Tuolsung: Headline
Hmarkhawlienah Hmar Inpui Assembly nei:
HI Consitition (review) Assembly in an namdet
Hmarkhawlien: Zani (May 15, 2015) khan Hmarkhawlien, Cachar, Assamah 7th Hmar Inpui Assembly nei a nih. Hi huna hin Hmar Inpui President Dr John Pulamte chun Assembly ko a nina san le thu pawimaw tum tum hai a hril zovin Pu Lalawilien Amaw, Vice President, HI GHQ in tawngtainain hun a hawng.
Hmar Inpui Assembly chun thu pawimaw tum tum relin resolutions 3 an siem a, chuonghai chu Barak Vallya Hmar khuo le ramhai humhal ding le maksan tahnunghai hluokir nawk a ni theina dingin Hmar Inpui in theitawpin hma la sien ti a ni a, hi thu hi fumfe taka ngaituo a ni hnungin Barak Valley Regional headquarters in hma hung la sien, report kimchang July, 2015 bo hma ngeiin hung pelut sien chu zova Hmar Inpui Executive Council in ngaituoin bawzui sien tiin resolution an passed.
Hmar Inpui Constitution (review) November 6, 2014 Special Assembly in ‘in principle’a a lo pawm ta chu Hmar Inpui 7th Assembly (May 15, 2015) a nei chun hmang le zawm dingin an namdet a; Financial Rules & Policy ruok chu Executive Committee in Assembly nawka namdet thei dinga a buotsai dinga tha ti a nih.
Chun, Hmar Inpui Constitutiona um angin 2017 Assembly (8th Assembly) chena Speaker dingin Prof. Vanlalnghak, Shillong Meghalaya le Secretary dingin Pu Lalthalien, Imphal, Manipur lungruol takin an thlang. Deputy Speaker I chu Executive Committee ruot dingin an sie a, Deputy Speaker II le Dy. Secretary chu Barak Valley Region le NC Hills & Karbi Anglong Region han June, 2015 bo hma ngeia an hung inruota, Headquarters a peklut dingin an sie.
HI Assembly huna hin Pu Lalmuanpuia Punte chun May 3012, 2015 inkar sunga Union Home Minister, Jt. Secretary (NE), Ministry of Home Affairs le Centrala National party thuoituhai Mizoram, Manipur le Assama Hmar Political issues dang dang le inzawma an inhmupuina thuhai report a pek bakah, Pu Vanlallien Pulamte chun Cachar, Hailakandi le Karimganj district, Assama Hmar hai Scheduled Tribe enlistment le inzawma hma an lo lakna report a pek a, Assembly chun lawmum an ti hle. Pu R.C Traite chun tawngtainain Assembly hi a khar.
Hmar Martyrs’ Day hmangna
CCPur: Vawisun 1PM a inthawk hin Saikawt Playgroundah the 12th State Level Hmar Martyrs’ Day cum Hmar Martyrs’ Trophy Football closing Ceremony hmang ning a tih. Hi huna hin Dr L. Fimate, HoD Forensic, JNIMS Chief Guest in thang a ta, Pu Thanglianpau, President, ZRO le Pu P.S. Haokip hai Guest of Honours le Pu Laldawnlien Varte, President, HYA GHQ Functional President in thang an tih. Closing Function hmangnaa hin HYA Rengkai le Muolvaiphei Branch HYA han Hmar Cultural Dance in entir an ta, khuollienin Churachandpur Times (A bilingual monthly Magazine & Online News Portal) tlangzarna le Talent Show Khuplal (mihrat) in inentirna nei bawk a ta, Lalengvari Sinate, Joselyn Infimate le Gladys Lalparzo Sanate han hla sak bawk an tih. Martyrs Trophy final chu Hill Town FC le Lamka Sporting Club (LSC) han inkhel an tih.
Hmar Martyrs Day hi Churachandpur district a chau ni lovin Hmar hai chengna state dang hmun tum tum haia khawm ursun taka hmang ning a tih.
Assam Rifles han Helpline Number
CCPur: June 1, 2015 nia MDC election hung um ding le inzawmin 7Assam Rifles chun Security thila dingin Helpline an siem a. Security thila harsatna nei candidate hai chun Helpline No. 03874236677 le 09862826806 haiah Army hai biekpaw thei ning an tih.
