Khawvel hung changkang hin chu a tu tu khawm hi a mi sawidanglam hne ngawtel maw. Hi hma khan a khup zawnga lo lawn ni inla tuhin chu a thal zawngin ei lawn an tah chuongang deu chu a nih ei danglam nasat lawm lawm dan hi. Sil le bil fak le dawn khawm nasatakin ei inthlak danglam nin an lang. Hun la hung fe peia ieng ang takin am ei khawsa ding chu. Khawvel inthlakdanglamna nasa tak kara hin eini Kristien thalaihai hi ei khawsak danhai eiin ennawn zing naw chun ei ti nawna tienga fe a awl awm kherel.
Tulai chu ei thu fe pui dan hai khawm a mak danglam ta em em. Thil ei thaw le ei hril hai po po hi a awlsam le hadam zawnga lak vawng ei tum tah a, thiltha tak chu a ni chi dim aw ti ngaituo a tul. Thalaihai ei changkang tah ei ti lai zingin ei changkangna hai khawm hi hmangsuol awl em em mi thuoi kawitu hmangruo thatak an hung ni pei ta bawk a nih. Chuong ang ngirhmun a ngir thalaihai eini ta leiin thatak a in enkawl le in relbawl chu ei tul ta takzet. Chu ding chun ei Pathienthu hi ei ringa ei zawm tlat a tul. Pathienthu tak hi inkhel ngai lo ding eini ringtuhai ta dinga ei kalchawina kawng tin renga hmathuoitu ding chu a nih. Pathienthu hi eini Thalai eini leia inthlazal a ni chuong naw a. Thalaihai tulai ngat lem hin chu Pathienthu ngaisak ei um meu ta nawh. Thalaipawla/Kohrana inhmang rak hai lem hi chu demna ding chau an tah ei zawng lem, an naw ??? Chu chu ienglei am a san ei ti chun ei nina ei in hrietchieng naw a a ni tak annawm. Tulai ei ti a thalaihai le nu le pa a tam lem chun ei thil thaw dan hai po poah tulai ti hadam takin ei lak zo vawng tah annawm. Tulai ti chun a ni ngei maw....iengkim hi a thieng naw um thei dingin ring khawm a um ta nawh. Tulai Fashion annawm, tulai chu pek zau naw chun, tulai chu inkhawm ngai ta lo hai a, ei hotu, thuoituhai hi an tulai ta nawh, le a dang dang in tum ding tam ngawt a ti maw tulai ti vawng el in la chu...Hieng a ei khawsa pei ding a ni chun thiltha tak a ni dim aw ti ngaituo a tul. Ei Pathien hi ei hlat san vai chun ei du chu hmu naw manih. Ei chunga roreltu a ni sih a. Ei nuom zawng, ei tha ti zawng niloa Ama dit dan le a tha ti dan anga ei um hram hram chun malsawmna hmu lem ei tih.
Tulai thalaihai ei inchei nuom danhai hi a mak danglam ta em em. Inkhawm dingin ei hang fe khawmin Bible chawi taloin mobile phone ei chawi tawl deu vawng tah. Mobile phones hai hlak hi a changkang hrat bawk si,ei phone hai a hmang thei ding Bible application khawm a um tah. A then tamtak Bible chawi pei rak lo hai ta ding chun thil remchang tak chu nih. Kei khawm Delhi Version ka phone a um ve tat. A siem dawk tuhai hmu phak nihai sien chu chibai buka bu faka ko hiel ei nuom el annawm ie maw. Amiruokchu hieng Bible application, mobile phones hai hi ring tawp el chu thiltha le mawi a ni naw a, Biekin pana inkhawma ei fena dinga Bible chawi ringawt ei hang pei ta naw khawm chu Chanchintha hril darna kawnga chu hmangna ding um nawm ei nih. Ringtu ni hi a awl ringtu indiktak ni hi thil harsa tak a lo nih. Ka ti hlak a ei missionary tamtak haiin chanchintha an hril darna kawnga, ringthar an lak belsa na kawnga hin ringtu, Isu Krista hnungzui hi anhawi taluo ti pal an tih ti hi ka thil inlau tak a ni hlak. Isu Krista hnungzui hi thil awlsam le hadam tak an naw a pei naw lai tak khawma pei naw sa saa zui tul hlak a nih. Chu ding chun eini rawi thangthar hai hi chu ei tlin ta naw takzeta chuongang khawp chu ei um naw hrim a nih. Pathienthu tak ngai pei muol khawm ei um ta nawh. Ei ti ti sepna hai nuomna hai khawm a dang zo tah. Pathienthu an leng ta nawh. Pathienthu ei hriet nuom dan le ei hril nuom dan hai chu ringna sukhratna ding le thlaraua insuk hratna ding ni ta loin a ringhla zawng le andik nawna ang hai zawngdawk tum zawngin a hung fe pei tah nin an lang. Pathien thilthawthei zie, a mak zie hai hi fie tum ngai nawm ei neiu. Eini mihriem hai fie ruol ding a ni nawh. Ei ihril nuomhai chu mak danglam tak tak hai an ni lem tah. A pawi ta bak el. Hieng a ei fe zing chun boralna lampui hrawtuhai chu ei ni mek ding chu niin an lang tah. Pathienthu khawm a awlsam zawng le hadam zawngin ei lak tan mek hi a pawi em em. Pathienthu hi hadam taka lak chun a hadama a awlsam hrim a nih. Amiruokchu, chu chu suol hmangruo thatak, ringtu indiktak ei nina ding mi daltu thatak a ni lem ding a nih.
