Responsive Ad Slot

Hmasawnna Thar | 18 March, 2015

Wednesday, March 18, 2015

/ Published by VIRTHLI
Natl Rural Drinking Water & Sanitation Week tan
CCPUR: Public Health Engineering Dept. (PHED), CCPur Division hmalaknain March 17-22, 2015 inkar sung National Rural Drinking Water & Sanitation Awareness Week zanita inthawk khan tan a ni a. Hi week tan a ni le inzawm hin zanikhan Govt. School tum tum haia student han sanitation thuah rally an nei. Rally hi zani 10AM khan Public Ground, CCPur-a inthawk Mr Langkhanpau, Chairman, ADCC in a vai liem a, rally hi PHED Office, Headquarter veng chen lampui hrawna (rally) an nei. Rally nei zo hin PHED Office, CCPur-ah programme hmang a ni a, hi huna hin S. Tinliankham, SO, i/c Coordinator PHED chun fai le thienghlimna dinga kut sawpfai a pawimaw dan student hai hrilhrietna a nei a; hi zo hin India sawrkarin Oct. 2, 2014 a Swachch Bharat Mission (SBM) a tan
le inzawma India ram sung pumpuia mipuihai kuoma tui dawn ding hnienghnar le thienghlim pek a tumna le inzawma hi thil hi thaw a ni thu a hril.


Hi thua hin March 18, 2015, 10AM a inthawk khin ZEO Office, CCPur le thangruolin Govt. School-a kai Class IX le XII inchuklai han “Water and Sanitation” ti thupui hmangin Essay ziek inelna nei an ta, 1st in lawmman Rs. 5000/-, 2nd in Rs. 3000/- le 3rd in Rs. 1000/- lawman dawng an ta, mi 10 kuomah consolation prize Rs. 500/- seng pek ni bawk an tih. March 20, 2015 khin PHED Office-ah hi week kharna um a ta, chu huna chun lawmman hai hi sem ning a tih. Zanita rally hi ZEO khawmin a uop.

School toilet bawlna ding Tender
CCPUR: NEEPCO chun CCPur district sunga Schools 4 haiah toilets 6 bawl pek a tum a. Hi le
inzawm hin March 19-20, 2015 inkar sung khin DC Office, CCPur-ah Tender ko ning a ta, inhnikna nei han ngaiven thei ning a tih. Toilet bawlna ding School hai chu MB Saichang JB School-ah 1; Rengkai Govt. Hr. Sec. School-ah 3; Leijangphai Govt. H/S-ah 1 le Kumbipukhri Govt. Jr. H/Sah 1 an nih.

Postal Dept. in MANIPEX 2015
CCPUR: Manipur Postal Divison, Imphal hmalakna in zanikhan YPA GHQ Hall,
Hiangtam Lamka hmuna ni 4 sung aw ding Grand Philatelic Exhibition ‘MANIPEX 2015’ hawngna hunser hmang a nih. Hi huna hin Pu Lunminthang Haokip, IAS, DC CCPur khuollienin a thang a, exhibition hi a hawng. Director Postal Services, Manipur T. Mangminthang, IPS chu functional president in a thang. Khuollien chun, 1970s le 1980s hun lai khan chu tu hun angin internet communication a la umnaw leiin Postal services hi hmun le ram hla tak taka lekha pawimaw
le sum inthawntuonaa hmang hlak a ni thu a hril a. Tulai khawm hin internet communication nasa taka inthangin insang ta sienkhawm ngirhmun pawimaw tak a la hluo zing a thu a hril. Fucntional President chun, ‘stamp exhibition’ hi Manipur-ah vawi tam tak thaw nita sienkhawm CCPur district-a dingin a vawikhatna a la ni thu a hril.


