Responsive Ad Slot

Hmasawnna Thar | June 25, 2014

Hmasawnnathar

Wednesday, June 25, 2014

/ Published by VIRTHLI
HEADLINES:
Majorkhul-ah kangmei rapthlak takel a suok; mi 4 a kang hliem:
Dawr 3 ṭhangsain In 15 a kang ut vawng
IMPHAL: Zani sun dar 11:15 vel khan Manipur Press Club bul, Majorkhul, Imphal-ah kangmei rapthlak takel a suok a, Dawr 3 ṭhangsainIn 15 a kang ut vawng. Kangmei hi building sawng thum, a chung rangva a inthawka inṭan nia hril a nih. Building sawng thumna hnuoitak hi LPG Cylinders le thil dang dang siekhawmna a nih. Kangmei hi LPG Cylinder putsuok lei le LPG Cylinder puokdar leia suok nia hril a nih. Kangmei suokna hi Manipur Assembly Guest House hnung char a nih. Kangmei suok thu hi a hun takah Manipur Fire Service inhriettir an ni a, sienkhawm kangmei suokna hmun hi sun dar 12:30 velin an tlung chauva hril a nih. Manipur Fire Service a Water tenders 6 hmangin kangmei hi ṭhel a ni a, darkar 3 neka sawt ṭhel a ni hnungin kangmei hi ṭhelmit thei chau a nih.


Kangmei ṭhelnaa hin Varun Water Canons 2 hmangzo a nih. Kangmei hin thil chi tum tum cheng vaibelsie khat neka tam manhu a kangsietnia hril a nih. Kangmei leia thi an um naw a, sienkhawm mi 4 a kang hliem a, chuonghai laia Khushi Rai (12) d/o Lalan Ri chu a hliem na taka hril a nih. Kangmei suokna hmuna hin Manipur Chief Minister Okram Ibobi Singh; Deputy Chief Minister Gaikhangam; Assembly Speaker, Th. Lokeshwar Singh; Assembly Deputy Speaker Preshow Shimray; Social Welfare Minister A.K.Mirabhai; Ministers le MLA hai an va fe a, thil um dan a hmuna an enfel. Kangmei leia harsatna tuortuhai sawmdawlna le ṭhangpuina sin chu Zeliangrong Artists Forum, Zeliangrong Students Union, United Naga Council le Zeliangrong Body members han an thaw bakah All Manipur Working Journalists Union in Press Club ah Relief Camp an hawng. Gaikhangam chun hi thil tlung hi thil vangduoithlak takel a nih tia hrilin, Manipur Fire Service kangmei ṭhelna hmangruohai a hluiin a tulai naw taluo ta a, hmangruo thar a thuom thar a ṭul a nih tiin a hril. Chun, hmun pawimaw le mihriem bubitna a cheng han Safety norms ei zui a ṭul a nih tiin a hril.

LOCAL NEWS:
Official pahni in District Hospital an hung sir
CCPUR: Behiang PHC hnuoia Suangphu khuoa Malaria PF invawi 4 hmusuok an ni chungthu le inzawmin zani 12:00 khan Imphal-a inthawk official pahni- Dr T. Jamkhokam Kuki, State Malaria Officer le Dr Retendra Mohan, Consultant, Monitoring and Evaluation, National Vector Borne Diseases Control Programme hai chun District Hospital, CCPur an hung sir a. CMO office chamber-ah Dr Thangchinkhup Guite, CMO; Dr F. Thienkhogin, DACO le Medical Supdt. District Hospital Dr Shyamsundar Singh hai an inhmupui a, National Vector Borne Diesease thua hmalak pei dan ding hai an hrilpui.

SHG Leaders Training nei
CCPUR: Zani 11AM khan NABARD huoihawtnain Tuibuong-a DRDA Hallah Self Help Group (SHG) Leaders training nei a ni a, training hi Langkhanpau Guite, Chairman, ADCC in a hawng a, resource person in KS Lal Guite, AGM, NABARD; Rajkumar Yaiphata Meitei, Manager, NABARD Imphal; Nirai Singh, LDM CCPur le Jangkhongam Lhungdim, Asst. Branch Manager, SBI Tuibuong hai an ṭhang.

