Home Minister R.Lalzirliana chuan HPC ‘D’ Army Chief leh Dy. Army Chief te an man chhan chu Suspension of Operation Agreemnet (SoO) an palzut avang leh state ralmuanna vawnnun zel duh vang a nih thu sawiin, “Zohnahthlak te inpumkhatna kenkawh zel a nih theih nan leh Mizoram khawi hmunah pawh mitinin zalen taka kan awm chhunzawm theih nan te, a tibuaitu kawhmawh bawl chingten kawng dik lo an zawh chhunzawm loh nan HPC (D) hruaitute hi man an tul a ni,” a ti bawk.June ni 10 (Pathianni)-a Silchar Airport-a Mizoram police ten an man, HPC (D) Army Chief Lalropuia leh Dy. Army Chief, Biaknunga te an man chhan chu Manipur-a Central sorkar hriatpuia SoO an neih te an palzut vang niin Home Minister chuan a sawi a. He agreement, August ni 22, 2008-a ziakah hian HPC (D) te chu an designated camp-ah chauh awm tur te, an ralthuam dah bo vek tur te, an pawl zawm thar tur la lo tur te, midang tiral\i lo tur te, sorkar function leh development tibuai lo tur tein an intiam tih a sawi a. Heti chung hian Mizoram state ralmuanna tibuaiin, Mizoram chhung leh pawnah mipui tithlabar zawnga an chet reng avangin an man ta niin a sawi bawk.
June ni 11 a office-a thuthar lakhawmtute a kawmna-ah Home Minister chuan, HPC (D) te hian Sakawrdai PS-ah case 3, Saitual PS-ah case 9, Darlawn PS-ah case 9 an nei mek niin a sawi bawk a ni.
---------
SoO an palzutna
September ni 2, 2008-ah 1st IR Bn, Pay Escort Party lambunin mi pali an that a, pathum an hliam.
January ni 22, 2010-ah SHDC hnuaia contractor te Hmarkhawlian-ah kokhawmin, an estimate amount atanga 10% deduct a, HPC (D) hnena pe turin an hriattir.
February ni 15, 2012-ah VC inthlan tura candidate te Tuiruang kamah an ko a, an party candidate chauh vote turin an hriattir.
March ni 13, 2012-ah an hnen atangin Ak 47 pathum, H&K pahnih, DBBL paruk leh a mu 500 bakag Grenade 10 an man.
April ni 17, 2012-ah an demand area chhunga VC, sorkar hnathawk leh chhungkaw tin hnenah tukluihna pawisa an khawn. Khaw 28 zet he thil avang hian thinthi-in an mu ngam lo.
An demand area-a YMA branch 37 leh branch dang 9 te chu an branch thiat turin an vau.