One Day Intersectoral meeting
CCPUR: National Vector Borne Disease Control programme, National Health Mission, Manipur hmalaknain vawisun 10:30AM hin CMO Office Conference Hall-ah One Day Intersectoral Meeting on Prevention and Control of Dengue nei ning a tih. Hi huna hin Pu Lunminthang Haokip, IAS, DC CCPur khuollienin thang a ta, Dr T. Zamkhokam Kuki, SMO/ SNO, NVBDCP, Manipur le Dr Thangchinkhup Guite, CMO, CCPur hai chu guest of honour le functional president in thang an
tih. Technical session-ah Dr A.Ritindramohan Singh, Consultant, M&E, NVBDCP, Manipur resource person in thang a tih. DLOs hai chu thang seng dingin DC in an hriettir.

Manmasi Digest a suok nawk tah
CCPUR: Manmasi Digest February-March, 2015 issue chu a suok nawk tah. HPC (D) Assam Region Tri-partite Talk, Interview with L.Pulamte, MPS le tiem nuom um tak tak a chuong. A dit hai chun Lekhabu zawrna dawr le Agent hai kuoma inthawk hmu le inchawk thei ning a tih.

Delhi CM, Dy. CM le Yadav hai Delhi Court hmaah an inlang
NEW DELHI: Zanikhan Delhi Chief Minister Arvind Kejriwal; Delhi Deputy Chief Minister Manish Sidodia le AAP thuoitu Yogendra Yadav hai chu Delhi Court hmaah an inlang. AAP thuoituhai hi defamation case siem khum an ni leia Court hmaa inalng an nih. An taksa ngei Court hmaa inlang lo dingin hnina an siem a, sienkhawm phalpek an ninaw leia zani chawhnung dar 2 vela kha Court hmaa inlang an nih. Arvind Kejriwal le Manish Sisodia hai chu a ruolin Court sungah an lut a, Yadav ruok chu ama khata lut a nih. AAP thuoitu pathum hektu chu Advocate Surender Kumar Sharma a nih. Kum 2013 a Delhi Assembly a khan Sharma hi AAP ticket a ngir ve dingin hnina a pek a, AAP thuoitu pathum hai hin rem an tipui vawng hnungah AAP ticket pek lo dingin an hnawl nawk a nih. Hi lei hn a nina le a ngirhmun sukhnuoi a ni bakah a hmingthatna an sukhmang pha tia lungawi lova Mr Sharma hin Criminal Defamation Case a siem khum niin ei thu dawngna chun a hril.

Thina tuok sunghai Rs. 5,00,000
IMPHAL: Khwairamband Bazar huop sunga Temporary Market a bomb puok leia thina tuok mi pathum sunghai kuomah zangnadawmna Rs. 5,00,000/- seng le hliem inrik hai thangpuina Rs. 1,00,000/- seng pek ning an tih tiin CM O.Ibobi Singh in zanikhan a puonglang. CM chun zanikhan bomb puok leia hliem le motor eksiden leia hliem Hospital-a um hai a va kan. CM hi Dy. CM Gaikhangam le Dy. Speaker Preshow Shimray han an zui. Jessami le Phek a motor eksiden leia thi le hliem hai khawm thangpuina pek tum an nih tiin CM chun a hril.

US Guitarist Neil Zaza in April 16 in Imphal-ah a perform ding
IMPHAL: US guitarist inlar takel Neil Zaza chun April 16, 2015 khin Seven Sisters Entertainment huoihawtnaa Manipur State AIDS Control Society (MACS) le Tribal Research Institute (TRI) hai le thangruola HIV/AIDS and Drugs Abuse thua Imphal hmuna awareness programme hmang huna a perform ding niin Shem-Rah, founder Seven Sisters Entertainment chun zanita Manipur Press Club-a press conference huna a hril. Neil Zaza hin kum 1987 khan rock band ZAZA a lo indin ta bakah kum 1991 khan Party with the Big Boys ti album a lo siem ta a nih.

UNLF hotu BSF kutah pek
IMPHAL: Feb. 11, 2015 a inthawka a umna hriet lova inhmang nia hril, UNLF hotu Nabachandra @ Silheiba chu Bangladesh Security Forces han an man, March, 2015 thla bula Dawki, Meghalaya-a um BSF hai kuta an pek chu March 16, 2015 khan Imphal West Police Custody phurtlung ni tain ei thu dawngna chun a hril.

