Boundary thuah joint meeting nei
CCPUR: Zani 11:00AM khan District Council Hall, Tuibuongah District Boundary le inzawmin Mr Langkhanpau Guite, Chairman, ADCC inrawinain ADC/CCPur le Village Chief han joint consultative meeting an nei. Village Chief tienga inthawk United Chief Committee (UCC), All Tribal Chief Forum Manipur le Thangting Area Chief Assn. a member khuo lal 32 an thang.
Mr Genneikhup, EM, ADCC chun, Army le BSF hai anga Lal han ram le leilung an venghimna leia District Boundary humhal theia um a ni thu. Manipur Assembly in Aug. 31, 2015 nia Bills 3 an passed hai JAC, JPO le student bodies hai ta dinga passed ni lovin Lal hai ta dinga passed a nih tiin a hril.
Thil pawi tak chu KukiNaga conflict le ADC kum 20 defunct a ni sunga Manipur sawrkarin hill district ram lak dinga plan& policy a lo siem, directa a lak theinaw leia Police jurisdiction ang zawnga ram lak a hung tan hi a nih tiin a hril bawk. Manipurin kum 1972 a statehood a hmu hma 1971 khan Article 371C hnuoiah ADC indin in a um a, sienkhawm vawisun chen hin power pek an la ni naw a, 6th Scheduled hnuoia ti lo Article 371 C ah tribal hai himna ding a um nawh. Assembly bill vawikhat passed hi hmang nghal a ninaw khawmin kum 30/40 hnunga hmang thei, kum 40 liemtaa Jammu & Kashmir Assembly in bawngsa zawr pha lo dinga bill a pass tuhin hmang a hung ni a, muslim tamna nisien khawm bawng that khap a hung nitah tiin a hril a, hi thua hin Bills 3 hai tha taka en a, dodal dingin Lal hai a ngen. Hmang nghal ninaw sienkhawm ei tu le te hai thanga hmangin a hung um ding a nih tiin a hril.
Shillong highway intep tak sawrkarin keklien a nuom khawma a thaw thei nawna san chu 6th Schedule hnuoia an um lei a ni thu; Politicians han tlangmi hai ta dinga Bills 3 han harsatna an tlunnaw ding thu an hrilna thuah Justice T.Vaiphei, Acting Chief Justice Guwahati High Court in tlangmi hai a tawk ngei zie, hidden agenda tam tak a um nia a hril thu le Politician hai thuhril mak a ti thu a hrillang bawk.
United Chief Committee a representative hai chun, Kangvai areaa Police station 1 sie dinga Minister Phungzathang, T. Manga Vaiphei le T.N. Haokip kuoma an ngenna MLA han ngaisak lovin Phoubakchau a Police station sie a ni thu an hril.Thangting PartI Chief Assn. President chun, Samulamlan Block chu boundary thua buoi um na tak a ni thu a hril.
Thangginlun Haokip, Chief of Bijang Tampak chun, Demarcation felnaw leiin Bijang Tampak khawm CCPur Districta um a ni lai zingin Police Station Moirang, SubDivision hnuoia um, TD Blockah Samulamlan hnuoia um le Postal station Moirang, Revenue Bishnupur District hnuoia um a ni thu hrilin ama ngei khawm a buoi hle niin a hril.
Hmar Inpui General Assembly vawisun tan ding
CCPUR: Kum 2015a lo rel ta angin Inpui (HI) 8th General Assembly chu Feb. 1213, 2016 haia hin VTI, Rengkai, Churachandpur hmuna nei ning a tih. Mizoram, Cachar, NC Hills, Tripura, Meghalaya le Guwahati haia inthawk palai (delegates) hai chu Feb. 12, 2016 hin hung tlung tawl an tih. AntiTribal movement le inzawma bandh kotu hai chu Assembly palai hai zalen taka an inlawn phal pek dingin Hmar Inpui GHQ chun ngenna a siem.
Assembly rorelna Feb. 12, 2016, 11:00AM hin tan ning a ta, hi hma zing dar 10:30 in Flag keipharna hun hmang ning a tih.
Bandh puong thuah Magistrate in L&O enkaitu ding a ruot
CCPUR: Tribal Martyrs hai ruong Feb. 13, 2016 nia vui dinga UPF/KNO in thutlukna an siem ni a, KNO President in zani hmasaa KKL Complexa Joint meeting huna a puong le inzawma Martyrs hai ruong vui la remti lo Pawl tum tum han Feb. 11, 2016 zanrila inthawk Feb. 12, 2016 zanril chen CCPur khawpui sunga total shutdown/bandh thaw an tum le inzawmin District Magistrate chun zanikhan Order insuoin Law and Order enkawitu dingin mi 5 a ruot a. Chuonghai chu Dist. Hospital Chiengkawnpangah Lalsuong Gangte; Police stationLighthouse LaneSangremsiama; Nehru Marg Junction Shri Damu Singh; DC’s Office Complex Lalthanzam Fimate le Forest Gate, Tuibuong areaah Jangminlun Lupho hai an nih.
MicroEntreprise Devpt. Training tan
CCPUR: Zani 10:00AM khan EAC Training Centre, Rengkai Roadah Relief & Development EAC huoihawtna le NABARD Regional Office sponsorednain ni 13 aw ding Micro Enterprise Development Training tan a nih. Training hi Pu Lal Hossan, Vice Chairman, ADCC in khuolliena thangin a hawng a, Chief host in N. Hauzel, LDMSBI le Guest of honour in Thangchinkhup Guite, DDM/NABARD hai an thang.
Pu Lal Hossan chun, Piggery le Poultry hai hi project/scheme tenau ni lo, capital tam tak tulna a ni leiin hieng tiengpang lunglut hai ta dinga training nei a pawimaw thu a hril. Vawksa le Arsa fa ei tam leiin demand an sang leiin sungkhuo chawmnaa hmang thei a ni thu a hril bawk.
Training hi Feb. 25, 2016 chen aw ding a ni a, SHG le pawl tum tum training a hin an thang a, zanita technical session a chun Thangchinkhup Guite le N. Hauzel han thupui tum tum hmangin training an pek.