Tunkhopum Baite ruong hung phur mek
CCPUR: Chin Liberation Army (CLA) chief General Tunkhopum Baite ruong tulai hnaia Hmuizawl, Serchhip Sub-Division, Mizoram a inthawk km. 2 vela hlana hmuna hmu le chodawka um chu CCPur tieng hung panpui mek a ni a. Zani hmasa zan khan Suangdoh khuoah a ruong hi riekpui a ni a, zani zan khan Singngat hungtlungpui a nih.


Vawisun hin ZYA HQ inrawinain Tunkhopum Baite ruong hi Singngat khuoa inthawk va sawm ning a ta, Lanva-a Tunkhopum sung hai in tlungpui ning a ta, hi zo hin Panglian khuo panpuiin hi hmuna hin vui ning a tih. General Tunkhopum hi Feb. 5, 1967 a kum 47 mi a ni laia Laldenga hun laia MNF han an that le a ruong umna hriet lova um a ni a. June 17, 2014 khan a ruong ni dinga ring hi hmu le chodawka Aizawl phurtlung a ni hnunga Manipur tieng
hung phur pei a nih.

AIR, CCPur stn. Prog.
CCPUR: Vawisuna AIR, CCPur station-a Paite programme a chun N. Thangminlian le T. Khampu & Party han hla sak an tih. Hmar programme a chun Albert Donald & party le James Joel Joute han hla sak an ta, “Puonchei le insung” ti thupui hmangin short play insuo ning a tih. Thadou programme- ah Manasheh Cultural Troupe han hla sak an ta, NRHM thua Dr Lhingboi interview-na insuo ning a tih.

IMPHAL NEWS:
June 27 a inthawk mi 5 chauin Red Beacon light
IMPHAL: June 27, 2014 a inthawk Manipur-ah VIPs/ VVIPs 5 chauin Red Beacon Light hmang thei tang an tih tiin M. Lakshmikumar Singh, Secretary (Transport), Govt. of Manipur chun Official Order zanikhan an suo. Red Beacon light hmang thei dinghai chu, Governor, Chief Minister, Deputy Chief Minister, Speaker, Manipur Legislative Assembly le Chief Justice, High Court of Manipur hai an nih. Chun, Ambulances, Fire Services le Maintenance le Essential Services han light pawl hmang thei an tih.

Manipur Assembly Budget Session
IMPHAL: Manipur Legislative Assembly Budget Session chu July 19, 2014 a inthawk ṭan ning a tih tiin Secretary, Manipur Legislative Assembly chun thusuok a siem. Sitting umzat ding le thu rel dinghai chu Business Advisory Committee meeting in la rel an tih. Assembly Session hung um ding hi 10th Manipur Legislative Assembly 8th Session-na ding a nih.

Imphal-Mandalay Bus Service
IMPHAL: October, 2014 a inthawk khin Imphal-Mandalay, Myanmar Bus Serivice ṭan a ni el theia hril a nih. Imphal le Mandalay inkar hi Km. 579 a sei, darkar 14 vel tlan ngai a nih. Bus chuongman hi bituk fel a la ninaw a, Rs. 2,000 hnuoi a ni el thei.

NHA in Jiri lampui siemna
IMPHAL: New Delhi-a inzin BJP Manipur President Th. Chaoba Singh le a hnungzuituhai chu Imphal an hungtlung nawk tah. Zanita BJP Manipur Office, Imphal a Th. Chaoba Singh in Chanchinbumihai an hmupuinaa chun, Km. 222 a sei Imphal-Jiribam lampui siemna sin chu National Highway Authority (NHA) in BRO kuta inthawk lain NHA chun siemin mawphurna an lak ta ding a nih tiin a hril. Hi thu hi New Delhi a an inzin sunga Central Ministers 8 an inhmupui a, chu taka an thu mi tiem a nih tiin Th. Chaoba Singh chun a hril.

Form peklut hun suksei
IMPHAL: MOBC hnuoia Academic Session 2013-14 a Pre- Matric Scholarship hni nuomhai ta dingin Application Form peklut thei hun chu August 12, 2014 chena suksei le Application form lak thei hun chu July 31, 2014 chena suksei a nih tiin Director, MOBC chun inhriettirna a siem. Chun, Tribal Development hnuoia Class IX le X inchuklai hai ta ding khawmin Pre-Matric Scholarship hni thei hun lai a nih.

