A THO NAWK TAKTAK AM

~Ramthienghlim Varte

Tarik Ni 7, April 30 AD a Kross lera Lal Isu khengbeta um chuh a thi tak tak ani ti sipai haiin an enfie hnungin zantieng Dar 5:00PM velin a ruong chu an lak thlak a, hun an tepter ta em leiin thawdan pangai khawm a thaw hman lovin Joseph, Arimathai khuo ami chun Bawrsap Pilat kuom ah Isu ruong chu a hni in an lak thlak a, hmawsarum tak meuvin thuktheinawna damdawi a hungchawi Alawi le Mura anti chau chu an nal sawk sawka puonzai inhmi’n an tuom a, thlan lungker sung a an inzaltir ta a. A thlan lungker sinna lung dawmsawn mei mei theilo khawp a rik ruong danghai sinna lungphek ang mei mei nilo chun an sin a, vengtuhai hmu ngeiin thataka char de’n midanghai thawdan bak a Rome Sawrkar seal an tet khum a nih. A ruong vengtu dinga ruothai kha Juda sipai, a thonawk ding inlau dawp dawp vawng an na, anrawitu ding chun Bawrsap Pilatin ami ringzo tak Sipai za hotu Petronius a ruot ti ani nghe nghe.
Hienglai a Rome sipaihai inhremdan chuh – i) Indona hmuna tlansie chu Sipai hotu lientak General in a kut ngeiin chemin a sathlum ding, ii) Duty laia inlusu chu rawla namthlak ding ti a nih.Chuleiin hi zana thlan vengtuhai hi an inlusu hman chu ring a um nawh. An hotupa rawiin rawla namthlak chu an hma a dawkan ani tlat leiin.

Tarik Ni 9,April 30 AD (Pathienni) zingkar inhma deuvin Mari Magdalin le Mari dang chu Isu ruong zalna thlan chuh ti le inthin dawr dawr pumin anva en dawk dawk a, a hril ang ngei khan alo tho tak tak a nih. A tho nawk thu chuh Vana inthawk Vantirko hung tumin an kuom ah ‘Tinaw ro, Isu an hemde kha in zawng a ni ti ka hriet, hi taka hin a um ta nawh, a hril ang ngeiin a thonawk tah, a zalna hi hei enta hman ro’ tiin. A tuomna puon chau chu anva hmu a nih.

A tho nawk thu an hriet phing leh an lawm taluo a, a thuoihruoi Jerusalem a umhai le mi dang dang a lainatuhai kuomah an hril tapei a. A tho nawk thu chu Jerusalem khawpui sunga chau nilovin Juda ram, Samari le Galilee a hai an thang suok vawng nghal a nih. A tho nawknaw sa thukhel hril ni haisien chu nikhat khawm dai naw ni a, an chung khawm ava hei rik awm ngei de. Rome sipaihai le Juda mipui haiin Lal Isu an sawisak neka nasa lemin an thaw awm si a.

Thlan vengtu sipai haiin kan inlusu kar a thuoihruoi haiin a ruong anlo hung inruk hmang anti ngam el tak ta hih a mak bek bek el chu nih. Chuonga inlusu chuh an dan angin rawla namthlak ding anna, an nam thlak ti ruokchu ei hmu si naw a, hotuhai le inthuruol vawng an nih ti a chieng. A reng rengin a inkar chun an rutu chuh a thuoihruoihai anni ti iengtinam an hriet thei, anlo inruk suok lo ni reng sienla a ruong ansie na chu iengtinam an zawngsuok naw ding.

Isu tuomna puon hi a tak tak hmu theiin Italy ram Turin khawpui biekin pakhat a anla sie tha a, a hming Shroud of Turin ( Isu tuomna puon ) an ti. Europe rama mithiem tamtakin SHROUD OF TURIN RESEARCH PROJECT tiin a tak tak ani am tak tak naw an suina a chun Isu tuomna puona hin mihriem thisen pawimaw tak tak hieng- Hemochromogen, Serum Albumenhai an hmusuok a; hi puon tuomna a hin thildang tamtak an lang a nih. An vuokna be an hmudan chun hnungtieng nekin hmatieng a tam lem a, vuokna be hmun zakhat vel hmu a nih. Hruihruol a vuoka hrem ding chun vawi sawmli bak vuok lo awi lo a nih.

