Responsive Ad Slot

Hmasawnna Thar | July 02, 2014

Wednesday, July 2, 2014

/ Published by VIRTHLI
HEADLINE:
16th Lok Sabha in Opposition Leader a neinaw ding;
Nehru, Indira Gandhi le Rajiv Gandhi hai huna khawm LS-ah Opposition Leader an lo um nawh
NEW DELHI: 16th Lok Sabha chun Opposition Leader a neinaw ding nia hril a nih. Lok Sabha Speaker Sumitra Mahajan chun indik le khau takin hi chungthu a hin rule book zui a tum. 16th Lok Sabha election, 2014 a khan tu party khawm Lok Sabha a Opposition leader ngirhmun chel theina dinga tlinna an nei nawh. Rule dungzui chun Lok Sabha-a Opposition Leader chel theina dingin Lok Sabha seats um po po (543)- ah seats 10% bekah an tling ding ti a nih. Party mala chun Congress seasts 44 ah an tling a, sienkhawm Opposition Leader ngirhmun chel theina dingin an tlingzo naw a nih. Jawaharlal Nehru, Indira Gandhi le Rajiv Gandhi hai Prime Minister an ni hun haia khawm khan Lok Sabha-ah Opposition Leader an lo um naw a nih. 7th le 8th Lok Sabha hun August, 1979 a inthawk December, 1989 inkar, kum 10 sung liemtaa khawm khan 16th Lok Sabha ang tho hin Opposition Leader tlingzo an lo um nawh.

Lok Sabha Opposition leader hmasa tak chu Ram Subhag Singh (1969) a nih. Hi hnung hin Y.B. Chavan, Jagjivan Ram, Rajiv Gandhi, L.K. Advani, Atal Behari Vajpayee, P.V. Narasimha Rao, Sonia Gandhi, L.K. Advani (again) le Sushma Swaraj hai chu Lok Sabhaah Opposition Leader an lo ni ta bawk.

Rajya Sabha a chun Congress ṭhuoitu hlun Ghulam Nabi Azad chu Opposition Leader a nih. Parliamentary Democracy a chun Lokpal, Chief Vigilance Commissioner (CVC) le Chief Information Commisioner (CIC) ruotna dinga Selection Panel ah Lok Sabha a Opposition Leader chu member a nih. Lok Sabha a Opposition leader a um naw chun Selection Committee chun Opposition leader post chu a ruok a ti el thei niin sawrkar thusuok chun a hril. Thil ni thei pakhat chu Rajya Sabha-a Opposition leader chu selection panel a inṭhangtir a nih.

LOCAL NEWS:
SBI Day hmang: CDDU kuoma Chair le Table an pek
CCPUR: Zani zantieng 3:30PM khan S. Kaikhanthang, Chief Manager, SBI, CCPur inrawinain SBI CCPur Branch Staff han an Office hmuna SBI Bank Day an hmang a, hi huna hin CCPur District Disable Union (CDDU) in an officea hmang ding Plastic Chair 5 le Plastic Table pakhat an ngen hai chu Chief Manager, S. Kaikhanthang le T. Nengzamang, AGM, SBI Hyderabad han CDDU kuoma inhlanna an nei nghal bawk. SBI CCPur Chief Manager S. Kaikhanthang chun, SBI hi hun sawt takel Presidency Bank hnuoia um, July 1, 1955 kuma SBI a hrana indang a ni a, hi lei hin July 1 chu kum tinin SBI Bank Day-a hmang hlak a nih tiin a hril. Churachandpur khawpui sung hmun tum tum ṭhangin SBI CCPur Branch chun ATM 15 inṭhut le hawng a tum a, tuchena hin hmun tum tuma SBI ATM 11 hawngin a function ta mek a. SBI-ah Cash Deposit Machine (CDM) a um a, hi CDM a hin Rs. 49900 chen deposit thei a ni a, senior citizen le disable hai ta dingin kartin Thawṭanni le Zirtawpni zat 9:30 – 11:30AM inkara a hran lieuin Counter hawng pek an nih tiin SBI CCPur Chief Manager chun a hril.