JCILPS thuoitu 2 man an nih
IMPHAL: Thangal Bazar, Imphal sunga Vai dawrhai khar dinga thu petu JCILPS Convenor, Sayad le K. Dhanajit, Vice President, All Manipur Students Union (AMSU) hai chu Police han an man.

Police pakhat mipui thangruol han an vuok
IMPHAL: Police Constable Th. Mahendra (30) s/o Th. Tomcha of Singjamei Thongam Leikai chun zani hmasa zan khan silai leh chuktuoin Yumnam Budhi (48), s.o (L) Ibotombi of Yumnam Huidrom Makha Leikai le a unau dang 3 hai vauna a pek leiin an veng mipuihai thangruolin Mahendra hi na takin an vuok hliem a, Shija Hospital panpui a nih. Mipuiin silai an chawi, AK-47 Rifle 1 le Pistol an lak pekhai chu Police kutah an pekkir.

ADC election a hun taka huoihawt dingin
IMPHAL: Kuki Chief’s Association Manipur (KCAM) chun, Manipur Hill district haia Autonomous District Council (ADC) Election chu sukhnuk lova a hun taka huoihawt dingin Manipur sawrkar an mawr. KCAM President Haokai Lupheng le Gen. Secy. Haokholet Touthang han zanita thusuok an siema chun, ADC election sukhnuk hin tribal hai ta dingin thiltha iengkhawm intlun naw nih tiin an hril a. India constitution provision hnuoia ADC hai full powers pe dingin an phut bawk. ADC election a hun taka huoihawt a ninaw a ni chun CoPTAM in hma an lakna KCAM chun thlawp a tih tiin an hril bawk.(UNA)

Vai dawrhai khar an nih
IMPHAL: Joint Committee of Inner Line Permit System (JCILPS) han Vaihai an boycott leiin Paona Bazar, Thangal Bazar le Khwairamband Bazar a Vai dawrhai khar an ni bakah Food Corporation of India (FCI) le FCS sin thawnahai a chawl thup niin ei thu dawngna chun a hril.

NE biela Aadhar Card peksuok ta zat
SHILLONG: March 8, 2015 chena India hmarsak biela Aadhar Card peksuok ta zat chu, Meghalaya 0.7% (21,313 persons); Assam 0.8% ( 242,655) persons); Arunachal Pradesh 12.2% (168,460 persons); Mizoram 26.2% (286,146 persons); Manipur 41.2% (1,120,649 persons); Nagaland 43.2% ( 856,374 persons); Tripura 90.2% ( 3,317,808 persons) le Sikkim 92.4% ( 562,562 persons) niin official thusuok chun a hril.

Biekin suksiet le Nun suolluina thu
NEW DELHI: Zanikhan Lok Sabha le Rajya Sabha haiah Selkaltu pawla members han Hirsa, Haryana a Biekin suksietna thu le West Bengal a Nadia hmuna Nun kum 71 mi suolluia a umna
thua an lungawi nawzie le suksuoltuhai hrem dinga an ngenna hai an khekpui. PM Narendra Modi chun hieng thil tlung hai hi a ngaimaw hle thu le thil suksuoltuhai hrem an ni ding thu bakah an rang
thei anga report kimchang pe dingin thuneituhai an hriettir. Hisar, Haryana hmuna Kristien Biekin pakhat suksietin a sunga Kros ladawkin Hanuman lim sie a nih. BJP MP Subramanian Swamy in Mosques le Churches hai chu building mei mei, tawngtaina hmun chau an nih a; suksiet thei a nih tia a hril chun lungsenna a keitho a nih.

Land Acquisition Bill dodalna
NEW DELHI: Zani zantieng khan Selkaltu pawla Political party tum tum 14 zet thangruol han Parliament House a inthawk Rashtraqpati Bhavan chen lampui hrawna an nei a, President kuomah Memorandum an pek. Selkaltu pawl tum tuma Political parties 14 a thuoituhai chun Land Acquisition Bill an ditnaw le an dodal thu an Memorandum-ah an zieklang. Lampui hrawnaa hin Congress, Trinamool Congress, JD(U), SP, Left Parties le a dang dang hai an thang.