Kim Joe office khar ding
CCPur: Hmar Martyrs Day leiin vawisun (May 16, 2015) hin Kim Joe Gas Service, Nehru Marg, CCPur Office chu khar ning a tih. Customers hai hrietthiemna Manager in a ngen.
Hmar mipui kuoma inhriettirna le ngenna an siem
CCPur: John F. Hmar, Secretary, Information & Publicity, HPC(D) General Headquarters, Sinlung in zanita Hmar mipui kuoma inhriettirna le ngenna a siema chun hieng a hnuoia thu hai hi zieklang a nih:
Hmar Peoples’ Convention (Democratics), Gen. Hqrs., Sinlung chun vawisun May 16, 2015 a 25th Hmar Martyrs’ Day (Silver Jubilee) inser a um ding leh inzawm hin, khawvel hmuntina um Hmar nau zalenghai le hi ni mi lo hlutsakpuitu taphawt Chibai a buk cheu.
Vawisun May 16, Hmar Martyrs’ Day ei hmangna ding le inzawm hin, hnam tadinga thlunglu lo chan ta hai ei hriet zing le ei inza zie suklangna dingin Hmarhai chengna biel huop sunga Office, School/College/University, Sumdawngna hmun, Bazar le Dawr hai po po mi lo khar pek dingin ei in ngen a. Kum dang ang bawkin in milo zawm pek kan beisei. Chun, mani gate annawleh, a remchangna hmun takah Hmar Martyrs’ Trophy Board (HMARTOB) in Hmar Martyrs’ Day Flag tar dan dinga thusuok an siem anga tar seng dingin ei in fiel bawk a nih.
May 16 Hmar Martyrs’ Day a hung tlung hin, ram le hnam tadinga kan aihna phapui, hringna hlu tak lo inhlan tah hai kan ngaisangna cheu a zuol takzet. Nghilni reng um ta ngai naw’ng in tih. Nangni hai zarin ei hnam hin par anga vul ni la nei ngei a tih.
Mihrang fam lo changhai, in ta di’n hun le ni
A tharin kan hung inhlan cheu;
Hmar nau zaleng ruolha’n May 16 hi,
Martyrs’ Day ti’n kan inhlan cheu.
“Kan vawisun ni in zinga dingin kan inhlan”
PIMC meeting nei
CCPur: Zani 12:00Noon khan RPC Training Hall, Muolhlum, Rengkai, CCPurah 18th PIMC meeting nei a nih. Hi meeting huna hin Chief Manager, Lead Bank (LDM) chu Bandh leiin a hung thang theinaw a, K. S. Guite, DDM, NABARD, CCPur inrawina hnuoia meeting hi nei a nih. Hi huna hin DDDM, NABARD, CCPur bakah UBI le SBI haia Managers hai le Anchor NGOs pathum hai an thang. Meeting hi Rev. Lalhmuoklien, Sr.Director EAC in tawngtaina in a hawng a, Pastor Robert, RPC in tawngtainain a khar. Meeting huna hin CCPur Dist.a Self Help Groups hai hamthatna ding tum tu m hriltlang le rel a nih.
Hmasawnna Thar Office khar ding
CCPur: Kum dang ang bawkin vawisuna Hmar Martyrs’ Day hmang ding leiin Hmasawnna Thar Office khar ning a tih. Hi lei hin May 17, 2015 in Hmasawnna Thar hung suok naw nia, May 19, 2015 in a hung suok nawk chau ding a nih.
Election Office hawng an um zing
CCPur: June 1, 2015 nia Manipura ADCs 6 haia MDC seats 144 haia inthlangna hung um ding le inzawmin hmun thenkhata chun campaign nei mek a nih. Churachandpur District ADCC a candidates tum tum hai chun uolau takin vote campaign la nei kher naw hai sienkhawm khawpui sunga candidate thenkhat Election office hawng nitin deuthaw an um zing. Zani 3:00PM khan 16New Lamka West biela MDC candidate H. Thangzamuan chun a chengnainah Unit election office a hawng.
Chun, zani zantieng 1:00PM khan 15Hiangtam Lamka biela candidate G. Thangkhosuanmung Election Office ding chu Pastor D. Kamchinmang, Local Pastor, EBCC Hiangtam Lamka in a hawng.
