Responsive Ad Slot

Pathien Buon

Saturday, February 4, 2012

/ Published by Simon L Infimate
~R H Hminglien Hmar, VIRTHLI Columnist

Pathien meu hei inbuonpui ding chu … i zuom am? Tleirawl tha inthak huna khawm khan inbuon kher hi chu ruol ka el phak nawna tak a ni bawk a, ka huphur zawng tak a nih. Ama Pathien ropuizie hi ieng ang tak am a ni ding hre naw inlakhawm hi khawvel ei suoksan phaa ei umna dinga khawpui a lo buotsai ringawt khawm ‘a ropuizie hril thei ruol lo’ niin hlaphuoktu chun a mi hril a. A khaw indin hman chu ang khawpa ropui a ni chun a’n dintu lem chu ropui chem chem ngawt a tih. Bible khawma van khi Pathien ṭhungpha a na, hnuoi hi a ke innghatna a ni thu a mi hril kha (cf  Thilthawhai 7:49). Chu Pathien chu einihai buon chi a ni dim a nih!

Pathien thu lak dan le hril dan, ring dan le fepui dan hi hun a danglam ang peiin a danglam hret hret thei a ni ring a um. Isu inchuktir 11-hai hun laia inthawk Pathien thu hrilin kohran an kei \huoi a, kal an pen pei kha Martin Luther a huna chu ngaidan a lo inphir ta leiin an inṭhe hiel a nih ti an mi hril a. Chu hnung peia khawm kohran a kawidar rawp a; abikin Hmar ringtuhai lai lem chu ‘kohran kawidar/inṭhe hi thil tlung rawp (regular phenomenon) a nih’ ti inla, ei ṭawngsuol dim ...

Tirko hmasahai inchuktirna, Bible-a hmu thei hai ka hei dap vel ngiel a, Pathien buon dinga an mi hrilna le inchuktirna a vang rieu el. Chuong lai zingin tulaia ei thuhriltuhai le kohran ṭhuoituhai; abikin tlawma inlar deu le mihaiin an ko-lawn pawl laia ṭhenkhat chun Pathien an buon thu an hril hlak chu tie! A ṭhen lem chun insuktheina takin an la hmang nawk nghal. Chapopuiin, mi danghai deuna le chaldelna takin an hmang niin kei chun ka hmuh.

‘Buon’ amanih ‘inbuon’ thumal (English: ‘wrestle’, ‘wrestled, ‘wrestling’) hi Bible-ah hmu dingin a um zeu zeu; a tam nawh. KJV-ah vawi li ei hmuh: Gen. 30:8; Gen. 32:24; Gen 32:25 le Ephesi 6:12. NIV ei tiem chun hmun li-a bawk ei hmuh: Genesis 32:22 le 24; Gen. 32:25 le Sam 13:2. Hi Bible changhai hi ei tiem chun Jakob-in Pathien a buon ti ei hmuh a, ama naw chu mihriem tu dang khawma Pathien an inbuon-pui thu ei hmu nawh.

Iengkhawm ni sien, ei thu hi a chieng theina ding le a umzie indik tak ei hriet theina dingin mithiemhaiin ṭawng inbul lema inthawka phawkin hung sui suok hai sien, mi hril hai sien nuom a um takzet a. Beisei takin lo nghak ei tiu va. Tu ṭum hin chu mimawl- mi naranin ei ṭawng Bible ei tiem a, ei hmu thei china inthawkin ei hril a nih.

Pathien buon ei hriet sun Jakob-in a buonna san hi Bible-in chieng takin a hril nawh a. Ei hriet nuom ṭal a ni chun ei suisuok ngai ngei a ti leh.

Jakob a chanchin hi ei suikir chun ama hi Pathien thu awi thei tak chu niin a’n lang nawh a. Chu nek hmanin mani hma siel tak, mani hamṭhatna ding a ni chun khel khawm hril ngam, Pathiena inthawk tlanhmang (wandering from God’s presence) hram hram mi ni lemin a’n lang a nih.

Jakob khan Pathien a hriet a, Pathien khawma Jakob kha a hriet; a pieng hma, sunga a um laia inthawka Pathienin a hriet le a chanchin ding a rel-fel sa niin ei hmu thei (Gen. 25:23). Pathien rel dan chu Jakob hi chan ṭha changtu ding niin a’n lang nghe nghe a nih.