Hlawtling lawmpuina an buotsai
CCPUR: Feb. 15, 2016, 11:00AM khin Saipum Public Groundah Hlawtling lawmpuina le Pathien kuoma lawmthu hrilna hun hmang ning a ta, hi huna hin LM Khaute, IPS, DGP (Manipur); N.Neihsial, IDAS, Addl Controller General, Defence Account; GK Chin Khaute, IP &TS, Finance Adviser, NEC le C.Lalrammuana, IPS (retd), Member of MPCS Mizoram hai thang an ta, thuhrilna hun h mang bawk an tih. Zantieng lawmna ruoi kiltlang an tih.
Lok Adalat nei hun ding sawn
CCPUR: Feb. 13, 2016 a Chief Judicial Magistrate Court, CCPur a Lok Adalat nei dinga ti chu Law & Order ngirhmun thatnaw leiin March 12, 2016 a nei lem dinga a hun sawn hlat a nih tiin Secretary, Churachandpur Legal Service Authority thusuok chun a hril.
David Headley in Ishrat Jehan LashkareTaiba (LeT) a nih tiin zanikhan a hril
NEW DELHI: Kum 2008a Pakistan terrorist hai Mumbai khawpuia an chetna le inrawlna neia intum le man, tuta US a hrentang mek David Headley chu zanikhan US a hmun pakhata inthawk Video conferencing fethlengin Mumbai Special Court hmaah inlangtir nawk a nih. David Headley chun Ishat Jehan kha LashkareTaiba (Let) operative a nih tiin a hril. Ishrat Jahan kha kum 2004a fake encountera intuma midang pathum hai le Gujarat hmuna kap hlum an nih.
Headley chun LeTah women’s wing an um ngei thu, chu taka incharge chu Abu Aiman Mazhar a ni thu a hril bakah LeT in Naval wing khawm an nei thu, Sajit Mir hmaa Naval winga an hotu tak chu Muzammil Bhatt a ni thu; mi pakhat Abu Dujata in Muzzammil an hmelhriettir thu le a hnungin India rama Kashmirah inzinin Dujata le Muzzamil hai hi an hmupui thu Headley hin a hril bawk. October 12, 18 le 30, 2016 hai khan Mumbaia Reliance webworlda lutin idimmigration.usa hmangin internet a hmang thu hrilin a signature khawm entry bookah a um thu, kum 20062009 inkar India rama a um sungin mobile number hran 23 a hmang thu a hril bawk.
Ishrat Jahan le midang 3 kap hluma an umna Congress in fake encounter a nih tia intumna an lo siem thuah BJP chun Congress leader Sonia Gandhi le Rahul Gandhi hai chu ngaidam inhni dingin an phut. BJP party secretary Shrikant Sharma chun, kha huna Gujarat CM Modi that an tum lei le Gujarat statea sakhuona hmun hai bei an tum leia Police hai le inkaptuonaa Ishrat Jehan le midang 3 hai kha kap hlum an nih tiin zanikhan reporters hai kuoma a hril. Security Agencies hai chun Ishrat Jehan kha terrorist a nih tiin hril hai sienkhawm kha huna UPA sawrkar chun hre nuom lovin investigative agencies hmang suolin politics thila keilutin Modi le BJP beinaain an hmang a nih tiin Mr Sharma chun an tum. Hieng laizing hin Congress chun Headley inpuongna chu suizui dingin an ngen ve.
Headley hin zani Thawtanni le Thawleni haia video Conference fethlenga Mumbai special court hmaa inlangtir a ni hunah LeT hai Mumbaia an chet ding kha Pakistan Intelligence agency ISI le Pakistan Army hai khawma hrietpuiin an thlawp niin a lo puong ta bawk a nih.
A let hnia damnaw khum belsa
IMPHAL: Tlangram biela damnawhai ta dinga thil remchang lem a hung ni theina dingin District Hospital haiah damnaw khum umzat chu a let hni peia belsa ning a ta, Kangpokpi le Moreh Hospital haia khawm damnaw khum 50 ve ve sie ni tang a tih tiin zanita Health Minister, Phungzathang Tonsing in District Hospital fai tak lawmman a sem huna a hril. District Hospital fai tak lawmman Rs. 50 lakh chu District Hospital, CCPur in a dawng a, Commendation Certificate District Hospital Thoubal in a dawng a, hi taka hin sumfai Rs. 3,00,000 a thangsa.
Nuhmei suolluitu mi 2 observatory homeah
IMPHAL: Ngairangbam Loukon, Imphal West District a nuhmei suolluitua intum pasal 3 mana um hai chu zanikhan District Session Courtah inlangtir an ni a, an rengin kum tlinglo an ni a, mi 3 hai laia pakhat baila insuo le pahnihai chu Observatory Homeah sielut an nih.
Hun tiemchin u m lo total blockade
IMPHAL: Jiribam District Demand Committee (JDDC) chun ni 5 sung Economic Blockade an thaw zo hnung khawma an thil ngen ngaisak a ninaw chun NH37 (ImphalJiribam Road) ah hun tiemchin um lo total blockade an thaw ding thu an hril. District puitling ngennain ni 5 sung aw ding economic Blockade zani hmasa zanrila inthawk khan JDDC chun an lo thaw tan ta a nih.
Feb. 16 a inthawk inchuknainhai khar
JIRIBAM: Jiri College fullfledged Government College a hlangkai ding an ngenna State sawrkarin a supuitling peknaw leia lungawi lo le an thil ngen nawrnain Feb. 16, 2016 a inthawk khin Jiribam SubDivision huop sunga inchuknainhai po po khar tan an tum thu AMSU, District Committee, Jiribam, DESAM Local Council, Jiribam le KSA Jiribam District han thusuok an siem.