DDT Second Round kap nawk ding
CCPUR: Malaria Department, CCPur district chun July 14, 2014 a inthawk August 20, 2014 inkar sung khin CCPur District sunga khuo tum tum haiah DDT Second round kap nawk an tih. DDT second round hi first round kapna hmun haia kap nawk ding a nih. DDT second round kapna ding hai chu- Parbung PHC, Senvon PHC, Sibapurikhal PHC, Sinzawl PHC, Singngat PHC, Henglep PHC le Saikawt PHC hnuoi haia khuo tum tum hai an nih.

CDDU in lawmthu an hril
CCPUR: Churachandpur District
Disabled Union (CDDU) chun, District Administration le Bankers Committee han CCPur District sunga Banks haia kartin ni 2- Thawṭanni le Zirtawpni 9:30AM-11:30AM sung Disable (ruolbanlo) le senior citizens (kum upa tieng) hai ta dinga a hran lieu-a Counter hawng dinga hma an lakna thuah District Administration le Bankers Committee chunga lawmthu an hril. CMO chunga khawm District Level Medical Board (Disability) an din na thua lawmthu an hril bawk.

Pa hme leiin sungkhata mi 4 an thi
CCPUR: Papar hme ngei naw leiin Myanmar a Chin state a Teddim Town huop sunga Tuivial khuo a cheng Thang Suan Khual June 27, 2014 khan a thi a, a nauhai le a nuhmei Hospital panpui an ni a, sienkhawm a nau pasal tlangval 3 hai chu damzo lovin Hospital-ah an thi a, a nuhmei le a naunu pakhat an la dam.

AIR, CCPur stn. Prog.
CCPUR: Vawisuna AIR, CCPur station-a Paite programme a chun Songpu Hangshing & party, G.T. Lian Valte le K. Laljohn & party hai hlasak ngai thei ning a tih. Hmar programme a chun John L. Varte le Da Deserter hai hlasak ngai thei ning a tih. Thadou programme a chun Tongkhothan & party han hla sak an ta, An Ideal Women ti thupui hmangin Neipi Chongloi in thu hril a tih.

Doctorate Degree a hmu
CCPUR: Rev Van Lalnghakthang Khawbung s/o Pastor Laltlunglien of Parbung chun International Institute of Christian Management hnuoiah Doctor of Philosophy (Missional Study) hlawtling taka zovin June 28, 2014 khan Chennai-a Convocation huna degree inhlan a nih. A thesis chu ‘GOODNEWS TO THE POOR – The intrinsic call of the church with special references to Churches in Northeast India’ ti a nih. Rev. Lalnghakthang hi RPCNEI-ah Evangelist At Large sinthaw lai mek niin tuta hma khawm khan National Institute of Business Management (NIBM) hnuoiah MBA 1st Class (DE) lo zo ta a ni bawk.

IMPHAL NEWS:
Uṭawka sumdawng nuhmei 4 man
IMPHAL: Zani zingkar dar 4 vel khan Dingko Road, Imphal hmuna People’s For Animal (PFA), Thoubal le Imphal West Police hai ṭhangruolin Uṭawk a sumdawng nuhmei 4 hai chu Uṭawk 523 (Indian Bullfrog Spices)/Upeng leh an man. Rs. 2,000 seng inchawitir an nih. Mana um hai chu N. Dashu of Khongjam Tekcham, Naorem Memcha of Khongjam Tekcham, Tabitha Ningshem of Kamjong le Jenni Shimrah of Shangshak tuta Khuman Lampak, Imphal a cheng an nih. Uṭawk pakhatah Rs. 5-7 peiin an zawr hlak. Mi pakhatin zankhatin Uṭawk 50 vel an man thei a; zan khatain Rs. 250-350 an hlaw phak ang a nih.

Nuhmei naupang kum 6 mi suollui
IMPHAL: Chandel District a Chandel Police Station huop sunga Khurkathil khuoa pasal kum 31 mi, D.S. Kodar Maring chun June 28, 2014, 6.30PM khan an khawsung a cheng ve tho nuhmei naupang kum 6 mi chu chithlum pe a zawrin a suolui. D.S. Kardar Maring hin a suollui hnungin a tlan hmang niin nuhmei naupang sung han an hril. Chandel Police Station-ah June 29, 2014 khan D.S. Kodar Maring chungah Police han case an registered.

