JT. HMAR LITERATURE SOCIETY
INKHAWMPUI HMASATAKA ṬHANG DINGA
HMAR MIPUIHAI KUOMA NGENNA
November 07, 2014
Hung tlung ding November 18-19, 2014 (Thawleni le Nilaini) khin, Assam, Manipur, Mizoram le Meghalaya State haia Hmar Literature Society hai inkhawmpui hmasatak, Rengkai Community Hall, Rengkai, Churachandpur, Manipurah a um ding a ni a. Chu huna chun, Hmarsak State 4-a Hmar Literature Society-hai hmalâk pei dàn ding rel a ni ding a nih. Rorelna chu November 18, chawhma dar 10 le chawhnung dar 2 inkàrah um a t’a. November 19, chawhma dâr 10 le chawhnung dâr 3 inkarah Hmar ṭawng le Hmar Literature hmasàwn dàn ding thuah Seminar a um ding a nih. Chu huna chun Hmar Inpui, HYA, HSA le Hmar Women’s Associationa ṭhuoituhaiin thuhril tawi hun chang seng an tih.
Ei ṭawng le ei Literature-in hi nêka hmâ a sàwn hràt lem theina dinga thurâwn le ngaidàn ṭha nei taphawt chun, zalen tak le intîm dêr lova, thu an hril theina hun a um ding a nih. Literature hi mipui ta a ni a, mipuiin mipui ta dinga an siem a nih ti hre zing a, ei Literature, sukphuisui le sukhmasâwn a ni theina ding a, i hun hlu tak hung inhlàn ve dingin, Jt. Hmar Literature Society hminga ngen tak meu meuva ngèn i nih. Ràlkânga ngaidàn hril nêkin, a hmun le mipui pungkhàwmhai hmâ ngei a, i ngaidàn ṭha tak takhai hung phawrlang dinga beisei i nih. Ei ṭawngin hliempui a tuok a. Sukdam ding le thawi dam dingin, tu dang khawm hung naw’ng an tih. Nang le keiin ei ṭawng ei hum ngam naw a, ei humzo naw a ni chun, tûkhawm intum thei naw mei nih. Mipui ṭhang naw chun, Literature Society hin iengkhawm a thaw thei naw a, iengkhawm a ni thei bawk nawh. E ṭawng ta dinga thawthei pakhat ei nei seng a.
Chu chu November 19, 2014 (Ninlaini) chawhma dar 10 le chawhnung dar 3 inkàr, Rengkai Community Hallah fekhâwm a, ei ṭawng (Hmar ṭawng) ei hmangaina, a hmêlhem ding ei phalnawna le hmâ sawn pei sien ei nuomna suklang chu a nih. Nangin i thlawp sùng chu, Literature Society ṭhuoituhai hi, tlânsein zâm ngai naw ni hai. Nang chen khawm i thlawp ngam ta naw ruok chun, Literature Society ṭhuoitua ṭhang ngam um ta naw ni hai. Literature Society ṭhuoituhai hi mipui siehlaw an ni a. Tuisik bàk chu, ieng dang khawm hmathe ding an nei ve nawh. Hnam hmangaitu naw chu, tûkhawm an fiel ngam bawk nawh.
I ṭawng I hmangai chun hung ṭhang ngei dingin insiem la. Ruol pakhat bèk hung ṭhuoisa tum bawk rawh. I hung chun Hmar Literature Society hin thlawptu a la nei a nih ti hrie’ng a t’a. Hnam ta dingin, theitâwp suo zuol pei a tih.
Jt. HLS Coordination Committee aiin,
Sd/-
Upa Dr. VL Bapui
Chairman
Sd/- L.Ruoivel Pangamte
Secretary
Co-ordination Committee Jt. Hmar Literature Society