ZUF cadre 1 ralthuom leh man
IMPHAL: June 23, 2014 khan Red Shield Division pawlin Noney Part-IV ah Zeliangrong United Front (ZUF) a Self Styled Captain Benjamin (37) of Noney Part-IV, Tamenglong District chu AK-47 Rifle 1, Magazine 1, a mu 15, Rs. 2,000 leh an man a, Patsoi Police Station-ah an peklut. Chun, 21 Assam Rifles han June 23, 2014 khan Laijangphai area-a dappui an thaw naah .22 Pistol 1, a mu 2, Kenwood Radio set 1 le combat haversack pakhat dapdawkin an man.

Alto Car in mi 1 a baw hliem
IMPHAL: Zani sun dar 11:30 vel khan Noney Part- IV, Tamenglong ah Alto Car in cycle a chuong Lungonglung (64) a baw hliem a, 13 AR Unit Hospital, Noney ah first Aid pek a ni hnungin Imphal tieg panpui le Hospital- a admit a nih. Alto Driver chu Noney Police Station-ah an pe. Tamenglong a inthawka hung Bus le an inpelnaa Alto Car hi a eksiden nia hril a nih.

NATIONAL NEWS:
Mizoram Women Commission Chairman dingin Chawngthu
AIZAWL: Mizorama Congress MLA dinga thlangtling thar Vanlalawmpuii Chawngthu chu Mizoram State Commission for Women (MSCW) Chairman dinga ruot a nih tiin zanita official thusuok chun a hril. Ms Chawngthu hi April 11, 2014 nia Hrangturzo Assembly A/C a byelection nei huna MLA dinga thlangtling a ni a, kum 27 liemta sunga Mizorama nuhmei MLA thlangtlinga umsun a nih. MSCW member in nuhmei professors 3, District Court, Aizawl-a Judge nuhmei pakhat le Congress Mahila leader hai an ṭhang a, an term chu kum 3 ding a nih.

Army le helpawl hai an inkaptuo
HAFLONG: June 23, 2014 khan Dima Hasao District, Assam a Mahur Police Station huop sunga Impoi Village bula 9th Madraj Regiment le helpawlhai an inkaptuo a, thi le hliem ruok chu an um nawh. Inkaptuona hmuna hin AK-56 Rifle 1, a mu 50,Hand Grenade 2 le thilpuokthei ṭhahnemtawk tak hmuin an man.

Bru hai ṭhuoikirna chawlsan hri
AIZAWL: Mizoram Bru, Tripura state-a raltlanhai Mizoram tienga ṭhuoikirna sin a thawk rukna chu chawlsan hri phawt ning a tih. Bru hai ṭhuoikirna chungthua hin Union Home Ministry le Tripura sawrkar hai leh inrawntuo pei ning a tih. Tuta ṭum khan Bru sungkuo 173 a mi 886 ṭhuoikir an nih tiin Mizoram Home Minister R. Lalzirliana chun a hril.

Delhi University VC an ban
NEW DELHI: UGC le Delhi University hai Four Year Undergraduate programme (FYUP) chungthua an buoi lai mekin zanikhan Delhi University Vice Chancellor, Dinesh Singh chu a sina inthawk an ban. Students le teachers hai chun UGC thusuok hi an kal a nih. DU Vice Chancellor inban lei hin HRD Minister Smriti Irani chun zanikhan pro-VC Sudheesh Pachauri kovin DU Vice Chancellor thar ding an ngaituo tlang. DU Vice Chancellor sin chel thei ding hin Umesh Rai, Director South Campus chau a tling(fit) a hril a nih. Hieng laizing hin Pro-VC Sudheesh Pachauri khawm an ban nia hril rik a ni bawk.

President in Chhattisgarh Governor inbanna a pawmpek
NEW DELHI: Zani hmasa khan President Pranab Mukherjee chun Chhattisgarh Governor, Shekhar Dutt inbanna chu a pawm pek ta a, Governor thar ding ruot a ni hmapo chu Madhya Pradesh Governor, Ram Nares Yadav chu Chhattisgarh Governor sin lo chel dinga ti a nih. Narendra Modi PM nina hnuoia NDA sawrkar tharah Governor pathum an inban tah. Dutt hma hin Uttar Pradesh le Uttarakhand
Governor hai an lo inban ta a nih.