Entrance Exam result insuo tah
IMPHAL: Manipur Combined Entrance Examination, 2014 admission for B.Sc (Nursing), B.Sc (MLT), B.Pharm, B.Sc (RIT), B.Sc (OoT), D. Pharm le AYUSH Courses hai insuo a ni ta a, result hi Medical Directorate Notice Board-ah en theia tar a ni bakah Website:www. manipurhealthdirectorate.in ah en thei a nih.

MCPM in an ni sie niin an hril
IMPHAL: Mongjam Abhiram, Deputy Director, Manipur AIDS Control Society (MACS) in Gate tuol, Haobam Marak Irom Leikai a bomb sietu chu Red Guards of Maoist Communist Party an nih tiin Comrade Nonglen Meitei, Publicity & Propaganda Secretary, Maoist Communist Party of Manipur chun zanikhan thusuok a siem.

Mithiruong pakhat hmu a nih
IMPHAL: Zanikhan Yairipok Police Station huop sunga Yairipok Universal College tuol zawna lamlien sira Nullah ah Hidam Bobby Singh @ Herojit (35) s/o (L) Shamu of Langdum Awang Leikai chu a thisaa hmu a nih. Herojit hi ṭeklei siem sin thaw, Yairipok Mamang Leikai-a a nuhmei hai in a cheng an nih. A nuhmei le nau pasal 2 a thisan. June 30, 2014-a a umna hriet lova um a ni a, mi vuok hlum niin an lang. A ruong hi RIMS Morgue-ah sie a nih.

Hun tiemchin um lovin NH-37 ah blockade
JIRIBAM: AMSU District Committee, MSF Special Branch, DESAM Local Council le KSU han July 5, 2014 zanrila inthawk hun tiemchin um lovin NH-37 (Imphal-Jiribam Road) ah total blockade thaw ṭan an tum. Zirtirtu an mamaw zat pe dinga an ngenna state sawrkarin tuchena a la sukpuitling peknaw dodalnaa blockade hi thaw an tum a nih.

NATIONAL NEWS:
Pawisa note lem Rs. 1,07,000 leh man
LUNGLEI: June 29, 2014 zantieng dar 3:30 vel khan Raju Chetri (37) s/o Mohan Chetri of Chhinga Veng, Aizawl, Mizoram chu India pawisa note lem Rs. 1,07,000 le McDowel Rum bur 93, Rs. 55,800 manhu leh BSF Intelligence Wing, Lunglei; DC, Lunglei; CID (SB) le Mizoram Police han an man a, Police Station, Aizawlah an peklut. Pawisa note lem hai lai hin Rs. 1000 note lem 102 le Rs. 500 note lem 10 a ṭhang. Pawisa note lem hai hi Karimganj District, Assam a inthawka a lak le Mizorama India pawisa note indik Rs. 80 peia a zawr niin Raju Chetri chun a hril. Pawisa note lem hi Bangladesh a inthawka hung niin Satish Budakoti, DIG, HQ BSF Mizoram & Cachar Frontier chun a hril.

Food Minister’s Meeting ko
NEW DELHI: July 3, 2014 khin sawrkar thlungpuiin New Delhi-ah Food Minister’s Meeting a ko. Hi meeting a hin thil man kaisang thunun dan ding, bufai black a zawrna chungthu le indiklo taka bufai sekkhawl le thupruk sukre dan dinghai hriltlang an nih.

Helpawl han July 4 in Srinagar-ah bandh
SRINAGAR: Prime Minister Narendra Modi in July 4, 2014 nia Srinagar-a an zin ding dodalnain helpawlhai chun bandh an ko. PM chun Srinagar an zin huna ṭhalaihai ta dingin package a puong ding nia hril a nih.

Congress candidate in Modi a hek
VARANASI: 16th Lok Sabha a Varanasi Parliamentary Constituency a inthawka BJP ticket a thlangtling, tuta PM ni tah Narendra Modi chu hi biela Congress Candidate, Rai chun Allahabad High Court-ah a hek. Modi in Affidavit a pekluta chun a nuhmei Yashoda Ben thu ziekna ding column chu a ruok (blank) in a sie bakah Yashoda Ben PAN Card thu kim takin a ziek naw a, Supreme Court direction a kal a nih tiin Rai chun a hril.

