Responsive Ad Slot

MNF in mipui thlavang hauhna (thla huolna) lamhraw huoihawt

Thursday, January 22, 2015

/ Published by VIRTHLI
~  Henry L. Khawzawl
AIZAWL, 22 January, 2015: Mizoram Congress sawrkar hnuoia thil man sang taluo le zu zawr dtinaw inentirna'n Mizorama opposition pawlientak Mizo National Front (MNF) chun mipui thlavang hauhna (huolna) lamhraw (mass rally) a huoihawta, mipui thahnemtakin an tlawp.

Mipui thlavang huolna lamhraw hi vawisun chawhma dar 11 khan Aizawl, Chanmari traffic point a inthawkin nei a ni a, Aizawl khawpui lunna hmun Zarkawt point le Israel point a hai MNF thouitu ha'n thuhrilna neiin Vanapa Hall tuolah a kharna hun nei a nih.


Aizawl khawpuiah lamhraw ruol hin Mizoram district headquarter hrang hrang hieng- Lunglei, Kolasib, Mamit, Serchhip, Saiha, Lawngtlai le khuo hrang hrang - Hnathial, Chawngte, Thlabung, Lungsen etc. a hai lam hrawna hi huoihawt a ni bawk.

Lam an hrawna san hrilin Aizawl West-II MLA Pu. Lalruatkima in Israel point ah thu a hrilna a chun Congress sawrkar hnuoiah awmnaw baksaka thil man a hung to ta thut lein nitin khawsakna a harsa a, chuleiin mipui thlavang huol a ngai a nih a tia. Congress sawrkar chu nuomchen (inhawichen) sawrkar an nih ti a sawiselin, "sum inren ding an ti zinglai, inhawi deuin nunkhuo an phama, zanilai el khawm khan CM Lal Thanhawla chu helicopter hmangin Mimbung-ah an zin" a nih a tih.
Mizoram sawrkar chun January ni 1 anthawk khan ration bufai man sukto in MNF sawrkarlai a bufai (APL) man Rs. 9 chu Rs. 15 in a sukpunga. Hi baka hin electric bill, tui bill le sie (land revenue) khawm nasataka sukpung a nih.


"Congress sawrkarin hienga thilman a suk to thut hi an sum du lei le inhawi an chen nuom lei a na, thil man suk to in mipui an rawk (rob) a nih", MNF senior Vice President Tawnluia chun Vanapa Hall tuola thu a hrilna ah a ti a. "Mipui thlavang huol dingin a tul angin hma tieng kan fepei ding a nih", a ti bawk.

A hril peina ah Tawnluia chun Congress sawrkarin zu khap burna (total prohibition) dan MLTP Act hlipa, MLPC Act hmanga sawrkarin zu zawr a rawt chu mipuiin tha an tinaw hlea. Sienkhawm sawkarin sum hmanga inhawi chen a nuom leiin zu zawr hi a rawt a nih a ti a."Congress sawrkar hin zu zawr hi suktawp vat raw seh", tiin a ngen bawk.

MNF senior Vice President chun mithahnem ngaiha'n a tlawna thisen an pek lai Congress sawrkarin thisen unit 1 ah Rs. 550 inchawk dinga a ti chun a dem thu nasatakin a khek puia. Congress sawrkar chu nuomchen sawrkar le mipui sum hmanga insuk hausak tum niin an tum bawk.

MNF i huoihawt lamhrawna a hin Congress sawrkar demna poster le placard hai mipuiin chawi a ni a. "Christien rama zu zawr tum Congress sawrkar kan dit nawh; sum thawsuok loa inhawichen Congress sawrkar bang raw seh, Mipui rawktu Congress sawrkar bang raw seh; zu zawr kan dit nawh, sawrkarin hlip raw seh" ti in mipui an khek a nih.

Vawisun vek hin MNF thuoitu hai chun Mizoram Governor Dr. Aziz Qureshi kuomah Congress sawrkar lakah an lungawinawna thu memorandum an thelut a bawk.
Don't Miss
© all rights reserved
made with by Simon L Infimate