsatna an hung nei pha nghala hril a nih.

Artui le Tomato tha lovin an lo deng
New Delhi: June 12, 2015 khan Delhi Law Minister hlui Jitender Singh Tomar chu Bishwanath Law College, Munger, Bihar­ah Delhi Police han an thuoi a, a law degree certificate  enfel a nih. Kum 1994­95 session­ah law inchuk dingin admission a thaw a, 1994­95 le 1995­96 session haiah law examination­ah a thang a, sienkhawm a failed leiin 1996­97 ah a exam nawk a, hi huna hin a hlawtling niin official thusuok chun a hril. A roll No. chu 10136 nia hril a nih. A kir tieng Bhagalpur hmuna a hmu peilo han Artui thu, tomato tha lo le lekhatui han an lo deng khum niin ei thu dawngna chun a hril.

Electric in mi 25 zet a man hlum
Jaipur: Zani hmasa khan  Rajasthan state a Tonk district sunga Pachewan an ti hmuna Bus pakhatin electric hrui  (High tension wire) tla fuol a hrut fuk a, Bus a chuong mi 25 zet a man hlum a, mi 30 an hliem pha tiin Rekha Gupta, District Collector chun a hril. Power Department, Rajasthan chun mithi sunghai kuomah zangnadawmna Rs. 5,00,000 seng, na taka hliem hai kuomah thangpuina Rs. 2,00,000 seng le hliem hai kuomah  Rs. 50,000 seng pek ning an tih tiin a  puong.

LAM Military Chief ralthuom leh an pe
Tura:  Liberation A’Chik Matgrik Army (LAMA) Military Chief, Cherang D. Shira chu June 12, 2015 khan Ampati Police kutah ralthuom leh an pe. Ralthuom an peklutpuihai lai 9mm Pistol 2, .32 Pistol 1, Japanese siem Pistol 1, magazine ruok 5, bomb siemfawm 4, Walkie talkie handset 1 le battery, 9mm Pistol mu 6, GNLA Identity Card le demand letters 10 a thangsa.

Police Officers 20 kap hlum
Kandahar: Zani hmasa, zan sawt hnung khan Afghanistan rama Helmand Province a Musa Qala district­a Police Checkpoints chu Taliban helpawl han an va run a, Police officers 20 an kap hlum. Helmand Province hi Taliban helpawlhai hratna a nih. May thla khawm khan Helmand province a New Zad district ah Police officers 19 kap hlum an lo ni ta bawk.

Thla sung 6 zet a farnu rutawl leh
Kolkata: June 11, 2015 zan khan City Police han Kolkata khawpui laili lai tak 3, Robinson Street a in pakhat bathroom sungah mithi rutawl le Ui 2 an hmusuok. Hi mithi hi nupui kum 50 mi zet a ni ta a, Debjani ruong hi a Ui vai pahnihai leh raw lova a sangpa’n thla 6 zet a lo sie le umpui ta niin Police han an hril. Hienganga a unu (a farnu) thla 6 zet umpuitu hi Partho (45) a nih. A lungril buoi leia hienganga um ni an ring thu  Police chun an hril.

Zang transplant hlawtling hmasa tak
CApe Town: A hming hrillang lo, South Africa rama tlangval kum 22 mi chu a zang (til) transplant a ni a, a hung dam tha el bakah zangin a sin ding hlawtling takin a thaw thei a, a nuhmei khawmin nau a pai ta a, khawvela zang transplant hlawtling hmasa tak a la nih tiin  Tyerberg Hospital, Cape Town a transplant thawtu doctor chun June 12, 2015 khan a hril. Zang transplant hi tukum March thlaa thaw kha niin a hril.

Employment news:
SSC Combined Hr. Sec. Level Exam, 2015
Staff Selection Commission (SSC) chun Postal Assistants/Sorting Assistants, Data Entry Operators le Lower  Division Clerks hai lakna dingin November 1, 2015, November 15, 2015 le November 22, 2015 (Pathienni) hai khin Combined Higher Secondary Level (10+2) Examination, 2015 huoihawt a tum. Postal Assistant/Sorting Assistant a post lak ding zat chu 3523, LDC post 2049 le DEO post 1006 a nih.
1. Postal Assistant/Sorting Assistant
    PB ­1(Rs. 5200­20200) Grade Pay 2400
2. Data Entry Operator
    Pay Band­1 (Rs. 5200­20200), Grade Pay Rs. 2400
3. Data Entry Operator
    Pay Band­1 (Rs. 5200­20200), Grade Pay Rs. 1900
4. Lower Division Clerk
    Pay Band ­1 (Rs. 5200­20200), Grade Pay Rs. 1900
Thiemna:  August 1, 2015 chena Class XII (10+2) zo le a tlukpui ni a tul a, August 1, 2015 chena kum 18­27 inkar ni a tul a, SC/ST hai ta dingin kum 5 chen ngaithiem thei ning a tih.Exam Centre hai lai Manipur­ah Imphal le Churachandpur a thangsa.Inhnikna nei le hi exam­a thangnuom hai chun thu chieng lem SSC website: www.ssc.nic.in  annawleh Employment News 13.06.2015 issue­ah hmu thei ning a tih. Application/hnina chu July 13, 2015, 5:00PM chenin peklut thei ning a ta, Manipur thangin India hmarsakbiel states  le ram kilkhawr le ramdanga cheng hai ta dingin July 20, 2015, 5:00PM chenin peklut thei ning a tih. SC/ST, PH, Ex­ Servicement le  nuhmei candidates hai ta dingin  Application fee pek a tul nawh.
------------------------------------------------------------------------------------------------------------------
VAWISUN THUPUI
Thil thaw tha ni la chu inpak i hlaw  naw ding am a nih? I thaw tha naw ruok chun suol chu kawtkhar bulah a bawk zing a nih; a ditzawng chu nangma thuhne he a nih a, nisienlakhawm, nangin i hne lem ding a nih,” a tih a. ­ Genesis 4:7