Kum 12 mi an pathien kuoma an inhlan
VARANASI: Uttar Pradesh state a Bhadohi District a Telga Village a cheng pasal naupang kum 12 mi Sumit an ti chu Tantrik Upendracharya alias Upendra Tiwari le a ruolhai, Ravindra Sharma le Shivbhawan Sharma han May 12, 2014 khan thatin an pathien kuoma an inhlan leiin June 29, 2014 khan an man. Naupang mitmu an kheldawk bakah a kuthai an tanbawng niin police chun an hril.

K.K.Paul in Nagaland Governor
DIMAPUR: Meghalaya Governor, Dr Krishnan Kant (K.K.)Paul chu Nagaland Governor thar ding ruot a ni hmakhat Nagaland Governor sin lo chel dinga ruot a ni angin vawisun 11:30AM hin Durbar Hall, Raj Bhavan, Kohima hmuna Nagaland Governor dingin sesamna nei a tih. Chun, T.C. Sangtam chu Commissioner & Secretary to Governor, Raj Bhavan dinga ruot a nih.

EC in NCP Show-Cause Notice a pek
MUMBAI: Sharad Pawar ṭhuoina hnuoia NCP chu Election Commission in National Party a ninaa inthawk de-recognise dingin Show Cause Notice a pek. Hi thu hi thudik a ni a, a dwnna pek vat ning a tih tiin NCP Spokesperson Nawab Malik chun a hril. NCP chu states 3 a inthawk Lok Sabha MPs le states 6 a inthawk MLAs an nei leiin National Party a nina a inthawka de-recognised ninaw nih tiin Malik chun a hril.

Nitin nuhmei 93 suollui:NCRB
CHENNAI: National Crime Records Bureau (NCRB) data dungzuiin India ramah nitin nuhmei 93 suollui zie ang an nih. Nuhmei suolluina hi tlawm nekin pung tieng a pan pei niin NCRB thusuok chun a hril. Nuhmei suollui tamna tak chu Delhi a ni a, a dawttu chu Mumbai niin a pathumna chu Jaipur a nih.

Gogoi chungthuah thutlukna lak vat
NEW DELHI: Assam Chief Minister Tarun Gogoi chungthuah Congress High Command in thutlukna a lak vat ta ding nia hril a nih. Congress party Observer, Mallik Arjun chun June 30, 2014 khan a thil hmu dan AICC President, Sonia Gandhi kuoma report a pek ta a, thutlukna chu Congress High Command in an siem ding a nih tiin a hril.

SC in Tarun Tejpal bail a insuo dingin
NEW DELHI: Sex thila mawilo taka chea intum, Tehelka founder Tarun Tejpal chu zanikhan Supreme Court chun bail (regular) a insuo dingin a chungthu a rel. May 19, 2014 khan haptakar 3 sung interim bail pek a lo ni ta bawk. Tejpal (51) hi November 30, 2013 a man, Sada Sub-Jail, Goa Vasco town a intangtir, tuta interim bail-a suok a nih.

Casual leave in a tirkir vawng
NEW DELHI: Union Information and Broadcasting Minister Prakash Javadekar chun a office a thawktuhai chu office kai huna an tlung kim seng am tiin a va check thut a, a tlung hman lo an tam khawp el a, Prakash Javadekar chun Office kai huna tlung lo hai chu an thu le hla lovin Casual Leave in a tirkir vawng. Office kai hun hi zing dar 9 a ṭan dinga Order um tasa a nih.

Radio Kashmir kum 66 a tling tah
KASHMIR: Radio Kashmir chu zanikhan kum 66 a tling tah. Radio Kashmir hi kum 1948, kha hun laia Kashmir Prime Minister, Sheikh Abdulla in Radio Kashmir-Srinagar station hi a lo hawng a nih. Chun, AIR Guwahati khawm zanikhan kum 67 a tling tah.

Tripura Governor dingin Mizoram Governor
AGARTALA: Mizoram Governor Vakkom B. Purushothaman chu Tripura Governor thar ding ruot a ni hma khat Tripura Governor sin chelsa dinga ruot a ni angin zanikhan Raj Bhavan, Agartala hmuna Tripura Governor sin chel dingin Tripura High Court Chief Justice Deepak Gupta hmaah sesamna a nei. Hi huna hin Tripura CM Manik Sarkar le a cabinet minister-hai an ṭhang.

