HYA Founding Day le a Kum 30-na ursun taka inser

Tuithaphai | March. 7, 2015: Hmar Youth Association (HYA) chun 1985 a indin a ni ainthawka a kum 30-na  le Founding Day chu vawisun March 7, 2015 zing dar 7am khan General Headquarters level ah HYA Puonzar (Flag) keipharna neiin HYA Gen. Hqrs. Office innghatna hmun le HYA Inkhawmpui neina hmasatakna hmun Rengkai, CCpur, Manipur ah ursun taka inser a nih.

Hi hun hi Pu Songneilien Songate, Gen. Secretary, HYA GHQ in a keithuoi a, hi hun a hin HYA member fam lo chang tah hai hrietzingna le inzanain totawka minute 1 sung hun hmang a nih. Chu zo chun Rev. Lalkhumvel Joute DS, RPC NEI, Phairam Dist.-in Pathien kuoma tawngtaina a nei a. HYA Puonzar (Flag) keipharna Pu, Upa Laldawnlien Varte Gen. President, HYA, GHQ chun a nei zoin Thuhril tawi hun ah Pu Lalhmuok Famhoite, Founder Gen. Secy., HYA chun, HYA Gen. President 10 lo um tah laia, President khawm nilo hi huna ditsak a nina chungthu ah lawmum a ti thu hrilin, HYA hung in tan dan le a chanchin hai hrilna a nei a, President lo ni tah 6 hai Gen. Secy. Term 5 a lo ni ve ta thu, HYA Founding Day hi Branch tina hai inser hlak dinga HYA Constitution a khawm inchuon a ni thu, HYA chu dotu tam tak la um sienkhawm, par anga la vul ngei ding le hmatieng kal pen pei dingin a ditsakna insang tak an hlan a. Pu, Dr. John H. Pulamte, President, Hmar Inpui chun HYA hotu le lo  indintuhai chunga lawmum a ti thu hrilin, ei lo beisei anga ei lo tlung naw a la ni khawma, ei duthusam ei suk sang taluo leia infuknaw tut niin a hriet thu hrilin, HYA chu hnam mizie suk mawi zuoltu ni dingin a disakna an hlan a.

Hmar hnamhuop a pawl tum tum hai sukhratna ding bik a fienrielna hun, (Strengthening of Civil Societies) March 28, 2015 khin buotsai a ni ding thuhai hi hun a hin a hril. HYA le Val Upa chungchang thu a chun a chang kar a um hlak thuhai chu hrilin, a khawsakna hlak Imphal ngei khawm tuhin chu HYA le Val Upa kar um taloin a um ta thuhai a hrilsa bawk.

Pu, Upa Laldawnlien Varte chun HYA in kum 30 hmel hmu theia a um chu lawmum a ti thu hrilin, HYA hi nuom pawnga Organisation a ngai pal a awl a, chuongang an naw thu a hril a, a sietna lai a um khawma a sietna lai siem tha a, hmatienga a fena dinghai sukchieng a ngai thu hrilin, Kristienna le an kal naw thu, a thupui (motto) chu thaw ngei ngei dinga a mi’n chuktir lem a ni thu hai hrilin hmuntina um HYA memberhai chu hi ni ropui tak le inzawm hin hlawtling taka hmang seng dingin a ditsakna insang tak inhlanin chibai a buk.

Hunkhar tawngtaina Rev. SK Songate, Moderator, ICI in a nei a. Chu zo chun Branch le Jt. Hqrs tum tuma thuoitu hi huna fekhawmhai chu hi ni inserna le inzawm hin an umna senga tlangsin le mipui tadinga thiltha thaw dingin a inthe dar. Gen. President hi programme hmangzo a ni charin a umna CCPur a inthawka 61 Kms a hla Imphal panin HYA Imphal, Jt. Hqrs. Hmalakna a Hmar Community Hall le a se vel sukfaina tlang sin thaw dingin a pan ve nghal.

-LRS Puruolte | Photo: Alan Famhoite, Virthli