Editorial
Horse­trading a um tan
Manipur ADC election, 2015 result a inthawk Ukhrul le Sadar Hills haia chun sawrkar siem thei khawpa party mala hrat filawr pahni an um a, District dang haia chun tu party hai am thangruolin sawrkar an siem ding ti hriet thei a la ni nawh. Ukhrul district a chun NPF in sawrkarna siem an ta, Sadar Hills a chun Congress in sawrkarna an siem ding a nih. Hieng district pahni haia hin Horse­trading umnaw sienkhawm district dang 4, Chandel, Tamenglong, Senapati le Churachandpur district haia chun member­hai lai horse­trading a hung um ding niin an lang.
    
Tamenglong district a chun NPF 8, INC 10, Independent 1 le BJP 5 an tling a, tu party takin am sawrkar an  siem ding ti chu hriet a la ninaw a, party pahni bek thangruola sawrkar an siem a hung tul ding niin an lang. Chandel District le  Senpati district haia khawm party mala sawrkar siem thei ding an um naw leiin party pahni bek thangruola sawrkar indin a hung tul ding niin an lang bawk. Churachandpur a chun Independent candidate­hai an tling rawn tak a, Hill Peoples Alliance (HPA) an indin a, sawrkar siem chu an tum niin an lang. Sawrkar an siem thei ding le dingnaw chu sawrkar kuta um a nih.
    
Horse­trading hi a um tan der ta niin an lang a. CM in zani hmasaa Congress ticket a MDC a thlangtlinga um hai lawmpuina inkhawm a nei huna Churachandpur District a inthawk Independent candidate a thlangtling mi pakhatin Congress party a zawm ta niin a hril a. Hi baka hin Independent canidate a thlangtlinga  um  mi 3 in Congress party an zawm a, a tira MDCs 46 nei khan tuhin MDCs 50 an nei tling taa hril a nih.
    
Kum 2010 a ADC election a khan ADCs 6 haiah Congress party in sawrkarna an siem thei vawng a, kum 2015 ADC election a ruok chun an party khata sawrkar siem theina ADC pakhat chau an nei  hri a, kum 2010 a inthlangna leh khaikhin chun Congress party an tlase hle niin an lang. NPF hma an sawn tak a, a dawttu Independent candidate hai an hung nih. BJP khawm an beisei le an inhril angin hrat zonaw hai sienkhawm hma sawn takel an nih. Sawrkar siem theina khawm an hung nei el thei niin an lang. Congress party khawmin Sadar Hills ti lo, ADC pahni danga khawm sawrkar siem theina chance an nei niin an lang.
    
Kum 2015 ADC election result dungzui chun Manipur Assembly election nawka chun ‘Hung’ Assembly a hung um el dim ti chu mi thenkhat ring dan a nih. Central­a sawrkarna chelhai khuongben dan dungzuia lam hlak kha ei ni a, sienkhawm ADC election a chun a ninaw a lo nih. Assembly election nawka chun sawrkarna siemna ding kawngah NPF in hmun pawimaw takel an chang ding niin an lang.
    
Manipur ADC election 2015 a Party tum tum hai ngirhmun chu, Indian National Congress (INC) in seats 46, Naga Peoples Front (NPF) in seats 43, BJP in seats 21 le Independent han seats 34 an lak a nih. Manipur­a inthlangna u m tahai laia Independent candidate an tling rawn tak tum a nih. Churachandpur  district a lem chu Independent  candidates an tling rawn tak a, seats 24 umah seats 18 an  lak a, sawrkar siemna dinga chun ngirhmun pawimaw tak an chel a nih. An ngirhmun ding chu hunin a la hung rel ding a nih.




Don't Miss
© all rights reserved
made with by Simon L Infimate