Bullet trains intlantir dingin
NEW DELHI: Parliament Budget Session hung um dinga hin NDA sawrkar chun Bullet Trains intlantirna ding bill a phar el thei nia hril a nih. Tuta Rel hai hi darkar khatah 130-150km. an tlan a, Bullet Trains tlan hrat dan dinga riruong chu 300 Kmph a ni ding a nih. Union Railway Minister, Sadanand Gowda chun Pm Narendra Modi Vision a ni leiin Bullet Trains in service tir chu a lunglut hlea hril a nih.

Midnapore-ah Saiin mi 1 a that
JHARGRAM: Zani hmasa khan West Bengal a Midnapore district sunga Pathardoara village-a an in huongsunga tuolpara zal Jogeswar Mullick (47) chu Sai helin a ngawng a manin hnuoi dengnain a hmang a, iengkhawm hril hman lovin a thi niin Anjan Guha, Divisional Forest Officer (DFO), Kharagpur Range chun a hril. Hi lai hmuna hin ram sai an huongintau hle a hril a nih.

Thla khata In hluo man Rs. 16 lakh
NEW DELHI: Rajya Sabha member dinga tlingzo ta lo, Union Law & Telecom Minister hlui Kapil Sibal chun Jor Bagh hmuna thla khata In hluo man Rs. 16 lakh zet (luxurious residence) chu hluo dingin In neitu Siddarth Sareen leh Agreement an ziek der ta nia hril a nih. Hi in/bungalow hi square yard plot 1,250 a lien sunga bawl a nih.

Jamatiya Minister a laklut
AGARTALA: June 23, 2014 khan Raj Bhavan, Agartala hmuna Naresh Chandra Jamatiya chun an Governor, Debananda Konwar hmaah Cabinet minister dinga sesamna a nei. Hi hunsera hin CM Manik Sarkar le a minister- hai an ṭhang. Tripura Commerce& Industries minister Jitendra Chowdhury Tripura East (ST) Constituency a inthawka MP a thlangtling a ni leia minister post hi hung ruok le Jamatiya hi minister a laklut a nih.

Tamil Nadu Ngamantu 11 man
RAMESWARAM: Zanikhan Sri Lanka Navy han Katchatheevu le Neduntheevu inkarah Tamil Nadu Ngamantu 11 an man a, Court hmaah inlangtir an ni hnungin lunginah khum an nih. Sri Lanka tuipuiah dan bawse in nga an man leia an man a ni thu Sri Lanka Navy hai chun an hril.

Khingtu um lovin Nirmala a tling
HYDERABAD: Andhra Pradesh a Rajya Sabha seat khata byelection a chun Union Minister of State for Commerce, Nirmala Sitharaman chu khingtu um lova tlinga puong a nih. Hi seat-a member N. Janardhan Reddy a thi leia byelection hi nei a nih. Nirmala hin kum 2 Rajaya Sabha member ni theina hun a la nei.

Nikum sung Delhi-a motor eksiden leiin mi 1,820 an thi
NEW DELHI: New Delhi a chun nikum (2013) sung khan motor eksiden vawi 7,566 tlungah mi 1,820 an thi a. kum 2008 a inthawk 2013 kum 6 liemta sunga Delhi-a motor eksident leia mihriem thina tuok chu 12,300 an tling phak niin Centre for Science and Environment(CSE) in report an peka chun an zieklang. Eksiden tam zuolna deu hai chu Dhaula Kuan, AIIMS, Sarita Vihar, Mahipalpur, Rajokri, ITO/IP le Moti Bagh hai an nih tiin CSE report chun a hril. Kum 2012 khan Mumbai hmuna eksiden vawi 25,000 a tlung a, sienkhawm mihriem thina tuok chu 500 chau an nih. Delhia eksiden tamna tak chu lampui ṭhat leia motor hai an tlanhrat taluo lei a nih tiin traffic experts hai chun an hril.

Saddam Hussain khai hlum dinga Order insuotu khai hlum
BAGHDAD: Iraq President hlui Saddam Hussein khai hlum dinga Order insuotu Judge Raouf Abdul Rahman chu Islamic state of Iraq and Syria (ISIS) pawlin an man a, an khai hlum niin Facebook tum tum haiah zieklang a nih tiin Daily Mail, New York post le News websites han an zieklang. Judge Raouf Abdul Rahman hi June 16, 2014 a man le June 18, 2014a khai hlum nia hril a nih.