Ei in chei dan hai ei hang en chun mi ropui inza umtak tak ni awm ei tam hle. Hang bel chieng tak tak inla chu belchieng ei dawl tawl dim chu ringhla a um. Kekawr inzui zat ( keikhawm ka kekawr pakhat chu ka lo sukzui ve meta chu hril khawp a tling nawh ) , sam chu mit khingtieng inlang thei naw chara sei, a tukhnung tieng panga chun Sepoy/sipai sam tan ang elin a lusip hang phak vanga insang a ni nawk. A ring laia ear-phone hlak chu in awkhlum inlau um rak khawp a vet kuol. Kekawr sier tienga chun chain inkhai tla, ei hang intuokpui chu, “ Sir, yes sir !!! ” tia in tet khawnga Salam buk ei nuom vang annawm ie. Bible le intuo rem ding chun ei inhme ta naw bawka ni maw. Amiruokchu Chanchintha hi ami suk changkangtu, a mi dawmkangtu hieng chen min tlung tirtu a ni bawk si. Ei khawsak dan hi chu thil harsatak a hung ni tah hrim a nih. Iengtin tak in am khawsa tang ei ta maw ngaituo a va um de…??? Ei nuom zawng le ei thil dit hai hlak chu a mak deu deu bawk si.
Ei chengna ram Manipur chau khawm ni ta loin NE biel sunga state hran hran umkhawm naa hin nunghak, tlangval laia nupa ni hmaa nupa nun hmangna hi nasatakin a hung hluor ta em em. Sex video ngat lem chu en seng an ta nawh. A hnam bingin ei nei kim seng tah, ti lang an khel em dim chu…??? Hienghai po po hung intan theina chu a mi hre chiengtu hi ei hriet chieng naw lei a ni tak. Ama chun chiengtakin ei iengkim a mi hrietfai vawnga eini ruok chun ama hi hrietchieng khawm tum chuong loin, chieng lo takin hieng hin ei um nel nuola tha le fel inti tak siin ei nina in hre der loin le ei iringtak khawm hre chieng loin hmatieng ei fe pei chu a nih. Hieng kuhi a ni leiin thil ei thaw reng reng hai khawm hin a dai sawt ngai naw hrim a nih. Sum sawtnawtea bo nawk ang el ei nih. Ei ngirhmun indiktak chu hriet chieng a hunin a va tul ta de!!! Sap hai ei tia ei ei entawn a a tha. Amiruokchu, tuta ei in angna ei puona hai hi chu thil lawmum le thiltha a nih ti ngam nawm ei nih. An thiltha thaw nekin an nungchang mawi lo tak tak hai ei lakluot nasa in ei entawn a hmu dingin a um zing bawk tah. Chanchintha hung the luttu ni de hai sienkhawm thlarau tieng nasatakin an chau em em ei hriet seng. An thilthaw, an um dan, an nungchang ei entawna ei inthlau bek bek ta nawh. Ngaizawng nei chun sex hmang ngei ngei dinga ngaina hai a hung um tan. Chu chu a tlung meka a ra khawm hmu ding a um zing tah. Pharmacy hlak ei hau, damdawi hrattak tak hlak a tam. Ngaituo um tak chu ei ni tah. Nu le pa’n an hriet phak ta nawh. Hril ding tam tak a um ei hril seng nawh. Khawtiem a na hieng hin ei pan tum ??? Nasa chu ei nasa !!!
