The 18th April, 2012
To
Dear Sir,
Mr. T. Sangkunga
Tarik 30th January, 2012 a Ramhlun Sports Complex ah Y.M.A. kumpuan I hawn tuma I tawngkam kha kan pai dai thei mawlh lo. I thusawi kha ngaihthlak leh theia mobile phone a lo khung tha tawk an awm nghe nghe a sin. I thusawi kha I theihnghilh kan ring bik lova. “Sinlung Hills Development Council hi Autonomous District a hlangkai lo turin Pu Hawla leh a ministry kan sawipuia kan ngenna chu lawmtakin min pawmpui theih avangin a lawm awm hle” tih thu I sawi anih kha.
Kum 1946 khan Mizovin politics kan hmelhriat tan a. Mizo Union a pianga, Mizoram chauh nilo, Manipur leh Assam a HMAR awm zawng zawngin an tuipui a. Rin loh leh beisei loh ang takin Mizo District aiah Lushai Hills Autonomous District Council a piang ta hlauh zawk a. Council a pian hnu (Kum 10 a ral hnuah) Hmar ho beidawngin Tribe Recognition an dil chauh zawk anih kha le. Manipur leh Assam state ah H.Y.A (Hmar Youth Association) din a nia. Sinlung Area ah Y.M.A. Branch a din vek tawh avangin a hrang a hraia H.Y.A. Branch va ding kha tullova ngaiin din ani lo tih hrechiang ber tute zinga mi I ni ve lawm ni? Inlak hran tum ni ila eng ai ah nge kan din loh vang le.
Duhlian (Lusei) tawng hmanglo chu Mizo ah inngai miah na nge? Chi leh kuang ah chuan Hmar, Ralte, Paite, Lai, Mara etc te hi Lusei kan ni lova, kan ni ngai bawk hek lovang. Mahse Mizo vek kan ni. Mizo-means any Lushai tribes tih khan I thinlung leh ngaihtuahna a la peng hle ani lo maw? Chutiang anih si chuan engtinnge thukhat vua in kan insuihkhawm theih ang? C.Y.M.A. in Mizoram leh Hnam humhalh in tum dan hi min hrilh chiang law law ula, chuta leng ve lova inhre ho chuan belh tur dang kan zawng mai ta lawng.
Kum 1986 a India sawrkar leh MNF inremna thuthlung ziah fel tak ah khan Mizo Autonomous District chu cease to exist tih anih kha. Lusei ho khan Mizo an lo hmangaih khawpmai. Lushai Hills an surrendered a, Mizo tia kan thlak kha politician ho tihsual lianpui a lo ni. Mizo tih hi chi leh kuang hming anih loh vanga Mizo tlangval thalai tam tak in nunna an chan ani tih I theihnghilh ta em ni? Kei lehkha rawn thawntu ngei che hi MNF Party ah kum 10 chuanglai Hqtrs Joint Secretary in ka awm a sin. Chu chauh a ni hleinem, thingtlang khua ah kum 10 a zawn in Y.M.A. Branch President hna kalo chelh tawh a sin.
Thil pakhat ka zawt a che. Lusei (Duhlian) tawng leh Hmar tawng hi Pathianin A chanchintha puan nan a recognised tih I hre na nge? Harhna hla te hi eng tawng a tanga Pathian hian min pek nge tih chhut ve teh khai!.
Heti em em hian Hmar lakah rilru chhia leh itsikna thinlung hi Y.M.A. hian a put kan ring phal ngailo. I thawhpuite nena lungrual taka in passed anih chuan lehkha in min hrilh ula, Ngaihtuahna thar kan siam ve mai ang chu. Unau hmel kan lo inhai palh anih pawhin nangni (C.Y.M.A) mawh a ni ang.
Mingo hovin Mizo A, Aw, B min siam sak lai khan zohnahthlak tawng huapzo turin hawrawp siam a ni. Hmar, Ralte, Lusei, Lai etc, ho tan G tangkaina awm lo mahse zohnahthlak dangte tan a hlu a ni. Lehkha chhiar thei engemaw tawk an awm hma Mingo vin chanchintha Johana ziak Duhlian (Lusei tawng) leh Hmar tawnga lehlin tur an tih a dodaltu te kha kan la theihnghilh lo a sin. Hmar tawng a tawngtaite, thu sawite leh Hla phuahte phallotu kha tute nge. Hla phuahtu hmingthang R.L. Kamlala'n Ralte tawnga Pathian fakna hla a phuah Duhlian tawnga lehlin lova biakin a sak phallo tute kha tute nge? Hmar tawng hi Pathianin a mah faknan leh A chanchintha puandarh nana recognised a ni a. Dan tum engang mahla, I ti khawtlai thei, I dang zo chuang lovang.
Lusei tawng a tanga Chanchintha dawng kanni tih kan hai heklo Lusei tawng hi huat a hnekin vul zel se kan ti. Kan ngaihdan tak ah chuan Pathian remruat, zohnahthlak te zinga chanchintha thehdarhna tura Lal remruat a ni tih kan pawm rualin, non-naga tribal te pumkhata kan awm theihna tura Pathian ruat TAWNG a ni tih kan pawm.
Hnam inpumkhatna pawi in khawih bakah Pathian chatuan remruat ti chingpentu inni tih in ngaihtuah ngai em? Mizoram hmar tawp lam ah hian HMAR chauh kan cheng lova, Zohnahthlak hnam hrang hrang kan in chen pawlh vek, Mizorama Hydel Project zawng zawng deuhthaw hi kan Demand Area chhung a mi a ni. TUIRUANG DAM phei hi chu Mizoram sawrkar ta a ni lo. Vai hnam fing zawk ten min chimral ta se, In thinlung ana ve lovang maw?
Aizawl khawpui chhung chauh hi Mizoram a ni lo. Mizo hminga vai dawrkai mah in ngaih mawh chuan kan hmabak khirh tak hi min thlirpui ve ta che u. Ram in hma a sawna, a chhunga cheng (sons of the soil) te retheihna khur thim a kan tlak luh si chuan kan tan dam reng engnge a tangkaina? Kan ram delh min chhuhsak anga, kan taksa, kan thianghlimna zuarin ei tur kan zawng anga, Nawhchi zawrh mai loh chu hmabak kan nei lo. Pathian thu hriltute u, in tawngtaina ah kan hmabak thimzia hriain min rawn hrereng dawn ni a. Hmar-Mizo tlangval mai nilo, hmar lama cheng zawng zawngte harsatna anih avangin kan thisen a far ralrat thlengin he thil hi chu kan do dawn tih kan puang nawn leh e. Dam renga thih ai chuan min that fai hmasa vek law law se, sawrkar chuan atih tum chu ti mai rawh se. Adama kan dam tek tek chhung chu kan dodal zel dawn. C.Y.M.A. te pawhin ngun takin inthurel tawhsa pawh nise, Zofate hmingin thlirkir leh turin ka ngen a che u. Kan ngenna che u in bengkhawn tha duhlo anih chuan Demand Area ah hian Y.M.A. Branch hi ding tawhlo law law se, sawrkar pawhin luhlul a chhuahzel chuan nunna thapa chhuak ta chuan engthil pawh rawn ti ila, thiam loh min chantir lo hram turin mipui kan ngen a che u.
Ram leh hnam tan a in rawngbawlpui,
H. ZOSANGBERA
Chairman
H.P.C. 'D'
