Responsive Ad Slot

Hmasawnna Thar | June 24, 2014

Tuesday, June 24, 2014

/ Published by Simon L Infimate
HEADLINES:

Parliament Budget Session July 7-Aug. 14 chen nei ding:
Union Budget July 10 le Railway Budget July 8 haia phar ding
NEW DELHI: Cabinet Committee on Parliamentary Affairs Committee Meeting chu zanikhan Union Home
Minister Rajnath Singh inrawina hnuoiah Union Parliamentary Affairs Minister, M.Venkaiah Naidu Office pindan, Parliament Houseah nei a nih. Hi Committee meeting chun Parliament Budget Session chu July 7, 2014 a inthawk August 14, 2014 inkar sung nei dingin an rel. Thla khat neka sei Parliament Budget Session nei dinga hin Sittings 28 um a tih tiin official thusuok chun a hril. Narendra Modi Prime Minister nina hnuoia NDA sawrkar a Union Budget/ General Budget, 2014-15 chu July 10, 2014; Railway Budget, 2014-2015 chu July 8, 2014 haiah Parliament-ah putlut ning an ta, Economic Survey chu July 9, 2014 in Parliament-ah phar ning a tih tiin official thusuok chun a hril. Cabinet Committee on Parliamentary Affairs (CCPA) chun Ordinances Bill a inlettir ding hai lai SC/ ST Preven tion of Atrocities (Amendment) Ordinance, Polavaram Project, TRAI Act (Amendment) Ordinance le SEBI qhangsa dingin an rel. Hieng Ordinances hai hi July haptakar thumna hmaa bills a inlettir tum an nih tiin Official thusuok chun a hril. Parliament hmasain Vote-on-Account a lo pawm ta chu July 31, 2014 in a tawp ta ding a ni leiin a hun tawp tlung hma ngeia Budget thar hi phar a qul a nih. M. Venkaiah Naidu chun tuta hma khan Parliament Session sungin Lok Sabha Deputy Speaker thlang a ni ding thu a lo hrillang ta bakah Lok Sabha Speaker Sumitra Mahajan chun Budget Session hmain Lok Sabha a Opposition Leader ding sukfel ning a tih tiin a lo hril ta bawk. Budget Session a hin sawrkarna cheltua qhang lo political party tum tum hai chun Rail Budget phar hmaa Rel chuongman le thil phur man sukpung a ni thu hai nasa taka an sawisel le khekpui ring a nih.

VDF hai barrack ding DC in a hawng

CCPUR: Mr K. Kabib, IPS, SP, CCPur hmalaknaa CCPur District Police Head Quarter (SP Office), Complex sunga Barrack bawl zo a um chu zani 10:30AM khan Pu P.K. Jha, IAS, DC, CCPur chun a hawng. Barrack hawngna huna hin K. Kabib, IPS, SP, CCPur; H. Balram Singh, MPS, Addl. SP, CCPur le CCPur Districta Police Officers hai an qhang. Barrack bawla um hi VDF personnel DHQ a reserved line-a sie hai umna ding bik deua bawl niin VDF personnel han Mr M. Pradip Singh, IPS, SDPO, CCPur enkaina hnuoia an bawl a nih.

Zu fun 40 dapdawkin an bunthlak

CCPUR: D. Phailian Women Welfare Association chun zani zing dar 8:00AM vel khan Phailian Compound veng-a Mrs Naotombi In an dap a, Zu polythene a infun fun 40 zet dapdawkin an man a, zani ma khan Phailian bazar-ah an Zu man hai hi an bunthlak pek vawng. Naotombi hi Phailian suoksan dinga intiemkamtir a ni a, hi lei hin zani ma khan Phailian a suoksan niin ei thu dawngna chun a hril.