VAWISUN THUPUI
Tangka ngainatu chu tangkaah lungawi naw nih a; hausakna ngainatu khawm hlawknaa chun lungawi bawk naw nih: hi khawm hi teplo el a nih. - Thuhriltu 5:10

EDITORIAL

Thil man kaisang

Manipur chau ni lovin India ram pumpuiah thil man kaisangna chun zieum tieng pan nekin a la kaisang pei leiin mipui ta ding chun a beidawngthlak hle. Tulaia Vai rama Purunsen Kg. 1 ah Rs. 20-30 a zawra um chu October thlaa chun Kg. 1 ah Rs. 100 a hung kai phak ring a ni thu thil chinchang hrie le thil sui mihai chun an hril. Manipur a khawm thil manin kaisang tieng a la pan zing bawk. A bikin nitina fakfawm zawng le inhlawfahai ta ding chun a beidawngthlak zuol bik. Sawrkar hlak chun thil man kaisang hi thunun a tum chuong naw a, mipui ta dinga vangduoina rapthlak takel a nih. Mipuihai ṭhangruola thil man kaisang hi ei sawrkarin a ngaisak theina dinga nawrpui ei insuo a ṭul ta niin an lang.

Narendra Modi PM nina hnuoia NDA sawrkar a hung um a, mipui han beiseina nasa tak an nei laizing le budget session ṭan hmaa Rel chuonhgman le thil phur man NDA in an kaisangtir hin Political party tum tum hai chau ni lovin mipui sawisel a hlaw hle. 16th Lok Sabha election huna BJP Slogan chu “Achche Din Aane Wale Hain (Good times are ahead)” ti a nih. Amiruokchu an election slogan leh an hmalak dan hi an mil naw hle. Centre-a BJP sawrkar hi iem a hung ang pei ding chu maw?

July 7, 2014 a inthawk Parliament Budget session hung um a ta, July 8, 2014 in Union Railway Budget 2014-15; July 9, 2014 in Economic Survey le July 10, 2014 in Union Budget, 2014-15 Parliament-ah phar hung ning a ta, Union Budget a hin thil man iemanizat chu a hung kaisang ngei ring a um a, chuong thilhai chu ieng ieng am ning an ta ti chu mipu han huphur deuin an lo thlir ṭhup a nih. BJP in hun ṭha annawleh thilṭha a la hungtlung ding a nih an ti hi
iem ni tang a ta?

Union Budget parliament a phar ding hi mi naran hai nekin sumdawng hausa han nasa takin an lo tung a, an thil neihai khawm wholesale a zawr zung zung chu an nuom naw lai tak a ni ngei ring a um. Union Budget a thil man kaisanghai hrim hrim kha a rate hlui a zawr ta lovin a rate thara an zawr hlak leiin Union Budget hi Vai sumdawng hausa le lien hai chun nasa takin an lo tung hlak a nih. An ta ding chun hlawkna le malsawmna intluntu a nih. Mi pasie le riengvaihai ta ding ruok chun beidawngna le harsatna
intluntu a ni lem hlak.

Union Budget Parliament a phar a ni pha chun Cigarettes man, Chini man, nuomtawlna thil chi tum tum hai man a kaisang ring a um. Mihriem hringna le hriselna dinga ṭul le pawimaw tak ni lo hai hi chu a man a lo kaisang khawma hrietthiem a um. Amiruokchu, mihriem ta dinga lo thei lova pawimaw le ṭul, bu le hme, damdawi le thil dang dang man hai hi chu kaisang naw sienla nuom a um.

BJP sawrkar a hung inlal a, Hindi ṭawng official ṭawnga hmang ding ti an hung puong el khawm hi India mipui, Hindi ṭawng hmang lo, hre lo le thiemnaw hai ta ding chun tuornat um takel a nih. Hindi ṭawng hi a pawimaw naw ni lovin a pawimaw a, thiem le hriet ding a ni laizingin inbarlui ruok hi chu thaw chi niin an lang nawh. Centre a sawrkarna cheltuhai hi an puitling le lungril lien takel an put a; an thilthawna haiah an fimkhur hle a ṭul a nih.
Don't Miss
© all rights reserved
made with by Simon L Infimate