Ui in bomb a se puok leiin a taksa an dar vawng
PANAJI: Goa State a Sapeltuhai chun ramhnuoiah bomb siemfawm sa ṭhing le thu tha hai leh funin hlohna hringin an vur khum a, ramsa manna dingin an sie hlak a. June 30, 2014 khan Ui pakhatin va tuokfua bomb a ni hre lovin sa ṭhing le bu thu ta hnung chu fak tuma a se leiin bomb hi a se puok a, Ui hi a taksa an dar vawng. Goa Police le Forest Deparment hai chun ṭhangruola hiengang thil hmanga Sapeltuhai hi suizui le man dinga hma la tlang dingin remtina an nei.

A nau nuhmei 2 hai chempuiin a sat hlum
BANGALORE: Kum 45 a upa Ramesh an ti chun zani hmasa zan khan Magadi Road-a Tungnagar hmuna an chengnainah a nau nuhmei pathum hai chu that tumin a bei a, pahni a sat hlum a, a upa tak chu natakin a sat hliem. Ramesh hi autorickshaw driver a ni a, sienkhawm a pawisa batna han a autorickshaw an hrentang pek a nih. Ramesh hi ama le ama inthat tumin an sat hliem leiin hospital-a admit a nih. A nau nuhmei a sat hlum hai chu Monisha (7) le Monica (10) hai an ni a, na taka a sat hliem a naunu upa tak chu Dharini (14) a ni a, tuhin thihmun suolin hospital-ah enkawl mek a nih.

KNLA cadre 2 ralthuom leh man
DIPHU: Bokajan Sub-division sungah Assam Police le Army ṭhangruol han zanikhan Karbi National Liberation Army (KNLA) ni dinga ringhla pahni - Sonjet Rongpi le Sunder Timung hai an man. Hieng mi pahni hai kuta inthawk hin 7.65mm Pistol 2 le a mu 10 bakah India pawisa Rs. 1.8 lakh an man sa bawk.

Army Chief China ramah
NEW DELHI: China rama ni 4 sung cham dingin Indian Army Chief, General Bikram Singh chun vawisun hin New Delhi suoksanin Beijing pan a tih. Kum 9 zet a liem hnunga Indian Army Chief China rama inzin a pahnina ding a nih. Tuta hma khan Army Chief hlui General N.C. Vij a ni a, kum 2005 khan China rama a lo hang inzin ta a nih.

Thamna Rs. 25 lakh ngen leiin Officer 2 man
NEW DELHI: West Bengal a sumdawngtu pakhat tax chungchangah thamna Rs. 25 lakh zet a ngen leiin CBI pawlin Income Tax Department a Joint Commissioner Deepak J. Mehta le Income Tax Officer, P.N. Srivastava le Chartered Accountant Samendra Nath Ghosh hai chu Rs. 3,50,000; Bank Accounts 14 le rothil lekha pawimaw 3 hai leh an man. Kolkata Court hmaah inlangtir an ni a, Court chun lunginah a sielut vawng.

LPG man Rs. 16.50 in sukpung
NEW DELHI: Non-subsidised Cooking Gas (LPG) man chu Cylinder pakhatah Rs. 16.50 (14.2kg) a sukpung leiin LPG Cylinder (nonsubsidised) man chu Delhi ah Rs. 922.50 a ni ta ding a nih. Kolkata ah Rs. 966, Mumbai ah Rs. 949.50 le Chennai ah Rs. 924 a ni ta ding a nih. Non-subsidised LPG man hi thla hlui khan Cylinder pakhatah Rs. 23.50 a suktlawm a nih.

General Manager man a nih
NEW DELHI: Delhi Sikh Gurwara Prabandhak Committee a General Manager sin thaw, Harjeet Singh (54) chun June 21, 2014 khan Gurudwara a thawk ve tho nuhmei kum 30 mi in sex thilah a mi sukrimsi tia Parliament Street Police station a FIR a peklut leiin Delhi Police han June 30, 2014 khan manin case an siem khum.

