Hmar MIL Subject -hai hi inchuk tlak an ni am?

YLS-AH HMAR MIL ORIENTATION COURSE 28-03-2015 KHIN HUOIHAWT NI’NG A TIH. (HMAR MIL SUBJECT-HAI HI INCHÛK TLÀK AN NI AM?)

~ L. Ruoivel Pangamte

Hmar inchûklaihaiin, Pâwl 9 le Pâwl 10-a, Hmar MIL, Half Paper-a inchùk thei dinga Manipur Sawrkarin  phalna a mi pèk bawzuiin, Hmar Literature Society chun Hmar MIL Text-book dingin NUNROBU 10 a sut a. Chu chu, Board of Secondary Education, Manipur-in, Pawl 9 le Pawl 10-a Hmar MIL Text-book dingin, Order No. A/TD/4/89 hmangin, August 16, 1989 khan a mi pawmpèk a. NUNROBU 10 kha, hmawsarum le inhmawtaka sut a ni ka ring. Sawisel nuomtu ta ding chun, sawisel ding tamtak a um. Amiruokchu, “A tha èm a, Hmar tawng hmang Pawl 9 le Pawl 10 inchùk haiin Half Paper-a an inchùk dingin phalpêk ei tih” ti lei a, Manipur Sawrkarin NUNROBU 10 kha, Text-book dinga a mi pawmpek a ni nawh, Mi pângngâi pangngài chun chû ngaidan chu an nei seng ka ring.

1996-a inthawka Pawl 9 le Pawl 10 inchûklaihaiin, Full Paper-a Hmar MIL ei nei theina ding, Manipur Sawrkarin Order a’n suo chu bawzuiin, HLS-in Hmar MIL Text-books ding a, NUNROBU 9, NUNROBU 10, SINLUNG READER 9 & 10 le, HMAR GRAMMAR a buotsai chu, Board of Secondary Education, Manipur chun, Letter No. A/TD/4/89 hmangin, August 21, 1996 khan, a mi hung pawmpèk nàwk a. Kum za tamtak sùnga lekhaziek tha thahai làkkhàwm, English Literature tiemtuhai chun, 1910 kuma ziek le tiem hre tan vê chauhai lekhaziek chu, nêp ti ngei an tih. A ropui a that leia Hmar MIL ei inchùk, Manipur Sawrkarin a mi phalpèk ni lovin, ei tawng mi sukhmasâwnpèk a nuom lei a nih ti hi, mi tin hin hre thar seng ei tiu.

Kei khawm, a hminga MA English lo inchùk sil vê nang ka ni leiin, Pâwl 9 le Pâwl 10 Hmar MIL Subject le Pâwl 11 le Pâwl 12 Hmar MIL Subject-hai kha, insitum ka lo ti vê hle hlak. Pu L.Keivom-in a thiemna le a hrietna inthûk tak hmanga a mi hei chingletpèk thu ka ruoltha pakhatin a mi hei hril lem kha chu, àwm ka ti taluo a, zaah zain ka ‘support’ a nih.

Amiruokchu, ka ti ta angin, ei Hmar MIL Subject hi a that èm leia Sawrkarin Degree Level chena inchûk thei dinga a mi pawmpèk a ni nawh a. Sawrkarin Tribal-hai tawng mi sukchangkângpèk a tum lei a, ei phak  tâwk tàwka ei buotsaihai chu a mi pawmpêk hlak a nih ti hi, ei hriet a tha.

Entirna dingin, HLS-in Hmar MIL Text-book ding an hei buotsai ding khan, nuompâwnga tienami ngainuomum ringawt kha, inchuon el thei a lo ni nawh ti an hriet a. Board-in Syllabus Frame-work a lo nei kha zui a tûl leiin, ziek theitu ding àwma ring le beisei hai kuomah hnina le ngènna an siem a. Chuonghai laia zaa sawmnga (50%) khawmin, an sukpuitlingpèk thei ngai naw leiin, a then lem chu ziekpèk hiel an nih. ‘Ziekpèk’ ti lêmah, an hrietpui le an phalnaa ‘ziek’ lem chu a ni hlak tho. Thawdàn ding um nghallo chu, a ziekthei deuhai ziek, pahni pathum lotheilova inchuon dâm a tûl hlak a. Thenkhatin, a bul-le-bàl iengkhawm hre lo va, insuklàr tum leia anni thil ziek ngawt inchuon ang dàmin an hril hlak.

