Responsive Ad Slot

IENG TIK AM ANI CHU

Thursday, February 19, 2015

/ Published by VIRTHLI
By. VL Khawbung, Sinlung Hills

 Ei pi le pu nu le pa hai beiseina nei a zalenna suola, hnam meiser sittu ram le hnam ta dinga hringna hlu tak inhlantu hai kha tulaia mithenkhatin an deusaw a, an dema, an sawisela, an diriem em em lai hin kei chun an phu tawk chawimawina inhlan ka nuom tlat chu tie! Kha hnam damna ding kha. Beiseina in sang tak leh lekha inchukin, an sung le kuo hai khawma ka naupa hi "ieng tikam aw KAMDING ala ni ding" ti a tlumte thlira an lo thlir mek lai chun hnam in singsat runpui a hung tlunga, chu hnam kal siem a chun mawphurna insang tak an inbela, a fatu/tucha tak ni tumin an phur hle ani kha. Chu ding chun hmar zaleng nauhai ta dinga meiser sit eng tumin thang an lak ani kha.

Mani hnam puonzar hnuoi ah lenga, zalenna famkim nei a, mani a ro inrel chu kan hnam chanvo ani ti pawmtu an ni leiin awp betna hnui a inthawka intal suok chu thaw makmaw ah an ngai tlat ani kha. Hmar hnam damna dinga District council an nget le an phut an beisei kha ieng dan khawma a kal naw ani ti hretu an ni tlat leiin Mizoram sorkar laka khan an lo Demand an ta kha. Chuong chun sorkar leh thei tawpa in nawrin an inbeia, lam dang dap ding khawm hre ta lovin hrimhrei inlekin, huisen takin mizoram sorkar chu an bei an ta ti chu ei hriet naw kan lau tak zet. Khang anga an um kha mithen tam takin suol ta hrim hrim le dan baw si, kawmamw bawla vawisunni chena an ngaina hi an thaw suol let dera ngaidan indik lo tak ani.

Ei pi ei pu ei tlangval hai khan lekha an inchuklai dam an fak zawngna dam an sungkuo le an nuhmei an nau le te hai an khawtlang an maksan el ni lovin, ei hnam ta ding hin an iengkim an inhlan ani tak. Khawlai ram a khawm hnam hmangaina lungril hi chawk tho a a um chun lekha thiem hai a "rauin" a man phawt chun nghawng a nei naw thei nawh. Chu chu hmar district council khela beipui thlaka khawm khan ching takin ei hmu ani. Ei hnam pasaltha hai beipui thlak thawm chun zoram sorkar chu a nghawr nghing nghal a, a ram sorkar khawm an singsa mup mup el ani kha. Hmar nauhai zalenna meiser chawk put put el ding chu suk mit tumin thang a laka, a tum suk puitlingna ding chun ieng po khawm thaw rin naw a unau le unau inthat tir khawm a pawi ti naw a, hmangruo khawm a dittui naw hrim a, a rawva thei ang pa tawpa chang chu a tum dan ani leiin a ram sipai chu a hungin chang tir ta buon buon ani kha.

Dit tak chun kha buoina kha Mizoram sorkar khan tuolsung buoina ah a ngai naw a ti ding khawpin sorkar laipuiin hmelma ram bei ang el in hmar hai chu a mi bei ani ti ei hriet ring a um. Chulei chun vawisunni chen hin hmar nauhai lungril ah ser dam theilo a mi tuo/siem pek an tah. Aawle chu tieng pang chu lo hun sien, iengtik am ani chu khuo la var a tih. Chu huna chun mani chan ai dawng phak ta lo le khaw eng en ngam ta lova beidawngna rip sunga khum a um hai, kum nga dana hlema um kumtluon hlak hai, mawlna leia titna bawia intang hai le an mei chawk ringawt en a lungngaia inrum mek hai ta ding hin hlimna kawl la eng ngei a tih. Chu huna chun vawisun ni a hnam thil thaw sawi sela ngaineptu hai ta ding hin an lungngaina darri in thang vel ta lovin, an lawmna par angin vul tanga tih. Iengtik ni am ani chu hi hnam hin sandamtu a hrie in chawimawi la chawimawi a ta, chu huna chun mani ngaia ropui ni ta lovin hnam dang hai ngai ah hnam ropui ni tang a tih.

Politics hlutna khawm contract sin thaw le mirethei hai chan ding anfak ruka in nghat ta naw ni a; inkhi pek ta bawk naw mani. Chu huna chun ei kristien nun khawm hungin sang tang a ta, kohran phena suol thup tum misuol inbiru hai ngai pawimam tang ei tih. Chung mihai nek chun suolna hre a, pawma, insira, krista pantu misuol lem hai lam dingin kohran pen suok tang a tih. Ngaidamtu ni tumin kohran bel ta naw mani a, ngaidamna chang mamaw leiin kohran ah thang tang ei tih. Pulpit chu chapona chilper ni ta lovin simna mittui in buol lem tanga ti. A san iem ana ei ti chun ei hnamin krista le ram a la hung nei ding ani. Iengtik am ani chu ei beisei ram hi la hung tlung ta ta, ringna hin thu tak inlang tir a ta, varna hin siemtu chaldel lovin chawimawi tang a ti.

Iengtik am ani chu vawisunni hi tienlai lan chang a ta, hi thuziek hi thangthar han la tiem an ta, a ziektu dem ngam hiel khawpin hieng ang thu hmanga infui a tulnaw zie an nunin anlang tir pha chun vawisunni hi mak la ting an tih. Chu ram hung tlung ding chu ka thla hin ring nan a thlira, ka hring chan ka singmit hin hmt phak kan beisei, ka hmu phau naw ani khawma a mi tiem tu hi ring a um ani ringna mit a a min hmu fie tir leiin. Ka vui nawh . Lalpa ka pieng hi k lawm ani. Unau ei hnam mawina chu nang le keia innghat ani.
Don't Miss
© all rights reserved
made with by Simon L Infimate