Ei thupui a inbuk a ni ang hrimin ‘Tulai Thangthar’ hang ti nawk inla. Churachandpur phairuom sung hi hang thlir bik deu in la. Tleirawl ti dinga tleirawl khawm la ni tha mang lo, hung har tan lai vel. Nu le pa angsunga um pei naw lai hun a um hai. Hienghai lai hin Sex el ni taloin nasatakin dawmdawi(drugs/intoxicants) an lar em em. Nuhmei khawm an duoi bik nawh, nuhmei hai hman hman hi a thaw nasa lem am an ni aw ti thei dingin a um. A then chun ngo na ding dam an ta, a then chun ieng damdawi dawi am a nih hril ding le suonlam ding chu an invai naw kher el. Ei chi a lo kim ta bak bak el. A tam lem hai hi chu Hr.Sec.stage a mi ni deu vawng an tih. Mak ka ti tawp thei naw, ngaituona khawm a mi pek rawn, thawthei hlak ka nei bawk si nawh. “ Iengleia hieng lawm lawma tulai tleirawl hai laia hiengang thil hi a nasa bek bek el am ni tang a ta ? ” ti chun ka ngaituona an zam kuoltir vel. A san ding awma ka ring le ka ngaituona chu nu le pa hin ei nauhai ei khuokhir dan hai hi andik zo rak nawm an tah aw? Hi hma hang ti ve inla, kum tlawmte lo liemtah hai khan tulai tlangval hai hin tleirawl hun an lo hraw ve senga zalentakin an uma chuong lawma tulai ang a nun pawrche, suol le tha naw an tam nawh. Inkhuokhirna hlak um taluo lo, hun zalen tak a hmang hai an ni lem bawk si. An leh la hang ti nawk pei inla, ei Pathienthu hi ei intuo hne tak tak ta naw ni thei a ti ? A ni el dim maw. Lekha tiem le thiem dingin ei nauhai ei dit senga ei induthaw pui em em a, inkhawmhai chen khawm in fe tha tir ta loin lekha lo tiem ro ei ti a ei maksan hai dam hi a tha tak pa a tling zo ding am ? Hang ngaituo hrim hrim inla maw. Hi hun sung hin iengtin am hun lo hmang an tah ? An reng lem chun ni naw nihai, a tam lem chu nu le pa um lo chun zalen inti hleng an ti maw… An ta ding chun hun tha le hun lawmum ni ngei dingin ring a um. Nu le pa hai khawm ei nauhai ei enkawl le khuokhir dan hai hi a tha tak pa a ni am ti ngaituo nawn ei tieu. An naw leh, la hang ti nawk pei inla, ei nauhai hi ei duot taluoa an thil dit dit, an ti ti ei thaw a, ei pek hai dam hin nghawng chu a nei ring a um ngei. Sum nei lei ela mani nauhai dit zat le ti zat zat pek el hai dam hi chieng naw inla tha hle dingin ring a um. Sum an hlimna khawp an chawia ruol le pai le khawlai an hang suok chun thlemna chu a tam ding, ei fimkhur a tha. A ni ngei nu le pa’n nau an hmangaina hi anthuka nauhai chun ei hrietphakin ei hrietthiem zo naw a, an mi hmangaina lo dawmsawng ei thiem naw leiin tam tak chun ei sietpui hrim a nih. A tu tu khawm ei in ennawn seng chu a tulin a hun tah.
Hienghai po po chunga chun a mi siemtu, iengkim thawthei Pathien chu, feltak a ei iengkim inhmai thak loa mi hrietu a um. Ama hin a mi hrietchieng ang bawkin hrietchieng tumin thang lang ei tieu. A mi hrie chiengtu hi ei hrietchieng hun hun chu hieng ang a ei buoina pawrche tak tak hai le dit um naw tak tak hai hi bo ngei an tih. Chu ding chun Bible tiem rawn, tawngtai rawn, inkhawm bansan lo, nu le pa thuawi a tul.
[ Note : A ziektu hi a tha le fel chunghnung bik a ni nawh. ]
