Responsive Ad Slot

SETAN HMANGRUO ROCK MUSIC LE THALAI NUN

Thursday, August 11, 2016

/ Published by VIRTHLI
~ Ramthienghlim Varte

Setan hmangruo Rock music le Thalai nun ti thupuia ei nei hih Rock music inbul deu hleka an tan dan hrietchieng a tulin an lang a. Kum zabi 18 lai vela inthawk khawthlang rambung (Western Country) hmun hrang hranga um Kristien, abikin Thalaihai lai Ramhuoi (Setan) be nuom ngawi ngawi an um a nih ti chanchinbu an lo insuo zeu zeu ta hlak a. Milim (picture) mak le danglam, mawi naw le tha naw tak takhai siemin chu hmaah bawkkhup le dingthathuonin an lo biek ta hlak reng a nih. Chuleiin, ‘HELL FIRE CLUB’ ti khawm indin a hung ni ta nghe nghe a. Chuonglaia an hotupa chuh Crowley Aleister a nih. Ama chun England rama hmun lien deu an huonna thatawk taka siemin ‘Hi hmun hih Setan a huongsung , an lalna le rorelna hmun a ni a; Europe ram po pova mitawrawt tak ka na, ka hming khawm Sahuoi No 666 (The beast 666) a nih’ tiin.

Hi pawl hung indar lien peiin kum 1966 khan Anton Lavey le thalai tam takin ‘SETAN PAWL KAN NIH TAH’ tiin an inpuong tah a. Hi pawlin an thupui tak chuh mivar hmingthang Darwin a thuthlung (theory) ‘Struggle for survival of the fittest’ (A ru no no suok) ti hih a nih. Mihriem chuh taima, thilthawthei le a hrat hrat hung lienin indersuok an ta, tukhawmin ei sawisel thei nawh. Chuonghai chuh Setan a rawngbawltu le a tirko ning an ta, ei chungah rorel an tih. Setanin khawvela hlimna le thil po po a nei vawng a, khawvelah Lalna a chang ta ie, Lucifer khawm a tho nawk tah. Chuleiin,  vawisuna thalai  le mihriem la hung pieng dinghai khawmin hre seng ei tiu ti hih an slogan ropui tak a nih.

Setan pawlhai chun mawphurna hiengang hin an siem a :
Setan:  Hremhmun Lapa, mi sietna ngawt ngaituo le thaw hlak.
Lucifer :  Eng, Boruok, Ni, thla le Arasi chunga thuneitu.
Abadon :  Thil suksetu.
Bite:  Hremhmun enkawltu.

ROCK MUSIC KHAWVEL :

Rimawi khawvel tuipuia cheng le inhlieu tamlem chuh Thalaihai hih an na, chu rimawi remkhawm, ngainuomum le mak takel chuh Rock Music hieng heavy metal le vawisuna rapes eiti hai leh angkhata ngai thei a nih. Hi Music mawi dan chuh country, blue eiti hai ang hih a nive naw a. Thalai thisen hratlaihai lungril la peng thei dinga umzie nei, inri bung bung, khawvel hlimna chen nuomhai nun le inmila rimawi remkhawm a na. Nunghak-tlangval nun hlimna tuipuia inhlieu nuomhai tading ngaituoa rimawi fuonkhawm ti inla suol kher naw nih. Hi Setan le a pawlhaiin an hriet tlat leiin an ram lakna dinga hmangruo pawimaw tak, thalai nun hnena dinga an ngai chuh  Rock music  a nih.
Chuleiin, hi rock music hmang hin setanin ram a lak hrat em em el a, kum 1970 hnungtienga an ulbum tamlem chuh Setan tadingin an lo inhlan tah a nih. Entirnan, Steve Tailor hla – Loose hearted lay sleepy was she/Love for the Devil brought her to me; Venom hla – Sacrifice, Oh! So nice to Lucifer my master, Bring the chalice, Raise the knife welcome to my sacrifice, Plug the dagger in her breast, I insist sacrifice, Demon rejoice sacrifice; AC/DC (Australia)- We’ve back in black, Evil walks, Highway to hell…an member Billward  lem chun ‘ Setan hi ka Lalpa dittak a nih’ a ti a, an bass guitarist  chun ‘Kei hi ka nih Lucifer an ti pa chuh’ tiin. Chuongang peiin Jimmy Page ( Led Zeppelin ), Ozzy Osborn, Mick Jagger, Hall Oates etc. haiin an tlawpin an zui duol duol el tah a nih.
Anton Lavey Setan Kohran indintu hi Black Pope tiin an kova. Setan Baibul ziektu hmasatak a nih. Ama chawimawina dingin Eagles haiin Hotel California Ulbum hi an inhlan nghe nghe a nih. A ropui hem hem hle. Chu chauh chuh an nawh an lar bik deu deu hieng KISS group a mi Peter Criss hai lem chun Kristien haiin ‘Lalpa iengkim thawthei an ti hai nekin Setanin a lo thaw thei lem vawng, kei hi Setan Tirko ka nih’ tiin.

