Ankhasuo, August 15, 2021, Virthli (ONP): Hmar Peoples' Convention (Democratic) Manipur Region chun vawisûn India-in zalênna a hmu, kum 75 a tling champha ursûn takin Sinlung Camp, Ankhasuo-ah an inser. Hi huna hin India ram ta dinga hringna hlu tak tak inhlântu le zalênna suoldawktu hai po po an inzâzie suklangnain salute an pêk. Hieng lai zing hin Tuiṭhaphai-a khawm HPC (D) Manipur Region, Town Command-na hnuoiah The 75th Independence Day ursûn takin an lo inser ve.
India-in zalênna a hmu theina dinga an thiemna le an varna hai lo suo ve tu, an hringna chen thâp ngama ram zalênna dinga hmalatuhai po po chu inzâna insâng tak an pêk thu le, an theinghil naw ding thu an hril. India mi le sa an nina angin iengtik lai khawm ram ta dingin a ṭûl chun kal an pên pei ding thu an hril bawk.