IAS Officer ringhla um taka thi
BENGALORE: March 16, 2015 khan Karnataka State capital Bengaluru hmuna IAS Officer, D.K. Ravi chu a chengna insungah inkhaihlum saa hmu a nih. Selkaltu pawla MLA Jagadish Shetter chun IAS Officer thina hi ringhla a um a, CBI in suizui raw hai seh tiin zanikhan Karnataka Assembly-ah ngenna a siem. Sheter chun ama le ama inkhai hlum ni lovin mi that ning a tih tiin a hril. D.K. Ravi hi Additional Commissioner (Commercial Tax) sin chel lai mek a nih. Mr Ravi hi huoisen taka thil indiknaw thawtuhai hremna pe hlak mi, mi indik niin ei thu dawngna chun a hril.

Biekin suosamna thuah mi 1 man
CHANDIGARH: Hisar-a Kaimri village-a Biekin bawl lai mek suosam a nina thu le inzawm khan Haryana Police chun mi pakhat Anil an ti chu an man tah. Mana um pa hi Father Subhas Masih in ringhla mi 14 hming a hril hai laia thang ve a nih. Inspector General of Police (Hisar Range) Anil Kumar Rao chun, mana um pa hi Police in thu indawnna an nei mek bakah midang dang khawm thu indawnna an nei zing niin a hril. Haryana CM Manohar Lal Khatar chun Biekin suosamtu hai chu na taka hrem ngei an ni ding thu zani hmasa khan Haryana Assembly-ah a hril. Hi biekin suosamna le inzawma Fr. Subhash in FIR a thelut dungzui hin Anil Godara, Dalbir Singh, Raj Kumar, Kuldeep, Satpal, Krishan, Suresh, Dinesh, Jogender, Kulwant, Sudhir, Bijender, Satnarain le Chhotu Ram hai chungah Police chun case an registered a nih.

Srinagar-Jammu Highway khar a la nih
SRINAGAR: Ruotui tam l;ei le vur a tla nasa leia March 15, 2015 a inthawka Srinagar-Jammu Highway khar-a um chu khar zing a la nih. Highway khara um hi zanikha a ni thumna a ni tah. Boruok a hung zieum deu ta a, motor le Rel a fe thei dan ding ngaituo mek a nih.

Meghalaya-ah AMEF  pahni kap hlum
SHILLONG: Meghalayaa chun zanikhan Security Forces le Achik Matgrik Elite Force (AMEF) hai an inkaptuo a, inkaptuonaa hin AMEF cadre pahni kap hlum an nih. Army le Meghalaya Police han ramhnuoia dappui an thaw huna inkaptuona hi tlung a ni a. Kap hluma um hai kuta inthawk silai le a mu man sa a ni bawk. Hieng laizing hin Zanikhan Security forces han Chirang district, Assam-ah NDFB Songbijit faction-a cadre pahni an man bawk.

Rajya Sabha member dingin sesamna
NEW DELHI: Rajya Sabha member dinga thlangtling thar pathum hai chun zanikhan Rajya Sabha member dinga sesaamna an nei. RS member dinga zanita sesamna nei hai chu BJP MP Amar Shankar Sable; Congress MP Raj Babbar le Trinamool Congress a inthawk Ms Dola Sen hai an ni a, RS Chairman, Mohammed Hamid Ansari in sesamna an neitir.

Ran that khapna bill passed
CHANDIGARH: Haryana Assembly chun Bawng that le bawngsa zawr khapna ding bill lungruol takin members han an passed. Hi dan dungzui hin Bawng that khapna bawsietu hai chu kum 3-10 sung lungin intangtir thei le Rs. 1,00,000 chen inchawitir thei an ni ding ti a nih. Chun, chawi dinga ti pawisa a lo chawi theinaw chun kum khat dang a lungin intang ding hun suksei thei ning a tih.