Chun, Heavy Metal Group hieng – Judah Priest, KISS, Strypper, Bad Company, Blue Oyster, Cult, White Snake, Styx, Scorpion, Black Widow, Hawkind, Queen, Grateful dead, Poison, Black Sabbath, Santana, Alice Cooper le dang danghai hih satanic vawnga ngai an hung ni  ta pei a.

An hming umzie thenkhathai:
Styx – Name of river surrounding Hades (Hell).
KISS – Knight in Satanic Service.
Alice Cooper - Name of 17th Century witch.
Black Sabbath – Anti-Christ
AC/DC- Anti Christ/ Devil Children (Bisexual)
Eagles – Name derived from the major in the Indian Cosmos ( American Indian)
Grateful dead –Origin from occult
Iron Maiden – Medieval torture implement
Queen – Name comes from slang word-Homo sexual
Setan tadinga an hla inhlan thenkhathai :
Santana – Black Magic women
Queen – Tear it up
Strypper – Go to hell with the Devil
KISS – Heaven on fire
Juda Priest – Pain killer, Breaking the law.
Hienghai naw Group thar tamtak an hungsuok nawk pei a, chuonghai chuh update ta chuong lovin kum 2007-a ziek tah ka hmusuok hlauva ka hung insuo tawp el a nih.

THALAI LE KHAWVEL RIMAWI :
Hi Rock music hmangin Khawtlang rambung (Western country) tamlem a thalaihai nun suksietin setanin ram a lak nasa em em a. Nunghak-tlangval nun hlimna suola thuoilutin an um a. An hmaa thil tlungding ngaituo lova inhawi taka khawvel nun chen an nuom a. Setan le a rawihai thuthlung Rock music member haiin an ngaisang em em, zalen taka nuhmei-pasal thil le khawvel an hawi thei dandinga an ngai tak nun a um khah an thupui tak a hung ni tah pei a. Nu le pa maksanin, In le lo nei lovin an nuom ang angin an khawsa a, chu nun hlimna chun sawt a dai si naw leiin an lungril sawl hadamna ding ngaituo’n inruithei chi hrang hrang thaw a hung ngai ta pei a. Chu khawm chun sawt a dai chuong si naw leiin a tawpah boralna le thina’n thla a zar khum ta hlak a nih. A pawi em em.
 Chuleiin, nitin thina varuom hraw’n an liem duol duol zing a. Biekin ah thalai hmel hmu ding an tlawm tah em em a, Wales ram takngiela khawm hmun tamlema Biekin kharin a um tah. Hi lei hin  Rock music eiti hai hih damdawi inruithei chi hrang hranghai le inkawptlat le inzawl, sazang inpe thei ang tluk an nih tina a ni chuh.
           
Canada sawrkar chun Drugs leia buoina tamtak le harsatna an tuok nasa em em leiin a hungsuok dan le suktawp a ni theina dingin LE DAIN Commission an din pha hiel a. Hi commission reportna chun  Pop Musician haiin music an remkhawm ding reng reng chun inruithei thil chite bek a thangnaw chun a famkim thei naw a, an concert a hlawtling thei naw bawk ti a nih. New York khawpuia Annual International Music Conference a umnaa Mr. Paul Marshal-in a hril dan chun European country ah Music record company le  publisherhai hih khawvelah sum hmu rawn pawl tak an na, an sum hmu 50% (100 pei a 50) hih inruithei thil inchawkna’n an hmangral vawng a nih tiin a hril bawk.
           
America rama hin hun iemani chena inthawk tah kha inchukna tieng a tlahnuoi hrat em em a, mithiem inlar le Technology tienga filawrhai reng reng a tlangpuiin India, China, Japan le a ram puotienga thalaihaiin hma an khal lem tah a nih. Hienga an fe zing a ni chun vawisuna super power neia luling taka nuomna tieng tieng a vaikuol ang hi ni zing naw nih. An ngirhmun pangai neka inhnuoia um an inlau leiin ramdang mithiem le varhai an laklut nasa reng a nih.Hienghai hih nakie chuh an tadingin hembawk an chang ngei ding a nih. Hieng po po ienglei am ning a ta. Thalai nun fe suol ra a nih.