Jashodaben in RTI a file
AHMEDABAD: Prime Minister Narendra Modi nuhmei Jashodaben chun Gujarat Chief Minister a ni laia passporta apply naah a nuhmei neina (marriage related) documents a peklut ti chipchier taka pe dingin Regional Passport officeah RTI application a pek. Nikum November thlaa passport a ngen hunah PM Modi le an innei ngei ti finfiena marriage certificate annawleh Joint Affidavit a peklut theinaw leia a passport ngenna hnawl pek a ni leia RTI hi passport officea a file a nih. A application dawnna sawtnaw te hnunga pek a ni ding thu regional passport Officer ZA Khan chun a hril. Modi hin kum 2014 Lok Sabha election huna affidavit a peklut hunah Jashodaben hi a nuhmei nia a zieklanga inthawk Modi hi nuhmei lo nei ta a nih ti hrieta hung um chau a nih. Modi le Jashodaben hi innei chu an innei ngei a, sienkhawm um hmunkhat lo an nih.
Hanamanthappa a thi tah
NEW DELHI: Siachen Glaciera vur intawl leia India sipai 10 vur in a vur khum hai laia hring le dama sansuok Lance Naik Hanamanthappa Koppad chu zani 11:45AM khan Army Research and Referral Hospital, New Delhi hmuna a thi tah. Hanamanthapa hi hmu sansuok a ni hlim chun khawmuol a la hriet a, sienkhawm a ngirhmun hung se deu deuin, zani hmasaa inthawka kha a ngirhmun hi hung derthawng zuol a nih. L/N Hanamanthappa hi vur intawlin a vur khum ni 6 hnunga dama sansuok a nih.
Hanamanthappa hi a hung damsuok nawk theina dingin an taksa bung hieng Kal, Thin le a dang dang mamaw a nei chun a thlawna pek an inuom thu Mrs Nidhi pandey, Lakhimpur Kheri, Uttar Pradesh le Mumbaia um exNavy Sailor S.S. Raju hai chun zani hmasa khan an lo puong a nih.
Hanamanthapa (33) hin a nuhmei Mahadevi Ashok Bilebal bakah kum 2a upa nau nuhmei Netra Koppad a thisan.
SHAIDC in Election huoihawt dingin an ngen
AIZAWL: Sinlung Hills Accord Implementation Demand Committee (SHAIDC) chun February 10, 2016 khan Mizoram Chief Minister kuomah, SHDC election an rang thei anga huoihawt dinga an ngenna lekha an peklut.
SHAIDC chun an ngenna hi February 27, 2016 hma ngeia sukpuitling dingin Mizoram CM an ngen a, tuta inthawk thlakhat sunga assuarance an hmunaw chun High Courtah an khing ding thu an hril bawk. SHAIDC chun, Mizoram sawrkar le HPC in July 27, 1994a inremna thuthlung an ziek a inthawk kum 22 an vawi hnung khawma vawisun chena Accord sukpuitling a la ninaw chu pawi an ti thu; Mizoram sawrkarin Sep. 26, 2013a notification an suo dungzuia SHDC chu mimal kutah thuneina sie ta lova, an rang thei anga election buotsai dingin Mizoram CM an ngen bawk a nih. An ngenna lekhaa hin SHAIDC Chairman Vanlalsiama le Secretary Lalparkunga hanhming an ziek. (Virthli)
NCHAC Spl. Session nei; Hojai peithlak
HAFLONG: NC Hills Autonomous Council (NCHAC)a rorelna cheltu BJP inhning leia Congress in majority an claim le inzawma Assam Governor in No Confidence Motion/ Special Session nei dinga a lo ko ta angin February 11, 2016, 10AM khan Pu Ngamrothang Hmar, Chairman, NCHAC inrawina in ‘No confidence motion’/special session nei a nih. Hi huna hin Chief Executive Member ni lai Pu Niranjan Hojai chun hratna a changzo tanaw leiin NCHAC Executive bodya inthawk peithlak a nih. Sixth Schedule (as per Indian constitution ) dungzuiin darkar 48 sung ngeia Chief Executive Member ding thlangna nei ding ti a ni a, hi le inzawm hin Feb. 13, 2016, 9AM khin NCHAC Chairman inrawinain CEM thar ding thlangna Council Session Hallah nei ning a tih. (Virthli)
Sakei in pasal pakhat a se hlum
LAKHIMPUR: Zanikhan Kheri division huop sunga Salempur, Mailani range ramhnuoiah Sakei in pasal kum 50 mi Raees chu a se hlum niin Divisional Forest officer Neeraj Kumar chun a hril. DFO chun Raees sunghai kuomah zangnadawmna Rs. 10,000 pek dingin a puong bakah dan dungzuia zangnadawmna pek an ni theina dinga hma a lakpui ding thu a hril.
Albendazole fak leiin naupang 200 an damnaw pha
NEW DELHI: February 10, 2016 nia National Deworming day hmang le inzawma Union Health Ministry huoihawtnaa India ram pumpuia naupang hai kuoma Rulrukut damdawi (albendazole) infaktirna runpui nei a ni tum khan naupang 200 chuong ding zet chu an damdawi fak leiin an damnaw pha nia hril a nih. Madhya Pradesh le Haryana haia chun naupang thenkhat an inluok a, thenkhat an phing a na a, thenkhat khaw hre lovin an um a hril a nih. Naupang thenkhat hospitala admit an ni a, sienkhawmzantieng huna insuoktir nawk vawng nghal an nih.
Mobile Towers 1,357 inthut ding
NEW DELHI: Sawrkarthlungpui chun Maoist helpawlhai hratna Chhattishgarh, Jharkhand, Odisha, Bihar, West Bengal le Maharashtra state haiah Mobile towers 1,356 an din tah. March, 2016 thla tawp chena sawrkar chun hieng states 9 haia hin Mobile tower 2,199 indin dingin project a siem a nih. Hi thila sum seng dinga riruong chu Rs. 3,046 crore a nih. Mobile Tower indinna sin hi BSNL in an thaw a nih. Tulai hnai khan Union Home Ministry chun mobile tower 175 indin belsa dingin remtina a nei a, mobile towerhai hi Police Stations or camps le paramilitary forces camps/post haiah indin dinga ti a nih.
India rama Australia palai dingin Sindhu
MELBOURNE: Indian origin Harinder Sindhu chu Australia sawrkarin India rama a palai (High Commissioner to India) dingin zanikhan a ruot. Sindhu hi India rama pieng, naupang a ni laia a sunghai le Australia rama inpem an nih. Tuta India rama Australia High Comissioner ni lai mek Patrick Suckling a hmun a hung hluo ding a nih. Sindhu hi Department of Foreign Affairs and Trade bakah First Assistant Secretary of Multilateral Policy division hai lo chel tah; Moscow le Damascus haia Australia ram palai sin lo thaw ta a ni bawk. University of Sydneya Bachelor of Laws le Bachelor of Economics degree la a nih.