Headline:
May 22ah AIADMK Legislature Party meeting nei a ni ding; Jayalalitha Tamil Nadu CM a ni nawk ding
Chennai: Zanikhan AIADMK thuoitu lu tak J. Jayalalitha chun May 22, 2015 zing dar 7 in an Party Headquarters, Chennaiah AIADMK Legislature Party meeting nei a ni ding thu a puonglang. Hi thu hi an party mi le sa han nghakhla taka an lo thlir le tung em em el a nih. AIADMK Legislature party meeting chun an Legislature party Leader dingin J. Jayalalitha thlang an ta; hi thu hi an Governor, K. Rosaiah kuomah intlun nghal an tih tiin AIADMK thusuok chun a hril.
AIADMK Legislature Party meeting zo hin Tamil Nadu CM O. Pannerselvam le a Ministers han an Governor, K. Rosaiah kumah an inbanna pelut seng an ta; an Legislature Party Leader thar dinga an thlang J. Jayalalitha chun Governor inhmupui nghal a ta, sawrkar thar insiemtir dingin ngenna siem an tih. A ngenna hi Governor in a remti pek chun May 22, 2015 ni ma hin J. Jayalalitha chu Tamil Nadu Chief Minister thar dingin sesamna nei nghal a tih tiin AIADMK thusuok chun a hril.
Fakrukna casea Lower Court in J. Jayalalitha hi September 27, 2014a thiemnaw an changtir leia Tamil Nadu CM le MLA a nina haia inthawka inban a nih. Amiruokchu, May 11, 2015 a Karnataka High Court in thiem an changtir nawk ta leia hieng thil hi a hung inhersuok a nih. Jayalalitha hi kum 4 lungin intang ding le Rs. 100 crore chawi dinga thiemnaw inchangtir a ni a, lungina khawm an tang hman a, baila a suok laia Court in thiem a hung inchangtir nawk a nih. A tlaingna biela khawm byelection neizo le an party mi pakhat thlangtling a nih. CM a chel chun Jayalalitha hi thla 6 sung ngei MLA a ni nawk a tul ding a nih.
Bandh in nundan pangnai a sukbuoi
Imphal: M. Dayananda le M. Premananda hai thina le inzawma JAC in darkar 24 Manipur bandh an thaw chun nundan pangngai a sukuoi pha hle. Imphal West District sunga Banks, Dawr, Schools, Colleges le Office hai khar an nih. Manipur a inthawka State danga fe motor, Manipur puotienga inthawka Manipura hunglut hlak motor hai bakah Imphal le District Headquarters inkar haia service motor hai chu a service an um nawh. Zani sun dar 11 vel khan Moidangpok area sungah bandh bawsea tlan Truck (bufai phur) chu Bandh thawtu han an hnawt a, buoina a suok dangna ding le mipui hnawtdarna dingin Police han tear Gas shell le mock bomb an kap khum. Buoina boruok a la sosang leiin hun tiemchin um lova Curfew puonga um chu a la fe pei a, Curfew areas khawm suklien sa a nih tiin District Magistrate, Imphal West thusuok chun a hril.
Bawngin sungah bomb hmu
Imphal: Zani hmasa 10:30AM vel khan Imphal East District a Lamlai Police station huop sunga N. Basanta Singh (50) s/o N. Ibochouba Singh of Pourabi Nungoi Makha Leikai Bawngin sungah bomb (Grenade) pakhat hmu a nih. Police han an va lak a, pawitawk loin an sukpuok.
ImphalUkhrul roadah tiemchin um lo bandh
Imphal: Joint Action Committee (JAC) Against the antisocial activities to Gwaltabi Village chun May 16, 2015 zingkara inthawk tiemchin um lovin Imphal-Ukhrul roadah bandh an thaw ding chu zaniakhan an puong.
Others:
Petrol le Diesel man a kaisang
New Delhi: Oil Companies han zani zanrila inthawk khan Petrol man litre 1 ah Rs. 3.13 le diesel man litre 1 ah Rs. 2.71 in an inkaisangtir nawk. Khawvel pumpui huopa thautui thlitfimlo man a kaisang leia petrol le diesel man hi inkaisangtir a nih tiin Oil companies thusuok chun a hril. Hi dungzui hin Delhiah petrol litre 1 ah Rs. 66.29 le Diesel Rs. 52.28 a ni ta ding a nih.
