Responsive Ad Slot

Shelly Lubben;Pornstar a inthawk in Pathien rawngbawltu ah

Sunday, May 4, 2014

/ Published by VIRTHLI
By Nathanael Neingaite

A chanchin le a rawngbawlna ei hril tum tak Shelley Lubben hi, sex film siemtu ni sienkhawm, nu ropui tak , Pathien a piengtharna țhatak nei niin, porn film siemtu mi danghai kuomah rawngbawl in, hi suol a inthawk a in awk laklaw , tlansuokna chang hretalo; nun beidawngtaka um hai kuomah sansuokna sin thawtu ani na hi inpak a um in ngaisang a um hle anih.


Shelly Lubben
PIENG LE MÛRNA:
Shelley Lubben hi may 18, 1968 khan Pasadena, California-ah a pieng a. Kristien sungkuo pangngai le Biek In ngaina mi tak an ni a. Kristien sungkuo țha tak a um a ni laiin a Nu le Pa sinthawna leiin hmun/khuo dang a insawn a hung țul ta a , chuong a hmun/khaw dang a insawn an nilei le a Nu le Pa sinthawna lei chun biekin kai inthladana a hung nei pha ta a. Biek In an thlada na leiin Shelley hai sungkuo chun TV an en nasa thei em em a. TV in an sungkuo chu a nghawr nasa thei khawp el. Shelley khawm chu primary school an chuklaiin TV-a chun an lang ve nghe nghe anih. Chuong ang a nitin nun a hmang zing laiin, naupang ditum tak Shelley chu kum 9 mi chau ani in Tlangval pakhat in vangduoi thlak takin a pawngsuol (rape) hlau el ta a….! a rapthlak ngei!!. Chu thil chun Shelley nun chu beidawng tak in aum țan ta a. Tulai a taksa le thlarau in enkawlna țha chu a dawng ngai ta si nawh, lungngai ngawi ngawiin mal rieu a inngaina a nei ta leiin sex hmang chakna le tlangval ngaina chang a hung nei țan ta anih.


HRINGNUN HMATIENG:
Shelley chu a hung inṭhanglien pei a, tleirawl nun hung hrein a lungril putzie a hung danglam a , kum 16 mi chau a ni laiin playboy playmate hai inthuomna/incheina hai chu ngaina in, Zu le Damdawi thaw țan in a um ta bawk anih.

Shelley thil nuom zawng a inthawk in a sung ha’n buoipui/law ngaina an hriet ta naw leiin kum 18 a niin insunga in thawkin hnawt suok/dawk in a um ta a. Invai taka insung a inthawk a suok ani hnung in San Fernando hotel ah fak le dawn zawng dingin a pan tawp el ta a. Invai taka um ani leiin pasal 1(pakhat) in ama kuoma um ding’n a fiel a, sex hmang pui ding in a fiel sa bawk anih. In a in thawk a hnawt suok/dawk ani leiin pawisakna hrim neita lo in, a vawikhatna a ding in Dollar 35 in an zawr țan ta anih.
Shelley’n nawchizawr nun chu hmang ţan in, thil tam tak le thil rapthlak tak nawchizawr hai I tawng/tuok hlak thil chu Shelley’n a tawng/tuok ve ta a. Nisienlakhawm, pawisa hmu na’n ahmang leiin chu sin chu sunzawm pei in a um ta lem anih. Hi khawvel inhawi chenna thil a chun in hnam hnawi sienkhawm, hlimna nek in beidawngna in a sip lem a. “Hieng anga nun ka hmang laiin, ka naupang lai a ka ngai ve em em hlak Isu Krista chun ka lungril a hung kik hlak a, sienkhawm ka hriet der nawh, Pathien chun ami ngaisak naw ni a ka hriet leiin ka dam khawsuok theina dingin a ṭha le ṭhanaw khawm thlier lovin ka thei ang ang ka thaw el hlak” tiin Shelley’n a nun alo hmang dan hai a hril. Nawchizawr-a sum a lam laiin pawngsuol le sawisak a tuok nasa thei hle, asum hmu ang ang chun Zu le Damdawi inchawk na’n a hmangral pei leiin nawchizawr nun chu bansan in porn industry tieng an herliem lem ta a. Kum 24 a ni in sex film a siem țan a, kum 1993-94 khan film 30(sawmthum) chuong zet asiem hman anih. Shelley’n sex a hmang kuol nasat leiin sex a inthawka in kaisawng thei natna HERPES le HUMAN PAPILLONA VIRUS (HPV) a kai a. Chu thil chun a lungril suk beidawng in, Zu le Damdawi ruok chu an thla thei si nawh. HERPES natna an vei a inthawk in Porn Industry chu an kiengsan ta anih.