US in Pak. kuoma thangpuina $ 860 million
WASHINGTON: Barack Obama President nina hnuoia US sawrkar chun Pakistan thangpuina dingin USD 860 million pek dingin riruong a siem a, hi laia USD 265 milion chu military tiengpanga hmang dinga ti a nih. Sum hmangna ding danghai chu helpawlhai dona ding, nuclear ralthuom venghimna ding le India ram le inlaichinna siem thatna ding tihai a nih.
----------------------------------------------------------------------------------------------------------------
VAWISUN THUPUI
Lalpain, ‘Van ka thungpha a na, Hnuoi ka kepha innghatna a nih; In ieng angin am mi bawlpek in ta? Ka chawlna hmun khawm iengang am a na? Keia kutin hieng thil iengkim hi ka siem naw am a nih? a tih, ti ziek ang khan. ~ Thilthawhai 7:4950
Editorial
Thangruol hi
Thuvar inlar em em el, “Thangruol hratna a nih” ti hi an dikzie hre inlakhawm, thangruol hi thil harsa tak a ni a, thangruol naw leia sietna, buoina le harsatna tlung hi hril ding tam tak a nih.Thingher pakhat le thingher intelkhawm tekhin thu hrie kur si hin, intelkhawm le thangruol chu harsa ei ti a, ei thangruol nawzie chu ei um dan le ei thu hril haia inthawk hin an lang chieng khawp el. Thangruol thei ni inla chu tuta ei ngirhmun ang chau hin chu um ta nawng ei ta, hmasawn ei ta, ngirhmun pangngaiah um ta lovin ngirhmun thar le insang lemah chuongkai ngei ngei tang ei tih. Ei thangruol naw leiin hmasawn nekin ei hnung sawn lem niin an lang. Chik taka ei ngaituo chun ei hmakhuo ding hi an thim hle niin an lang.
Ei thil dit le ngen hi ei ta dinga tha em em el chu a nih. A bul ei hang tan lai khan chu ei ri a tha a, a thothang khawm a tha a, ei thangruolna khawm kha a tha tawk hle. Amiruokchu, hun a hung fe pei a, a ni telin ei thothang thatna le ei thangruolna hai chu a hung re tiel tiel a, ei dit dan le ei ngaidan hai a hung inang naw deu deu a, tulai taka ei ngirhmun lem hi chu a thanaw hle niin an lang. Inthuruol neka inthuruolnawna tienga hma ei sawn hi a pawi a, ei kumkhuo chatvaina ding hung ni pal hlau a tih ti hi inlau um takel a nih. Inthuruol hi hratna le hlawtlingna a nih ti a thar taka ahrie a, inthuruolna lampui zui dinga thang ei lak nuom a um hle.
Mipuihai inthuruolna, inzawmkhawmna le intelkhawmna chu ek tliek zo lo khawpa a hrat le a khau phawt chun ei thil dit le ngen hin umzie tha tak hung nei a ta, ra tha le ditum tak el, thil iemani bek chu a hung rasuok beisei a um. Thingher nghet taka khitkhawm ang ni lo, indul le infawk deu dura khitkhawm anga ei um chun awlsam taka thedar le ek tliek in ei um ding a nih. Assembly election hun a hung hnai nawk ta a, sum le pai hung inleng chum chum nawk a ta, chu huna chun iem ei chang ding ti khawm hi ngaituo um takel a nih. Ei boycott hai kha ei la boycott ngam zing dim, annawleh an hma bulah sum dit leiin ei bawkkhup nawk el dim maw? Mitin inennawn le inbi chieng a hun. Patling le nutling taka um a tha. Mani phingpui hmakhuo ding chau en lova ei hnam hmakhuo ding en a thang ngam tlat ding ei nih.
Mimalah, khawtlangah, ram le hnamah, a thangruol thiem thiem an ngirsuok hlak, chu chu khawvela mitin hriet a nih. Nisienlakhawm, chu thil chu hrie zing sia thangruol thei chuong lo an um a, chuonghai lai chun Manipura Zohnathlakhai hi thang ve pal ei tih ti hi titthawng um takel a nih. Hnam thangruol thiem chu hnam vangnei, hnam inhnarum, hnam inzaum le hnam danghai bel an ni hlak. Zohnathlakhai hi mihai beltlaka ei um theina ding chun ei thangruol thiem a tul. Hnam tinin sutkieng ngai harsatna ei nei seng a, chu harsatna sutkieng thei hai chu hnam inthuruol an nih. Mani hnam harsatna sutkieng zo lo hai chu mihai sirdein an um hlak. Chuongang hnam chu ei ni nawna dinga ei thangruol hi a pawimaw a nih.
Thangruol thei hnam ei nizie chu ei bul tan laia ei um dan le ei chet dan haia inthawk khan an lang chieng tawk hle. Thangruol theilo hnam ni inla chu khang hun lai khan ralkanga inthawk ei inthlir liem el ding a nih. Ei tum phawt chun thangruol thiem em em ei ni leiin tuta intahwk hin thangruol dinga hma ei lak nawk sau sau nuom a um. Ei hnamin a mamaw hi tosan el ding a ni nawh. Ei hnamin a mamaw tam tak a nei hai lai tulai taka ding chun thangruol hi a pawimaw zuol bik a nih.
Ei ram le hnam a him naw chun mimal, kohran le khawtlang khawm him bik chuong naw nih. Hi lei in kei ni chu ram le hnam thila inrawl chi kan ni nawh ti thei ding ei um nawh. Hi lei hin ei ram le hnam humhalna kawnga hin ei thangruol seng ding a nih. Mi tam takin ram le hnam chu Politics chauva hmangai thei niin an ngai a, hi ngaidan hi an dik tak pa a ni ring a um nawh. Kohran pawl tum tum hai khawma ram le hnam humhalna kawngah hin mawphurna an nei a, an mawphurna chu an thaw ve ding a nih.