ULFA le sawrkar inbiekna
New Delhi: ULFA, sawrkar thlungpui le Assam sawrkar palai han zanikhan New Delhiah inbiekna an nei. NDA sawrkar a hung um hnung hi pawl le sawrkar palai han inbiekna an nei hmasa takna a nih. Assam sawrkar palaiin Chief Secretary, Assam le DGP, Assam hai an thang niin Ms. L.S. Changsan, Commissioner (Home), Govt. of Assam chun a hril. ULFA tieng chu an Chairman, Arabinda Rajkhowa in an rawi.
Rahul Gandhi in Padyatra a tan
Adilabad: Zanikhan AICC Vice President Rahul Gandhi in Telangana State a Adilabad district Koratikal Village, Nirmal Block a inthawk 15 km. Padyatra a thaw tan. Khuo inthal leia loneituhai harsatna tarlang a nuom lei le a ngaimawzie suklangnaa Rahul Gandhi in km. 15 zeta hla chu Kelawnga lawntlung a tum a nih. Beidawnga loneitu 900 neka tam anni le anni an inthat ta hnung khawma state sawrkar chun sawmdawlna a la pek nawh tiin Rahul Gandhi le Congress thuoituhai chun state sawrkar an sawisel.
Thamna leiin Major Nirvikar (Retd) man
Chandigarh: Zani hmasa khan Army Major pension ta le ADC to Punjab Governor sin lo chel hlak Major Nirvikar Singh (Retd) chu thamna Rs. 15 lakh a lak tia intumna leiin CBI pawlin Khan Market, New Delhiah an man a, Patiala House Court, Delhi hmaah inlangtir a ni a, Court in thu indawn chieng dingin Police kutah ni 2 sung la u m dingin a chungthu a rel.
Arunachal le J&K thangsa lo
Beijing/New Delhi: India PM Narendra Modi le China ram President, Xi Jinping han Beijing khawpuia inbiekna an nei lai mek thu le China rama Modi an zin thu China TV (CCTV) in a puong laia India map a suklangnaa chun Arunachal Pradesh le Jammu & Kashmir hai an chuonsa nawh. Hi thil hi India ta ding chun ngaimaw um takel a nih.
Ngamantu 37 insuo dingin
Rameswaram: Dan kala Sri Lanka Tuipuiah Nga an man ti leia April 3, 2015 a Sri Lanka Navy han an man Tamil Nadu State a inthawka Ngamantu 37 man hai chu zanikhan Sri Lanka Court in insuo dingin Order an suo.
ISIS in an hrentanghai an la dam: Swaraj
New Deli: Union External Affair Minsiter Sushma Swaraj chun Inraq rama ISIS helpawl han India mi an hrentang 39 hai chu an la dam a, sansuok tuma hmalak zing a nih tiin a hril. ISIS kuta inthawka suokdawk le India rama hungkir ta Harjit Masih ruok chun hrentanga um India mi 39 hai chu that vawng anni ta tiin a hril a. Hi leia hi hrilchiengna hi Sushma Swaraj hin a siem a nih.
May 18ah Jharkhand Governor dingin
Ranchi: Jharkhand Governor thar dinga ruot Droupadi Murmu chun May 18, 2015 khin Biarsa Mandap Raj Bhavan, Ranchiah Jharkhand Governor sin chel dingin Sesamna nei a tih. Jharkhand Governor sin chel lai Syed Ahmad chu Manipur Governor thar dinga ruot a nih.
Khawvela simkhawlei inhning leia mihriem thi tam zuolna hai
August 11, 2012: a simkawlei inhning richter scale 6.3 le 6.4 a hratin Iran khawpui Tabriz a sawi tumin mi 306 an thi a, midang 3,000 an hliem.
March 11, 2011: Japan rama richter scale 9.0 a hrata simkhawlei inhning leiin mi 18,900 an thi.
October 23, 2011: Turkey rama richter scale 7.2a hrat simkhawlei an hning leiin mi 600 an thi a midang 4,150 an hliem.
January 12, 2010:a Haiti hmuna ricthter scale 7.0a hrat simkhawlei inhning leiin mi 250,000 300,000 inkar an thi.
April 14, 2010: a China rama Qinhai provincea richter scale 6.9 a hrat simkhawlei inhning leiin mi 3,000 an thi/inhmang.
