Mi tamtak chun an thi tawmin thu nuhnung an nei hlaka, Khawvel mi inlar le ropui thenkhathai thi tawma an thu nuhnung hi lo thlir in la.An thil hril thenkhathai hi chu a thlamuong thlak thei khawpel.Ei theinghil naw ding ruok chu, an thi tawmma an thil hril hai hi thlamuong um em em sienkhawm,vanram an kai dinga ring bur ding an chuong naw a,iengrak khawm an hril naw leiin an kai naw dinga ring chi khawm an bawk nawh.
Pathien um ring naw thuziek thiem,George Bernard Show kha ama le ama in that a ni a,a thi hma in kawtkhar ah,hi thu hi a lo tar a nih, “Vawituk zing dar 2 khan thu le hla hmanga khawvel in awi hlak tu George Bernard Show chu thlamuong takin a chawl ta,” ti hi.
English poet ropui Lord Byron chun, “Tuhin chu ka in innghil ve tak tak ding an ta,” a ti a.Karl Marx nawk thung chun, “Thurosie ti ang renghai chu an damlaia thaw ding thaw zo hmanlo mi in vethai thaw chi chau a nih,”a ti ve thung a.Historian le essayist ropui Sir,Thomas Carlyle chu, “Hi maw thina chu,a tha e…..,” a ti a.
Bristish playwright Noel Coward chun, “Dittakhai mangtha ro le,zinga ei in hmu tawl nawk ding a nih,” a ti lain,Voltaire chun, “Thlamuongtakin min thi tir hram ro ie,” a ti a.American essayist Henry Thoreau khan chu, “Hi khawvel hi insirna pakhat khawm nei loin ka suoksan a ni,” a ti.
Lord Budha khan chu, “Iengkim hi la tawp vawng a ti a ta,chun a thi ta a ni.Roman Emperor Vespasean chun, “Pathien ka ni ta hielin kan hriet,”a ti a.Roman Emperor bawk Caligula chun, “Ka la dam zing a ni,” ti in a thi.
France lal Charlemagne,Lady Jane Grey,Catherine of Aragonhai chun, Lalpa, I kuta ka thlarau kan kawl tir,” an ti seng lain,Alice in wonderland ziektu Lewis Carroll chu, “Hieng lukhamhai hi chu la sawn ta ro,ka ma maw ta naw ie,” a ti nih.Italy ram thuoitu,Machiavelte chu, “Ka lalram le hnam hi ka thlarau nek khawmin ka hmangai lem a ni,” ti in a thi a,Edison chun, chungtieng ram khi chu a mawi in,a va ropui de aw,” a ti a.
Nancy Astor chun, “Ka thi a,ka birthday lem niin ka hriet,” a ti a.Darwin chun, “Thi hi ka ti lem naw e,”a ti a.Queen Victor chun, “Thlamuongna hung thlung ding chu,” a ti lain President Roosevelt chun, “Kalu ana ngei el,”a ti nih.
King George V chun, “Ka lalram chu a dinhmun a tha de maw,” ti in a lan dawn hram hram a.Music phuokthiem,Franz Schubert khan chu, “Hi hi ka tawpna a ni,” a ti a.Novelist Sir,Walter Scott chun, “ Ngai ka aw nawk tan ta,” tiin a thi a.
Pathienmihai thil hril hi chu a ropui tawl khawpel
Martin Luther:- Ka pathien hi pathienhai pathien a ni a,Ama-ah chun hi thina hi kan biruk san ding a ni.
John Knox:-Ka nunnah, Krista-ah ka nunna chun,hi thina ti baiumtak el hin a ngam naw leiin ti reng reng ka nei nawh.
John Calvin:-Lalpa,thinain ka nunnah chiem sienla khawm,I kuta ka umni anthawk ka lung a awi tawk takzet a ni.
Charles Wesley:-Lalpa nangma angnah famkim neia ka hring ve ta ding hi, ka lung a awi ngei!Lungawina, lungawina chu a hung tlung ta eh.
Richard Baxter:-Natna chu ka nei a,nisienlakhawm,ka nunna a tawk buoi nawh,muongna,muongna chu a kim ta.
Dr,Preston:-Thi ding ka ni naw a,Pathienin ka umna a sawn ding a ni lem chau a nih.Chu hmun pan chun pathien leh kan fe ding a na,a kuomah thlamuong takin ka chawl sawng ding an ta.
Samuel Rutherford:-Ka lungril hi hlimna in a luong liema,asanchu van mana-ah chawm a ni si a.Ka kut hi ama pawm dingin ka phar a,aman milo lawm a ti.
Nang I thi tawmin iem hril ve tang I ta?
Dwight Lyman Moody thu nuhnung tak chu, “Hnuoi hi an tawl hla tiel tiel a,van a hung hnai zuol tiel tiel a.Hi hi maw thina chu,Lallukhum ka khumni ding chu,” ti in.
Ni e, ringtuhai chu hnuoiah thil ropui thaw dingin ei hung pienga.Thinahai hi ei ta ding chun malsawmna a ni lem a.Chatuon chawlhna hmun hlun lem a ei lutna,ropuina,ropui lemma,lallukhum ei khum ni a ni ding si a.Ei nun hi iengtik a mani a la tawp ve ding a na.Zantieng nisa tla in sunni a herliem angin ei nunnah hi a la herliempui ve ding a na.Ringtuhai chu hmun ropui lemmah,thina um ta naw na ah ei la lut ding a na.Chu hun a chun a va ropui awm de. (Source:buannel.com)