CCPUR: Zani 11:00AM khan District Council Hall, Tuibuongah District Boundary le inzawmin Mr Langkhanpau Guite, Chairman, ADCC inrawinain ADC/CCPur le Village Chief han joint consultative meeting an nei. Village Chief tienga inthawk United Chief Committee (UCC), All Tribal Chief Forum Manipur le Thangting Area Chief Assn. a member khuo lal 32 an thang.
Mr Genneikhup, EM, ADCC chun, Army le BSF hai anga Lal han ram le leilung an venghimna leia District Boundary humhal theia um a ni thu. Manipur Assembly in Aug. 31, 2015 nia Bills 3 an passed hai JAC, JPO le student bodies hai ta dinga passed ni lovin Lal hai ta dinga passed a nih tiin a hril.
Thil pawi tak chu KukiNaga conflict le ADC kum 20 defunct a ni sunga Manipur sawrkarin hill district ram lak dinga plan& policy a lo siem, directa a lak theinaw leia Police jurisdiction ang zawnga ram lak a hung tan hi a nih tiin a hril bawk. Manipurin kum 1972 a statehood a hmu hma 1971 khan Article 371C hnuoiah ADC indin in a um a, sienkhawm vawisun chen hin power pek an la ni naw a, 6th Scheduled hnuoia ti lo Article 371 C ah tribal hai himna ding a um nawh. Assembly bill vawikhat passed hi hmang nghal a ninaw khawmin kum 30/40 hnunga hmang thei, kum 40 liemtaa Jammu & Kashmir Assembly in bawngsa zawr pha lo dinga bill a pass tuhin hmang a hung ni a, muslim tamna nisien khawm bawng that khap a hung nitah tiin a hril a, hi thua hin Bills 3 hai tha taka en a, dodal dingin Lal hai a ngen. Hmang nghal ninaw sienkhawm ei tu le te hai thanga hmangin a hung um ding a nih tiin a hril.
Shillong highway intep tak sawrkarin keklien a nuom khawma a thaw thei nawna san chu 6th Schedule hnuoia an um lei a ni thu; Politicians han tlangmi hai ta dinga Bills 3 han harsatna an tlunnaw ding thu an hrilna thuah Justice T.Vaiphei, Acting Chief Justice Guwahati High Court in tlangmi hai a tawk ngei zie, hidden agenda tam tak a um nia a hril thu le Politician hai thuhril mak a ti thu a hrillang bawk.
United Chief Committee a representative hai chun, Kangvai areaa Police station 1 sie dinga Minister Phungzathang, T. Manga Vaiphei le T.N. Haokip kuoma an ngenna MLA han ngaisak lovin Phoubakchau a Police station sie a ni thu an hril.Thangting PartI Chief Assn. President chun, Samulamlan Block chu boundary thua buoi um na tak a ni thu a hril.
Thangginlun Haokip, Chief of Bijang Tampak chun, Demarcation felnaw leiin Bijang Tampak khawm CCPur Districta um a ni lai zingin Police Station Moirang, SubDivision hnuoia um, TD Blockah Samulamlan hnuoia um le Postal station Moirang, Revenue Bishnupur District hnuoia um a ni thu hrilin ama ngei khawm a buoi hle niin a hril.
Hmar Inpui General Assembly vawisun tan ding
CCPUR: Kum 2015a lo rel ta angin Inpui (HI) 8th General Assembly chu Feb. 1213, 2016 haia hin VTI, Rengkai, Churachandpur hmuna nei ning a tih. Mizoram, Cachar, NC Hills, Tripura, Meghalaya le Guwahati haia inthawk palai (delegates) hai chu Feb. 12, 2016 hin hung tlung tawl an tih. AntiTribal movement le inzawma bandh kotu hai chu Assembly palai hai zalen taka an inlawn phal pek dingin Hmar Inpui GHQ chun ngenna a siem.
Assembly rorelna Feb. 12, 2016, 11:00AM hin tan ning a ta, hi hma zing dar 10:30 in Flag keipharna hun hmang ning a tih.
Bandh puong thuah Magistrate in L&O enkaitu ding a ruot
CCPUR: Tribal Martyrs hai ruong Feb. 13, 2016 nia vui dinga UPF/KNO in thutlukna an siem ni a, KNO President in zani hmasaa KKL Complexa Joint meeting huna a puong le inzawma Martyrs hai ruong vui la remti lo Pawl tum tum han Feb. 11, 2016 zanrila inthawk Feb. 12, 2016 zanril chen CCPur khawpui sunga total shutdown/bandh thaw an tum le inzawmin District Magistrate chun zanikhan Order insuoin Law and Order enkawitu dingin mi 5 a ruot a. Chuonghai chu Dist. Hospital Chiengkawnpangah Lalsuong Gangte; Police stationLighthouse LaneSangremsiama; Nehru Marg Junction Shri Damu Singh; DC’s Office Complex Lalthanzam Fimate le Forest Gate, Tuibuong areaah Jangminlun Lupho hai an nih.
MicroEntreprise Devpt. Training tan
CCPUR: Zani 10:00AM khan EAC Training Centre, Rengkai Roadah Relief & Development EAC huoihawtna le NABARD Regional Office sponsorednain ni 13 aw ding Micro Enterprise Development Training tan a nih. Training hi Pu Lal Hossan, Vice Chairman, ADCC in khuolliena thangin a hawng a, Chief host in N. Hauzel, LDMSBI le Guest of honour in Thangchinkhup Guite, DDM/NABARD hai an thang.
Pu Lal Hossan chun, Piggery le Poultry hai hi project/scheme tenau ni lo, capital tam tak tulna a ni leiin hieng tiengpang lunglut hai ta dinga training nei a pawimaw thu a hril. Vawksa le Arsa fa ei tam leiin demand an sang leiin sungkhuo chawmnaa hmang thei a ni thu a hril bawk.
Training hi Feb. 25, 2016 chen aw ding a ni a, SHG le pawl tum tum training a hin an thang a, zanita technical session a chun Thangchinkhup Guite le N. Hauzel han thupui tum tum hmangin training an pek.