Chuong lai huna chun kei chu HLS-ah nina iengkhawm ka la nei ve nawh a. Hmar tawng le Hmar hnam ka hmangaina lei chauvin, HLS |huoituhai kuomah thil umdàn ka’n dawn ta chawt a. HLS Thuoitu pakhat chun, “A ni ngei. Hienga hriltu hi an um ti kan hriet leiin, Text-book thar siem a  hung tùl nàwk khan, pakhat pahni bêk hung ziek ve dingin sawisèltuhai chu kan ngèn tàwl a. Thla ruk nêka tam hiel kan nghàk hnung khawmin, iengkhawm an la hung pèklùt thei nâw zing a. A tâwp a tâwpah, ‘Mi lo hrethiem el ro. Ka sukpuitling zo hlawl naw a nih. Ka hei tum ngiel khawmin, pâwngapuia Text-book-a inchuon tlâk ding zuk ziek chu, thil awlsam a lo ni dèr nawh. Ka tlâwm dêr a nih’ titu hi an kat nawk a nih. Chuleichun, Text-book-a ei inchuonhai hi, ‘inchuon tlâk an nih’ ei ti leia ei inchuon ni lovin, a umsun sun le ei hmu ang ang ei inchuon hlak a ni lem” tiin a mi hril a. “Field puoa Football pèt thiem hai hi, ei hei inpèttir a. A vêl nâwk chu, an to tawk tawk ta hlak” an ti hlak hi a mi’n ngaituosuoktir rum rum el!

Kei khawm hi, Pawl 9-a inchûk ding pakhat, Pawl 10-a inchûk ding pahni le Pâwl 11-a inchûk ding pakhat ziek ve dinga mawphurna pèk ka nih a. Hming inlàrna hnawt leia ziek ding ni sien chu, ka ziek pei ka ring nawh. Ka hei buoipui tak tak lai chu, ka thlan a phul zâk el hlak a nih. Uongthu chang naw sien, kei hman, MA chena Literature inchûk ka nih a. Literature umzie a mik a mak hre nawtu ta ding lem chun, Lesson pakhat hei suktuo el khawm chu, thil namên ni naw nih. Chuong ang boruok hnuoia Hmar MIL, Degree Level chena inchûk ding mi lo induongpèktu, ei hei deusaw ngam el hlak hi chu….kei chu a ngaina ka hriet dèr nawh…!

Awleh, HMAR MIL SUBJECT-HAI HI INCHÛK TLÀK AN NIH AM? ti hi, thenkhatin Hmar MIL Subject an deusawna ni lovin, HLS hnarkeituhai an deusawna a ni lem hlak a. Board of Secondary Education, Manipur, Council of Hr. Sec. Education, Manipur le, Manipur University-a Board of Studies haiin, inchûk tlàka an hriet a, an ‘approved’ ei Hmar MIL Subject-hai po po hi, kei chun, ‘Inchûk tlâk vawng an nih’ ka ti a nih.

“Ei MIL Subject-hai hi an tha famkim am?” ti ni sien chu, ‘An tha famkim nawh’ tiin dawn ka tih. Famkimlona khawvela hin tûkhawm hi a famkim ei um nawh a, ieng thil khawm hi a tha famkim a um bawk nawh. Kum 24 liem tah, 1989-a Pâwl 9 le Pâwl 10-a inchûk ding, HLS thuoituhaiin NUNROBU 10 an buotsai kha inchûktlàk a nih a. Chun, Full Paper ding a, 1996-a MIL Text-books dinga HLS-in a buotsaihai khawm kha, inchûk tlâk vawng an nih. Amiruokchu, NCF-2005 ((National Curriculum Frame-work-2005) dungzuia Text-book induongthat a tùl leiin, October 2013 khan Text-book thar dinga ei induonghai chu Approval dinga submit a nih a. Board of Secondary Education, Manipur-in Approval  a mi hung thawpêk el naw bàkah, sum le pai indainaw leiin sut el thei lovin ei um a. Tribal Research Institute, Government of Manipur-in Rs. 1.19,000/- (Chêng Nuoi Khat Sîng Khat Le Sâng Kuo) chie a mi pèk le HLS-in a tlâwm a zàwng a lo nei chu hmangin, Text-book 5 (panga) chu Rs. 1,94,000/-(Chêng Nuoi Khat Sîng Kuo Le Sâng Li) chie sêngin February 2015 khan sut zo a nih.

Tûta ei sut thar IX & X Hmar MIL Text-book tharhai khawm hi, duthusàma tha an la ni nawh ti hrechiengtu ka nih a. Duthû la sâm tàwk naw sien khawm, inchûk tlâk ruok chu an nih.

NCF-2005 dungzuia induong a ni leiin, Orientation Course  nei a tûl a. Chu le inzawm chun, March 28, 2015 (Inrinni) zing dâr 10 chie khin, Young Learners’ School, Zenhang Lamka-ah ONE-DAY ORIENTATION COURSE ON HMAR MIL TEXT-BOOKS FOR CLASSES IX & X hi, huoihawt a ni ding a nih. Manipur Sawrkar hnuoi a, High School-a Hmar MIL inchûktirtuhai po po, chu huna thang ngei dinga inhriettir le fiel an nih.

~ Hmasawnna Thar | 26 March, 2015