May 12, 2008: a China rama Sichuan provincea simkhawlei richter scale 8.0 a hrat inhning leiin mi 87,000 chuong an thi annawleh an inhmang.
May 27, 2006:a Indonesia rama Yogyakarta regiona simkhawlei hrat taka an hning leiin mi 6,000 an thi a, mi 1.5 million vel chengna ding in nei lovin an um pha.
October 8, 2005 a Pakistana North West Frontier Provincea simkhawlei richter scale
7.6 a hrat inhning leiin mi 75,000 chuong an thi bakah mi 3.5 million vel chengna ding nei lovin an u m pha.
March 28, 2005 a Indonesia rama Nias Island, Sumatra hmuna simkhawlei inhning leiin mi 900 in thina an tuok.
December 26, 2004a Sumatra Island tuipui sunga simkhawlei hrat tak inhning leia Tsunami an umtir leiin Indian Ocean le a se vel khawvel hmun tum tuma mi 220,000 chuong an thi, Indonesia rama ringawt khawm mi thi 168,000 an tling phak.
December 26, 2003a Iran khawpui Bam hmuna simkhawlei richter scale 6.7a hrat inhning leiin mi 31,884 vel an thi bakah midang 18,000 vel an hliem.
January 26, 2001a Gujrat (India) rama richter scale 7.7a hrat simkhawlei inhning leiin mi 25,000 an thi a, midang 166,000 an hliem.
September 30, 1993a Maharashtra (India) hmuna richter scale 6.3 a hrat simkhawlei inhning leiin mi 7,601 in thina an tuok.
October 20, 1991a Uttar Pradesh (India) a simkhawlei richter scale 6.6 a hrat inhning leiin mi 768 an thi.
August 20, 1988a Nepal rama simkhawlei richter sale 6.8 a hrat inhning leiin Nepal -ah 721 an thi a, a thenum India rama Biharah mi 277 an thi
July 28, 1976a China rama Hebei provincea richter scale 7.8 a hrat simkhawlei inhning leiin mi 242,000 an thi.
Tukum, 2015a Nepal rama Simkhawlei richter scale 7.3 a hrat an hning lei khan mi 8,460 chuongin thina an tuok bakah mi 20,000 chuongin hliemna an tuok bawk.
Indiklo taka RRB website hmangtu 2 man
New Delhi: Tuta haptakar sung hin Railway Recruitment Board (RRB) website tehlem hmanga mi tam tak Railways hnuoia sin le training pek dinga hlemtu pasal pahni, Naresh Rathi alias Balram Sharma le Akhilesh Kumar alias Sachidanand Jha hai chu CBI pawlin Haryana le Dehradun haia intahwk an man. Hlema um hai lai Lalit Verma a thangsa ve a, Northern Railwayah ticket checker sin pek dinga hrilin Rs. 1,50,000 an lakpek niin CBI thusuok chun a hril.
Well fet 200 neka inthuk cho khap
Bangalore: Maharashtra a chun an state sawrkarin Well feet 200 neka inthuka cho a khap. Feet 200 neka inthuka Well cho hai chu Rs. 10,000 Rs. 25,000 inchawitir annawleh thla 6 lungin a khum ning an tih tiin thusuok a siem. Hi thil hi tuihnar humhalna dinga thaw a nih tiin Maharashtra Chief Minister Devendra Fadnavis chun a hril. Amravati districta Vidarbha region a chun khuo an thal hle a, feet 1000 vela inthuka well an cho khawmin tui put hmu ding a um nawh. Buldhana Districta Marathawada region a khawm hiengang tho hin tui a vang tiin Official thusuok chun a hril.
India mi 4 thi hai ruong IAF in a hung phurtlung
New Delhi: Afghanistan khawpui Kabul hmuna Taliban helpawl han May 13, 2015 nia Park Palace Guest house an hlukhum tuma mi 14 an kap hlum hai laia India mi 4 hai ruong chu zanikhan special Indian Air Force vuongnain Kabula inthawk India ram a hung phurtlung tah. India mi 4 thi hai laia 2 hai chu Auditors an ni a, pakhat Afghanistan govt. projects a consultant sinthaw le NGO thawktu pakhat an nih.