Hlawtling lawmpuina an buotsai
CCPUR: Feb. 15, 2016, 11:00AM khin Saipum Public Groundah Hlawtling lawmpuina le Pathien kuoma lawmthu hrilna hun hmang ning a ta, hi huna hin LM Khaute, IPS, DGP (Manipur); N.Neihsial, IDAS, Addl Controller General, Defence Account; GK Chin Khaute, IP &TS, Finance Adviser, NEC le C.Lalrammuana, IPS (retd), Member of MPCS Mizoram hai thang an ta, thuhrilna hun h mang bawk an tih. Zantieng lawmna ruoi kiltlang an tih.
Lok Adalat nei hun ding sawn
CCPUR: Feb. 13, 2016 a Chief Judicial Magistrate Court, CCPur a Lok Adalat nei dinga ti chu Law & Order ngirhmun thatnaw leiin March 12, 2016 a nei lem dinga a hun sawn hlat a nih tiin Secretary, Churachandpur Legal Service Authority thusuok chun a hril.
David Headley in Ishrat Jehan LashkareTaiba (LeT) a nih tiin zanikhan a hril
NEW DELHI: Kum 2008a Pakistan terrorist hai Mumbai khawpuia an chetna le inrawlna neia intum le man, tuta US a hrentang mek David Headley chu zanikhan US a hmun pakhata inthawk Video conferencing fethlengin Mumbai Special Court hmaah inlangtir nawk a nih. David Headley chun Ishat Jehan kha LashkareTaiba (Let) operative a nih tiin a hril. Ishrat Jahan kha kum 2004a fake encountera intuma midang pathum hai le Gujarat hmuna kap hlum an nih.
Headley chun LeTah women’s wing an um ngei thu, chu taka incharge chu Abu Aiman Mazhar a ni thu a hril bakah LeT in Naval wing khawm an nei thu, Sajit Mir hmaa Naval winga an hotu tak chu Muzammil Bhatt a ni thu; mi pakhat Abu Dujata in Muzzammil an hmelhriettir thu le a hnungin India rama Kashmirah inzinin Dujata le Muzzamil hai hi an hmupui thu Headley hin a hril bawk. October 12, 18 le 30, 2016 hai khan Mumbaia Reliance webworlda lutin idimmigration.usa hmangin internet a hmang thu hrilin a signature khawm entry bookah a um thu, kum 20062009 inkar India rama a um sungin mobile number hran 23 a hmang thu a hril bawk.
Ishrat Jahan le midang 3 kap hluma an umna Congress in fake encounter a nih tia intumna an lo siem thuah BJP chun Congress leader Sonia Gandhi le Rahul Gandhi hai chu ngaidam inhni dingin an phut. BJP party secretary Shrikant Sharma chun, kha huna Gujarat CM Modi that an tum lei le Gujarat statea sakhuona hmun hai bei an tum leia Police hai le inkaptuonaa Ishrat Jehan le midang 3 hai kha kap hlum an nih tiin zanikhan reporters hai kuoma a hril. Security Agencies hai chun Ishrat Jehan kha terrorist a nih tiin hril hai sienkhawm kha huna UPA sawrkar chun hre nuom lovin investigative agencies hmang suolin politics thila keilutin Modi le BJP beinaain an hmang a nih tiin Mr Sharma chun an tum. Hieng laizing hin Congress chun Headley inpuongna chu suizui dingin an ngen ve.
Headley hin zani Thawtanni le Thawleni haia video Conference fethlenga Mumbai special court hmaa inlangtir a ni hunah LeT hai Mumbaia an chet ding kha Pakistan Intelligence agency ISI le Pakistan Army hai khawma hrietpuiin an thlawp niin a lo puong ta bawk a nih.
A let hnia damnaw khum belsa
IMPHAL: Tlangram biela damnawhai ta dinga thil remchang lem a hung ni theina dingin District Hospital haiah damnaw khum umzat chu a let hni peia belsa ning a ta, Kangpokpi le Moreh Hospital haia khawm damnaw khum 50 ve ve sie ni tang a tih tiin zanita Health Minister, Phungzathang Tonsing in District Hospital fai tak lawmman a sem huna a hril. District Hospital fai tak lawmman Rs. 50 lakh chu District Hospital, CCPur in a dawng a, Commendation Certificate District Hospital Thoubal in a dawng a, hi taka hin sumfai Rs. 3,00,000 a thangsa.
Nuhmei suolluitu mi 2 observatory homeah
IMPHAL: Ngairangbam Loukon, Imphal West District a nuhmei suolluitua intum pasal 3 mana um hai chu zanikhan District Session Courtah inlangtir an ni a, an rengin kum tlinglo an ni a, mi 3 hai laia pakhat baila insuo le pahnihai chu Observatory Homeah sielut an nih.
Hun tiemchin u m lo total blockade
IMPHAL: Jiribam District Demand Committee (JDDC) chun ni 5 sung Economic Blockade an thaw zo hnung khawma an thil ngen ngaisak a ninaw chun NH37 (ImphalJiribam Road) ah hun tiemchin um lo total blockade an thaw ding thu an hril. District puitling ngennain ni 5 sung aw ding economic Blockade zani hmasa zanrila inthawk khan JDDC chun an lo thaw tan ta a nih.
Feb. 16 a inthawk inchuknainhai khar
JIRIBAM: Jiri College fullfledged Government College a hlangkai ding an ngenna State sawrkarin a supuitling peknaw leia lungawi lo le an thil ngen nawrnain Feb. 16, 2016 a inthawk khin Jiribam SubDivision huop sunga inchuknainhai po po khar tan an tum thu AMSU, District Committee, Jiribam, DESAM Local Council, Jiribam le KSA Jiribam District han thusuok an siem.
Jashodaben in RTI a file
AHMEDABAD: Prime Minister Narendra Modi nuhmei Jashodaben chun Gujarat Chief Minister a ni laia passporta apply naah a nuhmei neina (marriage related) documents a peklut ti chipchier taka pe dingin Regional Passport officeah RTI application a pek. Nikum November thlaa passport a ngen hunah PM Modi le an innei ngei ti finfiena marriage certificate annawleh Joint Affidavit a peklut theinaw leia a passport ngenna hnawl pek a ni leia RTI hi passport officea a file a nih. A application dawnna sawtnaw te hnunga pek a ni ding thu regional passport Officer ZA Khan chun a hril. Modi hin kum 2014 Lok Sabha election huna affidavit a peklut hunah Jashodaben hi a nuhmei nia a zieklanga inthawk Modi hi nuhmei lo nei ta a nih ti hrieta hung um chau a nih. Modi le Jashodaben hi innei chu an innei ngei a, sienkhawm um hmunkhat lo an nih.