A u Esau-in a rawng a bawl ding thu chu a pieng hmaa Pathien meuvin a hrillawk ni sienkhawm a pa’n a u chu mal sawm a tum el tah a! A beidawngthlak ta ngei el. Hieng ang huna hin a nih, ringtu tam tak ei bei a dawng a, Pathien kut nghak zo lovin, manivarnahmanga lampui ei dap ruoi hlak chu. A u chu a rawngbawltu ding a nih ti hi Jakob hin a hriet naw pal el thei; a pieng hma daia hrillawk a ni leiin. A hretu ding tak chu a nu Rebek a na; sienkhawm chuonga a pasalin an nau upalem Esau mal sawm a tum phinga buoise hmasatak khawm ama Rebek bawk hi a nih. Upa’n “Nuhmei varin tuikhur ral a kai nawh” an lo ti kha indikna chin a um khawm a hawi ta hiel el. Jakob kha lo mangang deu khawm ni sien, Pathien remruota innghat tlat dinga hriltu ding kha a beidawng hmasatakah a ṭhang a. Malsawmna dawngtu dinga Pathien mi-ruot chun a nu remruotna chu a zawm lem tah a. Mani hma a siel tlat sih a, a upa chan dinga a pa ruot malsawmna chu khel hrilin a chang tah a nih.Chuchu a nih ‘Jakob’ an ti-pa chu.

‘Jakob’ ti chu Bible thiemhai chun, “‘A ke khawngah a chel’ tina a na, a umzie tak ruok chu ‘A hlem’ tina a nih” an ti chuh! Hrilfietu ṭhenkhatin ‘Hlemtu’ tina a nih an ti bawk a; indik thei vel vawng a tih, ring a um.

Jakob chun a pa malsawmna dawng sienkhawm chu malsawmna lei chun a hringna hiel chan el thei ding niin a’n hriet ni ngei a ta, a tlanhmang zui nghal tah a nih. Pathien remruot nghak zo lova mihriem varna hmanga malsawmna tehlem ei dawng chun ei thipui thei ding a ni hmel khawp el. Malsawmtu indik tak, a u neka chan ṭha lem chang dinga ruottu Pathien chun hmangaina’n a hnawtzui pei a. Ram palailakah lung tum lukhama a riek khawma a mang tieng a thlamuon a. Chuonga mani hringna sanhim tuma tlanhmang ‘Hlemtu’ chu a pu Laban-in a lo hlem ve thung a. Kum sari tal tawp sin inrim tak thawha a ihlaw, a nuhmei ding chu lawi-ṭhat zanah thleng pekin, a ti naw lem leh honeymoon a’n hmangtir a. A ditlem chu nei ngei a nuom si; kum sari dang inrim taka sin thaw nawka hlaw dingin, abatin a nei tah a. Lawi-ṭhat zanah ni ta lem lovin, ‘a nawn zan’ chun honeymoon tak tak a hmang ṭawk a ni awm.

Ei pi-le-pu hai hun lai ang deu khan ran hau kha hausa an ni el awm. Jakob khawma a pu ran hlaw dingin sin chu a thaw zawmpeia, a pu hlaka a hlem masi bawk. Malsawmtu Pathien ruok chun a thlathlam nawh; hlemtu a nina bo naw sienkhawm a sin thawnaah a ṭhangpui pei a, ran khawm a hau nuom sawt hle hrim a. Jakob khan a hriet naw lui mei mei a nih.

Kha’ng khawpa Pathienin a ṭhangpui a, a hriet thei ngei ngei dinga a’n lar khawm khan hre nuom lovin mani hma siel takin, mani varna le remhrietna hmangin hma a lak pei a. A tawpah a pu, a tarpupa ni bawk chu a ruka tlansan ngai hiel khawpin an inlaichinna a sie a ni kha. Hlemtu chu hlemtu a la ni zing (Gen 31:26). A pu khawm a lung a sen kher el a, a sipaihai ṭhuoiin a hnawt a. Pathien lo inrawl naw sien chu Jakob le a sunghai chan kha a se hle el hmel a nih (ch. 29).

A puhai khuo tienga kir ding chi hlak an ni ta nawh; hma tieng an panpeiphawt a. Pathien chun a la thlathlam naw zing; angel tirin a zu biek a nih (Gen. 32:1). Iemani chen an fe hnung chun a ṭi tak, a tira a tlanhmangna san a u Esau chun sipai 400 leh a lo tuok ti thu a dawng nawk tah a. Mangangna khelah beidawngna a tuok tah a nih.