Chuongchun, a thuoihruoihai hlak arte a puiin a thisan ang elin anlo indar vawngta a, a thenkhat Galili dil tieng an nga manna hmuna dam anlo um ta. Amiruokchu, a damlai a hril angin a tho nawk hnunga a thuoihruoihai in hmupui na dinga alo ruot pek Galili ram hmun pakhat a chun thuoihruoi sawm le pakhat hai kuomah an lar a,thahnemngai taka a sinthaw (mission) sunzawm dingin a hril a, ‘Hnuoi le van thuneina popo ka kuomah pek ani tah; Fe unla….. thu kapek po po cheu pawm dingin inchuktir ro. Chun, ngaita u, kei kumkhuo in khawvel tawp chenin in kuomah um pei kati’ tiin. Chun, alo hrillawk ang ngeiin khawvela Ni 40 hmun hrang hranga inlarin a hun tiem a tlung phing leh a thuoihruoi mi tlawmte hai chuh thuoiin Olive tlangah an mit hmu ngeiin vana lak hmangin a um ta a nih.

Lal Isun thlarau thienghlim hung tlung ding lo nghakro ati ang khan, Pentikos ni (Isu thi a inthawk Ni sawmnga) a hungtlung chun Jerusalem pindan chunghnung taka chun thli angin thlarau thienghlim chu a hungtlung ta phut ela; an rengin thlarauvin an sip a, inthinna thlarau an chang a, tawng hrietlo hai hmangin an thilhril inhrepaw thei siin Pathien thlarau thienghlim chuh an chunga a fu ta a nih. Chuh, Juda Jerusalem a um haiin an hriet phingleh ‘Hienghai hi Galili ram mi an ninaw ama ni, iengleia an piengpui tawng ang ela tawng dang dang hmanghai hi inhrepaw thei am ani ta leh’ tiin. Chutaka inthawk a thuoihruoihai chuh Krista chanchintha thilsiem tinreng kuoma puongsuok dinga hmangaina lungril puta, iengkim Krista hminga tuor huomin huoisen takin Krista chanchintha chuh an puongsuok ta pei a. Thlarau thienghlim thilthawtheina neiin zeng, mitdel, kebai le dang danghai sukdam theina le thilmak thawtheina an changin Krista chanchintha chu an puongdar pei ta a.

Chawl hadam hman lovin an invak dara khawvel hmun hrang hrangah an hringna Krista tadingin hienganghin Andria chuh Russia ram a, Bartholomai le Simon chu Iran ram a, Philip chu Turkey ram a, Jakop Spain ram a, Hmangai Johan chu Asia Minor ram a, Marka chu Aigupta ram a, Mathai chu Ethiopia ram a, Peter chu Italy ram a ( Ka Lalpa hemde anga hemde chu ka phunaw, a letling zawng mi hemde ro tiin a hring an hlan a nih), Thoma Didum chu India ram a, an lo inhlan tah a nih. Hi nih missionary lungril chu.

Chuleiin 60 AD vela khan chuh khawvel hmun hrang hranga hi chanchintha hi andar suok nghal reng a, khawvel sakhuo laia pawimaw tak Kristien sakhuo ( Sakhuona a Krista hnungzuitu) chu a hung ni nghal reng a nih. Krista hi tho naw nisien la hieng popo hi a tlung thei naw ding a nih. Chuleiin:

Thlana inthawk a tho nawk ta, Sandamtu Laltak chuh;
Thlan thima inthawk hungsuokin, Khawvel suol le thina a hne zo ta.
A tho nawk ta, Inpak ro, sandamtu a tho nawk ta.

tiin hla’n ei sak dep dep thei tah a nih. Pathienni (Sunday) eiti kuhi Krista tho nawkni ani leia khawvel pumin eiin ser, Hindu kulmutna hmun India ram tak ngiel a khawm hril buoi um der lovin sawrkar sin le thil dang danghai chawl sanin ei inser bawk ani hi.