THALAI KHAWVEL NUN :

Tlangmi lai khawm Hmarhai hih ramhuoi ko thiem, thiempu hnama inngai, dawihla mawi tak tak siemthiem le  insam thiem ei lo ni hlak a. Kristien sakhuoa ei hung inlet hnung khawmin chu zie-rang chuh ei sawm tung pei a. Pathien ram lakna hmangruo pawimaw tak a hung  ni ta pei reng a nih. A hrila hril nek hmanin a saka saksuok hin ei lungril khawm an no awl lem. Nunghak-tlangval inngai melna hmangruoa ding khawmin ei hmang tangkai em em a. Tlangvalin saihla mawi thanglo chun nunghak lungrilah hmun a changzo tak tak ngai naw bawk. Chuleiin, ei thalaihai khawm rimawi khawvel tuipuia inhlieuva, nunkhuo chena phutawk ang peia tukhawm ngai biklo an ni deu vawng.

Hi lei hin  eini lai khawm setanin remchanga hmangin thalai nun a suksiet nasa em em a. A chunga ei hril Music mak tak takel hai hih a bul intanna le a umzie ngaituo manglova lo khukpui ve ei tam. Khawtlang (western) nun ei ngaisang a, an thawdan dan hei thawve hih changkangna ah ngaiin  rimawi khawvela ei thalai tam takhai hla ditzawng le ngaitlak nuom zawng chuh Rock music satanic tiengpang hih a hung nilem vawng hlak a. Ei thalai chanpui khawlien-khawte hmun dang danga um haiin an lo laksawng nawk pei bawk. Chuongang chun eini lai khawm setanin remchanga hmangin  hriet naw kar thalai tam tak a mi thuoi hmang pek zing a nih.

Hei belsa nawk met inla, eini lai chauh ni lovin, tlangram chanchintha hunglutna Senvon a inthawk khawtin deuthaw ah kohran rawngbawlna theitawp suoa ei thaw ngiel khawmin zu le damdawi chi hrang hrang thawpawl thalai an an pung tuol tuol a. Khaw thenkhata lem chuh hniengzu khu hlut hlut a urin sawrkar, kohran le NGO haiin thangpuina bufai an pekhaihai an thapral ngam a nih. Tam tlak naw ngaina a um nawh. Khawtlang tlawmngaina a tlawm ta a, khawsung roreltu le venghimtu dinga organization Village Defence Party-hai inzana khawm a tlawm tiel tiel ve an tah. Thalai inchukna tienga hmasawnna ding reng reng inhril var le lampui tha dapa hmalak danding chuh a vang khawp el. Chuongchuh, vawisuna ei thalai tam lem hai nun a nisi chun ei hmakhuo chuh iengang lawma inthim am ni tang a ta. Vawisuna thalaihai hih zinga Kohran le khawtlang thuoitu ding an ni si a.
Khawvel changkang ang peiin ei thalaihai nuom zawng khawm an tlak danglam hrat em  el ta a. Khawvel thila khawmpui lien  organization hrang hrangin an rawt chang khawm an ri bung bung a thang naw chun a hlawtling thei tak tak ta naw a. Chubakah, Kohran Inkhawmpui, Biekin inkhawmna le hlapawlhai hrim hrim Key board le dang dang hmanga inri bung bung a thaw hi ei nuomdan a hung nive ta pei a. A tha, lawm a um. Pathien inpak ei na, Lal David khawm perkhuong tingtang hrui sawm nei hai chen hmanga rimawi remkhawmin Lalpa an pak hlak. Solfa bukima thalaihaiin hne deuva hmathuoiin inkhawm an hei keihruoi a inhnuk ut utin, infaw tla ut ut a Pathien chawimawina hla ei hei sak changhin chuh a ropuiin, Lalpa Pathien khawm a lawm hle dingin ka ring hlak.

Amiruokchuh, tulai thangtharhai hih birthday annawleh function chi hrang hrang Biekin inkhawmhai chenin anri bung bung a thang naw chun ei inkeikhawmin ei insukphur zo ta naw nin an lang leiin ei fimkhur nawk zuol theina ding le beng sukvarna dinga ei hei thaikuol a na. Khawthlang (western) rama thil hungsuok ta phawt hi a tha bek beka ngai vawng naw in la. Rimawi khawvela Setan hmangruo tamtak Rock music, heavy metal, rapes le dang dang hungsuok thar mekhai a inthawk ei lo  inveng fimkhur nawkzuol theina dingin ei hung ziek a nih. Hrechieng dingin thalai le tiemtuhai ei infiel takzet a. Nu le pahai khawmin ei thalaihai music ngaithlak nuomdana inthawk an nungchang hriet tuma enkawldan thiem dingin ei bengvar deu hlek a tul ta hle.

Don't Miss
© all rights reserved
made with by Simon L Infimate