Mani hma siel tak a nih ti chu ei hriet; hi zan ang em ema mani hma a siel hi chu tu hma khan chu hriet a la ni nawh.

Hnung kir thei a ni ta si naw leiin hma tienga lo tuokthu a u chu a’n tuokpui tho tho ding a nih ti a chieng a. Chuongchun avarnale remhrietna po po khawnkhawmin lungvar a phan tah a.

A ran ruol le a rawihai chu pawl hni’n a the a, pawl khat chu an fe hmasa a. Esau le a rawihaiin an lo bei thut a ni khawma a pawl hnina bek chu an him thei a beisei deu a nih (Gen. 32:7).

Amiruokchu ama remruotna khawm chu a ring ngam tak tak ta nawh a. Lampui dang a hriet ta thlawt naw ni’ng a tih, Pathien a ko tah a. Pathien hmaah a tlawm ṭan met a nih (Gen. 32:10). Amiruokchu mani hma a siel dan a la danglam chuong nawh; a ṭawngṭaina hla khawm, ‘Mi sanhim la …’ ti a la ni ta rawp. Pawl hninaa ṭhang a nuhmei le nauhai lai khawm riek ngam lovin, makhatin Jabok vadungah a’n bi hmang tah a.Chuzan, tlanhmangna ding lampui a nei ta der naw zan chun a nih a kuomah Pathien a zu feh a, an inbuon thiel thiel el tak chu!

Pathien le inbuon ei ti hi a nina tak chu a lo ṭha hmel rak naw khawp el. Pathienin a zui nghawk phir a, thaw ngaina um thlawt lo khawpa Pathien rawl ngaithla nuom lova hel hai kosuokna hmangruo niin a’n lang a nih. Jakob khawm Pathienin a buon cho annawh, a elpui ru inpelsawl rakin a sawisa lem a ni kha.

Hi thu hi hlaphuoktu pakhat chun a hmu chieng hle ni’ng a tih; hi ang hin hla a phuok:
Suol ngaidamna le lungmuongna a mi pek

Ei suolhai na lovin a mi sukdam thei.

tiin. Na deu sawka ko ngai ei um hlak a; chuong mihai chu Pathienin zaidam taka a ko ‘hawi’ zo naw pha na ṭawkin a ko hlak niin a’n lang. Entirna ṭha tak chu Jona kha a nih. Kha ang kher khera ko ngai, annawleh Pathien meuvin a’n buonpui ngai khawpa lulul insuo chu insuktheina chi a ni hmel nawh.

‘Pathien buon’ chu zan khawvara ṭawngṭai amanih, Pathien rawl hriet tuma inpezo taka ṭhang lak hi ni lovin Pathien ngaisak lo le lulul hai Pathienin a kona ni lemin a’n lang.

Pathien ni lo, thil dang buon ding ruok chu ei nei a, Ephesi 6:12-ah chieng takin a mi hril a nih. Ei ibuon dinga ruot lai Pathien ruok chu a ṭhang nawh. Ringtuhaiin ei inbuonpui ding hai chu mani hmasielna (inlalna le thuneina) bawk a ni rek.Chuchu ‘chapona’ khawm a ni nghal a, chapona hi Pathien hmelma No.1 a nih ti inla indik a tih. Ringnaa inṭhanglien peiin ‘mani’ ei buon hne hnungah buon ding dang ei la nei ta rawp; Setan le a rawihai, hi khawvela che-tla hai le van insang taka khawsa hai chenin ei buon hne a ngai lem a nih.

Pathien thu ei hrilfie dan le hmang danah fimkhur a ṭul a, kohran mipui a nawlpuia inchuktirnaa lem chu a ṭul zuol. Pathien thu a nina indik tak sir deuva hmang hi ‘fe suol’ ei ti hung inṭanna a ni ngei awm sih a.

Ei thu chai-a inthawka inlang dan chun Pathien buon lem lovin Setan le a rawihai, a hmangruohai hi ei buon lem ding niin a’n lang a. Mani (self) inthuhne a ṭul tak niin ei hmu thei a nih. Tirko Pawla kha indawn phak inla chu mani taksa ngei khawm hi (self and self esteem) hnek chawr chawr hlak dingin a mi’n chuktir lem ring a um khawp el a nih.
Don't Miss
© all rights reserved
made with by Simon L Infimate