Tulaia ei hnam, hnam dang haiin an hmusit em em hi, inhawih naw chu ei ti seng ka ring, a san lientak chu eiin thuruol naw lei a nih. Hi hi mi tuel khawmin eiin phat ngam ka ring nawh. Ei inthuruol nawna san chu ieng lei am ei ti chun, a bulpui tak chu Kohran inṭhena, doctrine le ei Pathien ring dan inang char siin mimal duamna leiin sukṭhein ei lo um lem tah a nih.
Hi Kohran inṭhenain a ra suok hmasa tak chu, unau thisen inzawmpui ngei ngei chunga thisen insuo ngamna, intheidana, etc., hai hi an nih. Sungkuo thila inhmu khawmna ei nei chang khawm, thlaithleng ei awt hmunkhat thei naw chang khawm a tam, kohrana inthenna leiin.
Hi inṭhena le inngei nawna hin ei social life nasa tak in a suksiet, a tak taka inthuroul thei nawna nasa takin a siem. Imphal mithi an um chang, an naw leh social meeting, gathering thaw chang khawm, a ieng korana inkhawm in am siet a tuok, a ieng kohran inkhawm hin am hi social gathering a leardership nina a lak ti hi, mi mawltak khawm a, ei zuk hrietin ei hmu nghal thei.
Chulei chun ei political activity hai khawm a hrat thei ta naw a, nasatakin hnam dang hai a inthawk discrimination, inhmusitna ei hung tuok tung ta pei a. Ei unau Paite le a dang dang hai hi, kumsawm hmain chuong bek beka hnam inza um le ngaisang an hlaw ngai naw. Chu nek hmanin, Christian ei lo ni hmasa lemna leiin, einia inthawk Chanchinṭhahai dawngin, ei hla tamtak hai khawm an ṭawnga inletin a um.
Sienkhawm, kohran inṭhena ei hung tawnga inthawk khan, politically, economically, activity tak tak hi a hnam pumin nei thei a hung ni ta naw, mimal tam tak chun an hlawkpui, ei thilthaw ta popo haihi a kohran bingin a hung fe ta vawnga, khohran pakhat hlawkna chu, pakhat ta dinga natna, thikna ṭhalo siemtu. Ka unau pakhat in kohran danga sawma pakhat va pe sien, keiin a danga, kei ka sawma pakhat pek chu a hringa, ka unau ka dit naw hai kohrana sawma pakhat a va pek ruok chu a thi, ti ngaidan hiel nei khawm ei tam.
Hi factor lei hin sawt khawm ṭul lovin, ei unau hnam danga inthawk harsatna, hmusitna le kawng dang dang discrimination tam tak ei hung hmasawn a, chu beidawng chun, inthuruolna chi khat hung ra suok a, chu ra suok chun political movement pakhat a hung hring suoka ralthuomhai chen chawi ngamin nasa takin hma ei lak tlang a, a daltu tlawmte umhai sien khawm. Khanglai khan kei chu naupang chite chau ni lang khawm, kha political party leia hnam dangin an mi ṭi or inzana bourouk kha ka lo intem phak ve. Sienkhawm hi political party/movement hi, kohran daia inthawk an thir fihlim thei tak tak chuong naw, chu nek hman hman chun, a kohran ṭhuoitu hai hai kha, hungin rawl luta, a hma latu lai a pawimaw ni nuom in ṭhang nasa tak an hung lak ti kha mitin in ei inphat ngam ka ring naw.
Hi political party hi Hmar popo inpumkhat a ei um theina plateform pakhat ei nei sun kha a ni hrim a, amiruok chu, hi platform ei beiseina popo ei sina le ei neisun chu, chupa, khapa in a nuom nuom a a hmang thei, annawleh chuonghai kohranin an chawm ti thei ding khawpin a hung danglam ta ani… Iengangin hma lain, silaihai chawiin inhro sa inla khawm ei hmelma do anga eiin ngai lai zingin, eini le eini inkap le inthatna naw chu ei thawsuok thei ding umin an lang ta naw. Ei nuorna suk langa SHDC a inhnuk dawk ei in sawn zing lai in, a hung hlu nawk tu chu ei unau ngei ngei hai tho. Mi hmusit tu zukdo tum reng reng inla khawm ani hai le inkhing hma a eiin khingpui ngei ngei dinghai chu, ei Hmar unau chanpui hai tho, anni hai zukdem na ding san bik khawm ka hriet nawh, anni hma ei um dan hai kha an dik bik chuong naw, a hnam pum ta niding ni awmtak a kohran, mi mal in an ta bik anga an nuom nuom a an hmang mei mei thei, hmelma zuk do nading hmun a um ta naw. Vaak dum a vungsuok ruol ruol in, ei beisei nahai khawm chu boruok lai a thamral naw ti thei an naw.