LOCAL NEWS:
In kangah Rs. 65 lakh manhu a kangral
CCPUR: June 22, 2014 sun dar 11:30 vel khan Bijang field thlang lai meta Hatkholam Haokip w/o (L) Jangngam Haokip chengna in Gibeon Cottage-ah kangmei nasa tak a suok a, kangmei ṭhelnaa ṭhang


Jangginthang (27) s/o Thongsei of B.Aijalon chu a hliem leiin District Hospital- ah admit a ni a, kangmei suokin thil a kangsiet hi Rs.65 lakh manhu vel ni dinga hisap a nih. Kangmei suok hriet a ni charin mipui le Fire Brigade han an ṭhelhrawn a, sienkhawm an ṭhelmit zonaw leiin Army le PHED hai tui supply hmangin darkar 2 sung zet an ṭhel hnungin kangmei suok hi ṭhelmit a nih. Kangmei suok inṭanna tak hriet chieng ninaw sienkhawm electri a inṭan ni dinga ring a nih. Saikawt A/C MLA Pu T.N. Haokip le Pu Langkhanpau Guite, Chairman, ADCC han zanikhan kangmei suokna hmun hi a hmuna fein an va enfel.

Farmers Awareness Camp nei
CCPUR: Agriculture Department, CCPur chun zani 10AM khan Thingkangphai khuoah Rashtriya Krishi Vikash Yojhna (RKVY) Scheme 2013-14 hnuoia Farmers Awareness programme an huoihawt. Programme hi R.K. Dorenchand, Agriculture Officer, CCPur in a hawng a, K. Ranju Singh, EO, Agri Dept. le Kh. Ajit Singh, Plant Pathologist, Agri hai chu resource person in an qhang. R.K. Dorenchand chun, khawvel hmasawn le danglam pei le inzawmin technology thar thar a hung suok pei a. Thlai tamlem thar suok a hung ni theina dingin ei lo nei le thlaiching dan, thlai ei ching hai khawm sukdanglam le thleng pei a qul a nih tiin a hril. CCPur District-a loneituhai hmang ding tuta kar sung hin hnuoiqhatna (Urea) Truck 2 hungtlung a ta, sawrkar rate in loneituhai kuoma zawr ning a ta, a dang khawm la hung tlung pei a tih tiin a hril bawk.

MNF hun laia lo tuor hai ta dingin
CCPUR: Kum 1966-1986 inkar sunga Mizo National Front (MNF) hun laia Indian Army le Organisation dang dang haia inthawk buoina, thina, ruolbanlo raka hliemna tuor, in le lo, khuo le tui suksiet pek/rawpeka lo um hai bakah MNF cadres a lo qhang hai, kut lo tuor palhai hming, pa hming, date of birth/age, an tuorna hmun, a hun le ni le thla hai fel taka ziekin June 30, 2014 chen ZoRO Northern Zone, Sub-Commitee on Victims of MNF Regime ah pelut dinga inhriettir an nih.Tuibuong-ah office hawng a ni ta bawk. Chu chieng hre nuom han Pu Lienhmingthang Varte, Sielmat Phone No. 8974615336 ah chanchin indawn le a kuoma peklut thei ni bawk a tih. Ṭhangpuina sum hmu theina ding thil a nih.

CJM in Bail in an suo ve ve
CCPUR: June 18, 2014 nia New Lamka a Saulim Book Barn tuol laia Rechargeable Dianamo ṭhalo dehawna bomb a nih tia mipui sukthlabartu mana um Thangthianmuan (20) s/o Hauzachin of Colony Veng Bungmual le Kamkhankhup Thomte (24) s/o Dalzachin of Joar Veng, Bungmual hai chu zanikhan Chief Judicial Magistrate (CJM) CCPur hmaah inlangtir nawk an ni a, CJM chun Bail-in an suo ve ve.

Candidates 572 an exam
CCPUR: Zani hmasaa SSC huoihawtnaa SI le ASI lakna dinga All India Competitive exam neia chun CCPur District centre-a candidates 781 um hai lai 572 an exam a, 209 an absent.

AIR, CCPur stn. Prog.
CCPUR: Vawisuna AIR, CCPur station-a Paite programme a chun Ngulzachin & party in hla san an ta, ‘Dittatna ah pua khan zilni’ ti thupui hmangin S. Vungsing in thu hril a tih. Hmar programme a chun Lalrawngbawla Ralte le Thanglienzo han hla sak an ta, ‘Safe Water for Drinking’ ti thupui hmanga Short Play (HSA Rengkai Unit) insuo ning a tih. Thadou programme a chun Vahjaneng & party han hla sak an ta, Ṭhalai programme um a tih.

