Manmasi Suopui Inkhawmpui 2015 Janthum hmun ah nei a nih

-LRS Puruolte|Photo: Alan Famhoite

Janthum/Tripura: Rengpuiram (Tripura) sunga unau sulk hat suok, hnam tum tum hai chun “Manmasi Suopui Inkhawmpui 2015” chu Jan. 21-22, 2015 inkar sung hin Tripura Hmar Welfare Society le Janthum Rural Development Society huoihawt le mikhuolnain  Janthum English Medium Scool Compound, Janthum Bawng Colony, Dhalai District, Tripura hmun ah ursuntaka nei a nih. Hi hun a hin Tripura ram sung hmun tum tum a inthawk le Hmar hnam sunga kohran pawl tum tum a hotu, District Superintendent, Pastor, Missionary le Kohran thawktu Mission School Teacher tum tum hai thangsain an fekhawma, an tawiawm tha hle. Hi hun a hin Pu Dr. John H. Pulamte Gen. President, Hmar Inpui, Pu Lalhmingthang Hmar Gen. Jt. Secretary, Hmar Inpui, Pu (Upa) Laldawnlien Varte Gen. President, HYA GHQ, Pu L. Keivom IFS (Retd), Pu Lalhmingthang Joute 2nd in Command, CRPF, Agartala (Tripura) le a sunghai chu hungin thuhrilna hun hai an nei tawl. Manipur a inthawk Hmar hnam lam mawi tak tak, Khangbor Hmar Cultural Troupe in an suklang baka Hmar hlasakthiemhai le Tripura a Jampui Tlangdung tienga Hmar hlasakthiem tak tak haiin mipui hla’n an in awi a, mipui na le mit a lai hle. Zantieng hun a ruoi khawp le tlai taka zing le zantieng haia the hlak a nih. Tripura sung a hin hiengang hun unau inpumkhatna a um nawk zuol theina dinga hunser hi buotsai a lo ni ta hlak a.

Chun, tuta hma 1994 khan “Unau-Suopui Cultural Meet” ti hming chawiin Hmarkhawlien, Assam hmun ah Unau-Suopui hnam 13 laiin an lo huoihawt ta bawk. Kha hun a khan Tripura rama Politician inlar tak el, Pu B.K. Hrangkhawl le Hmar Students’ Association (HSA) Tuithaphai (CCPur) a inthawk khawmin kha hun a khan an sim ve a nih. Hi le inzawma Jan. 22, 2015 ni zing dar 7-11am a Business Session neia a um huna chun hieng thuhai hi an rel; Society Registration, Welfare Society chu Association a inlet ding, THWA hmatienga a fepei dan ding thuhai le hi huna hmalakna ding hriltlanga um hai le Bye-Law siem chungchanga Executive Committee-in a bawzui ding, Literature tienga hmalak a tul thu, Welfare in ralna le membership fee dawl dan dinghai an relin, an hriltlanga. Hi zo hin Palai fekhawmhaiin banpharin an namnghet. Hi zo, Sun hun a Cultural le Music programme a hun hmang a nih. Hi hun a Pu Dr. John H. Pulamte Gen. President, HI in thuhrilna hun a neina a chun Hiengang hun buotsaia um chu lawmum a ti thuhai hrilin mellung pawimaw tak a ni thu a hril a, Sakhuona chu ei inlet thei a. Ei nuom hun hun a ei ringnain rem a ti chun Hindu, Kristien, Pi-le-pu ainthawka ei ringna khawm ei inlet thei. Hnam chu inlet thei an nawh. Hnam chu thisena inthawk a ni thuhai a hril. Thenkhatin an hnam an theinghil le inzapui hlakna thu a inzapuium an ni lem thuhai hrilin mihriem khawm an hlem nawh. Mani inhlem anni thu hrilin. Mani hnam chawisang a pawimaw ziehai uor takin a hril. Hnam tum tum niin le State boundary in mi the sien khawm inpumkhat thei a ni zie le a dit thuhai a hril. Hi huna hun hmangtu dang danghai khawmin inpumkhatna an ngai pawimaw ziehai hrilin, ka ei pen tlang an phawt chun ei hmalaknahaia ei hlawtling thei thuhai uor takin an hril tawl.

Hi hun a bawk hin Palai fekhawmhai chun Tripura State a Hmar chu Tribe Certifcate chungchanga Schedule Tribe a zieklut a ni vat thei dan ding le hiengang hun hi Agartala hmun ngeia kum 2016 a nei nawk a ni ngei theina ding le huop zau lema hauoihawt an nuom thuhai hrilin a ngaituotu ding bik la’n ruot dingin an thu an reltluk bawk. Zan hun a hai programme phuisui taka hmang zawm pei a ni a.  Hi huna Pu L. Keivom in thu ahrilna a chun Unau ei ni zie hi inhril hran a ngai naw zie hai fie le chieng em em a hrilin Tripura ram hi hmatieng peia khawm suichieng dinga a la fe pei ding thuhai a hril a. Suopui vawng ei ni a, tudang ei um naw zie suklangin, Delhi ah in ei nei a, Delhi a in hung pha ei in ah hung tlung hlak ro tiin ama in ah tlung hlak dinga a lawmlut thuhai a hril chun mipui lawm a hlaw hle leiin mipuiin kut an ben dur dur. Bible an let mek thu hrilin March 2016 a zo hman a ni ngei a beisei thuhai a hrilsa bawk.

Pu Laldawnlien Varte, President, HYA General Headṭuarters in zan huna a thuhrilna hun a chun hi Manmasi Suopui Inkhawmpui mikhuoltu tuolsung tawng ngeiin mipuihai chibai bukin a ditsakna an hlan a, mipui lawm a hlaw hle bawk thu hrilin. Tawng hi Pathien-in mhriemhai inbiekpawna dinga a pek. Pathien malsawmna ropui tak a ni thu hai hrilin unau seng ei ni zie, inla hran ding, nangni inti ding tukhawm ei um naw ziehai a hril a. North East India a Suopui hnam hai hi inlahran ding ei ni naw zie chu tawng inhre paw vawnghai ei ni a inthawk a chieng tiin a hrilsa bawk.

Hun kar laka hnam lam Khangbor Hmar Cultural Troupe a inthawk hnam lam mawi tak tak suklang le hla ruoi the a ni a. Mipui an hlimin inhawi an ti tlang hle.

Tutaka hi THWS Thuoituhai chu Chairman- Rev. T. Lawmthang, Vice Chairman- Rev. Lalmuongthang, Secretary- Pu Benjamin Hrangchal, Asst. Secretary- Pu Lalchoisang Hmar, Fin. Secy.- Pu Johny L.F. Tusing, Treasurer- Rev. Buonghranglien hai an nih.