Bru Refugees hai June 5 a inthawk thuoikir ding
Agartala: Mizorama inthawka North Tripura statea Kanchanpur subdivision sunga Mizoram Bru raltlan hai chu June 5, 2015 a inthawk Mizoram tienga thuoikirna sin tan nawk ning a tih tiin zanita Official thusuok chun a hril. Bru raltlan hai hi camps 7 haia um an nih. Bru raltlan hai Mizoram tienga thuoikir nawkna ding hun hi zanita Damcherra, Kanchanpur subdivisiona Mizoram Government officials le Tripura Government officials hai le refugee thuoitu han tripartite meeting an nei huna an rel a nih. Hi meetinga hin Mizoram a inthawk Mamit district, Mizorama Deputy Collector inrawinain officials 15 an thang a, Tripura tieng chu North Tripura District Magistrate in an rawi. Mizoram tienga thuoikirna ding process chu June 2, 2015 a inthawk tan ning a ta, a thuoikirna tak chu June 5, 2015 a tan le first phase chu June 6, 2015 a zo ding ti a nih. Bru hai hi kum 1997 a hnam buoina leia Mizoram suoksana Tripuraa raltlan an nih.
Arunachal-ah AR hai NSCN (K) han an lambun
Dimapur: May 13, 2015 khan NSCN(K) han 14Assam Rifles pawl Changlang le Rangran inkar, Arunachal Pradesh a kelawnga patrollinga an fe lai an lo lambun a, Assam Rifles han an kap let ve leiin nasa takin an inkaptuo a, a thi le hliem ruok chu a tu tieng tieng khawm an um naw niin ei thu dawngna chun a hril. NSCN(K) pawl hin zing dar 8 le sun dar 12:30 inkarah IED an sukpuok nia hril a nih.
Goa MLA motor in mi 1 a baw hlum
Panaji: Zanikhan Goa BJP MLA Subhash Faldesai chuongna Car le Bike pakhat an inbaw a, Bike a chuong kum 28 a upa Sunil Rathod chu damzo lovin a thi. Hi thil hi zani zingkar dar 7 vela kha tlung a nih. Hi thil tlunga hin midang pakhat a hliem a, Goa Medical College and Hospitalah admit a nih.
Rs. 5,00,000 an pek hnungin insuo
Agra: Manoj Verma, Agra, Uttar Pradesh chu May 10, 2015 khan misuol pawlin an thuoihmang a, a sunghai chu a thuoihmangtu han Rs. 25 lakh a intlansuok dingin an phut a, sienkhawm Rs. 5,00,000 peka insuo dingin an inbiekrem a, a sunghai chun May 12, 2015 khan a thuoihmangtuhai chu Rs. 5,00,000 an va pek a, hi zo hin Manoj Verma hi an hung insuo a, dam le himin zan sawt hnungin an In hi zan hin a hungtlung. Intlanna pawisa pek ding huna hin Police han zui kan ti cheu an ti a, sienkhawm an mi zui ngam naw leiin keini sungkuo khatin pawisa hi kan va pek a nih tiin Manoj Verma upa Lakshmi Narain chun a hril. Verma hi Agra khawpuia Jewellery dawr nei a nih. An hrentangna hi Rajasthan dai a nih.
Mozambique Police han Saiha le Samak Ki 1.3 tons an man
Maputo: Mozambique Police han zanikhan in pakhata inthawk Saiha le Samak ki tons 1.3 zeta rik an man niin an hril. In neitu hi China mi a nih tiin Police chun an hril. Sai 170 le Samak 65 an that naa inthawka hieng thil hai hi an man niin Police chun an hril bawk.
IndianAmerican top 3 position
Washington: May13,2015 khan National Geographic Headquqrters,Washingtonah US National Geographic Bee Competition nei a ni a, a pakhatnaa inthawka a pathumna chen chu IndianAmerican studenthai vawngin an lak.Pakhatna chu Koran Menon (14) of New Jersey a ni a, lawmmanin USD 85,000 College Scholarship,US National Geographic Society ah Lifetime membership, Galapagos Islands le Lindblad Ship National Geographic Endeavour haia inzin theina hai pek a nih. Pahnina chu Shriya Yarlangadda (11) of Michigan in a lak a, lawmmanin USD 25,000 pek le pathumna chu Sajos Wagle of Arkansas (13) in a lak a, lawmmanin USD 10,000 a dawng.