Hanamanthappa a thi tah
NEW DELHI: Siachen Glaciera vur intawl leia India sipai 10 vur in a vur khum hai laia hring le dama sansuok Lance Naik Hanamanthappa Koppad chu zani 11:45AM khan Army Research and Referral Hospital, New Delhi hmuna a thi tah. Hanamanthapa hi hmu sansuok a ni hlim chun khawmuol a la hriet a, sienkhawm a ngirhmun hung se deu deuin, zani hmasaa inthawka kha a ngirhmun hi hung derthawng zuol a nih. L/N Hanamanthappa hi vur intawlin a vur khum ni 6 hnunga dama sansuok a nih.
Hanamanthappa hi a hung damsuok nawk theina dingin an taksa bung hieng Kal, Thin le a dang dang mamaw a nei chun a thlawna pek an inuom thu Mrs Nidhi pandey, Lakhimpur Kheri, Uttar Pradesh le Mumbaia um exNavy Sailor S.S. Raju hai chun zani hmasa khan an lo puong a nih.
Hanamanthapa (33) hin a nuhmei Mahadevi Ashok Bilebal bakah kum 2a upa nau nuhmei Netra Koppad a thisan.
SHAIDC in Election huoihawt dingin an ngen
AIZAWL: Sinlung Hills Accord Implementation Demand Committee (SHAIDC) chun February 10, 2016 khan Mizoram Chief Minister kuomah, SHDC election an rang thei anga huoihawt dinga an ngenna lekha an peklut.
SHAIDC chun an ngenna hi February 27, 2016 hma ngeia sukpuitling dingin Mizoram CM an ngen a, tuta inthawk thlakhat sunga assuarance an hmunaw chun High Courtah an khing ding thu an hril bawk. SHAIDC chun, Mizoram sawrkar le HPC in July 27, 1994a inremna thuthlung an ziek a inthawk kum 22 an vawi hnung khawma vawisun chena Accord sukpuitling a la ninaw chu pawi an ti thu; Mizoram sawrkarin Sep. 26, 2013a notification an suo dungzuia SHDC chu mimal kutah thuneina sie ta lova, an rang thei anga election buotsai dingin Mizoram CM an ngen bawk a nih. An ngenna lekhaa hin SHAIDC Chairman Vanlalsiama le Secretary Lalparkunga hanhming an ziek. (Virthli)
NCHAC Spl. Session nei; Hojai peithlak
HAFLONG: NC Hills Autonomous Council (NCHAC)a rorelna cheltu BJP inhning leia Congress in majority an claim le inzawma Assam Governor in No Confidence Motion/ Special Session nei dinga a lo ko ta angin February 11, 2016, 10AM khan Pu Ngamrothang Hmar, Chairman, NCHAC inrawina in ‘No confidence motion’/special session nei a nih. Hi huna hin Chief Executive Member ni lai Pu Niranjan Hojai chun hratna a changzo tanaw leiin NCHAC Executive bodya inthawk peithlak a nih. Sixth Schedule (as per Indian constitution ) dungzuiin darkar 48 sung ngeia Chief Executive Member ding thlangna nei ding ti a ni a, hi le inzawm hin Feb. 13, 2016, 9AM khin NCHAC Chairman inrawinain CEM thar ding thlangna Council Session Hallah nei ning a tih. (Virthli)
Sakei in pasal pakhat a se hlum
LAKHIMPUR: Zanikhan Kheri division huop sunga Salempur, Mailani range ramhnuoiah Sakei in pasal kum 50 mi Raees chu a se hlum niin Divisional Forest officer Neeraj Kumar chun a hril. DFO chun Raees sunghai kuomah zangnadawmna Rs. 10,000 pek dingin a puong bakah dan dungzuia zangnadawmna pek an ni theina dinga hma a lakpui ding thu a hril.
Albendazole fak leiin naupang 200 an damnaw pha
NEW DELHI: February 10, 2016 nia National Deworming day hmang le inzawma Union Health Ministry huoihawtnaa India ram pumpuia naupang hai kuoma Rulrukut damdawi (albendazole) infaktirna runpui nei a ni tum khan naupang 200 chuong ding zet chu an damdawi fak leiin an damnaw pha nia hril a nih. Madhya Pradesh le Haryana haia chun naupang thenkhat an inluok a, thenkhat an phing a na a, thenkhat khaw hre lovin an um a hril a nih. Naupang thenkhat hospitala admit an ni a, sienkhawmzantieng huna insuoktir nawk vawng nghal an nih.
Mobile Towers 1,357 inthut ding
NEW DELHI: Sawrkarthlungpui chun Maoist helpawlhai hratna Chhattishgarh, Jharkhand, Odisha, Bihar, West Bengal le Maharashtra state haiah Mobile towers 1,356 an din tah. March, 2016 thla tawp chena sawrkar chun hieng states 9 haia hin Mobile tower 2,199 indin dingin project a siem a nih. Hi thila sum seng dinga riruong chu Rs. 3,046 crore a nih. Mobile Tower indinna sin hi BSNL in an thaw a nih. Tulai hnai khan Union Home Ministry chun mobile tower 175 indin belsa dingin remtina a nei a, mobile towerhai hi Police Stations or camps le paramilitary forces camps/post haiah indin dinga ti a nih.
India rama Australia palai dingin Sindhu
MELBOURNE: Indian origin Harinder Sindhu chu Australia sawrkarin India rama a palai (High Commissioner to India) dingin zanikhan a ruot. Sindhu hi India rama pieng, naupang a ni laia a sunghai le Australia rama inpem an nih. Tuta India rama Australia High Comissioner ni lai mek Patrick Suckling a hmun a hung hluo ding a nih. Sindhu hi Department of Foreign Affairs and Trade bakah First Assistant Secretary of Multilateral Policy division hai lo chel tah; Moscow le Damascus haia Australia ram palai sin lo thaw ta a ni bawk. University of Sydneya Bachelor of Laws le Bachelor of Economics degree la a nih.