IMPHAL NEWS:
Imphal-Mandalay Chartered Flight
IMPHAL: Tuilihal Airport, Imphal-a Ground Works ṭhenkhat zo fel a la ninaw leiin June 27, 2014 a inthawka Imphal-Mandalay Chartered Flight service dinga ti chu ṭhul nawk a ni a, a service hun ding puong nawk a la ni nawh.

Nupui pakhat a thisaa hmu
IMPHAL: Zani zingkar dar 7:30 vel khan Pheiza Primary School, Hatta Golapati, Porompat Police station ah nupui pakhat a thisaa hmu a nih. Police in mithiruong hi an va lak a, a taksa, a sil le fen hai an enfelnaah Wallet an hmu a, Wallet sungah Adhar Card, Voter ID le ATM Cards 2 an hmu. A nabehai a bo ve ve a, mithiruong hi JNIMS Morgue-ah sie a nih.

Silchar Track June 25-ah
IMPHAL: Manipur Mountaineering and Trekking Association (MMTA) chun June 25, 2014 khin Indopui pahnina champha vawi 70 na le hi hrietzingnain Silchar Track 7AM a inthawk thaw an an ta, MMI Complex ah hungkirin 1PM ah ruoi kiltlang an tih.

Lions Club in 47th Charter Night
IMPHAL: Zanikhan Hotel Tampha, North AOC, Imphal-ah Lions Club of Imphal (LCI) chun Lions Club 47th Charter Night an hmang a, Gaikhangam, Deputy Chief Minister khuollienin a ṭhang.

Rickshaw Driver a thisaa hmu
IMPHAL: June 22, 2014 a inthawka a umna hriet lova inhmang Rickshaw Driver Keisham Rame (55) s/o (L) Sanjou of Kyamngei Maning Leikai,Imphal chu zani zingkar khan a thisain Leishang Hiden, Irilbung Police Station huop sungah hmu a nih.

Rangkachak Kg. 2 leh man a nih
IMPHAL: June 20, 2014 , 3PM vel khan Dimapurpana fe Van pakhat chu NRL Petrol Pump bul, Luwangsangbam, NH-2 ah Customs, Imphal Division han sukchawlin an dap a, rangkachak (Gold Biscuits 12) Kg. 2, Rs. 50 lakh manhu leh an man. Hi le inzawmhin R.K. Swami
of Sagolband chu case siem khum a nih.

Hmar Retired Officers Club indin
IMPHAL: June 21, 2014 khan Prof. L. Fimate In, Imphal, Langol hmuna Hmar Retired Officers iemanizat fekhawmin ‘Hmar Retired Officers’ Club’ indin remti a ni angin Convener Dr L.Fimate in Bye Laws le constitution a lo draft khawm entlangna nei a ni a, thleng ṭul hai thleng a ni hnungin hma hung lazawmtu dingin mi pali Upa Dr L. Fimate, Darsiemlien Ruolngul, Joseph Lalrothang le Laldatlien hai ruot an ni a. Recording secretary in F. Doliensung ruot a ni bawk. Observer/ special invitee in Timothy Z. Zote, Editor Manmasi Digest a ṭhang. Zantieng Dr L. Fimate hai sungkuo in ruoi an buotsai chu hlim takin an kiltlang.

NATIONAL NEWS:
Governors 2 in inban an nuom
NEW DELHI: Nagaland Governor Dr Ashwini Kumar (65) le West Bengal Governor, M.K. Narayanan (80) hai chun inban an nuom le inpei thu sawrkar thlungpui an inhriettir niin ei thu dawngna chun a hril. An ni pahni hi IPS Officer pension ve ve an nih.

Tripura-ah Malaria leia thi mi 41 
AGARTALA: Tripura State a Dhalai, Gomti, Khowai, North Tripura le South Tripura District haiah Malaria natna hri nasa takin an leng a, naupang 31 ṭhangsain mi 41 an thi ta a, Damnaw 22,000 thisen test a ni ta a, hienghai laia 3,215 chun Malaria natna an invawi ti hmu le hrietsuok a nih tiin Tripura Health Minister, Badal Chaudhury chun a hril. Unofficial thusuok chun mithi hi 60 le damnaw mi 3,000 an tling tiin a hril.

