Martyrs’ Day Hla

Phuoktu: Laltlansung Mihriemate

Hi khawvela hnam ze tinrenghai ta din,
Hmun le ram Chungkhuonun a lo ruotpek;
Hmar nau lenghai khawm hmun le ram chu zawng vein,
Val mihranghan an hringna an inhlan.

Mihrang fam lo changhai, in ta din hun le ni
A tharin kan hung inhlan cheu;
Hmar nau zaleng ruolhan May ni 16 hi,
Martyr Day ti'n kan inhlan cheu.

Ram santu mihrang, buonleia zal ta hai,
In tlawmngaina kan innghil thei lul nawh;
Tlang tin muol tinah sam ang lo zal inla khawm,
In sakhming hril hi bang thei nawng kan tih.

Ram le hnam ta dinga mi tlawmngai hai le
Hringna chen lo inhlantuhai leiin,
Ei hnamin par ang vul ni la nei ngei a ta,
An sakhming ṭhangthar lai mawi zuol a tih.

BUTU KHUONGLAWM (FE PHA HLA)

K- Zuong inhliep, zuong inhliep,

Aimuol tlang aw zuong inhliep.

M- Zongama changes hâwlpa,

I thang a ṭha aza e.

K- Thingpui inhlîm tlâng ngha ruou a,

Tlaitlâk tâwm rindi ka sawngna.

M- Rindi chal ang rawn sawng,

An her iena hluo lovin tlâng khuma e.

K- Zawllamchang indi hluo lo tlânga

Chawium ang kan ṭhung.

M- Ram ang kan chângsuol a vuoi,

Thlunglu vai bangin pâr e.

K- Vaimîm pâr ṭha ngo rawng aw,

Ka hrizawl lei inchamah.

M- kei aw ṭuonlu ang kan thiet,

Ka hmêlin a hawia e.

K- fe pha maw ni tang a ti,

Kal pha maw ni tâng a tih

M- Phaia  ârchang a tawnpa,

Ni lo nghak rawh aza e.

K- Ka lungdi’n ârchang a tawn,

Thlaw lo lamah.

M- tlaitlâk tâwm virthli’n a sêm,

An her iena e.

K- Ka râla par aw,

Hei kei malehawia e.

M- Zawltlingi va sai malehawia e.

K- Ka râla mi fê zo tah,

Sakhipa la ṭum bikah.

M- Sakhipa la ṭum bik a,

Zokhawhui ang an lâruol,

A hmuna khuo thima e.

Aw Kan Hmar Ram

~Lalkhum Keivom

Aw kan Hmar ram, inthim tlang dum duoi,
I sungah Hmar kan leng,
I hming hung mawina ding,
Nunghak, tlangval kan theitawp kan suo,
I par mawi min suo rawh.

Aw Pathien, kan ram kan pek che,
Kan ram lungmawl, inthim hi;
I var mawi chun hung sunvar la,
Mal mi hung sawmpek rawh aw

Cachar, Haflong, Aizawl, Manipur,
Inpumkhata ngirin,
Ei hnam lungmawl indar hi,
Kei khawm tuma varna thra zongin,
Hma tieng ke pên ei tiu.

Hnam dang dan thrahai la veng ei ta,
An dan suol thîk lovin,
Inphumkhata ngir tlatin,
A pawng bik a phai bik um lovin,
Hma tieng ke pen ei tiu.

Dar ang ei lengna ram hring dum duoi,
Zai tina ei chawi hlak,
Zai tin rema ei chawi lai,
Pi le puha’n ropui an rêlna,
Kan ram hi kan ro hlu.

SALULÂM HLA (an ṭhumna)

K- Ṭuon fe lo raw e, ṭuon fe lo raw e;
Ka khuoa mihai, ṭuon fe lo raw e.

M- A-ia maw e, serkhuo kan khâm e,
Puisai lâng pat bang kan sai e;
Serkhuo kan khâm e.

K- Lailên tuol zuong ṭum, lailên tuol zuong ṭum;
Zing le Rama e,lailên tuol zuong ṭum.

M- Suonglung rawn chawi e, suonglung rawn chawi e;
Zuo Lerin suonglung rawnn chawi e,
Lailên dêng thlûr e.

K- Ka lovauvah e, mi pâu bang reng e;
Mi hi nâi mawh e, sa hi nâi mawh e.

M- Mi hi nâi mawh e, sa hi nâi mawh e.
Lungdâr khaina sâwntêl tawnna,
Sâwntêl tawnna e.

K- Chal hrâwk inhrâwk e, Chal hrâwk inhrâwk e;
Zolam sakhi e, chal hrêk inhrâwk e.

M- Theipui rawn huom e, theite rawn hmuon e;
Zolam sakhi chal hrêk inhrâwk,
Chal hrêk inhrâwk e.

K- Lâk lovin ṭul e, lâk lovin ṭul e;
Âwnthing puolva e, lâk lovin ṭul e.

M- Zâwl lovin ṭul e, zâwl lovin ṭul e;
Nghâknu hmelṭha,
Zawl lovin ṭul e.