SANSUOKNA:
Kum 1994 khan Tlangval fel tak Garret leh an in hmu țan a , Garret chun inleng dingin a fiel a, Shelley in a fielna chu hnawl elloin an in zui suok a, ruol țhatak hung niin an um ta a. Garret hi kristien enkawlna a seilien , kristien sikul a kai , piengtharna țha tak nei mi ani a. Garret chun “ I nun a inthawk in sansuok I nuom am?” tiin Shelley chu an dawn a. Shelley chun,”Aw, ka nuom.” tiin a dawna, chutaka inthawk chun Garret țhangpui na zarin Shelley chun Zu le Damdawi chu bansan in nunthar neiin piengtharna țha tak el a hung ni pha ta a. Chuonga hun a hung fe pei chun Shelley le Garret chu February Ni 14 , Kum 1995 khan an innei ta anih. Hi an innei ni hi ṭhalai haiin an inser em em el, ‘Hmangaihai Ni’ tia hril Valentines Day anih.
Shelley le Garret chu harsatna an tuok nasa hle. Nisienlakhawm chungtieng an en tlat leiin kohran an bel a, Tascoma, Washington Champion Centre kohran ah chun theitawp a in hmang in an um a. Hieng hun lai hin Shelley chun, “Pathien in ka suolhai po po a ngaidam vawng ti ka hriet ta a, mithar ka ni tah. Pathien chun ka nun hlui hai popo theinghil in tawp chin neiloin a mi hmangai a, ka hmatieng hun ding a lo buotsai nasa hle hi a lo ni lem,” tiin a hril. Shelley’n nun thar a nei hnung in Web Designing an chuk a, College kai țan in Pathien thu Theology le Counseling tieng Bachelor Degree a lak bawk anih. Kum 8 hnung ah nawchizawr sal a intang Champion Centre beltu chu Champion Centre rawngbawltu pawimaw tak a hung ni ta a. Pathien chun Zu le Damdawi ngawl an vawina, lungril nuor ngawi ngawia a umna , sex ngawl an veina le inzakpui umtaka nun a hmangna a inthawk in a sansuok a, ama ang a tuor/intang mêk hai tading a sansuok rawngbawlna sin chu a țan ta a. Ringum tak le in pezo takin sin athaw leiin, athilthaw na kawng a chun anhnik hle anih.

PINK CROSS FOUNDATION:
A naupang lai Shelley’n Pathien thu hriltu chak hlak sienkhawm ,a nun a vangduoina tam tak a tuokna leiin sandamtu Pathien chu theinghil in a um a, vangneithlak takin Pathien’n Garret chu Shelley kuoma chun zawlnei ang a hmangin Shelley chu suol khura in awk mêk ani lai in sansuok in a um a. Tu ruok hin chu Shelley’n bachelor degree nei in, thil atuok hai le Pathien in a sansuok dan thu hril thei in a um anih. Chuongchun, kum 2005 khan internet-a Social Networking Site hmangin harsatna tam tak tuok mêk hai ,sex industry a in tang mêk hai sansuokna sin chu thaw țan in, kum 2008 khan pawl pakhat PINK CROSS FOUNDATION an din bawk anih. Hi Pink Cross Foundation thiltum tak chu Sex Industry a changtu(pornstar) hai beidawng taka nun an hmangna a in thawka sansuokna sin chu anih. Hi sin fe puitu ding in donation lak khawm a ni a, chu donation a thil lak khawm hai chu hmang țangkai in pornstar hai chu thil pek inhlan an ni hlak bawk, chu thil pek hai chu Bible, Pathien thu ziekna lekhabu, Gospel Music CD(Compact Disk) , Ditsakna Card le an harsatna hai in thlun theina dingin lekhate thun sa in le țawngțai na’n an san bawk hlak anih. Chun website www.pinkcross.org fethlengin sex film(porn movie) en hlak mi tamtak hai kuomah pornstar hai ngirhmun in diktak el lungsiet an um na le țhangpui an ngai thu hril hlak a ni a. Pornstar hai kuoma sim an nuom le nuom naw thu in dawn in, Porn Industry thlan san a nunthar an nei theina ding ani phawt chun kawng tin renga țhangpui dingin thu hrilsa in ,an țhangpui ngei bawk.

Tuhin Shelley hin nau 3(Pathum) a nei ta a. Pathien rawngbawlna sin chu sunzawm peiin , Jail, Radio, TV, Film, Conference le Pink Cross Foundation fethlengin sansuokna sin chu sunzawmpeiin midang tading in nun a hmang a. Shelley Lubben hin Porn Industry nina indiktak tarlang in, Porn Industry hi Sawrkar in a khuokhir thei dan ding lampui nasa taka zawngin hma a lak ta a. California legislator Charles Calderon le khan Porn Industry suktawp ding thu a hin hma an lak nasa hle . June 2010 khan US House of Representative Senate hmaa thu hril in, hi a inthawk in TV show inlar tak tak Howard Stern Show, ABC News Nightingle, The 700 Club, Fox 11 News, AP News le show in lar tak tak hai ah, hmusitum tak le beidawng taka nun a hmangna a in thawka sansuok ani thu a khekpui hlak anih. Hril ta angin Shelley’n website www.shelleylubben.com lewww.pinkcross.org hmangin nasa takin rawng a bawl a. Hi website hmang hin pornstar in lar tak tak hai khawsak dan le an piengthar dan testimony an ni ziek ngei an tarlang hlak anih. Sex Porn Industry a natna țium tak tak inkai/vawi thei ani ti tarlang a ni bâk ah, Pink Cross Foundation rawngbawl dan le an thlalak(photo) hai tamtak sie anih.

Ip thu niloin tulai khawvel sumdawngna insang tak le hlawk tak Porn Industry hi mipui I bawm tak ani ngei bawk a. Pornography hi addict awlsam tak, thlarau le nupa kar suksie theitu hi kristien Țhalai hai pornography lak a ei in veng fiemkhur a țul ta takzet anih. Internet ei hmang khawmin website țha tam tak a um bawk a, Chuleiin, ‘DITTHLANGNA’ lei chau in I taksa le thlarau in a hlawkpui thei ding zawngin website hmang țangkai dingin ei hung in fiel anih.
Muolhoi, Gilgal Veng.
Don't Miss
© all rights reserved
made with by Simon L Infimate