UGC in FYUP hmang lo dingin DU
NEW DELHI: Tuta Academic session a inthawk University Grants Commission (UGC) chun Delhi University le a hnuoia Colleges um 63 hai chu Four Year Under Graduate programme-ah student-hai admission thaw lo le FYUP hmang lova Three Year programme ah admission thaw dingin an hriettir. Undergraduate programme a admission chu vawisun hin ṭan dinga ti a nih. Amiruokchu, hienganga buoina um lei hin Academic Session 2014-15 admission vawisuna inthawk ṭan dinga ti chu Delhi University chun thil sukfel a ni hma pova dingin admission thaw hun ding hi a la ṭhul hri thu zanikhan a puong.

Sungkuo pakhatah doctors 31
JAIPUR: Tulai hnai ela RPMT a MBBS/BDS inchuk dinghai thlangnaa khan Jaipur a cheng Vinamriti Patni chu a hlawtling ve a, India ram pumpui huopin ranks 107-na a nih. MBBS an chuk zo pha chun an sungkuoa Doctors 31-na ding a nih. A rang, a ni, a unau hai chu Doctor an lo ni seng ta a, hienghai lai hin Physicians 7, Gynaecologists 5, Opthalmologist 3, ENT Specialist 3, Neurologist, Urologists, Surgeons, Psychiatrics, Pathologists le Orthopedic doctors hai an um.

NSCN(K) cadres 4 man an nih
KOHIMA: 19 Assam Rifles han June 20, 2014 zana PR Hills a dappui an thawnaah NSCN(K) cadre 3 hai chu Italy siem Pistol 1 le magazine 2, tuolsuok Pistol 1 le magazine 2, .22 Pistol 1, a mu 22 le magazine 1, bullet proof Jacket pakhat le sum ngenna lekha leh an man. Chun, hi zan ma hin Mohonkhola hmuna dappui an thawnaah US siem .22 Semi Automatic Rifle 1, magazine 1, silaimu 500 le Detonators 33 leh an man.

Maoist 6 an inpe
KORAPUT: Zani hmasa khan Odisha state a Koraput district-ah nuhmei pahni ṭhangsain Maoist helpawl 6 hai chu Police kuta an inpe. Inpe hai laia Pramila Wadeka chu sawrkarin luman Rs. 1,00,000 neia a lo puong ta sa a nih tiin Awinash Kumar, SP, Koraput chun a hril.

UPLA 1 kap hlum a nih
DIPHU: Zani zingkar khan Hanse Basti, Diphu area, Kari Anglong ah Police le United Peoples Liberation Army (UPLA) hai an inkaptuo a, UPLA Commander Rajib Inleng kap hlum a ni bakah Police constable Gautam Kuch na taka kap hliem a nih. Kap hluma um kuta inthawk AK- 47 Rifle 1 le a mu iemanizat hmu le man a nih tiin Mukdha Jyoti Mahanta, SP, Karbi Anglong chun a hril.

Dr Sanjay in World Food Prize, 2014
NEW DELHI: Indian Agriculture Scientist Dr Sanjay Rajaram chun World Food Prize, 2014 a dawng. Hi Award a hin pawisafai US dollar 250,000 a ṭhangsa. Rajaram hi Mexican khuo le tui nina nei ta, Wheat chi siemsuoktu a ni a, Father of Green Revolution tia ko Dr Norman Borlaug leh Wheat chi hran hran 480 zet an siemsuoka nih.

Uttarakhand CM hospital-ah enkawl
NEW DELHI: Uttarakhand Chief Minister, Harish Rawat chu a ringah hliemna a tuok leiin AIIMS, New Delhi-ah enkawl mek a ni a, Doctors han thla khat sung bed rest dingin thurawn an pek. Hospital a inthawk Assembly byelection ah ngir a tum. Dharchula A/C le Doiwala A/C haiah Harish Rawat hi a ngir el theia hril a nih. CM chel pei a la tum chun MLA a ni a ṭul a nih.

