[/caption]Aizawl, 28 May, 2012: Home Minister, R.Lalzirliana chun sawrkarin khawlai biel a khawm Autonomous District Council pek tumna a nei nawh ti thu a hril a,“Mi thenkhat kawmaw tlawmte um hai thilthaw lei hin hnam bik anga tukhawm a hrana en ding ani nawh" a ti bawk.
Home Minister chun, Mizoram sawrkar chun Autonomous District Council amanih, hiengang thil ngentu hai reng reng a thlawp tum nawh thu a hril bawk. Khawlai biel khawm nisien sawrkarin Autonomous District Council pek tumna a nei nawh niin a hrilsa bawk.
R.Lalzirliana chun, khawsak, khawthlang, sim le hmar ainthawka hung Mizo hnathlak hai, an tawng thluk a dang lei ringawt'n tukhawm innuisan ding a ni naw thu le Mizoram chu Mizo hai ta, thlamuong le him taka Mizo po po umna ding a ni thu hrilin, “Hi ram thedar tumtu hai chu a tutu khawm'n kan do ngam ding a nih,” a tih. Mizo hnamzie, tlawmngaina, mani neka upa inzana, thangpui ngaihai thangpuia,hmeithaile rethei hai ngaisaktu YMA chu Mizo mipui popo, party hrang hrang hril lova inlungruol le inngei taka an um khawmna a nih ti hrilin Home Minister chun, “Pawl thenkhat ruol'n YMA indin an khap hin sawrkar lungril a deng a, Mizo mipui hai lungril khawm a deng na hle a nih,” ti a hril.
R.Lalzirliana chun Mizoram sawrkar le mipui hai chawkbuoi zawnga khawsa lui tlat hai chu sawrkar'n ngaitheilo chin ala nei ngei ding thu a hrila, Mizo hnathlak hnam hrang hrang hai chu unau kan ni anga inngei tlang taka khawsa hi sawrkar'n a dittak a nih' thu a hril.
Karhmasak Zirtawpni-a Keifang Venglai Hall a hawngna-ah R.Lalzirliana chun thu hrilna a neina ah, India rama state ralmuong tak Mizoram a hin ralmuong taka mipui hai an um chu sawrkarin a dittak ti thu le hel tieng rawngkai reng reng mipuihai'n an thlawp a rem naw ti thu a hril bawk.