US in Pak. kuoma thangpuina $ 860 million
WASHINGTON: Barack Obama President nina hnuoia US sawrkar chun Pakistan thangpuina dingin USD 860 million pek dingin riruong a siem a, hi laia USD 265 milion chu military tiengpanga hmang dinga ti a nih. Sum hmangna ding danghai chu helpawlhai dona ding, nuclear ralthuom venghimna ding le India ram le inlaichinna siem thatna ding tihai a nih.
----------------------------------------------------------------------------------------------------------------
VAWISUN THUPUI
Lalpain, ‘Van ka thungpha a na, Hnuoi ka kepha innghatna a nih; In ieng angin am mi bawlpek in ta? Ka chawlna hmun khawm iengang am a na? Keia kutin hieng thil iengkim hi ka siem naw am a nih? a tih, ti ziek ang khan. ~ Thilthawhai 7:4950
Editorial
Thangruol hi
Thuvar inlar em em el, “Thangruol hratna a nih” ti hi an dikzie hre inlakhawm, thangruol hi thil harsa tak a ni a, thangruol naw leia sietna, buoina le harsatna tlung hi hril ding tam tak a nih.Thingher pakhat le thingher intelkhawm tekhin thu hrie kur si hin, intelkhawm le thangruol chu harsa ei ti a, ei thangruol nawzie chu ei um dan le ei thu hril haia inthawk hin an lang chieng khawp el. Thangruol thei ni inla chu tuta ei ngirhmun ang chau hin chu um ta nawng ei ta, hmasawn ei ta, ngirhmun pangngaiah um ta lovin ngirhmun thar le insang lemah chuongkai ngei ngei tang ei tih. Ei thangruol naw leiin hmasawn nekin ei hnung sawn lem niin an lang. Chik taka ei ngaituo chun ei hmakhuo ding hi an thim hle niin an lang.
Ei thil dit le ngen hi ei ta dinga tha em em el chu a nih. A bul ei hang tan lai khan chu ei ri a tha a, a thothang khawm a tha a, ei thangruolna khawm kha a tha tawk hle. Amiruokchu, hun a hung fe pei a, a ni telin ei thothang thatna le ei thangruolna hai chu a hung re tiel tiel a, ei dit dan le ei ngaidan hai a hung inang naw deu deu a, tulai taka ei ngirhmun lem hi chu a thanaw hle niin an lang. Inthuruol neka inthuruolnawna tienga hma ei sawn hi a pawi a, ei kumkhuo chatvaina ding hung ni pal hlau a tih ti hi inlau um takel a nih. Inthuruol hi hratna le hlawtlingna a nih ti a thar taka ahrie a, inthuruolna lampui zui dinga thang ei lak nuom a um hle.
Mipuihai inthuruolna, inzawmkhawmna le intelkhawmna chu ek tliek zo lo khawpa a hrat le a khau phawt chun ei thil dit le ngen hin umzie tha tak hung nei a ta, ra tha le ditum tak el, thil iemani bek chu a hung rasuok beisei a um. Thingher nghet taka khitkhawm ang ni lo, indul le infawk deu dura khitkhawm anga ei um chun awlsam taka thedar le ek tliek in ei um ding a nih. Assembly election hun a hung hnai nawk ta a, sum le pai hung inleng chum chum nawk a ta, chu huna chun iem ei chang ding ti khawm hi ngaituo um takel a nih. Ei boycott hai kha ei la boycott ngam zing dim, annawleh an hma bulah sum dit leiin ei bawkkhup nawk el dim maw? Mitin inennawn le inbi chieng a hun. Patling le nutling taka um a tha. Mani phingpui hmakhuo ding chau en lova ei hnam hmakhuo ding en a thang ngam tlat ding ei nih.
Mimalah, khawtlangah, ram le hnamah, a thangruol thiem thiem an ngirsuok hlak, chu chu khawvela mitin hriet a nih. Nisienlakhawm, chu thil chu hrie zing sia thangruol thei chuong lo an um a, chuonghai lai chun Manipura Zohnathlakhai hi thang ve pal ei tih ti hi titthawng um takel a nih. Hnam thangruol thiem chu hnam vangnei, hnam inhnarum, hnam inzaum le hnam danghai bel an ni hlak. Zohnathlakhai hi mihai beltlaka ei um theina ding chun ei thangruol thiem a tul. Hnam tinin sutkieng ngai harsatna ei nei seng a, chu harsatna sutkieng thei hai chu hnam inthuruol an nih. Mani hnam harsatna sutkieng zo lo hai chu mihai sirdein an um hlak. Chuongang hnam chu ei ni nawna dinga ei thangruol hi a pawimaw a nih.
Thangruol thei hnam ei nizie chu ei bul tan laia ei um dan le ei chet dan haia inthawk khan an lang chieng tawk hle. Thangruol theilo hnam ni inla chu khang hun lai khan ralkanga inthawk ei inthlir liem el ding a nih. Ei tum phawt chun thangruol thiem em em ei ni leiin tuta intahwk hin thangruol dinga hma ei lak nawk sau sau nuom a um. Ei hnamin a mamaw hi tosan el ding a ni nawh. Ei hnamin a mamaw tam tak a nei hai lai tulai taka ding chun thangruol hi a pawimaw zuol bik a nih.
Ei ram le hnam a him naw chun mimal, kohran le khawtlang khawm him bik chuong naw nih. Hi lei in kei ni chu ram le hnam thila inrawl chi kan ni nawh ti thei ding ei um nawh. Hi lei hin ei ram le hnam humhalna kawnga hin ei thangruol seng ding a nih. Mi tam takin ram le hnam chu Politics chauva hmangai thei niin an ngai a, hi ngaidan hi an dik tak pa a ni ring a um nawh. Kohran pawl tum tum hai khawma ram le hnam humhalna kawngah hin mawphurna an nei a, an mawphurna chu an thaw ve ding a nih.