Purunsen man a kaisang
NEW DELHI: New Delhi, Indore, Chandigarh, Mumbai le khawpuilien dang dang haiah Purunsen man a kaisang a, a hlawp (wholesale) a Purunsen Kg 1 ah Rs. 12.75 a zawr hlak chu kg. 1 ah Rs. 24 a zawr a nih. Mumbai a chun Kg. 1 ah Rs. 10, Kolkata ah Rs. 5, Delhi ah Rs. 24, Agraah Rs. 3, Bangalore le Hyderabadh ah Rs. 2 a zawr an nih.

WBCS Officer Mobile phone lakpek
KOLKATA: June 30, 2014 ni khan West Bengal Assembly Session ah Department of Women Development and Social Welfare demand hriltlang a ni laia member-hai insel lai chu West Bengal Civil Service (WBCS) Officer in a mobile phone hmangin thla a lo lak leiin Speaker, Biman Banerjee in a mobile phone a lakpek a, Biman Banerjee hi Seucurity personnel han tuolah an va thak dawk. Assembly Session zova Speaker in Biman Banerjee hi a office pindanah a ko a, hi taka hin dan a bwsietna thuah ngaidam an hni leiin a thlalak hai sukbo (deleted) a ni hnungin a Mobile phone hi a pekkir. Hiengang thil hi kum 2010 laia DGP, Bhupinder Singh khawmin a lo thaw leiin hi huna Speaker, A.Helim in pawisa a lo inchawitir ta a nih.

Rel in Sai pahni a rawt hlum
JALPAIGURI: Zanikhan West Bengal-a Jalpaiguri districtah Rel hrat taka tlan chun Alipurduar hmuna Sai chal pahni a rawt hlum. Sai pahni hai hin Rel lampui an kan mek laia Rel hin a rawt an nih. Rel hi New Delhi-a inthawk Guwahati pana hung tlan army personnel hai chuongna a nih.

Pawisa lem hmangtu kum 10 intang ding
AURANGABAD: District and session judge SG Shete chun Jharkhand mi Shaikh Nazeer chu pawisa lem thedar tuma intumna leiin kum 10 sung rimsi taka lungin intang ding le Rs. 25,000 fine chawi dingin thiemnaw an changtir. Shaikh Nazeer hin October, 2011 khan pawisa lem (fake) Rs. 1000 notes iemanziat chu dawr haia a hmang a, a bul chun dawr neitu han an hriet nghal naw a, sienkhawm dawr neitu pakhat chun a ringhla leiin Police a ko a chu huna Police han an man a nih. Man a ni huna hin Shaik kuta inthawk Rs. 1000 note lem 3 Police han an man sa bakah thu indawnna nei huna an puongnaa inthawk Police chun a chengna ina inthawk Rs. 1,000 note lem 18, pawisa tak (genuine) Rs. 44,570 le pawisa lem hmanga thil chi tum tum an chawk Rs. 52,000 man ding zet dapdawkin an man a nih.

Paraguay le Brazil-ah tuilien
ASUNCION: Paraguay le Brazil haia chun tuilien leiin mi 250,000 hai chun an chengna in hai suoksanin hmun himna hmuna an insawn tawl. Ruo nasa taka a sur leia vadung tui hai an luongliem leia tuilien hi tlung a nih. Praguay rama provinces 17 hai tuilien leia mani chengna ina um ngam lova in suoksan hi mi 200,000 vel nia hril a ni a, tuilien in a sukbuoina nasa tak chu an khawpui a nih.

VAWISUN THUPUI
Aw hung ta u, Lalpa chawimawiin hlimtakin hla sak ei tiu; Ei insandamna lungpui chawimawiin hlim takin khek ei tiu. Lâwmthu hrilin a hmaah feng ei tiu khai, Inpâkna hla saka ama chawimawiin hlimtakin râwl insuong ei tiu. - Sâm 95:1-2