A pasal cricket bat in a vuok hlum
VADODARA: March `14, 2015 khan Sangita chun a pasal Mukesh S. Bariya (35) chu Cricket bat in a vuok hlum. Bariya hi Police constable, Sardar Sarovar Dam, Kevadiya town a posting lai mek, ngaizawng dang a nei leia a nuhmei hin lungsen taluo insum zo lova a vuok hlum a nih. Sangita hin a pasal a vuok hlum thu hi Police station-ah fein a van hriettir.

Indopui pahnina huna ralthuom
DIPHU: March 15, 2015 khan Karbi Anglong district, Assam a Bokajan Police station huop sunga Ekerrani Doyal khuoah Indopui pahnina hun laia ralthuom chodawk a nih. Hi khuo a cheng Narayan Malakar in leilet an letnaa ralthuomhai hi hmu a nih. Ralthuom hmua um hai lai .303 silaimu thahnemtawk tak, Rifle 1 (Lee Enfield made) le Grenade pakhat a nih.

Kum 2020-ah NE khawpuihaiah Rel
SILCHAR: Kum 2020 chen khin India hmarsak biela state khawpui (capital) haiah Rel lampui tlung hman vawng tang a tih. Hi taka hin Sikkim khawm thangsa a tih. March, 2016 chena Tripura State khawpui Agartala chu Rel lien chi tlung a ta, March, 2017 in Tupul, Manipur chen tlung a ta, March, 2018 in Sairang, Mizoram chen BG line tlung a ta, March, 2019 chenin Tupul-Imphal Rel
lampui zo ning a ta, March, 2020 in Shillong, Meghalaya le Rangpo, Sikkim hai chu Rel lampui tlung vawng tang a tih tiin Rajesh Kumar Singh, General Manager (Construction), Northeastern Frontier Railway chun a hril.

April thla tawp a inthawk OROP hmang tan ding
JHAJJAR: April thla tawp a inthawk Armed Forces sungah One Rank One Pension (OROP) hmang tan ning a tih tiin Army Chief General Dalbir Singh chun a hril. OROP hi Finance Wing, Defence Ministry in an enfel mek a, an enfel zo pha leh Final approval thaw dingin Finance Ministry-ah peklut ning a tih tiin a hril. OROP hi April 1, 2014 a inthawka hmang a ni ding thu General Dalbir Singh chun a hril.

Pakistan-ah mi 12 khai hlum
ISLAMABAD: Zani hamsa khan Pakistan rama lungin tum tum haiah Pakistan Court in thi dinga thiemnaw an changtir hai laia mi 12 hai chu a khai hlum. December, 17, 2014 khan an ram PM Nawaz Sharif chun Unofficial moratorium on capital punishment chu hmang thei dingin a lo hlip ta a nih. Pakistan rama hin khai hlum hmabak mi 8,000 vel an um a hril a nih.

Renu Khator ACE lu tak dingin
WASHINGTON: Indian-American Renu Khator chu American Council on Education (ACE) a Board of Directors a Chairperson dinga thlang a nih. Renu Khator hi Uttar Pradesh a pieng, Kanpur University hnuoia Bachelor degree zo le Purdue University, Indiana hnuoia Ph.D. (Political Science) zo a nih.

Prince Harry in sipai a chawlsan ta ding
LONDON: Kum 10 zet sipaiah a thang hnungin Prince Harry chun June, 2015 khin sipaia a thangna a chawlsan ta ding niin Royal officials thusuok chun a hril. Prince Harry hi April le May thla haia hin Australian Defence Force-ah sipai sin a la zu thaw ding a nih. Kum 2007-2008 in Afghanistan ramah indona field-ah umin Air Controller sin a thaw a, March 2012-13 khan Afghanistan rama bawk Helicopter Pilot (Apache) in a lo thang ta hlak a nih.