Mi 3 rangkachak 7.5 kg leh man
CHENNAI: June 22, 2014 zan dar 10:30 vel khan Chennai Airport-ah Indigo Flight a Guwahati a inthawk Chennai hung vuong lut passenger pathum, Thameem, Ansari, Basheer le Mohammed hai chu rangkachak 7.5 kg leh Custom han an man. A tlangpuiin rangkachak hi Sri Lanka, Dubai le Singapore haia inthawk a ruka hung phurlut hlak a ni a, tuta ṭuma mi ruok hi chu Guwahati a inthawk Chennai pana fe haia inthawk rangkachak hi mana um a nih tiin DRI thusuok chun a hril.

LeT Commander kap hlum
SRINAGAR: Zanita Jammu & Kashmir a Baramullah District, Kashmir a Sopore Area sunga Security Forces le helpawlhai an inkaptuonaah Pakistan mi Lashkar-e- Toiba commander Mehmood Bhai kap hlum a nih.

AP in thawktu hai pension hun kum 60 in
HYDERABAD: Andhra Pradesh Assembly chun zanikhan AP Public Employment(Regulation of Age of Superannuation) Act 1984 lungruol takin an passed. Hi bill dungzui hin a state sunga sawrkar thawktu hai pension hun kum 58 ni hlak chu kum 60 a hung nita ding a nih. Hi bill hi CM N. Chandrababu Naidu in a putlut hnunga member han lungruol taka an passed a nih. World Health Organisation (WHO) dungzuiin India lifeexpectancy rate chu kum 65 a ni a, Central Govt. thawktu hai pension hun khawm kum 1998 khan 58 a inthawk 60yrs a suksei a nih tiin a hril.

J&K ah ralthuom tam tak man
JAMMU: June 22, 2014 khan Army han Jammu & Kashmir a Kistwar district a Keshwar Foresh belt ah dappui an thaw a, ralthuom tam tak dapdawkin an man. Ralthuom an man hai lai RDX Kg. 60, Russia siem thilpuokthei Kg. 1, tu siem am ti hrietlo thilpuokthei kg. 2, AK series Rifle 1, Plain Rifle 1, 12 bore Rifles 3, Pistol 2, Hand Grenades 43, Rocket Projectile Grenades (RPG) 3, Detonators 40, UBGL Grenades 10 le Explosives devices 104 a a ṭhang.

Central Observer Guwahati a hungtlung
GUWAHATI: Taraun Gogoi CM nina hnuoia Assam Congress Ministry buoina le inzawmin AICC chun Central Observer in Senior Congress leader Mallikarjun Kharge a hungtir a, Guwahati a hungtlung ta a, zani zantieng khan Congress MLAsle PCC Office bearers hai an hmupui a, an ngaidan hai a lakkhawm. A thil hmu dan hai Congress High Command kuoma report peng a tih. CM, Tarun Gogoi chu thlakthleng ni el theia hril a nih.

Regional Director, DRDO sun hliem
HYDERABAD: June 22, 2014 ni khan Charminar area, mi tamna hmuna pickpocketer pakhatin R.K. Satpathy, Regional Director, Defence Research and Development (DRDO) Koraput chu a sun hliem leiin Hospital panpui a nih. A hliemna hi an rik nawh tiin Police chun an hril. Mi sunhliemtu hi a tlan hmang leiin Police han an zawng mek.

Ruo sur nasat leiin mi 26 an thi
BEIJING: Tulai hin China rama Fujian, Jiangxi, Hubei, Hunan, Sichuan, Yunnan le Guizhou provinces haia ruo nasa taka a sur leiin mi 4.9 million in harsatna an tuok pha a, mi 26 in thina an tuok a, mi 3 an inhmang a, In 8,700 a sukthluk a, In 66,000 a suksiet bakah Bu le bal hectres 42,200 a mi a suksiet a, thil a suksiet hi USD 653 million manhu vel ning a tih tiin Xinhua news chun a hril.

