~ Jami Darngawn
Hun iemani chen a'nthawka lo hril lawk le nghakhla um em em el Hmar Holy Bible Golden Jubilee chu a tak ngeia hmang/tlung theia ei um leiin hun ṭha mi petu Lalpa kuoma ei lawmthu um raw seh.
Nov 24, 2018 zantieng chun ka pasal leh kan nauhai maksanin Lalpa hratna ringsanin a mi'n an hril Hmar Holy Bible Golden Jubilee lawmna hunser zankhatna hmang ding chun lmphal a'nthawkin Churachandpur panin (inkhawm ṭina kir nawk el dingin) kan tlan tlung a, lampuia chun Pathien thu le hla ngaithlak malanin ramtin ka ngaituo a, Pathien-in Hmar hai Ami hmamgai bîk ziet dam ka ngaituo'n ropui ka tiin, Hmar nupui ka lo ni ve thei dam hi vangnei kan ti hle a nih.
Awleh, lekhabu po po laia lekhabu ropuitak le thil thawtheitak Pathien inthuok khum Bible chu ei ni ṭawng ngeia tiem thei dinga lo buotsaituhai, lo inrimtuhai le tha le zung pawisa lo sengtuhai po po chunga ei lawm bek bek a nih.
Kum 50 lai ei ni ṭawnga tiem thei dinga lo um Hmar Holy Bible hi iengtin tak in am aw ei tiem rimsie ding chuh ! "Rimsie" ti tak hi "Tiemrawn/tiemtam" tina a nih. ka Bible le, i Bible chu ei tiem rimsiet a ṭul a nih, nuoma pindana sieṭhat mei mei dingin a pâmhmai taluo a nih.
Bible thilthawthei ziet tam tak hril ding um a tih. Sienkhawm, pakhat char hung suklang ka nuoma Lalpa ropuina dingin.
Vawikhat chu nuhmei inkhawm kan nei hun ah kan ruolnu pakhat chun hieng hin a hril "Kan gate bula sunchang lai hin thil ri a hung um zi a, unau Meitei hai chun khawhri a um a nih an mi ti pek a, vawikhat chu kan gate bula ka van ṭhunga, chu thil ri ngak ding chun, amiruokchu ka lo inlusu pal a, ka inlusuk lai tak chun kan gate chu a hung inri rup'a ka har phut a, chuongchun a zinga chun kan gate inrikna hlak a chun Holy Bible ka sie tah a, chutak a'thawk chun kan gate lai thil ri reng reng a um ta nawh" tiin a hril a nih.
Ani ngei el Bible hi Vânram lampui mi khawkhmutu, iengkima ei iengkim, taksa le thlarau damna, lungngai laia thlamuongna mi petu, ṭap huna chawl hadamna mi petu, hlimlai khawma lawmna suk kimtu a lo nih.
Tiem dinga ṭha tak chu Holy Bible a nih.