Editorial
Kristien hai sukdudana

Centre-ah sawrkar thar a hung um a, sawrkarna cheltuhai chun ei ram hmasawnna ding projects le scheme chi tum tum hai bakah thaw dan thar le ni danga ei la hriet ngailo hai khawm an hung thaw pei a, lawm a um laizingin sakhuo thil tiengpanga innekna le insukdudana hai hi Political party dang han sawrkarna an chel lai nek khan a hung zuol deu niin an lang. Hi thil hi dolet lova ei en liem pei ringawt a ni chun Kristien-hai ta ding chun harsatna lien takel a la hung intlun pha ding niin an lang. Kohran pawl tum tum hai thangruola, ei ram thuoituhai kuoma Kristienhai sawisaka ei um dan hi ei lawmnawzie le ei dodalzie suklang a hun ta hle.

India ram khawpui tak New Delhi khawpui sunga ngei khawm Christian-hai biekin 5 lai zet suksiet a ni tah. Sawrkar chun Biekin suksetuhai man le hrem ning an tih tiin a hril a. Police han case an registered ngei a, sienkhawm tuchen hin biekin suksetuhai man le hrem an la um der nawh. Hiengang hi Kristien-hai ngirhmun a nizing ta lai khawma sawisel lo le dona chang hre lova ei um zing chun ei ri, mihai ri ei la sawn ding a nih. Sakhuo zalenna ram ti leia Kristien hai hi thungmuong el ding ei ni nawh. Hmalak ve a hun ta a nih.

Haryana State sunga Hisar district a Kristien-hai Biekin pakhat suksietin a um a, Biekin sungah Hindu sakhuo zuituhai ngaisang le an pathien ‘Hanuman” lim siein a um a, hi thil hin India ram thangsain khawvel rambung tum tuma um Kristien han an hang hrietin an lung a sen a, a sukthangtlawm hle. Hi thil tlung pawi an ti thu le hi thil thawtuhai dema thiemnaw an inchang thu puonglang hai sienkhawm ieng tak tak a hung ni chuong nawh. Hinduhai Temple ah Bawngsa va sie annawleh Isu lim va sie inla chu India rama hin buoina runpui tlung a ta, India ram chu chappui kang ang elin kang dur dur ngei a tih. Kristienhai hin rawl ei insuo a hun ta an naw maw?

Biekin sunga Cross intung suksietin a um bakah inruk hmang a ni a, hi zo hin Hanuman lim (statue) Biekin sungah intungin a um a hril a nih. Hi thua hin Pastor Subhas Chand in Police kuoma report in FIR a thaw a, mi 14 chungah case registered a ni a, sienkhwm mi man an la um naw a, Hanuman lim ruok chu lakhmang a ni tah. Case registered khuma um mi 14 hai manna ding hin India ram states le UTs tum tuma um Kristienhai hin India President, Prime Minister le Union Minister hai kuoma Memorandum pe sup sup inla chu kakhawk le umzie a nei ngei ring a um.

Pastor Chand in February, 2015 a inthawk vauna a tuok a, Biekin umna hmuna hin Christian Biekin um thei naw nih ti chu a ram le a khaw mihai tawngbau a nih. Pastor Chand khawm haptakar hmasaa inthawk khan Hisar biela um thei ta lo dinga hnawtdawk a ni tah. India ram state dang dang haia khawm Kristienhai sukdudana ri hi riet ding a um zing ta a, Kristien-hai ei rama ngei ei intep tan ta a nih. State hran hran, a bikin BJP sawrkar le rorelna state haiah bawng that khapna le bawngsa zawr khapna dan hai hmang a hung ni pei a, bawng that khapna dan hi a hung zuol pei ding niin an lang. Muslim le Christian hai hlak bawngsa du le fa hlak ei ni leiin iengang khawpin am Bawngsa thua khawm hin harsatna ei la tuok ding ti hi ngaituo tham a tling a nih. Sawrkar thlungpui chun Kristien-hai sukdudana le Bawng that khapna hai hi ngaisak lova a siezing chun ei ram hin buoina nasa tak a la tuok el thei ding niin an lang.
Don't Miss
© all rights reserved
made with by Simon L Infimate