VAWISUN THUPUI
Thil ṭha thaw dinga Isu Kristaa chun siema umin, ama kut suok ei ni sih a, chu thil ṭha thaw chu ei umna dingin Pathienin a buotsai lâwk a nih. - Sâm 59:17

EDITORIAL
Naupang hmakhuo

Ram changkang taphawtin naupang hmakhuo an ngaisak hlak. Children Centre lien tak tak an indin a, chu taka chun naupang hai puolin Library dam, museum dam, Art Gallery dam, lem changna dam, lam inchukna dam, inhnelna le inkhelna hmangruo chi tum tum dam an sie hlak. An lungril le an taksa sukṭhanglien a, suk hmasawn thei ding thil chi hran hran an buotsai hmasa pek hlak. Naupang ei ngaisak dan le ei enkawl dan hin hmatieng huna ram um dan ding a hril sei em em a, chuleiin India sawrkar khawmin a ngaipawimaw a, sum seng a rin nawh. Naupang an ṭha chun insung an hawiin sungkuo ṭha a hung ni a, chuongang peiin khawtlang, kohran, hnam le ram ta ding khawma a hung ṭha hlak.

Ei ram ṭhuoituhai le chinchang hre lema ngaihai hin, inchuklai naupanghai hi nakie tienga ei ram le hnam, ei insung, ei khawtlang le kohran ṭhuoitu dinghai an la ni thu hi an mi hril rawp a, indik khawm an dik vieu a, sienkhawm a thu ringawtah hin ei dittawk hlak a, nakie tienga ei ram le hnam ṭhuoitu ding sersuokna kawngah ei tha ei inthlada nawk hlak si niin an lang. Chuleiin, tuta nekin naupanghai ngaisakna tieng hi uor zuol inla nuom a um. Inchukna sikulah naupang ei inkaitir a, zirtirtu han thu ṭha tinreng an inba a, an inchuklaibi thiem dingin an inchuktir a, hi ringawt hi chu a huntawk nawh. Lungril le taksa hrisel ei pek am ti hi ngun taka sut a hun ta khawp el. Chu khelah Naupanghai sikul hmasa tak chu insung a ni a, nu le pa hai mawphurna hi a lienin an sang em em el a nih. Nu le pa ṭha, fel le taima, nauhai inchuk le entawntlaka um hi a pawimaw hle. Nu le pa hai ei nauhai entawntlakin ei um am?

India sawrkar chun lekha inchuk dan system a hung thlakthleng pei a, hmatieng peia khawm a hung thlakthleng pei ding a nih. Ram le hnamin hma a hung sawn a, ram a hung inṭhanglien pei chun lekha inchuk dan chau ni lovin lungril, nundan, chet dan le khawsak dan hai khawm thlakthleng pei a ṭul a nih. Tulaia lekha inchuklai han thiemna thlungpui indik tak an nei theina ding chun training zo sa Zirtirtu a ṭulin ei mamaw bek bek el ta a nih. Chuleiin, zirtirtuhai hi an intuoi thar a, training hi an rin ding a ni nawh. Zirtirtu training ṭha taka neinaw hai ta ding chun tulai inchuklaihai subject-hai hi sapṭawng thiem ringawta hril thei chi a ni ta meu naw a, zirtirtuhai hi an intat ngei fet a ṭul ta a nih.

Zohnathlakhai hin naupanghai hi tuta hmaa ei pi le puhai huna inthawk ta khan mihriem tling lo ang hrimin ei lo ngaiin ei lo enkawl hlak a. Kha fe dan kha nasa takin a danglam ta. Sienkhawm, tuchen khawm hin naupanghai pawimawna hi ei la hrietthiem phak tak tak ngai nawh. An hung inṭhanglien a, an hung puitling hnunga hlak an lakah beiseina ei suksang nawk ang lawi si a, hi hi ei thawfuknawna pakhat a nih.

Sungkuoah nisien, khawtlangah nisien, ramah nisien, an ninaw hi chu tir ding dang ei nei si naw a, chuong laizing chun ei nakie tieng huna ei innghatna ding tak hai hi ngaitha takah ei nei nawk si, ei inbi chieng a hun ta hle. Naupang hi var tak, thil hrie thei le hrie sawt em em an ni a, ei thawpek thei naw ding le ei inchawk pek thei naw ding thil hrim hrim inchaw pek ka che, thaw pek ka che ti ngailo ding a nih. An lungril ei suknain ei sukhliempha hlak a nih ti hriet tlat ding a nih.

Don't Miss
© all rights reserved
made with by Simon L Infimate