VAWISUN THUPUI
Chun, Josefa chu a kawla ngir po pohai hmaa chun an sum zo ta nawh a, “Mi po po ka kuoma inthawk hin infe suoktir vawng ro,” tiin a khek a. Genesis 45:1
Editorial:
Ienglei am a ni a?
Council of Higher Secondary Education, Manipur (CoHSEM) hnuoia Class XII Examination, 2015 le Board of Secondary Education Manipur hnuoia Class X Examination, 2015 result hai puonglang a ni ta a. A pumpui thuah result hi a tha lem le kaisang tieng ngekin se lem le tlak hnuoi tieng a pan pei a. Hi thil hi ienglei am a na tia a san ei zawng suok a, result tha lem le insang lem ei nei theina dinga sawrkar, inchuknain neituhai le lukhaituhai bakah student, pawl tum tum, nu le pa han a hma neka thang ei lak nasa nawk zuol a tul takzet a nih. Ei education minister chun result tlak hnuoina san hi enruk thaw student an tlawm tiel tiel a, exam a thienghlim ta lei a nih tiin a hril a. Hi thil hi a san indik tak a ni chun a tha tiengpangah ngai le sie phawt el a tha awm ie.
Tuta hma kum 10 vel liemta khan chu tlangram district haia intahwk khawmin Class X & XII exam haia hin top ten lai ei thang phak hlak a, tulai ruok hin chu top ten chu hrillo, top 25 lai khawm pakhatpahni bak ei inlang phak ta nawh. Tlangram districts le tribal studenthai hmasawn pei nekin ei hnungtawl deu deu el hi a pawi a, tuornat a um hle. Hi lei hin ei hnungtawlna san le iengleia hiengang khawpa Class X & XII exam haiah ei tla hnuoi el am an ta a? ti hi ei ngaituo chet chet le a san zawng suoka ei insiem that nuom a um.
Manipur state a ding chun thil iengkima Imphal khawpui dawttua um hlak le Manipura second town tia ko Churachandpur district nasa takin ei tla hnuoi a, Class X & XII exam a ei hnungtawl dan hi a taluo ta niin an lang. A hmaa a pahnina le pathumna dam la le ni phak hlak hai kha iengleia hieng bek beka ei tlasie el ta am a nia ti hi chik taka ei ngaituo a, ei renga ei inennawn seng le ei tlaksiet elna san hi ei suisuok a, ni danga ei ngirhmuna beka kha ei um thei nawk ngeina dingin hma lang ei tiu.
Manipur phairam biela hin buoina, school khar, bandh le blockade tihai hi tlangram biel nekin a tam lem. Hieng thil hai hin phairam biela cheng students han an lekha inchukna haiah an bahla pha el dim ti a ni laiin a sukbahla pha nisienla chu Class X& XII result hung suok haia hin an lang ding a ni a, sienkhawm an lang pha chuong naw a, tlangram biela studenthai nekin examnaah an la thaw tha lem pei a nih. Tlangram mihai tluklo an nih. Phairam biela studenthai hin hlawtlingna thuruk an nei a nih. Chu thuruk chu lekha tiem taimakna le tumruna a nih. Tlangram biel mihai khawm phairam biel mihai ang bawka tumruna le lekha tiem taimakna anni anga ei nei nawk hun huna ni danga ei ngirhmun kha tlung nawkin ei khumkhel thei ngei beisei a um.
Churachandpur district a Zirtirtuhai hi a thiemnaw bik chu anni ring a um nawh. Amiruokchu, an intat hriem annawleh an intat ngei a tul niin an lang. Studenthai chau intum lova Zirtirtuhai, nu le pahai khawma iem thaw suol ei nei a? ti hi ngaituo a, kum tharah result tha lem ei nei theina dinga takchapa tia thang nasa nawk zuola ei lak hi ei thaw dan ding niawm tak a nih.
Ei district sunga private le Mission schoolhai khawma iengleia Class X le Class XII resultah hmasawn le insang tieng pan lova ei tla hnuoi deu deu am a nia ti hi an zawng suok a, an insiem that nuom a um. Private le Mission School haia chun thla tina tuition fee an lak a let tam takin an suk pung a, an Zirtirtu ruoihai sukthatho, sukphur le lawmna khawpin an hlaw an sukpung annawleh an pek naw lei amani ding tihai khawm ngaituo ve hai sienla nuom a u m. Tangka sum hin thil a thaw thei nasa hle ti hi hriet a tha.
