Pi Fimneizo (Hmar puon design-tu)

Pi Fimneizo  hi 15 July, 1934 kum khan Taithu khuo a piengin, (L) Lalphuta leh innei in nau 7 (Pasal 2, nuhmei 5) an nei a, tu 15 lai an nei tah a nih. Tuhin a naupasal hai leh Rengkai-ah an khawsa mek.

INCHUKNA TIENG
1. 1945 in pawl hni (Class-II) Lungthulien ah a passed.
2. 1946 in pawl thum (Class-III) Lungthulien a bawk a passed.
3. 1947 in pawl li (Class-IV) Senvon ah First-honour in a passed.
4. 1948 in pawl nga (Class-V) Old Churachandpur ah First Division in a passed.
5. 1949 in pawl ruk (Class-VI) Pherzawl M.E. School ah First Division in a passed.
6. 1951 in pawl sari (Class-VII) Pherzawl High School ah a passed.
7. 1952 in pawl riet (Class-VIII) Pherzawl High School ah a passed.
8. 1953 in pawl kuo (Class- IX) Shillong St. Mary's High School ah a passed.
9. 1954 in pawl sawm (Class-X) Pherzawl High School ah thaw in a failed a, inchuk zawm ta lovin a um a nih.

SINTHAWNA
1955 in Gramsevika, Social Welfare Department, Government of Manipur hnuoia thawk in kum 1985 khan alo pension tah a nih.

TRAINING CHIDANG DANG A ZO HAI
1. Trained in Ambarcharkha at Adimjati, Imphal in the year 1956.
2. Trained in Family Planning for two (2) months at Imphal in the year 1959.
3. Trained in P.T. Drill for one (I) month at lmphal in the year 1958.
4. Trained in Orientation course at Imphal for (l) month.
5. Trained in Family and child-welfare at Sriniketan, Birbum, Calcutta for six (6) months in the year 1969.
6. Trained in Rifles shooting at Rifle Training Camp of Women in 1973.

HMAR CULTURE-A A THANG DAN
Tarik 05-04-1954 in  Pu V.L. Siema Head Clerk in Rengkai Road a inkhawmna nei ani a. Hi inkhawm tanna hin HMAR CULTURE  ṭhuoitu ding inthlangna a um nghala, hieng a hnuoia hai hi an thlang a nih.
1) President- Pu H. F. Nghaka of Thenmuol.
2. Secretary- Pu S.K Hrangchal of lmphal
3. Treasurer- Pi Fimneizo of Rengkai.

Executive Members
1. V. L  Siema  2. Daka 3. H.K. Khawlkung 4. Sielchunghnung.

Hieng a chunga hai po baka hin, Tuithaphai khuo tin ami member pahni pei an thang bawk a nih. Hi inkhawmna a hin HMAR CULTURE Chairman dingin Pu Taivel of Rengkai ruot ani a, Secretary dingin Pu. H.L. Daka ruot ani bawk a nih.

Hmar Culture hi phur taka thaw ani a, India ram ta dinga ni pawimaw hieng-Republic Day a dam an lam hlak a nih. Hieng a Hmar lam an suklang anthawkin Chief Commissioner dam in sum in a thagpui hlak a. Chun vawikhat chu Butu Khuonglam hla hai sakin Republic Day niin an lam a, lawmmanin cheng zanga (Rs.500/-) an hlaw a. Rs.400/- (Zali) hin tuta HSA Campus, Rengkai bula cultural ram hi an inchawk a nih. Chun a chung po Rs.100/- (Zakhat) hin thil tul tak pakhat pawimaw em em bawk si an ngaituo tan ta a, khawtin a’nthawk mi pahni koin an inkhawm ta a. Hi inkhawm hin hnampuon tamtak um ta sienkhawm, abikin Hmar nuhmei puon ding bik ngaituo a hung ni ta a, chuonglai chun HMAR CULTURE a Treasurer sin chel Pi Fimneizo chu Design siem dingin an ruot a. Ruota a um ang chun hma a lak tan tah a nih.

[Hmar Culture/Hmar Cultural Society ti hi khanglai hun khan HSA hnuoia department pakhat anga um a nih]

HMAR PUON A DESIGN DAN
Pi Fimeizo hin thlakhat sung a buoipui a, chulaitak chun 'SUMRISANG' inzam vel hi nikhat chu a hmu a, a
ngaituona alak ta khawp el a. Dawra fein, pat a lak a, a zie a siem a, a khawng zo hnung kum 1957 in committee an ko a, khawtin a member pahni pei an fekhawm a, committee chun Pi Fimneizo in a design an hang hmu chun nal an ti ta em em a, hi ni a committee hai chun, a puon design chu HMAR NUHMEI PUON bik design 'HMAR PUON' ti in an namdet (passed) a nih.


HMAR PUON RIRUONG DAN 
Hmar Puon riruong dan hi Pi Fimneizo chun hiengang hin a hril; “Sumrisang zie a ni leiin, chi sari (7) a rawng an naw chun a nal ngai naw a, a rawng chi sari (7) hi hmang ngei ngei ding a nih. A khikna khawm hi 'ASEN' le a HRING, annawle 'SENDANG' le a hring ding a nih. Hi kum hin Hmar Culture show a kan hlaw Rs.500 /- anthawka kan hmu inhmun/hmun inchawkna bang Rs. 100/-  (Zakhat) in Hmar nuhmei puon 'HMAR PUON ' 6 (Paruk) le Zakuo laisen 6 (Paruk) kan khawng ta a. Chun HMAR THANGSUOPUON ruok hi chu pasal ta dinga a lo um ta sa reng a nih”.

HMARPUON DESIGN DAN
Hmar puon design dan hi chi sari (7) a nih.
1. A sen 2. A hring 3. A sendang 4. A dumpawl 5. Vanrawng
6. A dum 7. A var

A TLANGTIEL DAN
1. A tlang tak a dingin a sen lien deu met
2. A hring chin deu hlek
3. A sendang chin deu hlek.
4. A dumpawl chin deu hlek.
5. A sen chin deu hlek.
6. Vanrawng chin deu hlek
(No-2 anthawk No-6 chen hi antiet vawng ding anih)

HSA Platinum Jubilee 2014 Ngurte khuoa lawm tuma Chawimawina inhlan lai

A RAN DAN DING
A dum ran met pei a chun a sen le avar ran met pei ding (tiel ding ) a nih. Chun a lai a asen a sen lien ran pha a hring, sendang vanrawng inhuon ding a nih. Chun akhit na chu a hmawr an Sutnawna ding a, asen le a hring a khit chun a mawi biek rieu a nih.

PI FIMNEIZO NGENNA
Mi tuelkhawmin hnam ro "Hmar puon' inza pui el lova a hung suokna khawm danglam tak a ni leiin, ngaisang le a chawisang tu ni tum seng dingin ka ngen takzet cheu a nih.

HSA IN CHAWIMAWINA AN'HLAN

Hmar Students' Association (HSA) chun Platinum Jubilee kum 2014 a Ngurte, Churachandpur, Manipur hmuna lawmna hun an hmang tumin Pi Fimneizo hi Lifetime Appreciation Award an inhlan a nih. Hi huna hin Pi Fimneizo chun HSA thangpuina ding tia a sum lo inkhawl chu HSA kutah an hlan baka, a puon design dan hai hrilin HSA chunga lawmthu a hril.