EDITORIAL:
Bandh le Blockade hi mipui le sawrkar sirdena a nih

India ram hi democracy a rorelna ram a ni a, bandh le highway blockade annawleh economic blockade tihai hi dan kal a nih. Supreme Court le State ṭhenkhat chun bandh le blockade hai hi an khap ta bakah a huoihawttuhai hremna ding dan khawm an siem hiel ta a nih. Nisienlakhwm bandh le blockade hi India hmarsak biela chun inzing utin thaw a ni a, Manipur a lem chun a hluor zuol bik ti inla ei hril suol taluo ring a um nwh. Bandh hi Manipur state ṭhenkhata chun a um mek bakah blockade in a mi hmuok a nih. Bandh le blockade hi ram le hnam hmasawnna ding daltu a nih. India hmarsak biela states 8 um hai laia a chin pawl tak Sikkim a chun bandh le blockade um hi hriet a ni ngai zen zen nawh. Hi lei hi ni ngei a tih Sikkim hi hma a sawnin an changkang hrat em em a, India ram pumpui huopa khawm an khawpui Gangtok chu a thienghlimna tak a ni ring a um. Mipui rorelna rama chun, mipuiin dawr an hawng ding, tuol an suok ding le khuol an inzin ding chu sawrkar laka lungawi lo han khawlaiah duty in an khap a, zalen takin mipui an khawsa thei ngai naw leiin harsatna chi tum tum an tuok pha hlak. Bandh le blockade thawtuhai hi mipui zalenna sirdetu an nih. Mani le mani inhremna, harsatna siemtu, inhmangna le channa a ni bawk. Ram hi sum le paia hmasawn ding chun sun le zan hril lovin, Pathienni khawma dawr hawnga sin thaw a ṭul. Amiruokchu, mihriem taksa hratnain a tlin naw a, sakhuona ei inza leiin ei inthunun a, zan hun le Pathienni haia ei khar hlak.

Ram chu sum le paia hausa ding chun ram hmangaitu chun thei tawpa thawin hma a lak a ngai hlak. A san chu, ram hmangaitu chu ram le hnam ṭhatna ngaituotu a ni lei a nih. Chuong a ni laia dawr inkhartir, an sumdawngna lo inchawltir le an kuol inzin ding lo dang chu ramin a tuor em emin, ram suksietna a ni a, mipuizie suksietna a ni bawk. Chuleiin mi tukhawmin, mipui khawsak phung pangngai a sukbuoi a, ram hmasawnna ding sukbuoi zawnga bandh le blockade lo thaw chu man a hrem ding a nih. Hi thil hi ngaipawimaw a, ngai thu tak ngei ngei ding a nih.

Mi tukhawmin, ram le hnam chu hmangai an ti a, entirnain North East mihai an mi hmusit a ti a, a lungawinaw chun a tuorna chu ama chunga ngei a ni ding a nih. Chu chu mimal zalenna a ni a, midang zalenna suksiet pek dingin dikna pakhat khawm a nei nawh. Khawvel taka ei sut lem chun, ama hringna suktawp chenin zalenna nei a tih. Pathien thu anga ei sut ruok chun mani le mani inthat le insuknat chu a thieng der nawh. Hnam inthlierna tiin inchuklaihai chu an lungawinaw chun an niin an tuor el ding a nih. An nuom leh “Ni khat sung lekha kan inchuk naw ding a nih” tiin an school-hai an khar el ding a nih. An lungawinawna chu an ni chunga vek a tla ding a nih. Nisienlakhawm, an nuom nuoma mipui le sawkar namnula an sirde chun, democracy rorelna a nih ti thei nawng ei ta, Oligarchy rorelna ti lem ei tih.

Jiribam a um student bodies pathum, AMSU District Committee; MSF Special Branch, DESAM Local Council le Kangleipak Students Union (KSU) hai chu ṭhangruolin an thil ngen sukpuitling pek an ninaw leiin July 5, 2014 zanrila inthawk NH-37 (Imphal-Jiribm Road) hun tiemchin um lovin total blockade thaw an tum thu an puonglang a. Hi thil hi Manipur pumpuia chenghai tuorna le harsatna ding a nih. Hi nek hin an biel sunga inchuknain po po le sawrkar office po po kharin hma la hai sienla, mipui intuortir lovin an ni ngeiin hang tuorhai sienla chu thlawp le ngaisak an hlaw lem el naw ding maw? Bandh le blockade thawtuhai hi mipui le sawrkar iengma lova ngai a, sirdetu an nih. Hienganga thil thaw hi chu sim le bansan vat chi a nih. Ei insukhmu a, ei thaw zawngsak a, sawrkar le mipui harsa takin ei siem a, sum le pai tam tak ei sukriral pha ang a ni bawk leiin sim a, bansan chu a hun ta hle.



Don't Miss
© all rights reserved
made with by Simon L Infimate